ދިގު 47 އަހަރެވެ. މީހެއްގެ އުމުރުދުވަސް އެއްކޮށް ކަހަލަ ގޮތަކަށޭ ވެސް ބުނެވިދާނެ އެވެ. ދިވެހި ފިލްމީ ދާއިރާގެ ބައްޕަ ކަމަށް ބުނެވިދާނެއެވެ. ދިވެހި އަދަބިއްޔާތާއި ޅެންވެރިކަމުގެ ގުލްޝަނުގައިވެސް ވިދާ ރޯނުގޭ ޙަސަން މަނިކް މުނިއަވަސްފިލުވައިދިނުމުގައި އުޅުއްވާތާ މިމަހުގެ އެގާރައަށް މިވީ ސަތާޅީސް އަހަރެވެ.

ޕާފޯމިން އާޓްސްގެ ދާއިރާ އިން އާންމު ހިދުމަތުގެ އިނާމް ހާސިލުކުރައްވާފައިވުމުގެ އިތުރުން ފިލްމީ ދާއިރާއިން ޙަޔާާތީ އަރުތަ (ލައިފްޓައިމް އެޗީވްމެންޓް) އެވޯޑް ހާސިލުކުރައްވާފައިވެއެވެ. ފިލްމީ ދާއިރާގެ އިތުރުން ތަމްސީލު ކުޅުމުގައި ވެސް ޙަސަން އަކީ އަރާހުންނެވި ތަރިއެކެވެ. ދިވެހިބަހަށް މޮޅު، ޝާއިރެއްވެސް މެއެވެ.

މުނިއަވަސްފިލުވުމުގެ ދާއިރާއަށް ޙަސަން މަނިކް ވަދެވަޑައިގެންނެވި ގޮތް ދަންނަވައިލާނަމެވެ. ކަން ހިނގައިދިޔަ ގޮތް ކިޔައިދޭން މި ޖެހެނީ “ވަމުންދާ ގޮތް” އިސްޓޭޖް ޑްރާމާއާއި ހަމައިންނެވެ. އެއީ 11 ނޮވެމްބަރު 1977 ވަނަ އަހަރެވެ. ތަޢުލީމީ މަރުކަޒެއްގައި ހެޑްމާސްޓަރެއްގެ ގޮތުގައި މަސައްކަތް ކުރައްވަމުން ގެންދެވި ދުވަސްވަރެކެވެ. ޙަސަން މަނިކު ޕްރޮޑިއުސްކުރައްވައި، ކޯރިއޮގްރަފީކޮށް، މަރުކަޒުގެ ދަރިވަރުންކޮޅަކާއެކު ލީޑް ރޯލު ކުޅުއްވި އިސްޓޭޖް ޑްރާމާ “ވަމުންދާ ގޮތް” މިއީ ޙަސަން އެކްޓިންގެ ދާއިރާއަށް ވަދެވަޑައިގެންނެވި މުހިންމު ފިޔަވަޅެވެ. އެ ޑްރާމާ ބިނާކޮށްފައި އޮތީ ޒަމާނުއްސުރެން މާލޭގެ ބައެއް ފަރާތްތަކުން ‘ރާއްޖެތެރެ’އިން މާލެއަށް ކިޔަވަން ފައިބާ ކުދިންނާމެދު ގެންގުޅެމުން އަންނަ ތަފާތުކުރުމުގެ ސިޔާސަތުގެ މައްޗަށެވެ. އޭގެ ފަހުން ވެސް ތަފާތު ސްޓޭޖް ޑްރާމާތައް ޙަސަން ކުޅުއްވިއެވެ.

“ހުވާ” ސީރީޒްގައި ހަސަން ދައްކަމުން އަންނަނީ މޮޅު އެކްޓިންއެއް – ފޮޓޯ: ހުވާ ޓީމުން ނަހޫ

ފިލްމީ ދާއިރާއަކީ ހަސަން ކުރިއަށް ދިއުމަށް ވިސްނި ދާއިރާއެއް ނޫނެވެ. މި ދާއިރާއަށް ހަސަން ވެއްދެވީ މަރްހޫމް ސައިކުރާ އިބްރާހިމް ނައީމް އާއި ކަށިމާ ޝާކިރު އެވެ.

1980 ހިސާބުގައި އުފެއްދި ”ގެއްލުނު ފުރާވަރު“ ފިލްމަކީ ސްކްރިޕްޓަކަށް ދިވެހި ފިލްމެއް ތައްޔާރުކުރި ފުރަތަމަ ފިލްމު ކަމަށް ބުރަވެވެއެވެ. މި ފިލްމުގެ ބަޠަލެއްގެ ބައި ކުޅުނީ ހަސަން އެވެ. ސިނަމާތަކުގައި މި ފިލްމެއް ނާޅުވައެވެ. ޓެލެވިޛަން މޯޯލްޑިވްސް އިން މި ފިލްމު ދެއްކީ 13 ޖޫން 1980 ވަނަ ދުވަހުގެ ރޭގައެވެ.

“އެކަމަކު އެ ފިލްމަކީ ސްކްރީން ކުރި ފިލްމެއް ނޫން. ޓިކެޓް ވިއްކައިގެން މީހުން ބެލި ފިލްމެއް ނޫން. އެކަމަކު ޓީވީއެމް އިން އެ ފިލްމު ވެސް ދެއްކި. އަޅުގަނޑަށް ހީވަނީ 1980 ވަނަ އަހަރުހެން އެއީ،”

– ޙަސަން މަނިކް

ދިވެހި ސިނަމާގެ ފުރަތަމަ ބަތަލަކީ ރޯނު ހަސަން މަނިކު ކަމަށް ބުނާ ވާހަކައާ ބަޔަކު ޚިޔާލުތަފާތުވެފައި ވަނީ މި ސަބަބާ ހެދި ކަމަށް ބުނެ ވާހަކަ ދައްކަވަމުން ފާހަކުރައްވާފައިވެއެވެ.

ފިލްމު “ދޮންހިޔަލައާއި އަލިފުޅު”ގައި ހަސަން މަނިކް ސަންގު ފުމެއް – ފޮޓޯ: ރަން ޒަމާން އެފްބީ

ރޯނު ޙަސަން އަކީ ގިނަ ބަޔަކު އިއްތިފާޤްވާ ގޮތުން އެންމެ ‘ނެޗްރަލް’ ނުވަތަ ‘ރިއަލިޓީއާ’ އެންމެ ވައްތަރުކޮށް އެކްޓްކުރައްވާ ދިވެހި ފިލްމީ ތަރިއެކެވެ. އެކަން “ގެއްލުނު ފުރާވަރު” ފިލްމަށްފަހު ފިލްމު އުފައްދާ ފަރާތްތަކަށް ފާހަގަކުރެވި އެތަކެއް ފިލްމުތަކަކުން ފުރުޞަތު ދޭން ފެށިއެވެ. އެގޮތުން “ކަރުދާސް ފިނިފެންމާ” އަދި “ޒަހަރު ދިން އުފާ” ހިމެނެއެވެ. އެ ފިލްމަކީ އުފެއްދުމުގެ މަސައްކަތް ކުރިއަށް ނުދިޔަ ފިލްމެކެވެ. އޭގެ ފަހުން ‘ސީޑީއެސް’ ގްރޫޕުން ކުރިއަށް ގެންދިޔަ އިސްޓޭޖް ޑްރާމާ ކުޅުއްވުމާ ދިމާއަށް ހަސަން ޖެހިލެއްވިއެވެ. ދިވެހި މުނިއަވަސްފިލުވުމުގެ ދާއިރާގައި ފާހަގަކޮށްލެވޭ، ވިދާ ތަރިއަކަށް ޙަސަން ވެގެންދިޔައީ އެހިސާބުންނެވެ.

މުނިފޫހިފުލުވުމަށްް ކުރަައްވާ މަސައްކަތެއް ނަމަވެސް، ކުރައްވާ މަސައްކަތަށް ޙައްޤުވާ މިންވަރެއް ލިބޭ ގޮތަށް ޙަސަން ކުޅުއްވި ފުރަތަމަ ފިލްމަކީ ދިވެހި ފިލްމު “ޙައްޤު” އެވެ. ޔޫސުފް ރަފީޢު (ޔޫސޭ)ގެ ބުޚާރީ ފިލްމްސް އިން އުފައްދައި 1996 ވަނަ އަހަރު ރިލީޒްކުރި ފިލްމު “ޙައްޤު”ގައި ޙަސަން މަނިކު ފެނިގެންދިޔައީ އޭނާގެ ހަމައެކަނި ދަރިފުޅު އޭނާއާ ޚިޔާލުތަފާތުވާ އަންހެނަކާ ކައިވެނި ކުރަން މަޖުބޫރުކުރި ޝާހިދުގެ ބައްޕަ އަމްޖަދުގެ ރޯލުންނެވެ.

ފިލްމީ ދާއިރާގައި ޙަސަން މަނިކް ހޭދަކުރެއްވި ސަތާޅީސް އަހަރުގެ ވާހަކަތައް ދައްކައި ކޮޅުންލާކަށް ނެތެވެ. އެހެންވެ، މި ލިޔުން ކުރުކޮށްލުމަށް މިސްރާބުޖަހަމުން އަދިވެސް ދެތިން ކަމެއް ފާހަގަކޮށްލާނަމެވެ. މިއަދާއި ހަމައަށް ޙަސަން ކުޅުއްވި ފީޗާ ފިލްމުގެ ޢަދަދު އުޅެނީ 25 އަށް ވުރެވެސް މަތީގައެވެ. ޓީވީ ޑްރާމާ/ސީރީޒް ތަކުގެ އަދަދުވެސް ވިއްސަށްވުރެން މައްޗެވެ.

ޙަސަން އަށް ލިބިލައްވާފައިވާ ކާމިޔާބީތަކުގެ ތެރެއިން ފާހަގަކޮށްލެވެނީ:-

🏆 2008 ގައި ‘މިއަދު’ނޫހުން ބޭއްވި ދެވަނަ ކްރިސްޓަލް އެވޯޑްގައި ‘އެންމެ މޮޅު ބައްޕަގެ ރޯލް – ފިލްމު: “ވަގުތު ފާއިތުނުވަނީސް” އިން

🏆 2011 ގައި  ބޭއްވި ފުރަތަމަ ދިވެހި ފިލްމު އެވޯޑްގައި ‘ލައިފްޓައިމް އެޗީވްމެންޓް އެވޯޑް’

🏆 2012 ގައި ރައީސުލް ޖުމްހޫރިއްޔާ ދެއްވާ ހިތްވަރު ދިނުމުގެ ޤައުމީ އިނާމް ‘ޕަރފޯމިންގ އާޓްސްގެ ދާއިރާއިންނާއި ފިލްމާއި ތަމްސީލު ކުޅުމުގެ ރޮނގުން

🏆 2016 ގައި ‘ހަތްވަނަ ޤައުމީ ފިލްމު އެވޯޑުން’ ‘އެންމެ މޮޅު ސަޕޯޓިން އެކްޓަރުގެ ރޯލަށް ނޮމިނޭޓްވުން – ފިލްމު: “މި ހަށިން ފުރާނަ ދަންދެން” އިން

🏆 2017 ގައި ‘އަށްވަނަ ޤައުމީ ފިލްމު އެވޯޑުން’ ‘އެންމެ މޮޅު އެކްޓަރުގެ ރޯލަށް ނޮމިނޭޓްވުން – ފިލްމު: “ހުޅުދާން” އިން

ފިލްމީ ދާާއިރާގައި 47 އަހަރު ވާންދެން ހޭދަކުރައްވައި އަދި މިހާރުވެސް ކުރިއަށް ވަޑައިގަންނަވަމުން ގެންދަވާ ހަސަން އަކީ ދާއިރާ މީހުންގެ ބައްޕަކަމަށް އެމީހުން ބުނެއެވެ. ހަސަންގެ ޚުލްޤުހެޔޮކަމާ މަސައްކަތަށް ފަރުވާ ބަހައްޓާ މިންވަރު މިއީ ދާއިރާގެ ހަމަ ކޮންމެ މީހަކުމެ ފާާހަގަކުރާ ކަމެކެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: