07 ނޮވެމްބަރު 2023)

މީގެ ހަތްމަހެއްހައި ދުވަސް ކުރިއެވެ. ދަންވަރުގެ ވަގުތު ޓިކްޓޮކަށް ވަން ވަގުތު ޒުވާން ގްރޫޕަކުން ތަންކޮޅެއް ސީރިއަސް ލައިވްއެއް ޖައްސައިގެން އުޅޭތީއާ އެވަގުތު ލަވަކިޔަމުން ދިޔަ ކުއްޖާ ކިޔަމުން ދިޔަ ލަވައިގެ ހިތްގައިމުކަމުން މަޑުކޮށްލެވުނެވެ. އިރުކޮޅެއް ފަހުން އޭގެތެރެއިން ކުއްޖަކު ‘ލުޖައިން’ ނަމަކަށް ކިޔާ ލައެއް ކިޔައިލީ އަންމަޑޭގެ ބަހުރުވައިންނަމަ ‘ލަވައެއް ފަޅައިލާ’ ގޮތަށެވެ. އެހާވެސް މޮޅަށެވެ. ސަޅިކޮށެވެ.

އޭގެ އަނެއް ދުވަހު މުނިއަވަސްއިން އޮގީއާ ވާހަކަދައްކައިލީމެވެ. ހަނދާން އައުކޮށްލުމަށް އޮގީ ދިން ޖަވާބު ގެނެސްދޭނަމަވެ.

“އަހަރެން ގިޓާކުޅެ ލަވަކިޔަން ފެށީ އުމުރުން ފަސްއަހަރުގަ. އެކަމަކު އައްޑޫގަ އެއްވެސް ކަހަލަ އޮޕޮޗިއުނިޓީއެއް ނުހުރޭ. އެހެންވެ މިކަމާއިގެން ކުރިއަށް ދެވޭނެ އެއްވެސް ގޮތެއް ނެތިފަ ހުންނަން މި ޖެހެނީ.”

– އޮގީ

(މިއަދު)

މިއީ ލަވައާއި މިއުޒިކްގެ ފަންނުވެރި ޒުވާނެކެވެ. އުމުރުން އަދި ވީ 18 އަހަރެވެ. ނަމަވެސް މިވަގުތުވެސް މި ޒުވާނާއަކީ ރިޒޯޓްމިއުޒިކްގެ އިތުރުން ބައެއް ރަށްރަށުގައި ޝޯތައް ވެސް ދެމުން އަންނަ ޒުވާނެކެވެ. ލަވަ ކިޔުމުގެ އިތުރުން ބައެއް އިންސްޓްރޫމެންޓްތައް ވެސް ކުޅެއެވެ. ހޮބީއެއްގެ ގޮތުން ވަރަށް ޚާއްޞަ ކަމެއްވެސް ކުރެއެވެ.

އެހެންކަމުން މުނިއަވަސް އިން އޮގީ އާއި އެކުގައި ވަގުތުކޮޅެއް ހޭދަކޮށްލީމެވެ.

އަސްލު ނަން: ޙަސަން ޒަޔަން

އުފަންރަށް: އައްޑޫ ސިޓީ

އުމުރު: 18

ވަޒީފާ: މިއުޒިޝަނެއް

މިއުޒިކްގެ ދާއިރާއަށް ވަދެވުނު ގޮތް ހިއްސާކޮށްލަދީބަލަ؟

މިއުޒިކް ދާއިރާއަށް އަސްލު ވަދެވުނީ ކުޑައިރު އަޅުގަނޑުގެ އުފަންދުވަހުގެ ހަދިޔާއަކަށް މަންމަ ގިޓައެއް ގަނެދިން ފަހުން ގިޓާކުޅެން ދަސްކުރުމުގެ ތެރެއިން މިއުޒިކް ކުޅެން ފެށުނީ.

އޮގީގެ ލަވަތަކެއް ނުވަތަ ލަވައެއް ވިޔަސް ރެކޯޑިން ހަދާފަ ހުންނާނެތަ؟

އަމިއްލަ ދެ ލަވައިގެ ރެކޯޑިން ހަދާފަ މިހާރު އޮންނާނެ. އެ ލަވަތައް ބައިސްކޯފް އެޕްލިކޭޝަނުން ބަލައިލެވެން ހުންނާނެ.

އޯކޭ. އަމިއްލަ ދެ ލަވައެއް ނެރުނުވާހަކަ ބުނީމަ ހިތަށް އަރާ އޮގީގެ އަމިއްލަ އަލްބަމެއް ނެރެން ގަސްދުކުރަންތޯ އަހައިލަން؟

އަޅުގަނޑުގެ އަމިއްލަ އަލްބަމެއް ނެރުމުގެ މަސައްކަތް މިހާރުވެސް ކުރަމުން މިދަނީ، ވަރަށް އަވަހަށް އެ އަލްބަމް އިވިގެންދާނެ.

ރިޒޯޓް މިއުޒިކް ކުޅެންތަ؟

މިހާރުވެސް ރިޒޯޓް މިއުޒިކް ކުޅެމުން މި ދަނީ.

ޢީދު ވެސް ވަރަށް ކައިރިވެފަ އޮތީމަ މިފަހަރުގެ ސުވާލު އަމާޒުކޮށްލާނަން ޢީދާ ގުޅުވާލާފަ. ޢީދު ޝޯތައް ކުޅެން ރަށްރަށް ދާން ފުރުޞަތުތައް ވަރަށް ލިބޭތަ؟

އާދެ. ރަށުގަ ޢީދަށް ބޮޑު ޝޯއެއް ނެތިއްޔާ އެހެން ރަށްތަކަށް ދަން ޢީދު ޝޯކުޅެން.

ޅެންވެރިކަމަށް (ލަވަހެދުމަށް) ގަޔާވޭތަ؟ ޅެން ވަރަށް ގިނައިން ހަދަންތަ؟

އަޅުގަނޑު ވަރަށް ގަޔާވާކަމެއް ޅެންހެދުމަކީ. މިހާރުވެސް ހުންނާނެ އަމިއްލަ ދެ ލަވައެއް ރިލީޒްކޮށްފަ.

ކޮންމެ އިންޑަސްޓްރީއެއްގަ އުޅޭއިރުވެސް ހިތްހަމަޖެހޭ ކަންކަމާ ހިތްހަމަ ނުޖެހޭ ކަންކަންވެސް ދިމާވާނެދޯ. މި ދާއިރާއިން އެންމެ އުފާވި ކަމަކަށް ދިމާވީ ކޮން ކަމެއް؟

މި ދާއިރާގަ އެންމެ އުފާވީ އަޅުގަނޑުގެ އަމިއްލަ ބޮޑު މިއުޒިކް ޝޯއެއް ބޭއްވުނު ދުވަހު. އެއީ މި ދިޔަ އޭޕްރީލް 19ވަނަ ދުވަހު އައްޑޫގަ ބޭއްވި ޝޯއެއް.

މިއުޒިކްގެ އިތުރުން، ހޮބީއެއްގެ ގޮތުން ކޮށް އުޅެނީ ކޮން ކަންތައްތަކެއް؟

ލަވަ ލިޔުން އަދި މޫދު ކުޅިވަރުތައް

ކޮން އިންސްޓްރޫމެންޓްތަކެއް ކުޅެނީ؟

ގިޓާ އަދި ބޮޑުބެރު

ރަނގަޅު މިއުޒީޝަނަކަށް ވުމަށްޓަކައި ހުންނަން ޖެހޭނެކަމަށް އޮގީއަށް ޤަބޫލުކުރެވޭ އެންމެ މުހިންމު ސިފައަކީ ކޮބާ؟

ޑިސިޕްލިން

ތިޔައީ އަދި އުމުރުން ވަރަށް ހަގު ކުއްޖެއް ދޯ. އެހެންވީމަ އެއްވެސް ދާއިރާއަކުން މަތީ ތަޢުލީމު ޙާޞިލުކުރަން އެބަ ވިސްނަންތަ؟

މަތީ ތަޢުލީމު ޙާޞިލްކުރުމުގެ ޚިޔާލެއް އަދިއެއް ނެތް.

މުނިފޫހިފިލުވުމުގެ ދާއިރާއަކީ ޕޮޒިޓިވް ކޮމެންޓްސްގެ އިތުރުން ވަރަށް ބޮޑަށް ނެގެޓިވް ކޮމެންޓްތަކާއި ފީޑްބެކްތައް ލިބޭ ދާއިރާއެއް ދޯ.. އެހެންވީމަ އޮގީއަށް ލިބޭ ނެގެޓިވް ފީޑްބެކްތަކާމެދު ކަންކުރަނީ ކިހިނެއް؟

ނެގެޓިވް ފީޑްބެކް އަޅުގަނޑު ބަލައިގަންނަނީ ވަރަށް ޕޮޒިޓިވްކޮށް. ކޮންމެއަކަސް ފާޑުކިޔައިގެން ރަނގަޅުކުރަން ޖެހޭ ކަންތައްތައް އެނގޭނީވެސް.

އެންމެ ކިޔާހިތްވަނީ ކޮންކަހަލަ ލަވައެއް؟

ދިވެހި އަދި ހިންދީ ލަވަތައް

މި ދާއިރާގެ އެއްވެސް ފަންނާނެއް ކޮޕީކުރަންތަ؟

އެއްވެސް ފަންނާނެއް ކޮޕީއެއް ނުކުރަން.

ތަންކޮޅެއް ތަފާތު އަދި މެޗުއާރޑް ސުވާލެއް ކޮށްލާނަން. އޮގީގެ ނަޒަރުގަ ފިރިހެން ކުއްޖަކު ކައިވެނިކުރަން އެންމެ ރަނގަޅު އުމުރަކީ ކޮބާ؟

22 އަހަރު

@redhanboduberu Hanjaru 🥹 #fyp #foryoupage #viral #muisc #dhivehi ♬ original sound – Redhan Entertainment

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: