މިއަހަރުގެ އޯގަސްޓްމަހު ޖޯޑަންގައި ބޭއްވުމަށް ހަމަޖެހިފައިވާ “ޗިލްޑްރަން ފިލްމު ފެސްޓިވަލް”ގެ ތިން ވަނަ އެޑިޝަނަށް ފިލްމު ޑައިރެކްޓަރުން، ޕްރޮޑިއުސަރުން އަދި ފިލްމުގެ ހައްގުވެރި ފަރާތްތަކަށް ބައިވެރިވެލައްވަން ފިލްމު ހުށަހެޅުމުގެ ފުރުޞަތު ރާއްޖެއަށް ލިބި އެކަން އިޢުލާމުކޮށްފި އެވެ.

ދިވެހި ބަހާއި ސަގާފަތާއި ތަރިކައާބެހޭ ވުޒާރާގެ ދަށުން ހިންގަމުން އަންނަ ނޭޝަނަލް ސެންޓަރ ފޮރ ދި އާރޓްސް އިން މިމަހު09 ވަނަ ދުވަހު އާއްމުކޮށްފައިވާ އިޢުލާނުގައި ބުނީ މިފެސްޓިވަލްގައި ބައިވެރިވެލައްވަން ބޭނުންފުޅުވާ ފަރާތްތަކުން 20 ޖުލައި 2024 ގެ ކުރިން ސްކްރީނަރގެ ލިންކެއް [email protected] ފޮނުއްވައިދެއްވާ އެ މަޢުލޫމާތު ނޭޝަނަލް ސެންޓަރ ފޮރ ދި އާރޓްސްގެ މެއިލް އެޑްރެސް [email protected] އަށް ހިއްސާކޮށްދިނުމަށެވެ.

“ޗިލްޑްރަން ފިލްމު ފެސްޓިވަލް”ގައި ބައިވެރިކުރެވޭނީ މީގެ ކުރިން އެއްވެސް ޓީވީ ޗެނަލަކުން ނުވަތަ އޮންލައިން މަންސައަކުން އާއްމުކޮށްފައި ނުވާ ފިލްމު ކަމަށް މި ފެސްޓިވަލް އިންތިޒާމުކުރާ ޖޯޑަންގެ ރޯޔަލް ފިލްމު ކޮމިޝަނުން ބުނެއެވެ. އަދި ހުށައަޅާ ފިލްމަކީ 2022ވަނަ އަހަރުގެ ކުރިން ރިލީޒްކޮށްފައިވާ ފިލްމަކަށް ވެގެން ނުވާނެ ކަމަށްވެސް ބުނެއެވެ. ހުށައަޅާ ފިލްމު ހުންނަން ޖެހޭނީ އެމްއޯވީ ނުވަތަ އެމްޕީ-ފޯރ ފޯމެޓްގައެވެ.

ހުށައަޅާ ފިލްމަކީ އުމުރުން 06 އަހަރާއި 16 އަހަރާއި ދެމެދުގެ އުމުރުފުރާއާ އެކަށޭނަ މަންޒަރާއި އަޑު ހުންނަ ފިލްމަށް ވާން ޖެހެއެވެ.

ދިގު ފިލްމާއި ކުރު ފިލްމުވެސް ހުށައެޅޭ މި ފެސްޓިވަލަށް ފިލްމު ހުށައަޅާއިރު ޢަރަބި ބަހުން ސަބްޓައިޓްލް ކުރެވިފައި ހުންނަން ވާނެ ކަމަށާ ނުވަތަ ޢަރަބި ބަހަށް ތަރުޖަމާކުރުމަށް ނުވަތަ ޑަބްކުރުމަށް ބޭނުންވާނެ ކޮންޓެންޓް ހިމެނޭ ފައިލް ހުށައަޅަންވެސް ބުނެފައިވެއެވެ.

މި ފެސްޓިވަލްގެ އިތުރު މަޢުލޫމާތު ރޯޔަލް ފިލްމު ކޮމިޝަން އޮފް ޖޯޑަންގެ ވެބްސައިޓްގެ މި ލިންކުން ކިޔައިލެވޭނެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: