ހިތްގައިމު ދިވެހި ފިލްމުތަކެއް ކަމަށްވާ “ޗުއްޓީ”، “ހާލި” “އިހުސާސް”ގެ އިތުރުން ބޭރުގެ ފިލްމު ފެސްޓިވަލެއްގައި ބައިވެރިކުރަން ތައްޔާރުކުރި ކުރު ފިލްމު “އަޑު އިވުމުން” އުފެއްދި ލިޔުންތެރިޔާ އަދި ޑައިރެކްޓަރ މުހައްމަދު ހިލްމީ ދިވެހި ފިލްމެއް ހަދަން ތައްޔާރުވެއްޖެ އެވެ. ޒަމާންތަކެއް ފަހުން ހިލްމީ މިފަހަރު ހަދާ ދިވެހި ފީޗާ ފިލްމުގެ ނަން އާއްމުކުރުމަށް މިމަހު 06 ވަނަ ދުވަހު، ޚާއްޞަ އިވެންޓެއް ބާއްވާފައިވެއެވެ. މިފަހަރު ބެލުންތެރިންނާ ހަމައަށް ހިލްމީ ގެނެސްދޭން އަމާޒުހިފާފައިވަނީ ‘މުޙައްމަދު ހިލްމީ ފިލްމްސް’ގެ ފުރަތަމަ ފިލްމު “ލަމްހާ” އެވެ.

އިންޑިއާއިން ޑިޕްލޮމާ އިން ފިލްމް ޑައިރެކްޝަން ކޯހަކާއި ފޮޓޯގްރަފީ ކޯސް ފުރިހަމަކޮށްފައިވާ މުޙައްމަދު ހިލްމީ ލިޔެ، ޑައިރެކްޓްކުރާ ފިލްމު “ލަމްހާ”ގެ ޝޫޓިން ފެށުމަށް ހަމަޖެހިފައިވަނީ މިމަހު 10 ވަނަ ދުވަހުއެވެ. މި ފިލްމުގެ މައިގަނޑު ތަރިންނަކީ އަޙްމަދު އީސަ (އާނަންދު)، ނުޒުހަތު ޝުޢައިބް، އައިޝާ އަދި އަޙްމަދު ޝާރިފް އެވެ.

މި ފިލްމުގެ ޓެކްނިކަލް މަސައްކަތްތަކަށް ބަލައިލާއިރު، ކެމެރާކުރާނީ އިންޑިއާގެ ޗެންނާއީގެ ކެމެރާމަނެއް ކަމަށް ‘މުޙައްމަދު ހިލްމީ ފިލްމްސް’ އިން ބުނެއެވެ. މޭކަޕްކުރާނީ ސްރީލަންކާގެ މޭކަޕް އާޓިސްޓެކެވެ.

ފިލްމު “ލަމްހާ”ގެ ނަން އާއްމުކުރުމަށް ބައިސްކޯފު ސްޓޫޑިއޯގައި ބޭއްވި މި އިވެންޓްގައި ހިލްމީ ކުރިން ހަދާފައިވާ ފިލްމުތަކުގެ ޕޯސްޓަރުތައް އާއްމުކޮށްފައި ހުރިއިރު، ފިލްމު “ލަމްހާ”ގެ ނަން ޕޯސްޓަރުގައި އެ އިވެންޓްގެ ބައިވެރިން ސޮއިކުރުން ކުރިއަށްގެންދިޔައެވެ. މި އިވެންޓްގައި ރާއްޖޭގައި ފިލްމީ ދާއިރާގެ މަޝްހޫރު ބައެއް ޑައިރެކްޓަރުންނާ ޕްރޮޑިއުސަރުންގެ އިތުރުން ފިލްމީ ފަންނާނުން ބައިވެރިވިއެވެ.

@muniavas Hilmy ge LAMHA ge title launching event #lamha_themovie #hilmy ♬ original sound – MUNIAVAS

ހިލްމީ ޕްރޮޑިއުސްވެސް ކުރާ ފިލްމު “ލަމްހާ”ގެ އިތުރު މަޢުލޫމާތުތައް ހޯދައިލުމަށް މުނިއަވަސް ނޫހުން ހިލްމީއާ ވާހަކަދައްކައިލީމެވެ.

“މީގަ ލޯބި އިންވޯލްވޭ ވަރަށް ބޮޑަށް! ތަފާތު ގޮތަކަށް މި ފިލްމުގަ ލޯބި އިންވޯލްވް ވާނީ. އެއީ މީގަ އުޅެނީ ހަރު މީހުން.“

— މަޝްހޫރު ލިޔުންތެރިޔާ / ޑައިރެކްޓަރ މުޙައްމަދު ހިލްމީ

ހިލްމީ ބުނީ ހިލްމީގެ ވާހަކަތައް ބޮޑަށް ބިނާވާނީ ހަރު މީހުންގެ މައްޗަށް ކަމަށެވެ.

“އަޅުގަނޑަކީވެސް ހަރު މީހެއް. އެހެންވީމަ ޅަކުދިންގެ ސްޓޯރީތަކަކަށް އަދިއެއް އަޅުގަނޑު ނުދަން.“

— މަޝްހޫރު ލިޔުންތެރިޔާ / ޑައިރެކްޓަރ މުޙައްމަދު ހިލްމީ

ހިލްމީ ލިޔެ، ޑައިރެކްޓްކޮށް އަދި ކޯޕްރޮޑިއުސްކޮށްފައިވާ ފިލްމު ކުރު ފިލްމު “އަޑު އިވުމުން” އަދި މިހައިތަނަށް އާއްމުކޮށްފައެއް ނުވެއެވެ. މި ފިލްމުގެ ލީޑް ކުޅެފައިވަނީ ޢާއިޝަތު ޝިރާނީ އަދި އިސްމާޢީލް ވަޖީހެވެ. ފިލްމު “ޗުއްޓީ”ގެ އިސް ރޯލުތައް ކުޅެފައިވަނީ އިސްމާޢީލް ވަޖީހް، ވަދީފާ، ދަރާ ރަޝީދު، ހާމިދު ވަޖީހް އެވެ.

ހިލްމީ ކޮށްފައިވާ އިތުރު މަސައްކަތްތަކުގެ ތެރޭގައި “އަހަރެން”ގެ ސްކްރީންޕްލޭ ލިޔުމުގައި މަހުދީ އާއެކު ބައިވެރިވެފައިވެއެވެ. ޔޫއެންއެފްޕީއޭ އަދި އިންފޮމޭޝަން މިނިސްޓްރީގެ ‘މާޕާ’ އިން ގެނެސްދިން މި ފިލްމުގެ ޕްރޮޑަކްޝަން މެނޭޖަރަކީވެސް ހިލްމީ އެވެ.

@muniavas Hilmy ge film thakuge poster display – #lamha_themovie #hilmy ♬ original sound – MUNIAVAS

ފިލްމީ ދާއިރާގައި ހިލްމީ ކޮށްފައިވާ މަސައްކަތްތަކުގެ ތެރެއަށް ފީނާލާއިރު ފާހަގަކޮށްލެވޭ ކަންކަމަކީ:-

1984ގައި ނެރުނު ދިވެހި ފިލްމް “ހާލި”ގެ ވާހަކަ، އަދި ސްކްރީންޕްލޭ ލިޔުމުގެ އިތުރުން، އެފިލްމްގެ ކޯޕްރޮޑިއުސަރު އަދި އެސިސްޓެންޓް ޑައިރެކްޓަރަކީ ވެސް ޙިލްމީ އެވެ.
1993ގައި ނެރުނު ފިލްމް “އިހްސާސް”ގެ ވާހަކަ، ސްކްރީންޕްލޭ، އަދި ކޯޑައިރެކްޓަރަކީ ވެސް ޙިލްމީ އެވެ.
ދިވެހި ފިލްމް “އަޑުއިވުމުން”ގެ ވާހަކަ، ސްކްރީންޕްލޭ، އަދި ޕްރޮޑަކްޝަން ކޮންސަލްޓަންޓަކީ ޙިލްމީ އެވެ.
1994: އެންމެ މޮޅު ސްޕެޝަލް މޭކަޕް – މުޙައްމަދު ޙިލްމީ – “އިހްސާސް” – ގައުމީ ފިލްމް އެވޯޑް 1

މުޙައްމަދު ޙިލްމީގެ މަންމައަކީ މަޝްހޫރު ޅެންވެރިޔާ ޑޭޒީމާގޭ ފާއިޒާ އެވެ. 1990 ވަނަ އަހަރު ޙިލްމީގެ މަސްއޫލު ވެރިކަމުގެ ދަށުން “ސަންގު މަޖައްލާ” ނެރެފައި ވެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: