20 ނޮވްމެބަރު 2024 ވަނަ ދުވަހުގެ ރޭ އޮލިމްޕަސް ސިނަމާގައި ދައްކަން ތާވަލްކޮށްފައިވާ ފިލްމު “ދޭދަރު ރުއިން”، ކުރިންވެސް ހަމަޖައްސާފައިވާ ގޮތަށް ހަމަ އެރޭ ރިލީޒްކުރާނެ ކަމަށް ކަޒްމިކް އިންޓަނޭޝަނަލް އިން މިމަހުު 14 ވަނަ ދުވަހު ބުނެފިއެވެ.

ފިލްމު “ދޭދަރު ރުއިން” ޕްރިމިއާ ކުރުމަށް އޮލިމްޕަސް ސިނަމާ ކަޒްމިކަށް ދޫކޮށްފައިވާ ތާރީޚުގައި ދެވެން ނެތްކަމަށް ކުއްލި ގޮތަކަށް އެންސީއޭއިިން ކަޒްމިކަށް އެންގުމުން ފިލްމީ ދާއިރާގެ ފަންނާނުންގެ ލޭ ހޫނުވެ މިކަމާ ވަރަށް ބޮޑަށް ނުރުހުންފާޅުކޮށްފައި ވެއެވެ. ހަމަ އެހެންމެ ކަޒްމިކް އިންޓަނޭޝަނަލް އަދި އައިފިލްމްސް ގުޅިގެން ވަރުގަދަ ނޫސްބަޔާނެއްވެސް މިމަހު 13 ވަނަ ދުވަހު ނެރުނެވެ. މީގެ އިތުރުން ފިލްމު އުފެއްދި ފަރާތާއި މޯލްޑިވްސް ފިލްމު އެސޯސިއޭޝަނުން އެންސީއޭ އާއި މަޝްވަރާތައް ކޮށްގެން ކުރިންވެސް ހަމަޖެހިފައިވާ ގޮތަށް 20 ވަނަ ދުވަހުގެ ރެއަށް ކަޒްމިކް އިންޓަނޭޝަނަލްއަށް އޮލިމްޕަސް ހޯލު ދިނުމަށް ނިންމިއެވެ.

ސަރުކާރުން އިންތިޒާމުކޮށްގެން ބާއްވަން ނިންމާފައިވާ އޮލިމްޕިއަންސް ޝޯ، ބޭއްވުމަށް މިމަހުގެ 18 އިން 20 އަށް އޮލިމްޕަސް ހޯލު ބޭނުންވާ ކަމަށް އެންސީއޭ އިން މި ފިލްމު އުފެއްދި ކަޒްމިކް އިންޓަނޭޝަނަލްއަށް އެންގީ މިމަހުގެ 10 ވަނަ ދުވަހުގައި ކަމަށް ކަޒްމިކް އިން މިމަހު 13 ވަނަ ދުވަހު ނެރުނު ބަޔާނެއްގައި ބުނެފައިވެއެވެ. އެއީ ”ދޭދަރު ރުއިން“ ޕްރިމިއާކޮށް އެޅުވުމަށް ވާންޖެހޭ ހުރިހާ ތައްޔާރީތަކެއް ވެސް ވެފައި ވަނިކޮށް ކަމަށާއި ކުރިން އޮލިމްޕަސް ހޯލު ބުކްކޮށް ފައިސާ ވެސް ދައްކާފައި ވަނިކޮށް ކަމަށް ކަޒްމިކްގެ ބަޔާނުގައި ބުނެފައިވެއެވެ.

ފިލްމީ ދާއިރާގެ ގިނަ އަދަދެއްގެ ފަންނާނުންނާއި ކަޒްމިކް އަދި އައިފިލްސްގެ އިސް ފަރާތްތަކުން އެންސީއޭއާ ވާހަކަދައްކައިގެން މި މައްސަލަ ވަނީ ހައްލުވެފައެވެ. އެހެންކަމުން ޝެޑިއުލާއި އެއްގޮތަށް ފިލްމު ޕްރިމިއާކުރުމާއި ކުރިއަށް ހުރި ޝޯތައް ބޭއްވުމަށް ވަނީ ހަމަޖެހިފައެވެ.

ކުރެވުނު މަޝްވަރާތަކަށް ފަހު މައްސަލަ ހައްލުވުމުން ވެސް ކަޒްމިކް އަދި އައިފިލްމްސް ގުޅިގެން ނޫސްބަޔާނެއް ނެރުނެވެ.

ނޫސްބަޔާން

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: