އިރުކޮޅެއްގެ ހަމަހިމޭން ކަމަށްފަހު، ޢިއްޒުއްދީން ގެ ޖީބުން ގަލަން ނަގައި ޢާޝިޤާ ލިޔެފައިވާ ސިޓީގެ ތިރީގައި ކޮންމެވެސް ޢިބާރާތްކޮޅެއް ލިޔެލައިފި އެވެ. އެއަށްފަހު ވަރަށް ހަމަޖެހިލައިގެން ތުނބުން ފުމެމުން ލޯބީގެ ލަވައެއް ކިޔަމުން، ނަށަމުން އެއްޗެހި ބަދަލުކޮށްފި އެވެ. ފޯނު ނަގައި އެނދުގައި އިށީންދެ ހަމަޖެހިލާފައި ނަންބަރަކަށް ޑައިލް ކޮށްލި އެވެ.

ޢިއްޒުއްދީން އެ ގުޅި މީހަކަށް ގުޅައި، މާ ވެގަނެގެން ވާހަކަދައްކަމުން ދިޔައިރު އެނދުތަންދޮށުގައި ޢާޝިޤާ އޮތީ ކަނުލައި އަޑުއަހާށެވެ.

“ލޯބީ އަށް އެނގޭތަ؟ އަހަރެން ތައްޔާރުވެލައިގެން ދާނަން ލޯބި ކައިރިއަށް.” ޢިއްޒުއްދީން ބުންޏެވެ. “އެނގޭތަ، މަގޭ ނަސީބު ރަނގަޅުކަމުން އެ ޢާޝިޤާ ހިނގައްޖެ އަހަރެން ދޫކޮށްލާފަ. މަ ވަރުގެ އެހެން ނަސީބުވެރިއެއް ހުންނާނެތަ އަޅެ؟ އޭނަގެ ކަންތައް ބޮޑުކަމުން މަ މިހުރީ ހަދާނެ ނުހަދާނެ ގޮތެއްވެސް ނޭނގިފަ. އެހެން ހުއްޓާ އޭނަ ބަޗައިފި. އޭނައާ ކައިވެނިކުރެވުނު މޮޔަ ހީވޭ މިހާރުވެސް. އަޅެ ކުރިން ތީނަޔާ ދިމާވިނަމަދޯ. އޯކޭ ލޯބީ. ސީ ޔޫ ސޫން!”

އެންމެފަހުން ފޯނަށް ދޮނެއްވެސް ދެމުން ފޯނުކޯލް ނިންމާލައި ކޮޓަރިން ނިކުމެއްޖެ އެވެ.

އެނދު ތަންދޮށުގައި އޮތް ޢާޝިޤާ ފަކީރު އޮތީ ފެންކަޅިވެފަ އެވެ. ދެރަވަގެން ގޮސް ހިތް ފަޅައިގެން ދާހާވަރު ވެފައެވެ. އެނދު ދޮށުން ނިކުމެ އެނދުމައްޗަށް ވެއްޓިގަތެވެ. ރޯން ފެށުނެވެ. ގިސްލަގިސްލާފަ އެވެ. އިރުކޮޅެއްފަހުން އެ ގިސްލުން ބާރުވަމުން ބާރުވަމުން ގޮސް އަޑުން އަޑުނަގާފައި ރޯންފެށި އެވެ. ބާރަށް ރަނގަޅަށް ރޯންފެށިއެވެ. ފިރިމީހާގެ ބޭވަފާތެރިކަމުގެ ޝަކުވާތައް ހިތާހިތާ ކިޔަމުން އެނދުން ތެދުވެ ސައިޑް ޓޭބަލް މަތީގައި އޮތް ސިޓީ ނެގިއެވެ. ފިރިމަނިކުފާނު ލިޔުނީ ކޮން އެއްޗެއްތޯ ބެލުމަށެވެ.