އައިކާއަކީ ނިކަމެތި ދެމަފިރިއަކަށް ލިބިފައިވާ ތިންކުދިންގެ ތެރެއިން އެންމެ ދޮށީ ކުއްޖާއެވެ. ޤުދުރަތުން ރީތި ސިފަތަކެއް ލިބިފައިވީ ނަމަވެސް އެއްވެސް ދެއްކުންތެރިކަމެއްނެތް ހިތްތިރި ކުއްޖެކެވެ. އޭނާގެ ރިވެތި އަޚްލާޤާއި ބުރުސޫރައިގެ ރީތިކަމުގެ ސަބަބުން ޒުވާން ފިރިހެންކުދިން ތިބެނީ މަށަށް މަށަށް ކިޔާލަ ކިޔާލައެވެ. ޒުވާން ގިނަ އަންހެންކުދިންވެސް އައިކާއަށް ބަލާލަނީ ހަސަދަވެރިކަމުގެ ލޮލަކުންނެވެ. ނަމަވެސް އެކަމަކަށް އޭނާގެ އެއްވެސް ފަރުވާލެއް ނެތެވެ. އަދި އެއީ އޭނާ ފަޚުރުވެރިވާ ކަމެއްވެސް ނޫނެވެ. އޭނާގެ ހުރިހާ ސަމާލުކަމެއް ވަނީ އޭނާގެ ކިޔެވުމަށް ހުސްކޮށްފައެވެ. އަހަރަކީ އޭނާ އޯލެވެލް ހަދާ އަހަރުކަމުން އޭނާ ގަދައަޅާ މަސައްކަތްކުރަމުން ދިޔައީ މައިންބަފައިން ފަޚުރުވެރިވާފަދަ ނަތީޖާއެއް ހޯދުމަށެވެ.

މެންދުރުފަހުގެ ވަގުތެވެ. އާދައިގެ މަތިން އައިކާ ދިޔައީ އޭނާގެ ކޮމްޕިއުޓަރ ޕްރޮޖެކްޓް ހެދުމަށްޓަކައި ސްކޫލަށެވެ. އޭނާގެ އަތުގައި ކޮމްޕިއުޓަރެއް ނުހުންނާތީ ކޮންމެ ދުވަހަކުވެސް ޕްރޮޖެކްޓް ހެދުމަށް ސްކޫލަށް ދާން ޖެހެނީއެވެ. ނަމަވެސް އޭނާ އެކަމަކާ ޝަކުވާއެއް ނުކުރެއެވެ. އޭނާގެ މައިންބަފައިންނަށް އެފަދަ ތަކެތި އޭނާއަށް ހޯދައިނުދެވެނީ އެހާ ތަނަވަސްކަން ނެތުމުންކަން އޭނާ ދަނެއެވެ. އޭނާގެ ތިމާގެ މީހުން ތިބެފައި އެމީހުން އައިކާމެންނަށްވުރެ ތަނަވަސް ނަމަވެސް، އެމީހުންނާ އޭނާގެ އާއިލާއާ މާބޮޑު ގުޅުމެއް ނޯންނާތީ އެމީހުން ގާތަށް ދާން ނުކެރެނީއެވެ. އޭނާގެ ރައްޓެހިން އަތުގައި އެފަދަ ވަސީލަތްތައް ހުރިނަމަވެސް އެކުދިންނަށް ދަތިވެ ނޫނީ އެކުދިން ހިތްހަމަނުޖެހިދާނެތީ ދާން ބޭނުންނުވަނީއެވެ.

“ނަސީބަކުން މިއަދު އެ މާޒްއަކާ ދިމައެއްނުވޭ..” އަމިއްލަ ނަފްސަށް އިވޭވަރަށް އެހެން ބުނެލަމުން އައިކާ ހިނިތުންވެލިއެވެ. ސްކޫލާއި ފުދޭވަރަކަށް ކައިރިވީފަހުން އައިކާ ސިހުނީ ފަހަތުން އައިސް އޭނާއާ އަރާ ހަމަކުރި މާޒް ފެނިފައެވެ. މިއަދުގެ ކަންތައް މި ނިމުނީއޭ އައިކާގެ ހިތަށްއެރިއެވެ.

“އިކާ ޕްލީޒް.. އަހަރެންނަށް ޖަވާބެއް ދީބަލަ.. އާނއެކޭ ނޫނީ ނޫނެކޭވެސް ބުނެބަލަ.. އޭރުންނެއްނު އެނގޭނީވެސް.. އަހަރެން އިކާއަކަށް ދެރައެއް ނުދޭނަމޭ.. ކިހާވަރަކަށް އާދޭސްކުރެވިއްޖެ.. އިކާ ބޭނުންވަނީ އުމުރު ދުވަހު އަހަރެން ލައްވާ އާދޭސްކުރުވަންތަ؟ ނޫނީ އަހަރެން މިވާ ލޯބި އިމްތިހާންކުރަންތަ؟” އާދައިގެ މަތިން މާޒް އައިކާ ގާތު އާދޭސްކުރަމުން ދިޔައެވެ. އެއީ މަގުމަތިކަންވެސް އޭނާ ހަނދާން ނެތް ކަހަލައެވެ. ނޫނީ އެކަމަށް ފަރުވާލެއްވެސް ނެތީއެވެ.

މާޒްގެ ކަންތައް މިހާރު މިދަނީ މާ މައްޗަށެވެ. ކޮންމެ ދުވަހަކު ސްކޫލަށް ދާގަޑީގައި އެބަ ފަހަތު އަޅުވާލައެވެ. ނުވިތާކަށް އެހެން ބޭނުމަކުވެސް އެކަނި ބޭރަށް ނުކުމެލައިފިއްޔާ އެފަދައެވެ. ވާހަކަނުދެއްކިޔަސް ހަމަ ފަހަތުން އާދޭސްކުރަމުން ދުވަނީއެވެ. އަޖައިބެއް ކަހަލަ ފިރިހެނެކެވެ. އެހެންމީހަކުނަމަ މިހާރު ފޫހިވެގެންވެސް ހިނގައްޖައީހެވެ. އައިކާ ހިތާހިތުން ކުދިކިޔަމުން ހިނގުން ބާރުކޮށްލިއެވެ. އެވަގުތު މާޒް އޭނާގެ އަތުގައި ހިފެހެއްޓުމުން އޭނާގެ ގައިން ހީބިހި ނަގައިގެން ދިޔައެވެ. ދުވަހަކުވެސް ހިލޭ ފިރިހެނަކު އޭނާގެ ގައިގައި އެފަދަ ގޮތަކަށް ބީހިފައި ނުވާތީކަމަށްވެސް ވެދާނެއެވެ.

“އިކާ! އަހަރެން ފެންނައިރަށް ބިރެއް ފެނިގެން އުޅޭހެން ތިއުޅެނީ ކީއްވެ؟ އަހަރެން އިކާއަކަށް ދެރައެއް ނުދެން.. އަދި ގެއްލުމެއްވެސް ނުދެން.. ދެން ކީއްވެ؟ އަހަރެންނަށް އެނގޭ އިކާ ކުއްލިއަކަށް މާބާރަށް ދާން ތިއުޅެނީ އަހަރެން ހުރީމަކަން.. ޕްލީޒް! އުނދަގޫވަންޏާވެސް ތިގޮތަށް އަހަރެން އިގްނޯރ ނުކޮށް ރީތިކޮށް ބުނެބަލަ..” މާޒް ދެރަވެލާފައި އެހެން ބުނެލި ގޮތުން އައިކާވެސް ދެރަވިއެވެ. ނަމަވެސް އައިކާ މޫނުމައްޗަށް ނުރުހުމުގެ އަސަރު ވެރިކުރުވަމުން ބަލާލީ މާޒް ހިފަހައްޓާފައިވާ އޭނާގެ އަތަށެވެ. އައިކާއަށް ވީގޮތް ފެނުމުން މާޒް “ސޮރީ”އޭ ބުނަމުން އަވަސްއަވަހަށް އައިކާގެ އަތުން ދޫކޮށްލިއެވެ.

“މާޒް! އަހަރެން ބުނަންތަ ވަރަށް ރަނގަޅު ވާހަކައެއް؟ އަހަރެންނަށް މާޒްގެ ޢަމަލުތައް މިހާރު ތިހުންނަ ގޮތުން ވަރަށް އުނދަގޫވޭ.. މީ އަހަރެންގެ ކިޔެވުމުގެ އެންމެ މުހިންމު އަހަރު.. މާޒްއަށްވެސް އެނގޭނެ އަހަރެންގެ އާއިލާއަކީ އެހާ ތަނަވަސް އާއިލާއެއް ނޫންކަން.. އަހަރެންގެ ހަގަށް އަދި ކިޔަވާ ދެކުދިން އެބަތިބި.. ބައްޕަމެން އެތައް އުފަލެއް ޤުރުބާންކޮށްފަ އަހަރެމެންނަށް ކިޔަވައިދޭން މަސައްކަތްކުރަނީ.. އަހަރެން ބޭނުމެއްނޫން އެމީހުން އެކުރާ މަސައްކަތަކީ ބޭކާރު މަސައްކަތަކަށް ހަދާކަށް..”

“އަހަރެން މާޒްދެކެ ބިރުގަންނަނީއޭ ހީނުކުރައްޗޭ.. މާޒްއަކީ ވަރަށް ރަނގަޅު މީހެއްކަން އަހަރެންނަށް އެނގޭ.. އަދި މީހަކަށް ދެރައެއް ދިން މީހެއް ނޫންކަންވެސް އެނގޭ.. އެކަމަކުވެސް އަދި އަހަރެންނަށް ތިކަމަށް އެއްބަސްވެވޭކަށް ނެތް.. އެހެންނޫނަސް އަހަރެންނަކީ މާޒްއާ އެފަދަ ގޮތަކުން އެކަށީގެންވާ މީހެއްވެސް ނޫން.. އަހަރެންނަކީ ނިކަމެއްޗެއް.. މާޒްއަކީ މުއްސަންޖެއް.. ރީތި މީހެއް.. މާޒް ބޭނުން ކޮންމެ އެއްޗެއް، ކޮންމެ ކުއްޖަކުވެސް ލިބިދާނެ.. އެހެންވީމަ މާޒް އަހަރެންނަށް ތިގޮތަށް އުނދަގޫނުކޮށް އެހެން ކުއްޖަކު ހޯދާ.. އަހަރެން ކިޔެވިޔަދީ..” އައިކާ މަޑުމައިތިރިކަމާއެކު އޭނާ ބޭނުންވާގޮތް ހާމަކުރިއެވެ.

“އެންމެ ރަނގަޅު.. އެކަމަކު އަހަރެން އަބަދުވެސް އިކާދެކެ ލޯބިވާނަން.. އިކާ ނޫން އެހެން ކުއްޖަކު އަހަރެންގެ ހަޔާތަކަށް ނުގެންނާނަން.. އިކާ ކިޔަވާ ނިމޭނެ ދުވަހަކަށް އަހަރެން އިންތިޒާރުކުރާނަން.. ކިތަންމެ ދިގު އިންތިޒާރަކަށްވިޔަސް ފަރުވާލެއްނެތް.. އަހަރެން އުއްމީދުކުރަން އެދުވަހަކުން އިކާ އަހަރެންނަށް ރަނގަޅު ޖަވާބެއް ދޭނެކަމަށް.. ރަނގަޅަށް ކިޔަވާތި.. ދެން ދަނީ..” މާޒް އެހެން ބުނެފައި ދާން ހިނގައިގަތުމުން އައިކާއަށް މާޒްއަށް ގޮވާލެވުނެވެ.

“ސޮރީ!” އައިކާއަށް ބުނެވުނީ ހަމައެކަނި އެހެންނެވެ. މާޒް ހީލަމުން އެއީ އެއްވެސް ކަމެއް ނޫންކަމަށް ބުނެލީ ހިތުގައިވާ ރިހުން ފޮރުވަން މަސައްކަތްކުރަމުންނެވެ. އޭނާ އެނބުރި ދާން ހިނގައިގަތްއިރު އޭނާގެ ހިތުގައިވަނީ ޝަކުވާއެވެ. އާންމުކޮށް އެންމެނަށްވެސް ދިމާވާހެން އޭނާގެ ފުރަތަމަ ލޯބި ކާމިޔާބުވުން ނެތީ ހެއްޔެވެ؟ އޭނާއަށް އައިކާދެކެ ލޯބިވެވުނީ ކީއްވެ ހެއްޔެވެ؟ އައިކާ އޭނާގެ ލޯބި ޤަބޫލުނުކުރީ ކީއްވެ ހެއްޔެވެ؟ އައިކާއަށް އޭނާ ލޯބިވާވަރު އިހުސާސްވާނެނަމައެވެ.

ކޮމްޕިއުޓަރ ލެބްގައި އިންއިރުވެސް އައިކާއަށް ވިސްނެމުން ދިޔައީ މާޒްއާމެދުގައެވެ. މާޒްއަކީ ރަނގަޅު މީހެކެވެ. ބަލާލަންވެސް ރީއްޗެވެ. ނަމަވެސް މާޒްގެ އެހުށަހެޅުން ޤަބޫލުކުރާނީ ކިހިނެއް ހެއްޔެވެ؟ އޭނާގެ މައިންބަފައިން އޭނާއަށްޓަކައި ކުރަމުން އައި ފޮނި އުއްމީދުތައް ފުނޑުފުނޑުކޮށްލާނީ ކިހިނެއް ހެއްޔެވެ؟ އޭނާގެ މައިންބަފައިން ފަދައިން އޭނާގެވެސް އުއްމީދަކީ މޮޅަށް ކިޔަވައިގެން ރަނގަޅު ވަޒީފާއަކަށް ގޮސް ކޮއްކޮމެންނަށް ރަނގަޅަށް ކިޔަވައިދިނުމެވެ. އެދުވަހު އޭނާއަށް ރަނގަޅަށް އެއްކަމެއްވެސް ނުކުރެވުނެވެ. އެހެންކަމުން އޭނާ ޓީޗަރުގެ ހުއްދަ ހޯދައިގެން ގެއަށް ދިޔައީ ބޮލުގައި ރިއްސަނީކަމުގައި ބުނެފައެވެ.

“އަނހާ ދަރިފުޅާ! މިއަދު ހާދަ އަވަހަކަށް ތިއައީ.. އަދި ދެގަޑި ބައިވެސް ނުވެއެއްނު..” އައިކާ އައިސް ވަތްތަން ފެނިފައި އޭނާގެ މަންމަ ސަނާ ބުނެލިއެވެ.

“އާނ.. މިއަދު މާބޮޑަށް ވަރުބަލިވެފަ ހުރީމަ ސަރ ގާތު ބުނެފަ މިއައީ..” އައިކާ ބުނެލިއެވެ.

“އެހެންތަ؟ އެހެންވިއްޔާ އަވަހަށް ގޮސް އެއްޗެހި ބަދަލުކޮށްގެން އޮށޯވެލާ..” ސަނާ އެހެން ބުނެލުމުން އައިކާ ހިނިތުންވެލާފައި އޭނާގެ ކޮޓަރިއަށް ދިޔައެވެ. އައިކާ ކޮޓަރިއަށް ވަދެ އެއްޗެހި ބަދަލުކޮށްލައިގެން އެނދުގައި އޮށޯވެ އޮތްއިރުވެސް ވިސްނެނީ މާޒްއާމެދުގައެވެ. މާޒްގެ އާއިލާއަކީ އޭނާގެ އާއިލާއާއި ނުހަނު ގާތްކޮށް އުޅޭ އާއިލާއެކެވެ. އެހެންކަމުން އެދެމީހުންގެ މެދުގައި އެކުވެރިކަން އޮވެއެވެ. ނަމަވެސް މާޒް އޭނާއަށް ލޯބި ހުށަހަޅަން ފެށުމުން އެދެމީހުންގެ އެކުވެރިކަން މަޑުމަޑުން ބީރައްޓެހިކަމަށް ބަދަލުވަމުން ދިޔައީއެވެ. މިއަދު އޭނާއަށް ކަންތައް ކުރެވުނު ގޮތުން މާޒްއާ އޮތް އެކުވެރިކަން މުޅިން ކެނޑިދާނެހެން އޭނާއަށް ހީވަނީއެވެ. އެހެންވާކަށް ބޭނުމެއްނޫނެވެ. އޭނާގެ މަންމަ އަބަދުވެސް ރަނގަޅު ކުދިންނާއި ގުޅުން ނުކެނޑުމަށް ބުނެއެވެ. އެހެންވެއްޖެނަމަ އޭނާގެ މަންމަވެސް ވަރަށް ހިތްހަމަނުޖެހޭނެއެވެ. މާޒްއާ ބައްދަލުކޮށް އެކުވެރިކަން ބާއްވަން ބޭނުންކަމަށް ބުނަންވީބާއޭ އައިކާގެ ހިތަށްއެރިއެވެ. އެފަދަ ވިސްނުންތަކެއްގައި އޮއްވާ އޭނާއަށް ނިދުނު އިރެއްވެސް ނޭނގެއެވެ. ދެން އޭނާއަށް ހޭލެވުނީ އޭނާގެ މަންމަ ގޮވާ އަޑަށެވެ. ހަގަޑި ބައިވެއްޖެކަމަށް ބުނުމުން އައިކާއަށް ތެދުވެވުނު ގޮތްވެސް ނޭނގުނެވެ.

“އަޅެ މަންމަ ކީއްވެތަ ކުރިން ނުގޮވީ؟ މިރޭ ޖެހޭ ހަގަޑި ސާޅީސް ފަހަކަށް ދާން.. ދެން ނޭނގެ ގަޑިނުޖެހި ދެވޭނެކަމެއްވެސް..” އައިކާ ޝަކުވާގެ ރާގެއްގައި އެހެން ބުނެލުމަށްފަހު ތުވާލި ހިފައިގެން ފާޚާނާއާ ދިމާއަށް މިސްރާބުޖެހިއެވެ.

“މަންމައަށް ކިހިނެއްތަ އެނގޭނީ؟ ދަރިފުޅު ނުވެސް ބުނޭވިއްޔަ..” އެހެން ބުނެފައި ސަނާ އެކޮޓަރިން ނުކުތީ އަވަސްކުރުމަށް ބުނެފައެވެ. އައިކާ އަވަސްއަވަހަށް ފެންވަރާ ތައްޔާރުވެލައިގެން ނުކުތްއިރު ސަނާ ހުރީ ސައި ހަދާފައެވެ. އޭރު ގަޑިޖެހެން ހުރީ ފަސްމިނެޓެވެ. އެހެންކަމުން އޭނާ ހަމައެކަނި ސައިތަށި ބޯލައިގެން ދިޔައީ ގަޑިނުޖެހި ސްކޫލަށް ދެވޭތޯއެވެ. ސްކޫލް ހުރީ އައިކާގެ ގެއާ ފުދޭވަރަކަށް ދުރުގައިކަމުން، ހިނގުނު އެންމެ ބާރަކަށް ހިނގަމުން ބައެއް ހިސާބުތަކުން ދުވަމުން އައިކާއަށް ސްކޫލާއި ހަމައަށް ދެވުނީ ރަނގަބީލު އަޑަށެވެ. “އަލްޙަމްދުލިﷲ”އޭ ބުނަމުން އައިކާ ސްކޫލްތެރެއަށް ވަނީ އޭނާގެ އެންމެ ގާތް އެކުވެރިޔާ ލީންއާއެކުގައެވެ.

“އޭތް އިކާ.. ކޮބާ މިހާރުވެސް އެއްކަލަ މާޒް އިކާގެ ފަހަތުން އުޅޭތަ؟” ލީން ވަރަށް ގަޔާވެލާފައި އަހާލިއެވެ.

“މިއަދުވެސް މެންދުރު ގަޑީ ޕްރޮޖެކްޓް ހަދަން އައި ގަޑީގަ ފަހަތުން އައި.. އަހަރެން ބުނިން މިދުވަސްކޮޅު އަހަރެންނަށް އުނދަގޫނުކުރާށޭ.. ބުނީމަ އޯކޭއޭ ކިޔާފަ ގޮސްފި..” އައިކާގެ ޖަވާބުން ލީންއަށް ޗޮކެއް ކަނޑާލެވުނެވެ.

“ދެން އިކާ އޭނައަށް ޔެސްއޭ ބުނިނަމަ..”

“ލީން ޕްލީޒް! ތިނޫން ވާހަކައެއް ދައްކާ..” ލީންގެ ޖުމްލަ މެދުކަނޑާލަމުން އައިކާ ބުނެލިއެވެ. ލީންވެސް އިތުރަކަށް އެވާހަކަ ނުދެއްކީ، އެވާހަކަ ދައްކައިގެން އައިކާއާ ދެބަސްވާން ބޭނުންނުވާތީއެވެ.

އައިކާއަށް މާޒް ފެނުނީ އޭގެ ދެދުވަސް ފަހުން މާޒްމެންގޭ ފިހާރައިންނެވެ. އޭނާ ފިހާރައިން ނުކުތް ވަގުތާއި މާޒް ފިހާރައަށް ވަންނަން ދިމާކުރި ވަގުތުވީ އެއްވަގުތަކަށެވެ. މާޒް ގާތުގައި އެކުވެރިކަން ބާއްވަން ބޭނުންވާ ވާހަކަ ބުނަން މިއަށްވުރެ ރަނގަޅު ފުރުސަތެއް ނުލިބޭނެޔޭ އޭނާގެ ހިތަށްއެރިއެވެ. އެހެންކަމުން އޭނާ މާޒް ފިހާރައިން ނުކުންނަންދެން މަޑުކުރިއެވެ.

“މާޒް!”

“ކިހިނެއްވީ؟” މާޒް ހިނިތުންވެލަމުން އަހާލިއެވެ.

“މީ.. ވާހަކައެއް ބުނަންވެގެން..” އައިކާ ޖެހިލުންވެފައި ބުނެލިއެވެ.

“ކޮން ވާހަކައެއް؟ އަވަހަށް ބުނޭ.. އިކާގެ ކޮންމެ ވާހަކައެއްވެސް އަހަރެން އަޑުއަހާނަން..” މާޒް ވަރަށް ޝައުޤުވެރިވެފައި ބުންޏެވެ.

“މާޒްގެ ހުށަހެޅުން ޤަބޫލުނުކުރެވުނަސް އަހަރެން ބޭނުން އަހަރެމެން މެދުގަ ރަހުމަތްތެރިކަން އޮންނަން..” އައިކާ އެހެން ބުނެލުމުން މާޒް ކުޑަކޮށް ހީލިއެވެ.

“އަހަރެން ކޮންއިރަކު އިކާއާ ރުޅިވީ؟ އަހަރެން އަބަދުވެސް އިކާއާ ރައްޓެއްސޭ.. އިކާ އަހަރެން އިގްނޯރ ކޮށްލިޔަސް އެކަމަކާ އަހަރެންގެ ހިތުގަ އެއްވެސް އެއްޗެއް ނެތް.. އަހަރެން އަބަދުވެސް އިކާއަށް ހިތްހެޔޮ..” މާޒް އެހެން ބުނެލުމުން އައިކާ ހިނިތުންވެލިއެވެ. އަދި ދަނީއޭ ބުނެ ގެއަށް ދިއުމަށް ހިނގައިގަތެވެ. އައިކާ ގޮސް ގޯޅި އަޅަންދެން މާޒްއަށް ބަލަހައްޓައިގެން ހުރެވުނެވެ.

ދުވަސްތައް ފާއިތުވަމުން ދިޔައީ ނިކަން އަވަހަށެވެ. މާޒްއަށް އެހެން އަންހެންކުއްޖަކާ ދިމާއަށް އައިކާއާ ދޭތެރޭ ދުށް ނަޒަރަކުން ނުދެކެވެއެވެ. ދޭތެރެއަކުން މަގުމަތިން އައިކާއާ ދިމާވިނަމަވެސް ކުރީގައިހެން އައިކާގެ ފަހަތަކުން އޭނާއެއް ނޫޅެއެވެ. އޭނާގެ ސަބަބުން އައިކާގެ ކިޔެވުމަށް ހުރަސްއެޅެން އޭނާ ބޭނުންނުވަނީއެވެ. އައިކާވެސް މާޒްގެ އުނދަގުލެއް ނުފޯރުމާއެކު، ކުރީގައި އޮތްފަދަ ގާތް އެކުވެރިކަމެއް ނެތްނަމަވެސް މާޒްއާ އެއްކޮށް ގުޅުން ނުކެނޑޭތީ ހިތްހަމަޖެހިގެން ކިޔެވުމައިގެން ކުރިއަށް ދިޔައެވެ.

ރޭގަނޑުގެ ވަގުތެވެ. އައިކާ އިނީ އިތުރު ގަޑިއަކަށް ސްކޫލަށް ގޮހެވެ. އޭރު އަދި ކުލާހަށް ޓީޗަރު ނާންނާތީ އައިކާ އިނީ ލީންއާ ވާހަކައިގައި ޖެހިފައެވެ.

“އޭތް ތިއެއްނޫނޭ.. އަހަރެން ބުނީ މިހާރު އެއްކަލަ މާޒް އިކާ ފަހަތުން ނޫޅެނީތަ؟ މިހާރު ސްކޫލަށް އަންނަ ގަޑީވެސް ފަހަތުން އަންނަނިކޮށެއް ނުފެނޭވިއްޔަ.. އިކާ ކޮން ފަންޑިތައެއްތަ އޭނައަށް ތިހެދީ؟” ލީން ކުއްލިއަކަށް ކަމެއް ހަނދާންވެގެން އަހާލާފަދަ ގޮތަކަށް އަހާލިއެވެ. ލީން އެހެން ބުނެލިގޮތުން އައިކާ ގާތަށް ވަރަށް ހިނިއައެވެ.

“ނޭނގެ.. ބުނީމެއްނު އެއްކަލަ ދުވަހު އޭނަ ގާތު ބުނީމޭ އަހަރެންނަށް އުނދަގޫވާ ވާހަކަ.. އޭގެ ފަހަކުން އެގޮތަށް ފަހަތުންނެއް ނޫޅޭ.. އެކަމް މަގުމަތިން ފެނުނީމަ ކޮންމެވެސް ވަރަކަށް ވާހަކަދައްކާ.. އަހަރެންވެސް ބޭނުމީ އެގޮތަށް ފްރެންޑްސްގެ ގޮތުގަ އުޅެން…” އައިކާ އެހެން ބުނެލުމުން ލީންއަށް ބޯހޫރުވާލެވުނެވެ.

“އަޅެ އިކާ ތީ މޮޔައެއްތަ؟ މިޒަމާނުގަ މާޒް ކަހަލަ ރަނގަޅު މީހަކު ލިބޭނީ ވަރަށް ނަސީބު ރަނގަޅު މީހަކަށް.. ބަލާލަން ނުލާހިކު ރީތި.. މުއްސަނދި.. އަނެއްކޮޅުން އޭނަ އިކާދެކެ ކިހާ ލޯތްބެއް އެވަނީ.. އެހެންނޫންނަމަ އިކާ އެވަރަށް އޭނަ އިގްނޯރ ކުރިއިރުވެސް އިކާގެ ފަހަތުން މިހާދުވަސް ވަންދެން ނޫޅުނީހެއްނު.. އަނެއްކޮޅުން އިކާއަށް އުނދަގޫވާ ވާހަކަ ބުނީމަ ވަގުތުން ދުރަކަށްވެސް ނުދިޔައީހެއްނު.. ވިސްނަބަލަ..” ލީން ވަރަށް ވިސްނޭ މީހަކު ފަދައިން ވާހަކަދެއްކިއެވެ.

“އޭނަ ކިތަންމެހާވެސް ރަނގަޅު.. ރީތި އަދި މުއްސަނދި.. އޭނަޔާ ބަލާއިރު އަހަރެން މީ ކާކު؟ ނިކަމެއްޗެއް.. އެއްވެސް ގޮތަކުން އަހަރެމެން ދެމީހުން އެކަށީގެނެއްނުވޭ.. އެހެންނޫނަސް އަހަރެން ބޭނުންވަނީ ކިޔަވާ ނިމުނީމަ ތިކަހަލަ ކަމަކާ ވިސްނަންވެސް.. އެހެންނޫނީ އަހަރެންގެ ކިޔެވުން ހަލާކުވާނީ.. އެހެންވެއްޖެއްޔާ މަންމަމެން ކިހާ ދެރަވާނެ.. އެމީހުން އަހަރެންނާމެދު ދެކެމުން އައި ފޮނި ހުވަފެންތައް ފުނޑުފުނޑުކޮށްލާކަށް އަހަރެން ބޭނުމެއްނޫން..” އައިކާ ވަރަށް ސީރިއަސްވެފައި ބުންޏެވެ.

“އިކާ! އަހަރެން އިކާގެ ތިވާހަކަތަކަށް އިޙްތިރާމްކުރަން.. އެކަމް އަހަރެން ބުނެފާނަން ވާހަކައެއް.. އިކާއަކަށް މާޒްއަށްވުރެ ރަނގަޅު މީހަކު ލިބިދާނެހެނެއް ހިއެއްނުވޭ.. އިކާގެ ނިކަމެތިކަން އެނގިހުރެ އޭނަ އިކާގެ ފަހަތުން އެދުވަނީ..” ލީންގެ ވާހަކަތަކުން އައިކާގެ ހިތަށް ބިރުވެރިކަން ވަނީ އޭނާގެ ވިސްނުން ބަދަލުވެދާނެތީއެވެ. ނަމަވެސް އޭނާއަށް ހަމަޖެހުމުގެ ނޭވައެއް އެވަގުތު ކުލާހަށް ވަދެގެން އައި ޓީޗަރު ފެނިފައެވެ.

އެރޭގެ ފަހުން ލީން އައިކާ ގާތުގައި މާޒްގެ އެއްވެސް ވާހަކައެއް ނުދައްކައެވެ. ރޭގައި އައިކާގެ ފަރާތުން ފެނުނު ފަރުވާކުޑަކަމުން އޭނާ އިތުރަށް އެވާހަކަ ދައްކަން ބޭނުންނުވީއެވެ. އައިކާގެ އެ ވިސްނުމުގެ ސަބަބުން މާޒް ކަހަލަ ރަނގަޅު ޒުވާނަކު އައިކާގެ އަތުން ބީވެދާކަށް އޭނާ ބޭނުމެއްނޫނެވެ. ނަމަވެސް އޭނާ ދެން އިތުރަށް އައިކާއާ އެވާހަކަ ދައްކާނީ އައިކާގެ ވިސްނުން ބަދަލުވެގެން އަމިއްލައަށް އައިސް އޭނާ ގާތުގައި މާޒްގެ ވާހަކަ ދެއްކި ދުވަހަކުންނެވެ.

ދުވަސްތައް ފާއިތުވަމުން ގޮސް އޯލެވެލް އިމްތިހާން ފެށިއްޖެއެވެ. ރަނގަޅު ނަތީޖާއެއް ހޯދުމަށްޓަކައި އައިކާ ކިޔެވުމަށް ހޭދަކުރާ ވަގުތުތައް އިތުރުކުރިއެވެ. އެހެންކަމުން އިމްތިހާން ދުވަސްކޮޅު ލީންއާ ދިމާވަނީ ހަމައެކަނި ސްކޫލަށްދާ ގަޑީގައެވެ. ނަމަވެސް ކޮންމެ ދުވަހަކުވެސް މާޒްއާ ދިމާވެއެވެ. ދިމާވާ ކޮންމެ ފަހަރަކުވެސް ރަނގަޅަށް ކިޔެވުމަށް ނަސޭހަތްދެއެވެ. އައިކާ ރަނގަޅު ނަތީޖާއެއް ހޯދައިފިނަމަ އޭނާވެސް ވަރަށް އުފާވާނެކަމަށް ބުނެއެވެ. މާޒްގެ އެބަސްތަކުން އައިކާއަށް އިތުރު ހިތްވަރެއް ލިބެއެވެ.

އިމްތިހާންގެ އެންމެ ފަހު ޓެސްޓް ހަދާފައި ނުކުމެ އައިކާ އޭނާގެ ކުލާސް ކުދިންނާއެކު ވާހަކަދައްކާލަން އިރުކޮޅަކު މަޑުކޮށްލިއެވެ. އިރުކޮޅަކު ކުލާސް ކުދިންނާ ސަކަރާތް ޖަހާލަން ހުރެލާފައި އޭނާ ގެއަށް އަންނަން ހިނގައިގަތީ އޭނާ މާ ލަސްވެއްޖެނަމަ އޭނާގެ މަންމަ ކަންބޮޑުވާނެކަން އެނގޭތީއެވެ. އެހެންކަމުން އޭނާ އަވަސް ފިޔަވަޅުތަކެއްގައި އައިސް ގެ ހުންނަ މަގަށް ލަނބާލިތަނާ އެމަގުން ގޯޅި އެޅި މީހެއްގެ ގައިގައި ލައިގެންފައި އޭނާ ވެއްޓުނެވެ. އެއާއެކު އެމީހާގެ އެއްކޮނޑުގައި އަޅުވާލާފައިވާ ދަބަސް ވެއްޓުނެވެ.

“ވަޓް ދަ ހެލް..” އިވުނު ފިރިހެންވަންތަ އަޑާއެކު އައިކާއަށް ބަލާލެވުނެވެ. އައިކާ އެމީހާއާ ދިމާއަށް ބަލާލިއިރު އެމީހާ އޭނާގެ ދަބަސް ނަގައިގެން ތެދުވަނީއެވެ. އައިކާ އަވަސްއަވަހަށް ތެދުވިއެވެ. އެޒުވާނާގެ ރުޅިވެރި އަޑު އިވިފައިވެސް އޭނާ ހުރީ ޖެހިލުންވެފައެވެ.

“ތަންކޮޅެއް ބަލާލައިގެން އުޅެބަލަ..” އެޒުވާނާ ރުޅިވެރިކަމާއެކު އެހެން ބުނަމުން އައިކާއާ ދިމާއަށް އެނބުރުނު ގޮތަށް ހުއްޓުން އެރިއެވެ.

“ސޮރީ! ގަސްތުގައެއް ނޫން..” އައިކާ އެހެން ބުނުމަށްފަހު އަވަސްއަވަހަށް ގެއާ ދިމާއަށް ހިނގައިގަތެވެ. އައިކާ އެޒުވާނާ ފަސްދީ ތަންކޮޅަކަށް ދިޔަތަނާ އެޒުވާނާ ފަސްއެނބުރި ބަލާލިއެވެ.

“އިހަށް މަޑުކޮށްބަލަ..” އެޒުވާނާގެ އަޑު އައިކާއަށް ހަމަ ރަނގަޅަށްވެސް އިވުނެވެ. ނަމަވެސް އޭނާ އަޅާނުލާ ދިޔައީ އެއީ ބީރައްޓެއްސަކަށްވެފައި އެޒުވާނާގެ ރުޅިވެރިކަން ފެނިފައި ޖެހިލުންވި ވަރުންނެވެ.

“އަދި ބީރައްޓެއްސެކޭ.. އެކަމް ލަދެއްވެސް ނުގަތެއްނު ހަޅޭއްލަވައިގަންނާކަށް.. ޔަޤީން އެވާނީ މާލޭގެ މުއްސަންޖަކަށް.. އެކަހަލަ މީހުން ނިކަން ޒާތްކޮޅު ބޮޑުވާނެ..” އައިކާ ކުދިކިޔަމުން ދިޔައެވެ. މިދިމާވި ކަމަކުން އޭނާގެ މުޅި ދުވަސް ޚަރާބުވީއެވެ.

“އޭތް.. ދެން ދާންވީނު ގެއަށް.. މިހާރު އޭނަ ގޮސްފިޔޭ..” އައިކާ ދިޔަ ދިމާއަށް ބަލަހައްޓައިގެން ހުރި ޔޫޝައުގެ ކޮނޑުގައި ޖަހާލަމުން ލިހާމް ބުނެލިއެވެ. އެއާއެކު ސިހިފައި ޔޫޝައު ލިހާމްއަށް ބަލާލިއެވެ. އޭރު ލިހާމް ހުރީ ލާނެތް ފާޑަކަށް ހިނިއައިސްފައެވެ.

ލިހާމް، ޔޫޝައު ގޮވައިގެން ދިޔައީ އޭނާގެ މަންމަގެ ގެއަށެވެ. އެގެ ކުއްޔަށް ދީފައި ލިހާމްގެ މަންމަ އުޅެނީ ލިހާމްގެ ބައްޕަގެ ގޭގައެވެ. ޔޫޝައުއަށް ކޮޓަރި ދެއްކުމުން ޔޫޝައުއަށް އެކޮޓަރި ވަރަށް ކަމުދިޔައެވެ. އޭސީ ކޮށްފައި ނެތަސް އެކޮޓަރި އެހާ ތަނަވަސްވެފައި ކުޑަދޮރުލާފައި ހުރުމުން އޭނާ ވަރަށް ހިތްހަމަޖެހުނެވެ.

“އެއީ ބީރު ކުއްޖެއްތަ؟ ގޮވީމަ ބަލާވެސްނުލާ އެދިޔައީ..” ޔޫޝައު އެނދުގައި އޮށޯވެލަމުން އަހާލިއެވެ.

“ބަލާނެތަ؟ ފެނުނުއިރަށް ހަޅޭއްލަވައިގަތީވިއްޔަ ތި.. އެގޮތަށް ރުޅިއައިސްގެން ހަޅޭއްލަވައިގަތީމަ ކާކު ބަލާލާނީ؟ ބިރުންވެސް ދުވެ ފިލާނެއެއްނު..” ލިހާމް އެހެން ބުނެލުމުން ޔޫޝައު ކުޑަކޮށް ރަކިވިއެވެ.

“އަސްލު މަގޭ ލެޕް އޮންނާނެ މީގަ.. އެއަށް ގޮތެއް ވެއްޖެއްޔާ އެދިޔައީ ދުވަސް.. އެހެންވެ އަސްލު އެހާ ރުޅިއާދެވުނީ.. އެކަމް އެކުއްޖާ ފެނިފަ ނޭނގެ ވީގޮތެއްވެސް.. އެއީ ހާދަ ރީތި ކުއްޖެކޭ.. އެހާ ރީތި ކުއްޖެއް އަހަރެން ދުވަހަކުވެސް ނުދެކެން.. އެހެރަ ލޮލެއް.. އަހަރެންނަކަށް ނޭނގެ އެދެލޮލުން އަހަރެންނަށް އެޖެއްސީ ކޮންކަހަލަ ޖާދޫއެއްކަމެއް..” ޔޫޝައު ވަރަށް ފިލްމީ ގޮތަކަށް ބުނެލިއެވެ.

“މީހަކު ހަމަ ރަނގަޅަށްވެސް އިޝްޤުގަ ޖެހިއްޖެ.. އާނ އެހެންޏަ.. މާލޭގަ އުޅެ ބޮޑުވެ، ދުނިޔޭގެ އެތަންމިތާ ދަތުރުކޮށް އުޅޭއިރުވެސް ތިބުނީ އެހާ ރީތި ކުއްޖަކު ނުދެކެމޭ.. މީ ދެން އަޖައިބެއް..” ލިހާމް ޔޫޝައުއާ ދިމާކޮށްލިއެވެ.

“އަޖައިބަކަސް، އެހެން އެއްޗަކަސް އަހަރެންނަށް އެނގޭހާވެސް އެއްޗަކީ އަހަރެންނަށް އެކުއްޖާ ވަރަށް ކަމުގޮސްފިކަން..” ޔޫޝައު އެހެން ބުނުމުން ލިހާމް ހިނިގަނޑެއް ޖަހާލިއެވެ.

“އެކަމް އެކުއްޖާ ހާސިލްކުރުމަކީ ނުވާނެކަމެއްހެން އަހަރެންނަށް ހީވަނީ..”

“އެއީ ކީއްވެ؟” ޔޫޝައު ހައިރާންވެފައި އަހާލިއެވެ.

“އެއީ ވަރަށް ގޮތެއްގަ ހުންނަ ކުއްޖެއް.. ކިޔަވާ ނިމުނީމަ ނޫނީ މީހަކާ ރައްޓެހިވެސް ނުވާށޯ އެހުންނަނީ.. އެކަމަކު ބުނަން.. ވަރަށް އަޚްލާޤު ރަނގަޅުވާނެ.. މީހުންނަށް ވަރަށް ހެޔޮވާނެ..” ލިހާމް ބުންޏެވެ.

“އެހެންވިއްޔާ ތިވީ މާ ރަނގަޅަކަށްނު.. އަހަރެންނަށް ބޮޑަށް ކަމުދަނީވެސް ތިކަހަލަ ކުދިން..” ޔޫޝައު ބުނެލިއެވެ.

“އެހެންވީމަ ތިބުނީ ލަމްހާއަކީވެސް އޭގެ ކުއްޖެކޭ ދޯ؟” ލިހާމް އެހެން ބުނެލުމުން ޔޫޝައު ބޯޖަހާލިއެވެ.

“އެކަމް ތިހެން ކަންތައް ކޮށްފިއްޔާ ލަމްހާއަށް ވާނީ ކިހިނެއް؟”

“ލަމް އޯކޭވާނެ.. މީހަކަށް އެކަހަލަ ރަނގަޅު އަނތްބަކު ނުލިބޭނެ..” ޔޫޝައު އޭނާގެ ލޯބިވާ އަނބިމީހާ ލަމްހާއަށް ތަޢުރީފުކޮށްލިއެވެ.

“ދެން އެހާ ރަނގަޅު އަނތްބަކު ހުއްޓާ އެހެން މީހަކު ތި ހޯދަނީ ކީއްކުރަން؟” ލިހާމް ކުޑަކޮށް ހައިރާންވެފައި އަހާލިއެވެ.

“އަސްލު އަހަރެންވެސް ފުރަތަމަ ބޭނުމެއްނުވޭ އިތުރު ކައިވެންޏެއް ކުރާކަށް.. އެކަމަކު ލަމް ބޭނުންވަނީ އަހަރެން އިތުރު މީހަކާ އިންނަން.. މިހާރު ހައެއްކަ އަހަރު ވެދާނެ އެހެން ކިޔާތާ.. އެކަމަކު އަހަރެން މިހުރިހާ ދުވަހު އެކަމާ ދެކޮޅު ހަދަމުން މިއައީ..” ޔޫޝައުގެ ވާހަކައިން ލިހާމްގެ ހައިރާންކަން އިތުރުވެގެން ދިޔައީ ޔޫޝައު އިތުރު ކައިވެންޏެއް ކުރަން ބޭނުންވެގެން އެއުޅެނީ ލަމްހާ ބޭނުންވެގެންކަމަށް ބުނުމުންނެވެ.

“އެކީއްވެ؟” ލިހާމް ހައިރާންކަމާއެކު އަހާލިއެވެ.

“އެއީ އަހަރެން ބޭރުގަ ކިޔަވަން ހުއްޓާ ދިމާވި ކަމެއް.. އަހަރެން ދިޔައީ ލަމްވެސް ގޮވައިގެން.. އޭރު އަހަރެމެން މެރީކުރިތާ އަދި އެއްއަހަރު.. ލަމްގެ ބަނޑަށް ދެމަސްވީ ދުވަސް އެއީ.. ދިމާވި އެކްސިޑެންޓެއްގަ އެބޯރޓްވީ.. އެފަހަރު ޑޮކްޓަރ ބަލާފަ ބުނީ ލަމްއަކަށް ދެން ކުއްޖަކު ލިބޭނެހެނެއް ހިއެއްނުވެޔޭ.. އަހަރެމެން ވަރަށް ގިނަ ތަންތަނަށް ގޮސް ބޭސްވެސް ކުރިން.. އެކަމް ވާން ނެތްކަމެއް ނުވާނެއެއްނު ދޯ.. އަހަރެންވެސް ކުއްޖަކު ބޭނުންވޭ.. ލަމްވެސް ބޭނުންވޭ.. އެހެންވެ ލަމް އެދުނީ އަހަރެން އިތުރު ކައިވެންޏެއް ކުރަން.. އެކަމް އަހަރެން އެކަމާ ދެކޮޅު ހަދަމުން އައީ މިހުރިހާ ދުވަސް ވަންދެން.. އެއީވެސް ލަމްއަށް ދެރައެއް ލިބިދާނެތީ.. އެކަމަކު އައިކާ ފެނުނުފަހުން އަހަރެންގެ ޚިޔާލު މުޅިން ބަދަލުވެއްޖެ.. ލަމް އަދިވެސް ހަމަ އަހަރެން ގާތު ކިޔަނީ އިތުރު މީހަކާ މެރީކުރަން.. ލިހޭ ބުނެބަލަ ދެން އަހަރެން ހަދާނެ ގޮތެއް..” ޔޫޝައުގެ އަޑުގައިވާ އަސަރަކުން ލިހާމްވެސް ދެރަވިއެވެ.

“ކީކޭ ދޯ ދެން ބުނާނީ؟ އެކަމަކު އެކުއްޖާއާ ޔޫޝައުއަކާ އެކަށީގެނެއްނުވޭ.. އެއީ ވަރަށް ނިކަމެތި ކުއްޖެއް..” ލިހާމް އެހެން ބުނެލުމުން ޔޫޝައުގެ ހިނިތުންވުން ފުންވެގެން ދިޔައެވެ.

“ކީއްވެ ފާޑަކަށް ހީފަ ތި އިންނަނީ؟” ޔޫޝައުގެ ތުންފަތުގައިވާ ހިނިތުންވުން ފެނި ލިހާމް އަހާލިއެވެ.

“ކަމެއްނުވޭ.. ލިހޭގެ ވިސްނުން ތިހުންނަ ގޮތަކުން މި އިނދެވުނީ.. އާނ އެހެންޏަ.. މާލެ ކަހަލަ ތަހުޒީބުވެފައިވާ ތަނެއްގަ ތަޢުލީމު ލިބިގެން ބޮޑުވެފަ ހުރި ތިކަހަލަ ޒުވާނަކު އެހާ ބޯދާ ވިސްނުމެއް ގެންގުޅެފާނެކަމަށް ކާކު ހީކުރާނީ؟” ޔޫޝައު އެހެން ބުނެލުމުން ލިހާމް ފާޑަކަށް ބަލާލިއެވެ.

“ހަމަ ޔޫޝައުތަ ތިހެން ތިބުނަނީ؟” ހައިރާންވެފައި ލިހާމް އަހާލިއެވެ. ޔޫޝައުއަކީ އަބަދުވެސް ފަޤީރުންދެކެ އެހާ ރުޅިއަންނަ މީހެކެވެ. ވީއިރު މިއަދު ކުއްލިއަކަށް އޭނާގެ ވިސްނުން ބަދަލުވުމުން ހައިރާންވާނެ ނޫން ހެއްޔެވެ؟

“އާނ.. ހަމަ އަހަރެން.. އެނގޭ ވަރަށް ހައިރާންވެފަކަން ތިއިނީ.. އެކަމަކު އެއީ މާޒީ.. އޭރު އަހަރެންނަށްވެސް ނުވިސްނުނީ.. އެކަމަކު މިހާރު ވިސްނިއްޖެ..” ޔޫޝައު ސީރިއަސްކަމާއެކު އެހެން ބުނެލުމުން ލިހާމްއަށް ހީލެވުނީ އެކުވެރިޔާގެ ވިސްނުން ބަދަލުވެފައިވާކަން ޔަޤީންވުމުންނެވެ.

“އެހެންވީމަ އައިކާ ހަމަ ރަނގަޅަށްވެސް ޔޫޝައުއަށް ޖާދޫއެއް ޖައްސައިފިތާ..” ލިހާމް ދިމާކުރާފަދަ ގޮތަކަށް ބުނެލިއެވެ.

“އައިކާއޭ!! އެކުއްޖާއަށް ކިޔަނީ އައިކާތަ؟” ޔޫޝައު އެހެން ބުނެލުމުން ލިހާމް ބޯޖަހާލިއެވެ.

“ދެން ހިނގާ ގޭދޮށަށް ދަމާ.. މިހާރު މާޝާ ހުންނާނެ އަހަރެމެންގެ އިންތިޒާރުގަ..” ލިހާމް އެހެން ބުނުމާއެކު ޔޫޝައު ތެދުވެ އަވަހަށް ހިނގާށޭ ބުނެލިއެވެ.

“އުހުނ.. އިހަށް މަޑުކޮށްބަލަ.. މި ލެޕަށް ގޮތެއްވިތޯ ބަލާފަ ދެވޭނީ..” ޔޫޝައު އެހެން ބުނުމާއެކުހެން ދަބަސް ހުޅުވާލާފައި ލެޕްޓޮޕް ނެގިއެވެ. އަދި އަވަސްއަވަހަށް ލެޕްޓޮޕް ހުޅުވޭތޯ ބެލިއެވެ. ނަސީބަކުން އެއްވެސް މައްސަލައެއް ދިމާނުވެ ހުޅުވުނެވެ.

“އަލްޙަމްދު ލިﷲ!! ނަސީބަކުން އެއްވެސް ގެއްލުމެއް ލިބިފައެއް ނެތް.. ދެން ހިނގާ ދަމާ..” ޔޫޝައު އެހެން ބުނެލަމުން ލެޕްޓޮޕް މޭޒުމަތީގައި ބެހެއްޓިއެވެ. އަދި ލިހާމްއާއެކު ކޮޓަރިން ބޭރަށް ނުކުމެފައި ތަޅުލިއެވެ. ދެން ދެމީހުން ހިނގައިގަތީ ލިހާމްމެން އުޅޭ ގެޔާއި ދިމާއަށެވެ.

**********

އެ ލިހާމްއަށްވެސް އެކުވެރިވާން އެނޫން މީހަކު ނުލިބުނީ ހެއްޔެވެ؟ އެއީ ހާދަހާ ގޮތެއްވެސްނެތް މީހެކެވެ. ނޫންނަމަ ރަށަށް އަރައިގެން އަންނަ ގޮތަށް ރަށު މީހަކާ ދިމާއަށް އެގޮތަށް ހަޅޭއްލަވައިގަންނާކަށް ނުކެރުނީހެވެ. ހިތާހިތުން ކުދިކިޔަމުން ގޮސް އައިކާ ގެއަށް ވަނީ ޔުނީފޯމުގައި ހުރި ހިރަފުސްތައް ފޮޅަމުންނެވެ.

“އަނހާ ދަރިފުޅާ.. ކިހިނެއްވީ؟ ޔުނީފޯމު ހާދަ ހަޑިވެފަ..” ސަނާއަށް އައިކާ ފެނުމާއެކު ބުނެލިއެވެ.

“އާނ.. އެއީ އަންނަނިކޮށް ކުޑަ އެކްސިޑެންޓެއްވީ..” އައިކާ އެހެން ބުނުމާއެކުހެން ސަނާ އައިސް އައިކާ ގާތުގައި ހުއްޓުނެވެ. އަދި އައިކާއަށް ކަމެއްވެފައި ހުރިތޯ ބަލަން ފެށުމުން އައިކާ ގާތަށް ކުޑަކޮށް ހިނިއައެވެ. ނަމަވެސް އޭނާގެ މަންމަ އޭނާދެކެ ވާލޯބި އެނގޭތީ ނުހަނު އުފާވެސްވިއެވެ.

“މަންމާ! އަހަރެންނަކަށް ކަމެއް ނުވެޔޭ.. މަންމަ ތި ހީކުރާ ކަހަލަ އެކްސިޑެންޓެއް ނޫނޭ..” އައިކާ ވީގޮތް އޮޅުންފިލުވައިދިނުމުން ސަނާ ދެފަރާތަށް ބޯހޫރާލިއެވެ. ނަމަވެސް އައިކާ އެމީހާގެ ކިބައިން މާފަށް އެދިފައި އައީތީ އެކަމާ އޭނާ އުފާކުރިއެވެ.

ޖެހިގެން އައި ދުވަހެވެ. އައިކާ އިރުއަރާ މަންޒަރު ބަލާލުމަށްޓަކައި އަތިރިމައްޗަށް ދިޔައެވެ. އެއީ ސްކޫލް ބަންދު ދުވަސްތަކުގައި އޭނާ އާންމުކޮށް ކޮށްއުޅޭ ކަމެކެވެ. އޭނާ ގޮސް ރާޅުޖަހާ ފަށުގައި ހިނގާލުމަށްފަހު ތަންކޮޅެއް އެއްގަމަށް އަރާ ވެލިގަނޑުމަތީގައި އިށީނދެލިއެވެ. އޭރު އުދަރެހަށް ވަނީ އިރުގެ އަލިކަން ވެރިވާން ފަށައިފައެވެ. އައިކާ ކޮޅުކޮޅުމައްޗަށް ލޯހިންގާލިއެވެ. އެވަގުތު އޭނާގެ ހަރަކާތަށް ހުއްޓުމެއް އައީ ފެނުނު ހިތްގައިމު މަންޒަރަކުންނެވެ.

މޫދުގެ ލޮނުގަނޑު ތެރެއިން ބޯހިއްލާލި ޒުވާނާ ފުރަގަސްދީގެން ހުރުމުން އެއީ ކާކުކަން ނޭނގުނުނަމަވެސް އެޒުވާނާގެ ހަށިގަނޑަށް ބަލާލުމުން އެއީ ޤަވާއިދުން ކަސްރަތުކޮށް އުޅޭ މީހެއްކަން އެނގެއެވެ. ފުރަގަހުން ފެންނައިރުވެސް އެހަށިގަނޑުގެ ވަރުގަދަކަން އަންދާޒާކޮށްލެވޭހާވެއެވެ. އެޒުވާނާ ބޮލުގައި އަތް ހިންގާލި ވަގުތު މީދާ މަސްގަނޑު އުފުލިލައިގެން ދިޔަގޮތުންވެސް އައިކާގެ މެއަށް ފިނިވެގެން ދިޔައެވެ. އެޒުވާނާގެ ރީތިކަމުން އޭނާގެ ހިތަށް ގުޑުމެއް އަރައިފިކަން ޔަޤީނެވެ. އެޒުވާނާގެ މޫނު ދެކެލުމުގެ ޝައުޤުވެރިކަން އުފެދިގެން ދިޔައީ ކެތްނުކުރެވޭހާ ވަރަށެވެ. އެޒުވާނާ އެއްގަމަށް އަރަންވެގެން އެނބުރިލިތަނާ އައިކާ ފެނިފައި ފާޑަކަށް ހުއްޓުން އަރާފައި ހުއްޓެވެ. އައިކާއަށް އެޒުވާނާގެ މޫނު ފެނިފައި އަނގައަށް ގޮތެއް ހަދާލެވުނީ އެއީ އިއްޔެގައި ލިހާމްއާއެކު ރަށަށް އައި ބީރައްޓެހި މީހާކަން އެނގުމުންނެވެ.

އައިކާ އެތަނަށް އައީ ހިތްހަމަޖައްސާލަން ކަމަށްވިޔަސް އެޒުވާނާ ފެނުނު ހިސާބުން އޭނާގެ ހިތުގެ ހަމަޖެހުން ގެއްލިއްޖެއެވެ. އޭނާ ދެން ހަދަންވީ ގޮތެއް ނޭނގިފައި އިންދާ އެޒުވާނާ މަޑުމަޑުން އެއްގަމަށް އަރަން ހިނގައިގެންފިއެވެ. އެޒުވާނާގެ ފަލަމަސްގަނޑާއި ހަމައަށް ފެންނަ ހިސާބަށް އައިތަނާ އައިކާއަށް ދެލޯ ބޮޑުކޮށްލެވުނީ އެޒުވާނާ ގަޔަށް ފިޓް ބޮކްސާއެއް ފިޔަވާ އެއްވެސް އެއްޗެއް ލާފައި ނެތުމުންނެވެ. އޭރުވެސް އެޒުވާނާގެ ނަޒަރު ހުއްޓިފައި ހުރީ އައިކާއަށެވެ. އައިކާ އަވަސްއަވަހަށް ތެދުވިއިރު އެތާ އޮތް ސޯޓު ނެގުނުކަމެއްވެސް އޭނާއަކަށް ނޭނގުނެވެ. އޭނާ ހުރީ އެއިން ކަމެއް ވިސްނޭވަރަށްވުރެ ލަދުގަނެ ބިރުވެސްގަނެފައެވެ. މިއީ އަދި ލަދެއްވެސް ގަންނަ މީހެއް ނޫންތާއެވެ. އިއްޔެގައި އޭނާއާ ދިމާއަށް ފާޑަކަށް ބަވާލީއެވެ. މިއަދު އެހުރީ ހަމައެކަނި ބޮކްސާއެއްގައި މޫދަށް އެރިއެވެ. ގައިމު އެއީ ފަރަންޖީއެއްވެސް ނޫންވިއްޔާއެވެ. ކޮންމެވެސް ވަރެއްގެ ލަދެއް ގަންނަންވާނެ ކަންނޭނގެއެވެ. ހިތާހިތުން އެޒުވާނާއާ ދިމާއަށް އެއްޗެހި ކިޔަމުން ގެއާ ދިމާއަށް ހިނގައިގަތެވެ. އެއާއެކު އެޒުވާނާ އޭތްއޭ ކިޔާ އޭނާއަށް ގޮވިއެވެ. އޭނާއަށް ފަސްއެނބުރި ބަލާލެވުނުއިރު އެޒުވާނާ ބާރުބާރަށް އޭނާއާ ދިމާއަށް ހިނގާފައި އާދެއެވެ.

މި ގޮތްކުޑަ މީހާ އޭނާއަށް ކޮންމެފަދަ ގޮތެއްވެސް ހަދާފާނެއެވެ. އޭނާގެ ޢިއްފަތް ނަގާލާފައި މަރާލިޔަސް އެކަކަށް އެކައްޗެއްވެސް ނޭނގޭނެއޭ ހިތަށް އެރުމުން އައިކާ ދާހިއްލާލީ ބަސްބުނާހާ ހިނދުންނެވެ. ހިތް ތެޅިގަތީވެސް އޮބިނޯންނަ ވަރަށެވެ. ގަތްބިރުން އައިކާ ދުއްވައިގަތެވެ. އިރުއިރުކޮޅާ ފަހަތް ބަލާލައެވެ. އެޒުވާނާވެސް ދުވަމުން އާދެއެވެ. އަތިރިމަތީގެ އެ މަޑު، ދޮންވެލިގަނޑުގައި އައިކާއަށް ބާރަށް ދުވެވޭގޮތެއް ނުވިއެވެ. އިސާހިތަކު އެޒުވާނާ އައިސް އޭނާގެ ކުރިމައްޗަށް އަރާ ކުރި ބައްދައިފިއެވެ. އައިކާއަށް ބިރުން ފަހަތަށް ޖެހެވެން ފެށިއިރު އެދެލޯ ފެންކަޅިވެސް ވެއްޖެއެވެ. އައިކާ ބިރުގަތީކަން ޔަޤީންވުމުން އެޒުވާނާގެ ހިތަށްއެރީ ކީކޭކަމެއް ނޭނގެއެވެ. ކުއްލިއަކަށް އައިކާއާ ދިމާއަށް އެއްލޯ މަރާލާފައި އަތް ދިއްކޮށްލުމުން އައިކާއަށް ގަތްބިރުން އަނެއްކާވެސް ދުއްވައިގަނެވުނެވެ. ނަމަވެސް އެވަގުތު ކަކުނި ހޮރަކަށް ފައި ގަނބައިގަނެފައި އޭނާ އެތަނަށް ގުޅައަކަށް ޖެހިއްޖެއެވެ. މި ނުލަފާ މީހާގެ އަތްދަށުގައި ހަމަ ރަނގަޅަށްވެސް ހައްޔަރުވީއޭ އައިކާގެ ހިތަށް އެރިއެވެ.

އައިކާ ވެއްޓުނުގޮތް ފެނުމުން އެޒުވާނާ ގާތަށް ހިނިއައި ނަމަވެސް ހިނިގަނޑު އެތެރެއަށް ހިންދާލަމުން އައިސް އައިކާއާ ތަންކޮޅެއް ދުރުން ތިރިވެ ހަތަރެސްފައި ޖަހައިގެން އައިކާއާ ދިމާއަށް ދާން ފެށިއެވެ.

ނުނިމޭ

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: