“ކީއްކުރާނީ؟ އެންމެންނަކަށް އެނަސީބެއްވެސް ނުލިބޭނެ.. ހަމައެގޮތަށް އަހަރެންނަކަށްވެސް ދަރިންނެއް ނުލިބޭ..” ލަމްހާ އެހެން ބުނެލުމުން އައިކާއަށް ލިބުނީ ކުއްލި ސިހުމެކެވެ. އޭނާ ލަމްހާއަށް ބަލާލީ ހަމަ ތެދެއްހޭ އަހާލާފަދަ ގޮތަކަށެވެ.
“އާނ އައިކާ.. އަހަރެންނަކަށް ދަރިންނެއް ނުލިބޭ.. ޔޫޝައުވެސް އަހަރެންވެސް ދަރިއަކު ބޭނުން.. އަހަރެން ބުނެގެން ޔޫޝައު އެހެން މީހަކާ އިންނަން ނިންމީ.. އަހަރެން ވަރަށް ދުވަސްވެއްޖެ ޔޫޝައު ގާތު ދެވަނަ ކައިވެންޏެއް ކުރަން ކިޔާތާ.. އެކަމަކު އޭނަ އެއްބަހެއްނުވި.. އެހެން އުޅެނިކޮށް އޭނަ ތިރަށަށް ދިޔައީ.. އެ ގޮސް އުޅެނިކޮށް އެއްދުވަހަކު ގުޅާފަ ބުނީ މާ ކަމުދާ ކުއްޖަކު ފެނުނު ވާހަކަ.. އެކުއްޖާއާ އިންނަން ނިންމި ވާހަކަވެސް.. އަހަރެން ވަރަށް ކީން ފޮޓޯއެއް ދައްކާލަން.. އެކަމް ނުދެއްކި.. ނަން އެކަނި ބުނީ.. އެއީ އައިކާ..” ލަމްހާ އޮޅުންފިލުވައިދިނެވެ.
“ސޮރީ! އަހަރެންނަކަށް ނޭނގެ ލަމްއަށް ދަރިން ނުލިބޭ ކަމެއް.. އެކަމްވެސް އުއްމީދު ކަނޑާނުލައްޗޭ.. މާތް ﷲ ކޮންމެ ކަމަކަށްވެސް ކުޅަދުންވަންތަވެގެންވޭ.. އަދި އިރާދަކުރެއްވިއްޔާ ލަމްއަށްވެސް ދަރިން ލިބޭނެ..” އައިކާ ބުނެލިއެވެ.
“އާނ.. އަހަރެން އެއްއިރެއްގަވެސް އުއްމީދު ކަނޑައެއްނުލަން.. އެކަމް ޔޫޝައު އެވާހަކަ ނުދެއްކިޔަސް އަހަރެންނަށް އެނގޭ ޔޫޝައު ކުއްޖަކު ބޭނުންވާވަރު.. ކިތަންމެ އުއްމީދެއް ކުރިޔަސް އަހަރެންނަށް ކުއްޖަކު ލިބޭނެ ދުވަހެއް އެނގެނީކީ ނޫން.. އެހެންވެ އެހާ ދުވަހު އޭނަ ދަރިއެއްގެ ލޯބިން މަޙުރޫމުނުކުރަންވެގެން އޭނައަށް އެފުރުސަތު ދޭން ބޭނުންވާތީ އަހަރެން ބުނީ އޭނަ ގާތުގަ ދެވަނަ ކައިވެންޏެއް ކުރަން..” ލަމްހާ އެހެން ބުނެލުމުން އައިކާ ހީލިއެވެ. މިއީ ހާދަހާ މާތް އަންހެނެކެވެ. އަމިއްލަ އުފަލަށްވުރެ އެހެންމީހުންގެ އުފާތަކަށް އިސްކަންދޭނީ ކިހާ މާތްވީމަ ހެއްޔެވެ؟ ގައިމު ހިތުގައި ކޮންމެވެސް ވަރެއްގެ ހަސަދަވެރިކަމެއްވެސް އުފެދޭނެ ނޫން ހެއްޔެވެ؟ އަނެއްކާ ލަމްހާގެ ހިތުގައި އެފަދަ ޝުއޫރެއްވެސް ނުއުފެދެނީބާއެވެ. އައިކާގެ ހިތަށް ތަފާތު އެއްޗެހިތަކެއް އަރާފައިބަމުން ދިޔައެވެ.
“ބުނާއަޑު އަހަން ފިރިން ދެއަނތްބަށް އިންނަން އަނބިމީހާ ނުރުހޭ ވާހަކަ.. އެކަމް އަނބިމީހާ ބޭނުންވެގެން ފިރިމީހާ ދެއަނތްބަށް އިންނަން އުޅޭ ވާހަކަވެސް އަޑު މިއެހީ އަލަށް.. ލަމްގެ ހިތަށް ހަމަ އެއްވެސް އެއްޗެއް ނާރާތަ ފިރިމީހާ އެހެން މީހަކަށް ދޭއިރު؟” އަހަން ނާހަން އިނދެފައިވެސް އައިކާ އޭނާގެ ހިތުގައި އުފެދުނު ސުވާލުކޮށްލިއެވެ.
“އާނ.. ތީ ހަމަ ތެދު ވާހަކައެއް.. އެކަމް އަހަރެން ބުނާނީ އެއީ ބައެއް އަންހެނުންނަށް ނުވިސްނޭތީއޭ ދެކޮޅު ހަދަނީ.. ފިރިމީހާގެ އިހުސާސްތަކަށް އިޙުތިރާމް ނުކުރާތީއޭ.. ދެން މިހެން ބުންޏަސް އަސްލު ދިމާވެފަ ހުންނަ ކަންކަމުންވެސް އެހެންވޭ.. ބައެއް ފިރިހެނުން ދެވަނަ މީހަކާ އިނީމަ ފުރަތަމަ އަނބިމީހާ މަތިން ހަނދާންނެތޭވަރުވޭ.. ދޮށީ އަނތްބަށް އަޅައެއްނުލާނެ.. އަބަދު ހަގު އަނބި ދަށުވެގެން އުޅޭނީ.. އެކަމް އުފާކުރަން ޖެހޭ ކަމަކީ މަދުން ނަމަވެސް ރަނގަޅު ދިރިއުޅުމެއް އުޅޭ ބަޔަކުވެސް އުޅޭކަން.. ދެއަނބިން ތިން އަނބިން ގޮވައިގެންވެސް..” ލަމްހާ އޭނާ ޤަބޫލުކުރާ ގޮތް ހާމަކުރިއެވެ.
“ދެން އައިކާ ތިބުނީ ޖެލަސީގެ ވާހަކަ.. އަހަރެންގެ ހިތަކަށް މާބޮޑު އެއްޗެއް ނާރާ ފިރިމީހާ އެހެން މީހަކާ ހިއްސާކުރާކަށް.. އެއީ އަހަރެންނަށް ޔޫޝައުއާ ދޭތެރޭ ފުރިހަމަ ޔަޤީންކަން އެބައޮތް.. އައިކާ ބުނެބަލަ.. ހުއްދަ ގޮތުގައި އެކަން ކުރުމުގަ އޮތީ ކޮން މައްސަލައެއް؟ ނޫންތަ؟” ލަމްހާ އެހެން ބުނެލުމުން އައިކާވެސް ބޯޖަހާލިއެވެ. އައިކާ ހަޤީޤަތުގައި އެސުވާލު ކުރީ ޔޫޝައު އޭނާއާ ދެއަނބަށް އިންނަ ވާހަކަ ބުނި ދުވަހު އޭނާއަށް ކުރެވުނު އިހުސާސްތަކުގެ މަތިން ހަނދާންވުމުންނެވެ. އޭނާ ބޭނުންނުވި ނަމަވެސް އެދުވަހު އޭނާގެ ހިތުގައި ހަސަދަވެރިކަމެއް ހިނގާލިއެވެ. ނަމަވެސް އެހުރިހާ ކަމެއް އެއްފަރާތްކޮށްލާފައި އޭނާ ޔޫޝައުގެ އަނތްބަކަށްވާން އެއްބަސްވީ ޔޫޝައުދެކެ އޭނާއަށް މާބޮޑަށް ލޯބިވެވިފައި ވާތީއެވެ.
“ރަނގަޅު ވާހަކައެއް..” އައިކާ އެހެން ބުނެލިތަނާ ލަމްހާގެ ފޯނު ރިންގުވިއެވެ. ލަމްހާ ބަލާލިއިރު ގުޅަނީ ޔޫޝައުއެވެ. އޭނާ އައިކާއަށް ފޯނުގެ ސްކްރީން ދައްކާލާފައި ތެދުވެގެން އެއްފަރާތަކަށް ޖެހިލާފައި ފޯނު ނެގިއެވެ.
“ކޮންތާކަށް ތިދިޔައީ؟ އަހަރެން ހީކުރީ ގެއަށްކަމަށް އަންނާނީ..” ލަމްހާ ފޯނު ނެގުމާއެކު ޔޫޝައު ބުނެލިއެވެ.
“ކުޑަކުދިންގެ ބަގީޗާގަ މިތިބީ..”
“އަނެއްކާ މިއަދުވެސް.. އަހަރެން ކިތައް ދުވަހު ލަމް ގާތު ބުނާނީ ތިތަނަށް ނުދާށޭ.. ހަމަ ކޮންމެ ފަހަރަކުވެސް ތިތަނަކަށް ގޮސްފަ އައިސް ރޯނެ.. އަހަރެންނަށް މިހާރު ކިތައްފަހަރު ހަނދާން ކޮށްދެވިއްޖެތަ ލަމް ރޯތަން ބަލާކަށް އަހަރެންނަކަށް ފަސޭހައެއް ނޫނޭ.. ލަމް ރޮންޏާ އަހަރެންނަށް އަސަރުކުރާވަރު ލަމްއަށް މިހާރު އެނގެން ވެއްޖެހެން އަހަރެންނަށް ހީވަނީ..” ކުއްލިއަކަށް ޔޫޝައުގެ ވާހަކަދެއްކުމުގެ ރާގަށް ހިތްހަމަނުޖެހުމުގެ އަސަރު ވެރިވިއެވެ.
“ސޮރީ! ރުޅި ނާދެބަލަ.. ދެން ނާންނާނަން މިތަނަކަށް..” ލަމްހާ ދެރަވެފައި ބުނެލިއެވެ.
“އާނ.. ތިނިމުނީއޭ.. ކޮންމެ ފަހަރަކުވެސް ތިހެން ބުނަނީ.. އެކަމް ހަމަ އަނެއްދުވަހު އިރުއަރާއިރަކު ނޯންނާނެ ތިބުނާ ނާންނާނަމޭ، ނުދާނަމޭގެ ހަނދާނެއް.. ހަމަ ހަވީރު ވާއިރަށް ދާނެ ތިތަނަކަށް.. އާދޭ ގެއަށް..” އެހެން ބުނެލުމަށްފަހު ޔޫޝައު ފޯނު ކަނޑާލީ އިތުރަށް ވާހަކަދައްކަން ވެއްޖެނަމަ ޒުވާބަކަށް ބަދަލުވެދާނެތީއެވެ. އޭނާއަށް ލަމްހާއާ ވާހަކަދެއްކުނީ ރަނގަޅަށް ނޫންކަންވެސް އޭނާއަށް އެނގެއެވެ. ނަމަވެސް ލަމްހާ އެތަނަށްދާ ކޮންމެ ދުވަހަކުވެސް ގެއަށް އައިސް ރޮއިރޮއިފައި އޭނާގެ ނުކުޅެދުންތެރިކަމުގެ ވާހަކަދައްކައެވެ. އެހެންކަމުން އޭނާ އޮންނަނީ ލަމްހާއަށް އެތަނަށް ދިއުން މަނާކޮށްފައެވެ. އެހެނީ ލަމްހާގެ ލޮލުން އެންމެ ކަރުނަ ތިއްކެއްވެސް ވެއްޓުމަކީ އޭނާއަށް ކެތްވާވަރުގެ ކަމެއްނޫނެވެ.
“ހިނގާ ދާން.. މިހާރު އިރުއޮއްސެނީނު.. ބުނީމެއްނު އިރުއޮއްސުމުގެ ކުރިން ގެއަށް ދާންޖެހޭ ވާހަކަ..” އައިކާގެ ގާތަށް އަންނަމުން ލަމްހާ ބުނެލިއެވެ.
“އާނ.. ހިނގާ ދަމާ ދޯ.. އަދިވެސް އެއްފަހަރު ވަރަށް ބޮޑަށް ސޮރީ އިނގޭ އެވާހަކަ ދެއްކުނީމަ..” އައިކާ ދެވަނަ ފަހަރަށްވެސް މާފަށް އެދުމުން ލަމްހާ އެއީ އެއްވެސް ކަމެއް ނޫންކަމަށް ބުނެލިއެވެ. އައިކާ ގެއަށްލާފައި ލަމްހާ ގެއަށް ދިޔައިރު ޔޫޝައު އިނީ އޭނާގެ އިންތިޒާރުގައެވެ.
“ލަމްހާއަށް ކީއްވެތަ އަހަރެން ބުނާ އެއްޗެހި އަޑު ނީވެނީ؟ އަހަރެން މީ ލަމްހާގެ ފިރިމީހާއެއް ނޫންތަ؟” ޔޫޝައު ހިތްހަމަނުޖެހިފައި އެހެން ބުނެލުމުން ލަމްހާ ވަރަށް ދެރަވިއެވެ. މިއަދު ނޫނަސް އޭނާ ބަގީޗާއަށްދެއެވެ. ނަމަވެސް މިއަދު ރުޅިއައި ވަރަކަށް ޔޫޝައު އެއްދުވަހުވެސް ރުޅިއެއް ނާދެއެވެ. ކޮންމެވެސް އެހެން ސަބަބެއް އެކަމުގައި ވާނެޔޭ ލަމްހާގެ ހިތް ބުންޏެވެ. އޮފީހުން ހިތްހަމަނުޖެހޭ ކަމެއް ދިމާވީ ކަންނޭނގެއެވެ. އެކަމަކުވެސް އެކަމުގެ ރުޅި އޭނާއަށް ބާލަން ޖެހޭ ހެއްޔެވެ؟
“އެނގޭ.. އަޑުވެސް އިވޭ.. އެކަމަކުވެސް އަހަރެންނަށް ނުގޮސް ނުހުރެވެނީ.. ކުޑަކުދިންދެކެ ވާލޯތްބެއްގެ ބޮޑުކަމުން..” ލަމްހާއަށް ރޮވުނެވެ. ލަމްހާ ރޯން ފެށުމާއެކު ޔޫޝައުގެ ރުޅި ފިނިވިއެވެ. ޔޫޝައު ލަމްހާދެކެ އެވަނީ ހާދަހާ ލޯތްބެކެވެ.
“ސޮރީ! އަހަރެން ލަމް ކައިރީ އެތަނަށް ނުދާށޭ ކިޔާއިރުވެސް.. ލަމް ކޮންމެ ދުވަހަކު އެތަނަށް ގޮސްފަ އައިސް ރޯތީ އަހަރެން ނުދާށޭ ބުނަނީ.. އެނގެއެއްނު ލަމްދެކެ އަހަރެން ލޯބިވާވަރު.. ލަމް ރޮންޏާ އަހަރެން ދެރަވާނެވަރުވެސް އެނގެއެއްނު.. އެހެންވެ އެގޮތަށް ވާހަކަ ދެއްކުނީ.. ސޮރީ ލޯބީ..” ޔޫޝައު ލަމްހާގެ ގައިގައި ބައްދާލަމުން ބުނެލިއެވެ. ލަމްހާވެސް މާފްކޮށްފީމޭ ބުނެ ޔޫޝައުގެ ގައިގައި އަތް ވަށާލިއެވެ.
**********
ދުވަސްތައް ފާއިތުވަމުން ގޮސް އައިކާ މާލެ އައިތާ އަހަރުވީއެވެ. ލަމްހާއާއި އައިކާގެ އެކުވެރިކަން ދުވަހަކަށްވުރެ ދުވަހެއް ބަދަހިވަމުން ގޮސް އެދެމީހުންނަކީ މިހާރު ދެބެންފަދަ ދެމީހުންނެވެ. އައިކާ ލަމްހާއަށް ދައްތަ ކިޔާތީ ފުރަތަމަކޮޅު ލަމްހާއަށް ކުޑަކޮށް އުނދަގޫވި ނަމަވެސް ދުވަސްވަމުން ދިޔަވަރަކަށް އެކަމަށްވެސް ހޭނެމުން ދިޔައެވެ. ދެމީހުންގެ ދިރިއުޅުމުގެ މާޒީވެ ގޮސްފައިވާ ކަންތައްތަކުން ފެށިގެން މުސްތަޤުބަލަށް ރާވާފައިވާ ކަންތައްތަކަށް ދަންދެން ހުރިހާ ކަމެއް އެކަކު އަނެކަކާ ހިއްސާކުރެއެވެ.
އައިކާއާއި ލަމްހާގެ އެކުވެރިކަން ބަދަހިވަމުން ދިޔައިރު އައިކާއާއި މާޒްއާ ދެމެދު ދުރުކަން އުފެދިފައިވަނީ ދެ ބީރައްޓެހިންގެ މެދުގައި ގުޅުން އޮންނާނެ ފަދައަކުންނެވެ. އައިކާ މާލެ ދިޔަފަހުން މާޒްގެ ހާލު ބަލާވެސްނުލައެވެ. މާޒް ކިޔާ މީހަކު އޭނާގެ ޙަޔާތަށް އައިކަންވެސް އޭނާ ހަނދާން ނެތްކަހަލައެވެ. އަމިއްލައަށް ފެނިގެން މާޒްއަށް ގުޅާނުލާތާ މާޒް ގުޅުމުންވެސް ގިނަ ފަހަރަށް ފޯނެއް ނުނަގައެވެ. މިކަމުގެ ސަބަބުން މާޒްގެ ހިތަށް ދަތިކަން ލިބެއެވެ. އަބަދުވެސް އޭނާގެ ހިތަށްއަރައެވެ. އޭނާ ވާލޯބި އައިކާއަށް އެނގޭނެނަމައެވެ.
އައިކާ އުޅުނީ ބަދިގެތެރޭގައި ޒިދުނާއަށް ކެއްކުމުގައި އެހީތެރިވެދިނުމަށެވެ. ފިޔާ ކޮށަން އިންދާ ބެލް އަޅާލި އަޑު އިވުމުން ޒިދުނާ އައިކާ ގާތު އައީ ކާކުތޯ ބަލާލަން ދިއުމަށް ބުންޏެވެ. އައިކާ އަތް ދޮވެލައިގެން ގޮސް ދޮރު ހުޅުވާލިއިރު ކުރިމަތީގައި ހުރި މީހާ ފެނުމުން ދެލޯ ބޮޑުކޮށްލެވުނެވެ.
“ލީން!!” ހައިރާންކަމާއެކު އައިކާ އެހެން ބުނެލި ނަމަވެސް އޭނާގެ ތުންފަތްމައްޗަށް ފުޅާ ހިނިތުންވުމެއް ވެރިވީ އެއް އަހަރަށްފަހު އެންމެ ގާތް އެކުވެރިޔާ ފެނުމުންނެވެ. އައިކާ އުފަލުން ލީންގެ ގައިގައި ބައްދައިގަތެވެ. ލީންވެސް ހީލަމުން އައިކާ ގައިގައި ބައްދާލިއެވެ.
“އަޅޭ ހާދަ އުފާވެއްޖޭ.. ނުވެސް ބުނަމެއްނު އަންނަ ވާހަކައެއް.. ބުނިނަމަ އަހަރެން ދިޔައިމުހޭ ލީން ބަލާ.. އެކަމް ކިހިނެއް މިގެ އެނގުނީ؟” އައިކާ އުފަލުން ފުރިފައި ހުރެ ވާހަކަދައްކަމުން އެންމެފަހުން ހައިރާންކަމާއެކު އަހާލިއެވެ.
“ދެން މިތާ ހުރެގެންތަ ހުރިހާ ވާހަކައެއް ދައްކަންވީ؟ މިހާރު އަހަރެންގެ ދެފައިގަވެސް ރިއްސަން ފަށައިފި..”
“އޯހ.. ސޮރީ! އަވަހަށް އާދޭ އެތެރެއަށް..” އައިކާ ލީން އެތެރެއަށް ވައްދާފައި އިށީންނަން ސޯފާއެއް ދެއްކިއެވެ. އަދި އެބަ އަންނަމޭ ބުނެ ބަދިގެއާ ދިމާއަށް ހިނގައިގަތެވެ.
“ކާކު އައީ؟” އައިކާ އައިސްއަލަމާރި ހުޅުވާލުމުން ޒިދުނާ އަހާލިއެވެ.
“އެއީ ލީން.. އަހަރެންގެ ބެސްޓް ފްރެންޑް..”
“އެހެންތަ؟ އޭރުން ދެން އައިކާ ދޭ އިނގޭ.. އެންމެ ރަނގަޅު ދެން ބަދިގެއަށް ނަޔަސް.. މިހާރު މިކަންވެސް މި ނިމުނީއޭ..” ޒިދުނާ ހީލަމުން ބުނެލިއެވެ. އައިކާ ޖޫސްތަށްޓެއް ހިފައިގެން ސިޓިނގރޫމަށް ނުކުތުމުން ލީން އަނގައަށް ވައްތަރެއް ޖައްސާލިއެވެ.
“ދެން އަހަރެން މީ ބީރައްޓެއްސެއްވެސް ނޫނެއްނު އެހާ ޚާއްސަކޮށް މެހެމާންދާރީ އަދާކުރާކަށް..” ލީން އެހެން ބުނެލުމުން އައިކާ ތުން އަނބުރާލިއެވެ.
“ހޫނ.. އަދި މީ ހާދަ ޝަކުވާވެސް ގިނަ އަންހެނެކޭ ދޯ.. މާ އަނގަގަދަ ނުކޮށް މި ބޮއިބަލަ.. އަން..” ޖޫސްތަށި ދިއްކޮށްލަމުން އައިކާ ބުނެލިއެވެ. ލީން ހީލަމުން ޖޫސްތަށީގައި ހިފާ އެތިފޮދެއް ބޯލިއެވެ.
“ހާދަ މީރޭ.. މީ ކޮންކަހަލަ ޖޫހެއްތަ؟”
“މީރު ދޯ؟ ތީ ބްލެކް ކަރަންޓް ޖޫސް..”
“ކަޅު ކަރަންޓޭ!! މަންމާ! އައިކާ އަހަރެންނަށް ކަރަންޓް ބޯންދީ ކަރަންޓް ޖައްސަން އުޅެނީ..” ލީން ތުއިވެލާފައި އެހެން ބުނެލުމުން އައިކާ ލީންގެ އަތުގައި ޖެހިއެވެ.
“ސާބަހޭ! ތި އަނގަގަނޑު މައިތިރިކޮށްބަލަ.. މިގޭ ދައްތަ ކީކޭތަ ހީކުރާނީ؟” އައިކާ އެހެން ބުނެލުމުން ލީން ހީލިއެވެ.
“އެއީ މަޖަލޭ.. އެކައްޗެއްވެސް ހިއެއް ނުކުރާނެ އެމީހުން..” ލީން އޭނާގެ ދިފާއުގައި ބުނެލިއެވެ.
“މަޖަލޭ!! އެމީހުން ހީކުރާނީ ތީ ބޯހަމަ ނުޖެހޭ މީހެކޭ.. އާނ ދެން ކަރަންޓު ބޮވޭތަ؟” އައިކާ އަނގައަށް ވައްތަރެއް ޖައްސާލަމުން އެހެން ބުނެލިގޮތުން ލީންއަށް ހެވުނެވެ.
“ހޫނ.. ތިއެއްނޫނޭ.. ކޮންކަމަކު މާލެ އައިސްގެން ތިއުޅެނީ؟” އައިކާ ސީރިއަސްކަމާއެކު އަހާލިއެވެ.
“މިއައީ ކުޑަކަމަކު.. އަސްލު ކުޑަ ކަމަކުވެސް ނޫން.. އެއީ އޭގެ ނަތީޖާ..”
“އެއްކަލަ ހާސަރު ދައިތަ.. ތިހާ ދިއުޅި ދިގުނުކޮށް ބުނަން އުޅޭ އެއްޗެއް ބުނެބަލަ..” ލީން މާ ވާހަކަ ގިނަކުރާތީ އައިކާއަށް އުނދަގޫވެގެން ބުނެލިއެވެ.
“ތެލެސީމިއާ ޓެސްޓްކުރަން..”
“މިހާރު ޓެސްޓް ކުރީތަ؟” އައިކާ އަހާލިއެވެ.
“އާނ.. ރެޒަލްޓް ނަގައިގެން މިއައީ މިގެއަށް..”
“ކިހިނެއް ވަނީ؟” ހިތް އަވަސްވެފައި އައިކާ އަހާލިއެވެ.
“އަލްޙަމްދު ލިﷲ!! ނޯމަލް.. އަހަރެން ހާދަ ނާވަސްވިއޭ..” ލީން އުފާވެލާފައި އެހެން ބުނެލުމުން އައިކާވެސް “އަލްޙަމްދު ލިﷲ!!” އޭ ބުނެލިއެވެ.
“އެކީއްވެ އެހާ ނާވަސްވީ؟ އެކަކު އަތުގަ ހުދު ކާޑެއް އޮވެއްޖެއްޔާ އޯކޭ ވާނެއެއްނު..” އައިކާ ބުނެލިއެވެ.
“ނާވަސް ވާނެއެއްނު.. ޒިޔާ އަތުގަ އޮންނަނީ ޕިންކް ކާޑެއްވިއްޔަ..” ލީން އެހެން ބުނެލުމުން އައިކާއަށް ލީންއަށް ބަލާލެވުނެވެ. ލީން ބޯޖަހާލީ ހަމަ ތެދެކޭ ބުނާފަދަ ގޮތަކަށެވެ.
“ނަސީބެއްނު ދޯ..” އައިކާ އެހެން ބުނެލުމުން ލީން ބޯޖަހާލިއެވެ.
“އިކާމެން ޓެސްޓް ކޮށްފިންތަ؟”
“ހޫމް.. އަލްޙަމްދު ލިﷲ!! ދެމީހުންވެސް ނޯމަލް..” އައިކާގެ ނަސީބާއިމެދު ލީން އުފާކުރިއެވެ.
“ހޫމް.. ދެން މިވަގުތު އަހަރެން ދަނީއޭ.. އަދި އަންނާނަން ހަވީރުން ބޭރަށް ގޮސްލަން.. މާދަމާ ރޭ ފުރަންވިއްޔަ..” ލީން އެހެން ބުނެލުމުން އައިކާ އެންމެ ރަނގަޅޭ ބުނެލިއެވެ.
ލީން ދިއުމުން އައިކާ އަނެއްކާވެސް ވަނީ ބަދިގެއަށެވެ. އޭރު ޒިދުނާ އުޅެނީ މެންދުރަށް ކައްކަން އުދައިގެންނެވެ.
“ތިއައީ ދޯ؟ މިހާރު މި ނިމުނީއޭ..” ޒިދުނާ ހީލަމުން ބުނެލިއެވެ.
“ދެން ނެތްތަ ކުރާނެ ކަމެއް؟”
“ހޫމް.. އައިކާ ތީ ނޯކިރީކުރަން ގެނައި ކުއްޖެއް ނޫނޭ.. އައިކާ ގެނައީ ކިޔަވަން.. އައިކާ އެކަން ކުރޭ.. މިހާރު ތިއޮއް ފަހު އިމްތިހާން ފެށެންވަނީ.. ރަނގަޅަށް ތައްޔާރުވެ މަންމަމެން އުފާވާ ކަހަލަ ނަތީޖާއެއް ހޯދަންވާނެ.. ނޫނީ މާލެ އައިސް ތި ހޭދަކުރެވުނީ ބޭކާރު ދެއަހަރެއްނު..” ޒިދުނާ އެހެން ބުނެލުމުން އައިކާ ފޫހިވެފައި އަނގައަށް ވައްތަރެއް ޖައްސާލިއެވެ.
“ދައްތަވެސް ދޯ.. ދެން މިހެން ފަހަރެއްގަ ގޭގަ ކަމެއް ކޮށްލިޔަސް އެއީ ނޯކިރީކުރުމެއް ނޫނެއްނު.. އަންހެންކުދިން ޖެހޭނެއެއްނު ގޭގަ މަސައްކަތްވެސް ކުރަން.. އެހެންނޫނީ މީހަކާ އިންނަ ދުވަހަކުން ކިހިނެއް..”
“އާނ.. ރަނގަޅު ވާހަކައެއް ތީވެސް.. އެކަމު މިދުވަސްކޮޅު އައިކާ އެއްވެސް މަސައްކަތެއް ކުރާނެކަމެއް ނެތް.. އައިކާ ހަމަ ކިޔަވާ.. ޓެސްޓް ނިމުނީމަ ދައްތައަށް ހެޔޮ އައިކާ ކިތަންމެ ކަމެއް ކުރިޔަސް..” ޒިދުނާ ހީލަމުން ބުނެލިއެވެ.
“ދެން ނެތްތަ ހަމަ އެއްވެސް ކަމެއް؟ ފޫހިވާވަރުން އަސްލު..”
“ދެން ތިހާ މަސައްކަތް ކުރާހިތުން އުޅެންޏާ ގޮސް އައިސްއަލަމާރިން ދެތިން އޮރެންޖް ނަގައިގެން ފަނި ގިރާލަބަލަ.. އާނ ދެން މިކުއްޖާ ކިޔަން ފަށައިފި އެއްޗެއް ހުއްޓާލާނީކީވެސް ނޫންވިއްޔަ..” ޒިދުނާ ހީލާފައި އެހެން ބުނެލުމުން އައިކާ ހީލަމުން ގޮސް އައިސްއަލަމާރިން ދެތިން އޮރެންޖް ނަގައިގެން ފަނި ގިރަން ތައްޔާރުކޮށްލިއެވެ.
ފަނި ގިރައި އައިސްއަލަމާރިއަށް ލާފައި އައިކާ ގޮސް ލަމްހާއަށް ގުޅާލިއެވެ. އަދި ހަވީރު އެމީހުންނާއެކު ބޭރަށް ދެވިދާނެތޯ އަހާލިއެވެ. ލަމްހާ ޔޫޝައު ގާތުގައި އަހާލާފައި ގުޅާނެކަމަށް ބުންޏެވެ. ލަމްހާ ޔޫޝައު ގާތުގައި އެހުމުން ދިޔަޔަސް އެންމެ ރަނގަޅުކަމުގައި ޔޫޝައު ބުންޏެވެ. އެހެންކަމުން ލަމްހާ އައިކާއަށް ގުޅާފައި ދާނެ ވާހަކަ ބުންޏެވެ.
ހަވީރުގެ ވަގުތެވެ. އައިކާއާއި ލީން ތިބީ އައިކާމެން ގޭ ބެލްކަނީގައި ލަމްހާގެ އިންތިޒާރުގައެވެ. މާދިގު އިންތިޒާރެއް ކުރާކަށް ނުޖެހުނެވެ. ޔޫޝައުއާއެކު ސައިކަލުގައި ލަމްހާ އައިސް ފޭބި މަންޒަރު ފެނުމުން އައިކާ ލީންއަށް ލަމްހާ ދައްކާލިއެވެ.
“އެއީތަ ޔޫޝައުގެ ވައިފް؟” ޔަޤީން ނުވެފައި ލީން އަހާލިއެވެ. އައިކާ އާނއެކޭ ބުނެ ބޯޖަހާލިއެވެ.
“ވަރަށް ގުޅޭ ދޯ އެދެމީހުން..”
“އާނ.. ހުރިހާ ގޮތަކުންވެސް.. އަސްލު އޭނަގެ އެންމެ ރަނގަޅު ތަންކޮޅަކީ ހިތްހެޔޮކަން..” އައިކާ އެހެން ބުނެލުމުން ލީންވެސް ހީލިއެވެ. އިރުކޮޅަކުން އައިކާގެ ކޮޓަރީގައި ޓަކި ޖަހާލި އަޑު އިވުމުން އައިކާ “ވަންނާށޭ” ބުނެލިއެވެ.
“ކޮބާ ހިނގާ ދަމާ..” ބެލްކަންޏަށް ނުކުންނަމުން ލަމްހާ ބުނެލިއެވެ.
“އިހަށް އާދެބަލަ.. އަހަރެންގެ ބެސްޓް ފްރެންޑް ތަޢާރަފް ކޮށްދޭންވާނެއެއްނު ދޯ.. ލަމް! މީ ލީން.. ލީން! މީ ލަމްހާ.. ޔޫޝައުގެ ވައިފް..” އައިކާ ދެމީހުން ދެމީހުންނަށް ތަޢާރަފް ކޮށްދިނެވެ.
“ވަރަށް އުފާވެއްޖެ ބައްދަލުވީމަ.. އައިކާ އަބަދުވެސް ދައްކާނެ ލީންގެ ވާހަކަ.. ލީން މަތިން މިސްވާ ވާހަކަ..” ފުރަތަމަ ބައްދަލުވުމުންވެސް ލަމްހާގެ ހިތްހެޔޮކަން ލީން ދެނެގަތެވެ. އަމިއްލަ ނަފްސަށް ހިނިތުންވެލެވުނީ އޭނާގެ އެންމެ ގާތް އެކުވެރިޔާއަށް ދެވެން އުޅެނީ އެހާ ރަނގަޅު ބައެއްގެ ތެރެއަށްކަން ޔަޤީންވީތީއެވެ.
ތިންމީހުން އެކި ވާހަކައިގައި ތިބެ ރަސްފަންނާއި ދިމާއަށް މިސްރާބުޖެހިއެވެ. ރަސްފަންނުން އެކި ތަންތަނުގައި ހިނގާ ހިތްހަމަޖައްސާލައިގެން ގެއަށް އައީ އިރުއޮއްސެން ނުހަނު ގާތްވެފައި ވަނިކޮށެވެ.
“ލީން! މިރޭ ހަމަ ދަނީތަ؟ ވަރަށް މިސްވާނެ..” އައިކާ ދެރަވެލާފައި އަހާލިއެވެ. ވާނީވެސް އެހެން ނޫން ހެއްޔެވެ؟ ރަށުގައި އުޅުނުއިރު އޭނާގެ ހިޔަނި ފަދައިން އެކުގައި އުޅުނު އެންމެ ގާތް އެކުވެރިޔާއާ ދުރުގައި އެހާ ދުވަހު އުޅެފައި ދިމާވެ، ދެދުވަސް ވެފައި ވަކިވާން ޖެހުމުން ދެރަވާނެ ނޫން ހެއްޔެވެ؟ ލީންވެސް ރަށު ސްކޫލްގެ ލައިބްރަރީގައި ވަޒީފާ އަދާކުރާތާ މިހާރު ހަތަރު މަސް ވަނީއެވެ. ލީން ވަޒީފާއަށް ވަތްފަހުން އައިކާއާއި ފޯނުންވެސް ދިމާވަނީ ވަރަށް މަދުންނެވެ.
“އާނ.. އެކަމް ދާހިތަކުން ނޫން.. ޖޮބްގަ އުޅޭތީ އަސްލު މަޑުކުރެވެން ނެތީ..” ލީންވެސް ދެރަވެލާފައި ބުނެލިއެވެ.
“އިރާދަކުރެއްވިއްޔާ ވަރަށް އަވަހަށް ދެމީހުން ބައްދަލުވާނެ..” އައިކާ ބުނެލިއެވެ.
“ތިހެން ބުނީމަ މި ހަނދާންވީ.. މާރޗް ފަހެއްގަ މެރީކުރަން މި އުޅެނީ.. އިކާ ކޮންމެހެންވެސް ދާންވާނެ..” ލީން ކުއްލިއަކަށް ހަނދާންވެގެން ބުނެލިއެވެ.
“އަޅޭ.. ކުރިން ބުނިނަމަ.. މިގޭ ދައްތަ ބުނި ފެބްރުއަރީ ފަހު ހަފްތާގަ ބެންކޮކަށް ދާން އުޅޭ ވާހަކަ.. އަހަރެން ނުލާ ނުދާނަމޭ ބުނީ.. ދެން ކިހިނެއް ހަދާނީ؟” އައިކާ ދެރަވެލާފައި އަހާލިއެވެ.
“އޭރުން ކައިވެނި ކެންސަލްކުރާނީ.. އަހަރެންގެ ޙަޔާތުގަ އަންނާނެ އެންމެ އުފާވެރި ރޭ އިކާ އަހަރެންގެ ގާތުގަ ނެތިއްޔާ އަހަރެންނަކަށް އެރޭގެ އުފާ އިހުސާސެއް ނުކުރެވޭނެ..” ލީން އެހެން ބުނެލުމުން އައިކާ ދެލޯ ބޮޑުކޮށްލިއެވެ.
“އުހުނ.. އެހެން ނުހަދާތި.. އޭރުން ޒިޔާއަށް ވާނީ ކިހިނެއް؟” އައިކާއަށް ވިސްނާލެވުނީ ޒިޔާންއާ ދޭތެރޭގައެވެ. ލީންއަކީ ބުނާ ބަހުގައި ހިފަހައްޓާ މީހެއްކަން އޭނާއަށް އެނގޭތީ އޭނާ ކައިވެނި ކެންސަލްކޮށްލަންވެސް ފަސްނުޖެހޭނެކަން އައިކާއަށް ޔަޤީންވެއެވެ. އެހެންކަމުން އޭނާ ދެވަނަ ވިސްނުމަކަށްވެސް ނުގޮސް އޭނާ ބެންކޮކް ދަތުރު ކެންސަލްކޮށްލާނެ ވާހަކަ ބުންޏެވެ.
“ދެން ދަނީ.. ފުރުމުގެ ކުރިން ގުޅާނަން އިނގޭ..” ލީން އެހެން ބުނެލުމުން އައިކާ ބޯޖަހާލި ނަމަވެސް އޭނާ ހުރީ ލީން ދާތީ ދެރަވެފައެވެ.
**********
ދުވަސްތައް ފާއިތުވަމުންދެއެވެ. ސަނާއާއި ނާޒިމް އެމީހުންގެ ދެން ތިބި ދެކުދިން ގޮވައިގެން މާލެ ދިއުމަށް ތައްޔާރުވަމުންދެއެވެ. އެމީހުން އެދަނީ އައިކާގެ އޭލެވެލް ނަތީޖާ ފާޅުކުރާ ރެއަށް އައިކާއަށް ސަޕްރައިޒެއްދޭށެވެ.
“މަންމާ! ދޮންތަ ވަރަށް ސަޕްރައިޒް ވާނެ ދޯ އިޝީމެން ފެނުނީމަ..”
“އާނ ދަރިފުޅާ.. ދޮންތައަށް ނުގުޅާތި ހަނދާންކޮށް.. އެހެންނޫނީ ބުނެވިދާނެ..” ސަނާ އެހެން ބުނެލުމުން އިޝިކާ ބޯޖަހާލިއެވެ.
މެންދުރުގެ އެންމެ އަވިގަދަ ގަޑީގައި ސަނާއާއި ނާޒިމް އެމީހުންގެ ދެކުދިން ގޮވައިގެން ތިބީ ބަނދަރުގައެވެ. ޗުއްޓީ ދުވަސްވަރަކަށްވުމުން މާލެ ދާ މީހުން ނުހަނު ގިނައެވެ. ލޯންޗަށް އެއްޗެހިތައް އަރުވާ ނިމުމުން އެމީހުން ގޮސް ލޯންޗަށް އަރާ ފަހަތު ސީޓުގައި ޖައްސާލިއެވެ.
“އަނހާ ސަނާ.. ކޮން ދަތުރަކު؟” ސަނާގެ އަވަށްޓެރި ބުސްރާއަށް ސަނާމެން ފެނިގެން އަހާލިއެވެ.
“މި ހަމަ އައިކާގެ ގްރެޖުއޭޝަންއަށް މިދަނީ.. އޭނަ ގުޅާފަ ބުނިވިއްޔަ އަންނައްޗޭ.. އެކަމް އަހަރެމެން ބުނެފިން މިދުވަސްކޮޅު ދެވެން ނެތް ވާހަކަ.. އެހެން ކިޔާފަ ސަޕްރައިޒެއް ދޭންވެގެން.. ބުސްރާ ކޮންކަމަކު ތިދަނީ؟” ސަނާ އޭނާ ދާ ސަބަބު އޮޅުންފިލުވައިދިނުމަށްފަހު އެހިއެވެ.
“މީ އެއްކަލަހެން ފައި ދުޅަވާތީ.. ބަލާބަލަ.. މިހާރުވެސް ދުޅަކަމުން ހިނގަންވެސް އުނދަގޫވެގެން މިއުޅެނީ.. ރިއްސާވަރުން..” ބުސްރާ އެހެން ބުނެލުމުން ސަނާ ބުސްރާގެ ފަޔަށް ބަލާލިއެވެ.
“ދޮގެއްވާ ނޫން.. ހާދަ ބޮޑަކަށޭ ދޯ ދުޅަވެފައި ތިއޮތީ.. އަސްލު ކިހިނެކޯ ވަނީ؟”
“އެމީހުންނަކަށްވެސް ނޭނގެ އަސްލު ވާގޮތެއް.. މިފަހަރު ގޮސް ގޮތެއް ނުވެއްޖެއްޔާ ބޭރަށް ދާނީ.. އޭރުން ދެން އެނގިދާނެތާ ވާގޮތެއްވެސް..” ބުސްރާ އެހެން ބުނެލުމުން ސަނާ ބޯޖަހާލިއެވެ.
“ދެން ތިހާވަރު ވެފަ އޮތްއިރުވެސް ބުސްރާ އެކަނިތަ ތިދަނީ؟” ބުސްރާއާއިއެކު އިތުރު މީހަކު ފެންނަން ނެތުމުން ސަނާ އަހާލިއެވެ.
“ނޫނޭ.. ނަވީން އެއްޗެއް ބަލާ ގެއަށް ގޮސް ވީ.. މިހާރު އޮވެގެން އަންނާނެ.. އޭނަ ނައިސްގެން ނައްޓާނުލެވިފަ އެތިބީ..” ބުސްރާ އެހެން ބުނެލުމުން ސަނާ އެހެންދޯއޭ ބުނެ ހިނިތުންވެލިއެވެ.
“ނާޒިމް ކިހިނެއްތަ؟”
“ރަނގަޅޭ.. ބުސްރާ ކިހިނެއް؟ ކޮބާ ވާފިރު؟” ނާޒިމް ހީލަމުން އަހާލިއެވެ.
“އަހަރެންގެ ހާލު ދެން މިހިރީ ފެންނަންތާ.. ވާފިރު އެބަހުރި މާލޭގަ.. އޭނަ ގުޅާފަ ބުނެގެން މިދަނީ..” ބުސްރާ ބުނެލިއެވެ.
ދޮޅު ގަޑިއިރުގެ ދަތުރަކަށްފަހު މާލެ ދެވިއްޖެއެވެ. އޭރުވެސް ދޭތެރެ ދޭތެރެއިން ސަނާއާއި ބުސްރާ ކޮންމެވެސް ވާހަކައެއް ދައްކައިގަނެއެވެ. ނާޒިމްވެސް ދޭތެރެއަކުން ނަވީންއާ ކޮންމެވެސް ވާހަކައެއް ދައްކާލައެވެ. ނަމަވެސް ނަވީންއަކީ އޭނާގެ ދަރިއެއްހާ އުމުރުން ހަގު ކުއްޖަކަށްވުމުން އެދެމެދުގައި ދައްކާނެ މާގިނަ ވާހަކައެއްވެސް ނެތެވެ. އެހެންކަމުން ނާޒިމް ގިނަ ވަގުތު އިންނަން ޖެހުނީ ފޫހިވެފައެވެ. އިޝިކާއާއި އައުފްވެސް އެދެމީހުންގެ ކޮނޑުގައި ބޯއަޅާލައިގެން ނިދާފައި އޮތުމުން އޭނާގެ ފޫހިކަން އިތުރުވިއެވެ. އެދެކުދިން ހޭލާ ތިބިއްޔާ ހުއްޓާނުލާ އަބަދުވެސް ކޮންމެވެސް ވާހަކައެއް ދައްކާނެވިއްޔާއެވެ.
ލޯންޗުން ފައިބާފައި ނާޒިމް މަގަށް ނުކުމެ ކާރެއް ހުއްޓުވިއެވެ. އަދި ސަނާއާއި ދެކުދިން ފަހަތު ސީޓަށް އަރުވާފައި އޭނާ ކުރީ ސީޓަށް އަރައި “ގްރީން ލައިޓް”އަށް ގެންގޮސްދިނުމަށް ޑްރައިވަރ ގާތުގައި އެދުނެވެ. ޓްރެފިކުން ސަލާމަތްވެގެން އެގެއާއި ހަމައަށް ފޯރާވަރުވީ ތިރީހަކަށް މިނެޓުންނެވެ. ޑްރައިވަރަށް ލާރި ދީފައި ކާރުން ފައިބައި ފޮށި ހިފައިގެން ގެއަށް ވަނެވެ. ތިންވަނަ ބުރިއަށް އެރުމަށްފަހު ބެލް އަޅާލިއެވެ.
“ޔަޤީން އެއައީ..” ހިތާހިތާ އެހެން ކިޔާލަމުން ޒިދުނާ ގޮސް ދޮރު ހުޅުވާލިއެވެ.
“ކޮބާ އައިކާ؟” ސަނާ ފުރަތަމަވެސް އަހާލިއެވެ.
“ކޮޓަރީގަ ވީ.. އަވަހަށް ވަދޭ..” ޒިދުނާ މަޑުމަޑުން އެހެން ބުނެލުމުން ނާޒިމްއާއި ސަނާ ދެކުދިން ގޮވައިގެން އެތެރެއަށް ވަނެވެ. ޒިދުނާ އެދެކުދިން ގާތު އަޑެއްވެސް ނީއްވާ މަޑުން ތިބުމަށް ބުންޏެވެ.
“އައިކާ! އައިކާ! އާދެބަލަ..” ޒިދުނާ ތަންކޮޅެއް ބާރަށް އެހެން ގޮވާލިއިރު އައުފްއާއި އިޝިކާ ތިބީ ދޮރު ކައިރީހުރި ފާރުކޮޅާއި ނިވާވެގެންނެވެ. ޒިދުނާގެ އިރުޝާދުގެ މަތިން ކަންތައް ކުރެވޭތޯ ބަލަމުން ދިޔައިރު އައިކާއަށް ވާނެގޮތް ސިފަކުރެވޭތީ ނުހީ ތިބެވެނީވެސް ކިރިޔާއެވެ.
“ޕޮއް!!” އައިކާ ދޮރު ހުޅުވާލާފައި ނުކުތުމާއެކު އައުފްއާއި އިޝިކާ އެއްއަޑަކަށް ހަޅޭއްލަވައިގަތެވެ. އެއާއެކު ސިހުނުވަރުން އައިކާ އަތުގައި އޮތް ފޯނުވެސް ނުވެއްޓުނީ ކިރިޔާއެވެ. އައިކާއަށް ވީގޮތް ފެނިފައި އައުފްއާއި އިޝިކާ ބާރަށް ހޭން ފެށިއެވެ.
“އައުފް! އިޝީ!” އައިކާ އުފަލުން ފުރިފައި ހުރެ އެދެކުދިންގެ ގައިގައި ބައްދާލިއެވެ.
“ސަޕްރައިޒް!!” ނާޒިމްމެން ތިބި ހިސާބަށް ދެވުމާއެކު އެންމެން އެއްކޮށް އަނެއްކާވެސް ބުނެލިއެވެ. އައިކާ ވީ އުފަލުން ގޮސް ސަނާ ގައިގައި ބައްދައިގަތެވެ. ނާޒިމްގެ ގައިގައިވެސް ބައްދާލީ ދުވަސްކޮޅެއް ފަހުން އަނެއްކާވެސް ބައްޕަ ފެނުމުންނެވެ.
“މަންމަމެން ކީއްވެތަ އަންގާނުލީ؟” ކުސްތަޅާލަމުން އައިކާ ބުނެލިއެވެ.
“ކޮއްކޮމެން ދޮންތައަށް ސަޕްރައިޒެއް ދިނީއޭ ދޯ މަންމާ..” އައުފް އަވަސްއަވަހަށް ބުނެލިއެވެ. އެވަގުތު އައިޝްކާ ގޮވައިގެން ބޭރުން އައިސް އެތެރެއަށް ވަނީ އާސިފްއެވެ. އައިޝްކާއަށް އައުފްއާއި އިޝިކާ ފެނުމާއެކު ދުވެފައި އައިސް އެދެކުދިން ގޮވައިގެން އޭނާގެ ކޮޓަރިއަށް ވަދެއްޖެއެވެ.
ޖެހިގެން އައި ދުވަހެވެ. އައިކާ ތައްޔާރުވަމުން ދިޔައީ ނަތީޖާ ފާޅުކުރާ ތަނަށް ދާށެވެ. ސަނާއާއި ނާޒިމްވެސް އެތަނަށް ދިއުމަށް ތައްޔާރުވިއެވެ. އައުފްއާއި އިޝިކާވެސް ތިބީ އެތަނަށް ދާން ފައިވިއްދާލާފައެވެ. ނަމަވެސް އައިކާމެން ދިޔުމުން ގޭގައި ތިބި އެންމެން ޕިއްޒާ ކާން ދާނީއޭ ޒިދުނާ ބުނުމުން އެދެކުދިންވެސް ގޭގައި ތިބެން އެއްބަސްވެއްޖެއެވެ.
އައިކާމެން ދިޔުމުން އައުފްއާއި އިޝިކާ އަދި އައިޝްކާ ޕިއްޒާ ކާން ދާން ކިޔަން ފަށައިފިއެވެ. ނަމަވެސް އައިކާ ސްޓޭޖަށް އިނާމު ބަލާ އަރާތަން ބަލާލާހިތުން އިންވަރުން ޒިދުނާ ޕިއްޒާއަށް އޯޑަރުދިނެވެ. އެކުދިންވެސް ވަރަށް ފަސޭހައިން ގޭގައިވިޔަސް ޕިއްޒާ ކާން އެއްބަސްވެއްޖެއެވެ.
ޖަލްސާ ފެށިގެން ގޮސް ގަދަ ފަހެއް އިޢުލާން ކުރާ ވަގުތު ޖެހުނުއިރު އައިކާ އިނީ ފިނިވެގެން ދެއަތް ދެއަތާ މޮޑެލަ މޮޑެލައެވެ. އިނާމު ބަލާ ކިތަންމެ ފަހަރަކު ސްޓޭޖަށް އަރަން ޖެހުނު ނަމަވެސް ފިނިކަން ނުކެނޑެއެވެ. އެތާނގައި ތިބި ކުދިންތަކާއި ބެލެނިވެރިންތައް އެހާ ގިނަވެފައި މީޑިއާތަކާއި ސަރުކާރުގެ ބޮޑުންވެސް ތިބުމުން ކަންނޭނގެއެވެ. އަނެއްކޮޅުން މިއީ އޭނާގެ މުސްތަޤުބަލާއި ނުހަނު ބޮޑަށް ގުޅިފައިވާ ނަތީޖާއަށް ވުމުންވެސްމެއެވެ.
އޭލެވެލްގެ ނަތީޖާއިން މުޅި ރާއްޖެއިން އެއްވަނައަށް ހޮވުނީ އައިކާކަން އިޢުލާން ކުރި ވަގުތު އޭނާގެ މެޔަށް ފިނިވެގެން ދިޔައެވެ. ހޯލު ތެރޭގައި ތިބި ދަރިވަރުންނާއި ބެލެނިވެރިންގެ އަތްތިލަބަޑީގެ އަޑުން މުޅި ހޯލުތެރެ ގުގުމާލިއެވެ. އޭނާއަށް ބަލާލެވުނީ އޭނާގެ މަންމައާއި ބައްޕަ ފެނޭތޯއެވެ. އެވަގުތު އުފަލުން ރޮވިފައި ތިބި ނާޒިމްއާއި ސަނާ ފެނުމުން އޭނާގެ މޫނުމައްޗަށް އުފާވެރިކަން ވެރިވީ އިންތިހާއަށެވެ. ލުއި ހިނިތުންވުމެއް ވެރިކުރުވައިގެން ދިޔައިރު ސްޓޭޖާއި ކައިރިވާ ވަރަކަށް އޭނާގެ ހިތުގެ ތެޅުން އަވަސްވަމުން ދިޔައެވެ. ރައީސުލްޖުމްހޫރިއްޔާގެ އަތްޕުޅުން ތަށްޓާއި އިނާމުތައް ލިބިގެންދިޔައިރު އޭނާއަށް ބުނެދޭން ނޭނގޭފަދަ އުފާވެރި އިހުސާސެއް ކުރެވެމުން ދިޔައެވެ.
ޖަލްސާ ނިމިގެން ގެއަށް ދިޔައިރު ޒިދުނާއާއި އެންމެން ވެގެން ގޭތެރެ އޮތީ ވަރަށް ރީތިކޮށްލާފައެވެ. އައިކާގެ އެއުފާ ޚާއްސަ ގޮތަކަށް ފާހަގަކުރަން ޒިދުނާ ބޭނުންވީއެވެ. ސޯފާތަކުގެ މެދުގައި ހުރި މޭޒުމަތީގައި ހުރި ބޮޑު ކޭކު ފެނުމުން އައިކާ ކުޅުދިޔާވިއެވެ.
“މިހާ ކުޑައިރުކޮޅެއް ތެރޭ ކިހިނެއް މިހުރިހާ ކަމެއް ކުރީ؟ އެހެންނޫނަސް މިކަހަލަ ބޭކާރު ޚަރަދުތައް ކުރާކަށް ނުވާނެއެއްނު..” ސަނާއަށް ނުހުރެވިގެން ބުނެވުނެވެ.
“މީ ހަމަ އަހަރެން އައިކާގެ އެއުފާ ޚާއްސަ ގޮތަކަށް ފާހަގަކޮށްލަންވެގެން ކުރި ކަމެކޭ.. އެއީ އެއްވެސް ކަމެއް ނޫން.. ދެން މި ކަރުދާސްތަކާ އެއްޗެހި އެލުވީ މިކުދިން ބޭނުންވެގެން.. އަސްލު އަހަރެން އުޅުނީ ހަމައެކަނި ކޭކެއް ފަޅާލަން.. އަހަރެންގެ ރައްޓެހިންކޮޅެއް ގެނެސްގެން އެކަން ކުރީ..” ޒިދުނާ ކަންވީގޮތް އޮޅުންފިލުވައިދިނެވެ.
“އެކަމަކު ދެން މިހާ ގިނަ..”
“ސަނާ! އެކަމާ އެހާ ނުވިސްނަބަލަ.. އައިކާ އާދޭ އަވަހަށް ކޭކު ފަޅަން.. މިހާރު އެހެރަ ބާރަ ޖަހަނީ..” ޒިދުނާ އެހެން ބުނެލުމުން އައިކާ އައިސް ކޭކު ފަޅާލިއެވެ. އަދި ފަހަރަކު މީހެއްގެ އަނގައަށް ކޭކުކޮޅެއް ލަވަމުން ގޮސް ޒިދުނާއަށް ކޭކުކޮޅު ލަވަން އުޅެނިކޮށް ގޭގެ ބެލް އަޅާލި އަޑު އިވުމުން ޒިދުނާ ދޮރާއި ދިމާއަށް ހިނގައިގަތެވެ.
“ދައްތާ! މި ކާލައިގެން ދޭބަލަ..” އައިކާ އެހެން ބުނެލުމުން ޒިދުނާ ކޭކުކޮޅު ހިފައިގެން ހިނގައިގަތެވެ. އޭނާ ގޮސް ދޮރު ހުޅުވާލި ވަގުތު ސިއްސައިގެން ދިޔައީ ކުއްލިއަކަށް ދޮރުމައްޗަށް އެރި މޫނު ނިވާކޮށްގެން ހުރި މީހާ ފެނުމުންނެވެ. އަވަހަށް ދޮރު ލައްޕަން ކުރި މަސައްކަތް ވީ ބޭކާރެވެ. އެމީހާ ގޭތެރެއަށް ދެމިގަތުމުން ޒިދުނާ އުޅުނީ އަވަހަށް އެމީހާގެ ކިބައިން ސަލާމަތްވެވޭތޯއެވެ. ނަމަވެސް އެމީހާއާ ދުރަށް އެންމެ ފިޔަވަޅެއް އެޅުނުތަނާ އެމީހާ އަވަސް ހަރަކާތަކާއިއެކު ޒިދުނާގެ ކަނާއަތު ކޮނޑާއި ދިމާއިން އަތް ގެންގޮސް ވައަތު ކޮނޑުގައި އަޅުވާލައި ހިފަހައްޓާލިއެވެ.
“ހެޔޮނުވާނެ.. އަހަރެން ދޫކޮށްލާ.. އަހަރެން ކަލޭ ބުނި ވަރަކަށް ލާރި ދީފާނަން..” ޒިދުނާ ބިރުން ހުރެ ބުންޏެވެ. ނަމަވެސް އެމީހާ ޒިދުނާ ދޫކޮށްލަން ނޫޅުނުތާ އަނގައަކުންވެސް ނުބުންޏެވެ.
“އާސިފަށް ގުޅާ!” ޒިދުނާ ހާސްވެ ބިރުގެންފައިވާ އަޑަކުން ބުނެލިއެވެ.
“އޭތް! ހަމަ މިހާރު ދައްތަ ދޫކޮށްލާ! އެހެންނޫނީ މި ވަޅީގެ ހުރި ތޫނުކަން ދައްކާލަފާނަން.. ކަލޭ ކަހަލަ މީހެއްދެކެ އަހަރެން ބިރެއް ނުގަނޭ..” ވަޅި ހިފައިގެން އެމީހުންނާ ދިމާއަށް ދަމުން އައިކާ އިންޒާރެއް ދިނެވެ. ނަމަވެސް އެމީހާ ހުރިތަނުން ގުޑާވެސްނުލިއެވެ.
“ދަރިފުޅާ! ތި ވަޅި ބާއްވާ!” ނާޒިމް އެހެން ބުނަމުން އައިސް އައިކާ ވަޅި އަތުލިއެވެ.
“މަންމާ! ދޮންބެ ކަހަލަ ރިންގްއެއް..” އައިޝްކާއަށް އެމީހާގެ އަތުގައި އޮތް ރިހި އަނގޮޓި ފެނުމުން ބިރުން ހުރެ ބުނެލިއެވެ. އެއާއެކު އެމީހާ މޫނުގައި އަޅާފައި އޮތް މާސްކު ދަމައިގަތެވެ.
“ސަޕްރައިޒް!!”
“އައްޒާމް!” ހައިރާންކަމާއެކު ޒިދުނާއަށް އަނގަމަތީ އަތްއަޅާލެވުނެވެ.
ނުނިމޭ
ލިޔުންތެރިޔާގެ ފުރަމަލަ
- މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.
މި ލިޔުންތެރިޔާގެ ބައެއް އެހެން ލިޔުންތައް
- 1 މެއި 2024ވާހަކައިމްނާ
- 16 އޮކްޓޯބަރ 2023ޚަބަރުމާމޮރިސް ބ: ގޮއިދޫ ފުޓްސަލް ފިއެސްޓާ 2023 : ޓީމް ޗަޑްސް އިން އުންމީދު އާކޮށްފި
- 16 އޮކްޓޯބަރ 2023ޚަބަރުމާމޮރިސް ބ. ގޮއިދޫ ފުޓްސަލް ފިއެސްޓާ 2023 : ރޯޔަލް ފްރެންޑްސް އާއި ޗެލެންޖާސް ސްޕޯޓްސް ކްލަބަށް މޮޅެއް
- 14 ސެޕްޓެމްބަރ 2023ޚަބަރުހަމް ޓީވީއިން މިފަހަރު ގެނެސްދެނީ “ފިތުނާ”
