ސިންގަޕޯރިއަން ރައިސް އަކީ ޕާކިސްތާނު ކައިވެނި ހަފުލާތަކުގެ ސުފުރާ މަތިން އާއްމުކޮށް ފެންނަ ކެއުމެކެވެ. މިއީ ވަރަށް މީރުވަސްދުވާ ބަތެކެވެ. ބަތުގެ މައްޗަށް ކްރީމީ އަދި ސޯސީ ނޫޑްލްސް އަޅާފައި ހުންނައިރު ކުޅުދިޔާ ކޮށްލާނެ އެވެ. މިޔަށް ސިންގަޕޯރިއަން ރައިސް ކިޔިޔަސް މިއީ ސީދާ ސިންގަޕޫރަށް ނިސްބަތްވާ ކެއުމެއްކަން ޔަޤީނެއް ނޫނެވެ. އެހެން ނަމަވެސް މިއީ ގޭގައި ތައްޔާރުކޮށްލަން ވަރަށް އެކަށީގެންވާ ކެއުމެކެވެ. ޚާއްޞަކޮށް ޢީދު ދުވަހު މެންދުރުގެ ސުފުރާއަށް ވަރަށް އެކަށީގެންވާނެ ކެއުމެކެވެ.

މިފަހަރު މުނިއަވަސް ރަހަފަތުގައި މިގެނެސްދެނީ ސިންގަޕޯރިއަން ރައިސް ތައްޔާރުކޮށްލާނެ ގޮތެވެ.

މިއީ އެންމެ މީހަކަށް ވާވަރަށް ތައްޔާރުކޮށްފައިވާ ރަހަފަތެކެވެ.

ބޭނުންވާނެ ތަކެތި:

– 3-4 ޗިކަން ބްރެސްޓް ފިލެޓް

– ½ ކިލޯ ހަނޑޫ

– ½ ޕެކެޓް ނޫޑްލްސް

– 2 ކެޕްސިކަމް

– 2 ކެރެޓް

– 1  ޖޯޑް ކެބެޖް

– 4-5  ތޮޅި މިރުސް

– 4  ލޮނުމެދު

– 1  ފިޔާ (މެދު ސައިޒުގެ)

– 1 ސައިސަމުސާ ލޮނުމެދު އިނގުރު ޕޭސްޓް

– 1 ސައިސަމުސާ ބޯކޮށް މުގުރާފައިހުރި ހިކިމިރުސް

– 1 ސައިސަމުސާ ދިރި

– 1 ޖޯޑު މެޔޮނައިސް

– 2 ސައިސަމުސާ އޮއިސްޓަރ ސޯސް

– 2 ސައިސަމުސާ ރާހުތް ނުވަތަ ސޯޔާ ސޯސް

– 2 ސައިސަމުސާ ކެޗްއަޕް (ބޭނުން ނަމަ)

– 2 ސައިސަމުސާ ޗިލީ ގާރލިކް ސޯސް

– ½ ސައިސަމުސާ ވައިޓް ޕެޕަރ

– ½ ސައިސަމުސާ އާދައިގެ އަސޭމިރުސް

– 2 ސައިސަމުސާ ކޯން ފްލަރ ފެނަށް ގިރާފަ

– ރަހަލާ ވަރަށް ލޮނު

– ނޫޑްލްސް ފްރައިކުރުމާއި ކެއްކުމަށް ތެޔޮ

– ½ ޖޯޑު ޗިކަން ސްޓޮކް (ކުކުޅު ގަރުދިޔަ)

ތައްޔާރުކުރާނެ ގޮތް:

1- ކުޑަކުޑަ ރީނދޫކޮޅެއް ލައިގެން ނޫޑްލްސް ކޮޅު ކެކޭހާ ފެން ކައްކާށެވެ.

2- ފެން އެތި ކެކެން ފެށުމުން ނޫޑްލްސް ކޮޅު އަޅައި ނޫޑްސް މަޑުވާންދެން ކައްކާލާށެވެ.

3- ނޫޑްލްސް ކެކުމުން ފެން ހިއްކައި ހޫނުކޮށްފައިވާ ތެލަށް އަޅައިގެން ތެލުލާށެވެ. ތެލުލައި ނިމުމުން ކަރުދާސްގަނޑެއް މައްޗަށް އަޅާފައި ބަހައްޓާށެވެ.

4- ފުން ތަވައެއްގައި ލޮނު، ދިރި، 2 ސައިސަމުސާ ތެޔޮ، ފެންފޮދަކަށް އަޅައިގެން ކައްކާށެވެ. މިއީ ހަނޑޫކޮޅު ކެކޭހައި ފެނެވެ.

5- ދޮވެ، ފެންހިއްކާފައިވާ ހަނޑުކޮޅު، ފެންފޮދު ތެރެއަށް އަޅައިގެން ކައްކާށެވެ. ބަތް ކައްކާވަރަށް ހަނޑޫކޮޅު މަޑުކޮށްލަންވާނެ އެވެ.

6- ތޮޅި މިރުސް، ލޮނުމެދު ދިގުކޮށް ކޮށާލައި ތެލުލާފައި ބަހައްޓާށެވެ.

7- އެއަށްފަހު ކެރެޓް، ކެޕްސިކަމް އަދި ކެބެޖް، ކޮޑީގެ ބައްޓަމަށް ކޮށާލާށެވެ.

8- ތަވައެއްގައި ލޮނުމެދު-ގާރލިކް ޕޭސްޓް ގަދަ ގިނީގައި 15 ސިކުންތު ވާންދެން ތެލުލުމަށްފަހު ކޮޑި ބައްޓަމަށް ކޮށާފައިވާ ކުކުޅުކޮޅު އަޅާލައި ރަތްވާންދެން ތެލުލާށެވެ.

9- ކުކުޅުކޮޅުގެ ތެރެއަށް ތަރުކާރީ އާއި ލޮނު، ވައިޓް ޕެޕަރ، އަސޭމިރުސް، ރާހުތް، އޮއިސްޓަރ ސޯސް، ކެޗްއަޕް އަދި ޗިލީ ގާރލިކް ސޯސް އަޅާށެވެ.

10- ހަމައެހެންމެ، ½ ޖޯޑު ޗިކަން ސްޓޮކް (ކުކުޅު ގަރުދިޔަ) އާއި ފެނަށް ގިރުވާފައިހުރި ކޯން ފްލަރ އަޅައި އެއްކޮށްލާށެވެ.

11- އެއްކުރި އެއްޗެހި އޮލަވާންދެން ހަލުވަމުން ކެއްކުމަށްފަހު އުނދުންމަތިން ބާލާށެވެ.

12- ބޯތަށްޓެއްގައި މެޔޮނައިސް އާއި މުގުރި ހިކިމިރުސް އަދި ފެން އަޅައިގެން ކްރީމީ ސޯސް ގަނޑު ތައްޔާރުކުރާށެވެ.

13- ކައްކާފައިހުރި ބަތްކޮޅުގެ އެއްބައި ބަތްކާ ތަށްޓަކަށް އަޅާފައި ރީތިކޮށް ފަރުރާލާށެވެ. އޭގެ މަތީގައި ކުކުޅާއި ތަރުކާރީން ތައްޔާރުކުރި ތަކެތި ފަތުރާލާށެވެ. އެއަށްފަހު އޭގެ މަތީގައި ބަތް ފަށަލައެއް ފަތުރައި ތައްޔާރުކުރި މެޔޮނައިސް ސޯސް އާއި ތެލުލާފައިވާ ހުރި ތޮޅި މިރުހާއި ލޮނުމެދު އަތުރާލާށެވެ.

14- އެންމެ ފަހުން ނޫޑްލްސްކޮޅު ފަތުރާލާށެވެ. މިހާރު އެހެރީ މީރުމީރު ސިންގަޕޯރިއަން ރައިސް ތައްޔާރުކުރެވިފައެވެ.

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: