ޝައިމް އާއި ޝައިން އަކީ އެއްމާބަނޑު ދެބެއިންނެވެ. ދެބެން ގެ ސިފަ ވައްތަރުކަމުން އެކުދިންގެ މަންމައަށް ވެސް ދެކުދިން ވަކިކުރަން އުނދަގުލެވެ. ޚާއްޞަކޮށް އެކުދިން ތުއްތު އިރުއެވެ.
ސިފަ ކިތަންމެ ވައްތަރު ނަމަވެސް ދެކުދިންގެ މިޒާޖާއި އުޅުން އުޑާއިބިމާހައި ތަފާތެވެ. ޝައިންގެ ރައްޓެހި ކުދިން ވަރަށް މަދެވެ. އެއްގޮތަށް ނުވެސް ތިބެއެވެ. އެކަމަކު ޝައިމް އަކީ ރަޙުމަތްތެރިން ގިނަ، ކުދިންނާއި ގުޅޭ ކުއްޖެކެވެ. އަވަހަށް ރައްޓެހިން ހޯދަން ކުޅަދާނަ ކުއްޖެކެވެ. ޝައިމް އަކީ ފޮނިކާއެއްޗެއްސަށް ފިސާރި ފޯރި ހުންނަ ކުއްޖެކެވެ. ނަމަވެސް ޝައިން އަށް ކަމުދަނީ ކުޅި ކާއެއްޗެއްސެވެ. ފޮނިކާއެއްޗެހި ދެކެ ނިކަން ފޫހިވެއެވެ. ޝައިން އަކީ މަންމަގެ ދޮންފުތު ކުއްޖާއެވެ. އަދި ޝައިމް އަކީ ބައްޕަގެ ދޮންފުތު ކުއްޖާއެވެ. ޝައިމް އަކީ ދީލަތި އަދި އެހެން މީހުންނާއިމެދު ވިސްނާ ކުއްޖެކެވެ. މިޔާ ޚިލާފަށް ޝައިން އަކީ ދަހިވެތި އަދި އަމިއްލަ އެދުންބޮޑު ކުއްޖެކެވެ.
ޝައިމް އާއި ޝައިން ބޮޑުވެ ފުރާވަރަށް އެޅުމާއެކު އެކުދިންގެ ބައްޕަގެ މުދަލާއި އެންމެހައި ފައިސާއެއް ދެކުދިންގެ މެދުގައި ހަމަހަމައަށް ބެހުމަށް ނިންމި އެވެ. ނަމަވެސް މިކަމާ ޝައިން އެއްބަހެއް ނުވިއެވެ. ޝައިން ބޭނުންވީ ދެކުދިންގެ ތެރެއިން އެންމެ ތޫނުފިލި އަދި ވަރުގަދަ ކުއްޖެއް ބެލުމަށްފަހު އެކުއްޖަކަށް އެންމެ ބޮޑު ހިއްސާއެއް ލިބޭގޮތަށް މުދަލާއި ފައިސާ ބެހުމަށެވެ.
ޝައިމް މިކަމާ ވަގުތުން އެއްބަސްވި އެވެ. އެހެންކަމުން އެކުދިންގެ ބައްޕަ ނިންމީ ދެކުދިންގެ މެދުގައި ރޭހެއް ޖެހުމަށެވެ. އެގޮތުން ދެކުދިންކައިރީގައި ބައްޕަ ބުނުއްވީ ހިނގުނު އެންމެ ދުރަކަށް ދެކުދިން ހިނގުމަށްފަހު، އިރު އޮއްސުމުގެ ކުރިން ގެއަށް އައުމަށެވެ. މުދަލާއި ފައިސާ ބެހުމަށް ނިންމީ ދެކުދިންނަށް ހިނގޭ ދުރުމިން ބެލުމަށްފަހު އެ ނިސްބަތަށެވެ. ރޭހުގެ ޤަވާޢިދެއްގެ ގޮތުން ބައްޕަ ބުނުއްވީ ގަޑި ބެލުމަށް ގަޑިއެއް ނުގެންދެވޭނެ ކަމަށެވެ.
އޭގެ އަނެއްދުވަހު، ޝައިމް އާއި ޝައިން ހިނގަން ފެށިއެވެ. ދުވަހަކީ ހޫނުގަދަ ދުވަހެކެވެ. ޝައިމް ހިނގަމުން ދިޔައީ މަޑުމަޑުން ހަމަޖެހިގެންނެވެ. ނަމަވެސް ޝައިން ހިނގަމުން ދިޔައީ ވަރަށް ބާރަށެވެ. މުބާރާތުން އެންމެ ކުރި ހޯދުމަށް ތެޅިފޮޅުނީ އެވެ. ބައްޕަގެ މުދަލާއި ފައިސާއިން ބޮޑުބައެއް ހޯދުމުގެ ދަހިވެތި ކަމުގައެވެ.
ޝައިމް ހިނގަމުން ދިޔައީ ވިސްނައިގެންނެވެ. ހިނގާނެ ހިސާބަކަށް ހިނގުމަށްފަހު މެންދުރު ވުމުން ގެއަށް އައުމަށް މިސްރާބު ބަދަލުކޮށްލަން ޖެހޭނެކަން ދަނެގެންނެވެ. ގެއިން ފެށިގެން ހިނގުނު ހިސާބަކަށް ދިއުމަށްފަހު އެނބުރި ގެއަށް ދިޔުމަށްވެސް ހަމަ އެހާ ވަގުތު ނަގާނެކަން ވިސްނުމުގައި ބަހައްޓައިގެންނެވެ. އެހެންކަމުން މެންދުރުގެ އިރު މެދުއުޑުގައި ޖެހުމާއެކު ޝައިމް ގެއަށް ދިއުމަށް ހިނގަން ފެށިއެވެ.
ނަމަވެސް، ބައްޕަގެ މުދަލާއި ފައިސާއިން ބޮޑުބައެއް ހޯދުމުގެ ދަހިވެތިކަމުގައި މެންދުރުވެ އަސުރުން ތިރިވިއިރު ވެސް ޝައިން ހިނގަމުން ދިޔައީ އެންމެ ދުރަށް ހިނގުމަށެވެ. އެގޮތުން ޝައިމް ހިނގި ދުރުމިނުގެ ދެގުނައަށް ޝައިން ހިނގައިފިއެވެ. ޝައިން ހީކޮށްގެން ހުރީ އެހައި ދުރަށް ހިނގުމަށްފަހު އިރުއޮއްސުމުގެ ކުރިން ގެއަށް ދެވޭނެ ކަމަށެވެ. އިރު އޮއްސުމަށް ރަތްވިލާ ލާންފެށުމާއެކު ގެއަށް ދިއުމަށް ޝައިން ހިނގައިގަތީ ދެފަޔަށް ލެވުނުހައި ބާރެއް ލާފައެވެ. ނަމަވެސް އިސާހިތަކުން މުޅި މާހައުލަށް އަނދިރިކަން ރަސްކަންކުރަން ފަށައިފި އެވެ. ވަރުބަލިވެ ދެފަޔަށް ތަދުވާވަރުން ހިނގުމުގެ ބާރުމިންވެސް މަޑުވަމުން މަޑުވަމުން ގޮސް މަޑުވެއްޖެ އެވެ. ގެއަށް ދެވުނުއިރު އިރުއޮއްސި އިޝާ ނަމާދަށް ބަންގި ގޮވަންވެސް ކައިރިވެއްޖެ އެވެ.
ރޭހުން މޮޅުވީ ޝައިމް އެވެ. ރޭހުން ބަލިވީ ޝައިން އެވެ. ޝައިންގެ ދަހިވެތިކަމުންނެވެ. ދަހިވެތިކަމުގެ ނަތީޖާ އަބަދުވެސް ހިތިވާނެ އެވެ.
ނޯޓު: މިއީ އިނގިރޭސި ވާހަކައެއްގެ ތަރުޖަމާ އެކެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
- 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
- 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
- 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!
