12 އޯގަސްޓް 2018 ވަނަ ދުވަހަކީ ރާއްޖޭގެ ލިޖެންޑަރީ ލަވަކިޔުންތެރިޔާ އަދި މިވަގުތު ރާއްޖޭގެ އެންމެ މޮޅު އަންހެން ލަވަކިޔުންތެރިޔާ އުނޫޝާ ގެ މަންމަ، ފާތުމަތު ޝަފީޤާގެ ޙަޔާތަށް ވަރަށް އުފާވެރި ދުވަހެކެވެ. ގިނަ ދުވަސްތަކެއް ހަޔާތުގެ ބައިވެރިއަކާއި ނުލައި ހޭދަކުރުމަށްފަހު ޝަފީޤާ މިވަނީ މިމަހުގެ 12 ވަނަ ދުވަހު އައު ކައިވެންޏެއް ކޮށް ޒަވާޒީ ޙަޔާތެއް އަލުން ފަށާފައެވެ.

 

 

އުމުރުން 57 އަހަރުގެ ޝަފީޤާ ކައިވެނިކުރީ އުމުރުން 39 އަހަރުގެ ޙުސައިން ފިރާޤް އާއެވެ. ފިރާޤަކީ މ. އަތޮޅު މަޑުއްވަރީ އަށް އުފަން މީހެކެވެ.

ޝަފީޤާ އަދި ފިރާޤް ގެ ކައިވެނި ހަފުލާގެ ކާޑު

އަލުން އައި ކައިވެންޏެއް ޝަފީޤާ ފަށާފައި މިވަނީ “ވަރަށް ރޮމޭންޓިކް” ކޮށެވެ. ކައިވެނީގެ ހެދުމުން ފެށިގެން ގޮސް ކައިވެނި ހަފުލާގެ ކާޑާއި ހަފުލާ ކުރިއަށްދިޔަ ގޮތްވެސް އެހާމެ ރޮމޭންޓިކެވެ. މަޑު ފިޔާތޮށި ކުލައަކަށްދާ ވެޑިން ޑްރެސް އެއްގައި ޝަފީޤާ ހުރި އިރު، ފިރިމީހާ ފިރާޤް ހުރީ ޝޭރްވާނީ ކުރުތާ ހެދުމެއްގައެވެ. ކައިވެނި ހަފުލާ ބޭއްވީ ދަރުބާރުގޭ ބިއްލޫރި މާލަމުގައެވެ. ހަފުލާ ތެރެއިން އެންމެ ފާހަގަކޮށްލެވުނު އެއްކަމަކީ ޝަފީޤާ އާއި ފިރާޤް ގެ ލަވަކިޔުމެވެ. މިއުޒިކް ޓްރެކް ޖަހައިގެން އަތާއި އަތްގުޅާލައިގެން ކިޔި ހިތްގައިމު ލޯބީގެ ލަވަތަކެވެ.

މުނިއަވަސް އަށް މިވަނީ ޝަފީޤާ އާއި ފިރާޤް ކިޔާފައިވާ މިފަދަ ލަވައެއްގެ ވީޑިއޯ އެއް ލިބިފައެވެ. ވީޑިއޯ އިން ޝަފީޤާގެ ދޮށީ ދަރިފުޅު، މަޝްހޫރު ލަވަކިޔުންތެރިޔާ އުނޫޝާ ވެސް އޭނާގެ މަންމަމެންގެ އުފަލުގައި އުފާވެރި ހިނިތުންވުމަކާއެކު މަޖާކުރާތަން ފެނިގެންދެއެވެ.

ޝަފީޤާ އަދި ފިރާޤް

ޝަފީޤާ އަކީ ކުރީގެ މަޝްހޫރު ބޭންޑް ގެލެކްސީއިން މަޝްހޫރުކަން ހޯދާފައިވާ ފަންނާނެކެވެ. ޕާކިސްތާނަސް އުފަން މަޝްހޫރު ލަވަކިޔުންތެރިޔާ ސަލްމާ އާގާ ގެ އެންމެ ފާހަގަކޮށްލެވޭ އެއް ލަވަކަމަށްވާ ‘ދިލްކެ އަރުމާ އާސުއޯނމޭ ބެހެގައޭ..” މި ލަވައާއި އެރާގަށް ޝަފީޤާ ކިޔާފައިވާ ދިވެހި ލަވައަކީ ހަދާނުން ފޮހެލަންދަތި ލަވައެކެވެ.

 

ޝަފީޤާ ކުރިން ކައިވެނި ކޮށްފައިވަނީ ލަވަކިޔުންތެރިޔާ އަދި މިއުޒީޝަން އިމާދު އިސްމާޢީލް އާއެވެ.

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: