| MUNIAVAS

ރާއްޖޭގެ ފިލްމީ ދާއިރާގެ ރާނީ ނިޢުމާ މުޙައްމަދު ގެ ވަދާޢީ ފިލްމު “ނިވައިރޯޅި” ގެ ފަރުދާކަހާލައި ޕޯސްޓަރާއި ލަވައެއް އަދި ޓްރެއިލަރ ދައްކާލައިފި އެވެ. ޓްރެއިލާ ދޫކޮށްލީ އެކަމަށް ހާއްސަކޮށް ރޭގައި ބަނޑޮސް އައިލެންޑް ރިސޯޓުގައި ބޭއްވި “ނިވައިރޯޅި ކާޓެއިން ރެއިޒާ” އިވެންޓުގައި އެވެ.

ސިޔާސީ ގޮތުން ރާއްޖެ އެންމެ ބޮޑަށް ހަލަބޮލިވެ އިންތިޚާބަށް ހޭލަމޭލަވެފައިވާ އެންމެ ފަހު ދަނޑިވަޅާއި ދިމާކޮށް ރޭ ބަނޑޮސް އައިލެންޑް ރިސޯޓްގައި ބޭއްވި ކާޓެއިން ރެއިޒާ އިވެންޓްގައި ފިލްމުގެ ކާސްޓާއި ކްރޫ އަދި ދައުވަތު ދީގެން ގިނަ ބަޔަކު ބައިވެރިވި އެވެ. ރޭގެ ހަފުލާގައި ފިލްމުގެ އޮފިޝަލް ޕޯސްޓަރާއި ފިލްމުގެ ލަވައެއް އަދި ޕްރޮމޯޝަނަލް ލަވައެއްވެސް ވަނީ ދޫކޮށްލާފަ އެވެ. ޓްރެއިލާ އަދި ޕޯސްޓަރު ނެރެދިނީ މަޝްހޫރު “ނޯޓް” ކޮސްމެޓިކްސްގެ ރާއްޖޭގެ މާކެޓިން މެނޭޖަރު އަހްމަދު ޝިޔާމެވެ.

ނިވައިރޯޅި ގެ ރަސްމީ ޕޯސްޓަރ

“ނިވައިރޯޅިގެ ޓްރެއިލާ އާންމުކުރުމާއެކު ވަރަށް ގިނަ ދުވަސްތަކެއްގެ އިންތިޒާރު ނިމުމަކަށް މި އައީ، ވަރަށް ބުރަ މަސައްކަތެއްގެ ކުޑަ ތަންކޮޅެއް ތި ފެނުނީ، ހުރިހާ ބޭފުޅުންނަށްވެސް ވަރަށް ކަމުދާނެކަމަށް އުއްމީދުކުރަން،” މިހާރު އެންމެ އިންތިޒާކުރެވޭ ދިވެހި ފިލްމާއި ބެހޭގޮތުން ނިއުމާ ބުންޏެވެ.

ނިއުމާ އެކްޓުކުރުން ހުއްޓައިލާ ފިލްމު “ނިވައިރޯޅި” ރިލީޒްކުރަން ނިންމާފައި ވަނީ އަންނަ މަހުގެ 15 ގަ އެވެ. މި އަހަރުގެ އެންމެ އިންތިޒާރު ކުރެވޭ އެއް ފިލްމްގެ އާ ޓީޒާ ޓްރެއިލާ އިން ވަނީ ފިލްމްގެ ގިނަ މަންޒަރުތަކެއް ނިއުޅެމުންދާތަން މިއުޒިކާ އެކު ދައްކާލައިފަ އެވެ. ޓްރެއިލަރ ގައި ފިލްމްގެ އެއްވެސް މަންޒަރެއްގެ ޑައިލޮގެއް ހިމަނައިފައެއް ނުވެ އެވެ.

ފިލްމުގެ ރަސްމީގެ ލަވައިގެ ގޮތުގައި ދައްކައިލި ލަވައިން ފެންނަނީ ނިއުމާ އާއި ޔޫސުފް (ޔޫއްޕެ) ޝަފީއު އެވެ.

ނިއުމާގެ ފިލްމީ ކެރިއަރަށް 24 އަހަރުފުރުންވެސް ރޭގައި ވަނީ ފާހަގަކޮށްފަ އެވެ. ނިއުމާ ފިލްމީ ދާއިރާއަށް ނިކުތީ 1994 ގައި ޑްރާމާ ސިލްސިލާ “ހިތި ތަޖުރިބާ” އިންނެވެ.

ނިއުމާއާއިއެކު މި ފިލްމުގެ ކާސްޓުގައި ޔޫއްޕެ، ފާތިމަތު ޒީނަތު (ޒީތު)، އަމިނަތު ރިޝްފާ، އަހްމަދު އަޒްމީލް (އަޒޭ)، އަހްމަދު ޒިޔާ، އަހްމަދު ސައީދު، މަރިޔަމް ޝަކީލާ، މަރިޔަމް ހަލީމް، އަމިނަތު ރަޝީދާ (އައިންތު)، ނާޝިދާ މުހައްމަދު (ނާއްކޮ)، އާމިނަތު ނިފާ ރަޝީދު، އަހްމަދު އާސިފް، އިސްމާއިލް ޒާހިރު، އަދި އަޖްނާޒް އަލީ ހިމެނެ އެވެ.

ނިޢުމާ އާއި އޭނާގެ ދަރިފުޅޫ ޒޯޔާ ގެ ނަމުން ނަންދީފައިވާ ‘ނިއުޒޯ ފިލްމްސް’ އިން ގެނެސްދޭ މި ފިލްމު ޑައިރެކްޓް ކޮށްފައިވަނީ މޫމިން ފުއާދު އެވެ. ފިލްމު ސިނަމާއަށް އަންނާނީ އަންނަ މަހު 15 ގައި އެވެ.