ސޫރުދަ ނިޒާމު (ސޯލަރ ސިސްޓަމް) ގައި ހިމެނޭ އެންމެ އުޖާލާ ފަސް ގުރަހަ ކަމަށްވާ އަތާރިދު (މާކަރީ)، ޒުހުރަތު (ވީނަސް)، މުޝްތަރީ (ޖުޕިޓަރ)، ޒުހުލު (ސެޓަރން)، މިއްރީހު (މާރސް) މިއަހަރު ދެވަނަ ފަހަރަށް އެއްފަހަރާ އެއްބަރިއަކަށް ހުއްޓާ ފެންނަން ހުންނާނެއެވެ.

 

މިގުރަހަތައް ހުޅަނގު އުދަރެހުން ފެށިގެން އެއްބަރިއަކަށް މައްޗަށް އެތުރިފައި ހުއްޓާ ފެންނާނެއެވެ. މިމަހުގެ ހުރިހާ ރެއެއްގައި މި ގުރަހަތައް މިސަރަހައްދުން ފެންނަން ހުރިނަމަވެސް އެންމެ ރީއްޗަށް ފެންނާނީ މިރެއެވެ. (18 އޮކްޓޯބަރު 2018 ވަނަ ދުވަހުގެ ރޭގަ އެވެ.)

 

އުދަރެހާ އެންމެ ކައިރިން ހުޅަނގުފަރާތުން ފެންނަން ހުންނާނީ އަތާރިދާއި ޒުހުރަތެވެ. ޒުހުލު ހުންނާނީ ތަންކޮޅެއް މަރިން ހުޅަނގު އުތުރުގައެވެ. މިއްރީހު އެއަށްވުރެވެސް މަތީގައެވެ. އާންމުކޮށް ފެނުން އުނދަގޫ އަތާރިދު، އަލިގަދަ ޒުހުރަތުގެ ކައިރީގައި ހުރުމުގެ ސަބަބުން މިރޭ ރީއްޗަށް ފެންނަން ހުންނާނެއެވެ. މިމަހުގެ ތަންކޮޅެއް ފަހުން (އޮކްޓޯބަރު 24) ގައި ޔުރާނަސް އާއި ނަފުތޫނު އުޑުމަތިން ފެންނާނެއެވެ. ނަމަވެސް އެހާ ސާފުކޮށް ނުފެނުން އެކަށީގެންވެއެވެ.

 

މިގޮތަށް ގުރަހަތައް އެއްތަނުގައި ހުއްޓާ ފެނުމަކީ މާގިނަގިނައިން ވާކަމެއް ނޫނެވެ. މިއީ މިއަހަރު މިގޮތަށް ފެނުނު ދެވަނަފަހަރު ކަމުގައި ވީނަމަވެސް މީގެ ކުރިން މިގޮތަށް ފެނިގައިވަނީ 2016 ވަނަ އަހަރުއެވެ. އޭގެވެސް ކުރިން މިގޮތަށް ފެނުނީ ދަހަރެއް (ދިހަ އަހަރު) ކުރިންނެވެ.

 

އެންމެ އަލިގަދަ މިފަސް ގުރަހަ ދެން މިގޮތަށް އެންމެ އަވަހަށް ފެންނާނީ 2020 ޖުލައި ގައެވެ. ނަމަވެސް މިފަހަރު މިފެނުނު ގޮތަށް ގުރަހަތައް ކައިރިއެއް ނުވާނެއެވެ. ހުންނާނީ ބޮޑު ސަރަހައްދަކަށް ފެތުރިފައެވެ.

ލިޔުންތެރިޔާގެ ފުރަމަލަ

މުޙައްމަދު ނަޒީރު
މުޙައްމަދު ނަޒީރު
އާއްމުކޮށް ނަޒީރުގެ ލިޔުންތައް ނުފެނުނަސް، ނަޒީރަކީ ތަޖުރިބާކާރު ބޭފުޅެކެވެ.

ގުޅުންހުރި ލިޔުން: