ސުރުޚީގައި އެވާ ސުވާލަކީ ޕްރީ ސްކޫލް ޓީޗަރުންނާއި ފަށާ ތަޢުލީމު ނުވަތަ ޕްރައިމަރީ ޓީޗަރުންނަށް ދަރިވަރުންގެ ފަރާތުން ވަރަށް ގިނައިން ކުރިމަތިވާނެ ސުވާލެކެވެ. މިހެން މިދެންނެވީ އަޅުގަނޑުވެސް ޕްރައިމަރީ ގްރޭޑްތަކަށް އިނގިރޭސި ބަސް ކިޔަވައިދިނުމުގައި ހޭދަކުރި ފަސް އަހަރުގެ ތަޖުރިބާއަށް ބަލާފައެވެ. ދަރިވަރުންނަށް ‘ބީ’ އާއި ‘ޑީ’ މި ދެ އަކުރު އޮޅުންއަރާގޮތް ވުމަކީ ވަރަށް ޢާއްމު ކަމެކެވެ. ނާރސަރީ ދަރިވަރުންގެ އިތުރުން ގްރޭޑް 1 ން ފެށިގެން 5 ގެ ދަރިވަރުންގެ ކިބައިންވެސް މިކަން ފާހަގަ ކުރެވެއެވެ. މީގެ އިތުރަށް އަލަށް އިނގިރޭސި ބަސް ދަސްކުރަން ފަށައިގަންނަ ބޮޑެތިމީހުންނަށްވެސް މިކަން ކުރިމަތިވެއެވެ.

 

އަޅުގަނޑު ޓިއުޝަންދެމުން ދިޔަ ދުވަސްވަރެއްގައި، އަޅުގަނޑު ޓިއުޝަންދިން ދެ ދަރިވަރަކު ވަރަށް ގިނައިން މި ދެ އަކުރު އޮޅުވާލައެވެ. މި ދަންނަވާ ދެ ކުދިންނަކީ ގްރޭޑް 2 ގެ ދަރިވަރަކާއި 4 ގެ ދަރިވަރެއްގެ ވާހަކައެކެވެ. މިއަދު މި ދެއަކުރުގެ ތަފާތު އޮޅުންފިލުވައިދިނަސް މާދަމާވެސް ހުންނާނީ ހަނދާން ނެތިފައެވެ. ކުރިން ދެންނެވިފަދައިން އަޅުގަނޑު އުނގަންނައިދިނުމުގައި ހޭދަކުރި ފަސް އަހަރު މުޅިންވެސް ކިޔަވައިދިނީ ޕްރައިމަރީ ގްރޭޑް ތަކަށް އިނގިރޭސި ބަސް ކަމަށް ދެންނެވިޔަސް ދޮގަކަށް ނުވާނެއެވެ. އެ ދުވަސްވަރު އަޅުގަނޑުގެ ބައެއް ދަރިވަރުންގެ ފަރާތުން މި ދެއަކުރު އޮޅުވާލުމުގެ މައްސަލަ ހައްލުކުރުމަށް ރަނގަޅު ‘ޓެކްނީކެއް’ ލިބޭނެ ނަމައޭ ވަރަށް ގިނައިން ހިތަށް އެރިއެވެ. ނަމަވެސް އެ ދުވަސްވަރަކީ ލ. އަތޮޅު ތަޢުލީމީ މަރުކަޒުގެ ޙަޔާތުގައިވެސް އަދި ޚުދު އަޅުގަނޑުގެވެސް ޙަޔާތުގައިވެސް އިންޓަރނެޓަށް މިހާރުހައި އަހުލުވެރި ޒަމާނެއް ނޫނެވެ. އެހެންކަމުން އެކަމަށް މާ އެދެވޭ ހައްލެއް ހޯދުން ދަތިކަމަކަށް ވެފައި އޮތީކަމަށްވެސް ވެދާނެއެވެ.

 

ކޮންމެއަކަސް ‘ޑީ’ އާއި ‘ބީ’ ގެ ފަރަގު ދަރިވަރުންނަށް އޮޅުން ފިލުވައިދިނުމަށް ވަރަށް ފައްކާ ގޮތްތަކެއް އިންޓަރނެޓް ހާވަނިކޮށް އަޅުގަނޑަށް ފެނުމާއި އެކު އެ ގޮތްތައް ހިއްސާ ކޮށްނުލައި އަޅުގަނޑަށް ހުރެވޭވަރެއް ނުވިއެވެ. އެހެންކަމުން މި ލިޔުމުގައި މި ބަލައިލަނީ ‘ދަ ފަރސްޓް ގްރޭޑް ޕެރޭޑް’ ނަމަކަށް ކިޔާ ‘ބްލޮގް’ އެއްގައި ޝާއިޢު ކޮށްފައިވާ ލިޔުމެއްގެ މައްޗަށް ބިނާކޮށް ލިޔެފައިވާ ލިޔުމެކެވެ.

 

‘ބީ’ އަކުރާއި ‘ޑީ’ އަކުރު އޮޅުންއެރުމަށް އިނގިރޭސިބަހުން ކިޔައި އުޅެނީ ‘ލެޓަރ ރިވަރސަލްސް’ (އަކުރު އޮޅުވައިލުން) އެވެ. މިގޮތަށް ދަރިވަރުން އޮޅުވައިލަނީ ހަމައެކަނި އަކުރެއް ނޫނެވެ. ބައެއް ބަސްބަސްވެސް އޮޅުވާލައެވެ. b  ގެ ބަދަލުގައި d ބޭނުން ކުރެވެއެވެ. ހަމަ އެހެންމެ އޭގެ އިދިކޮޅަށްވެސް ބޭނުންކުރެއެވެ. tac  ގެ ބަދަލުގައި cat ބޭނުން ކުރެވެއެވެ. އިނގިރޭސި ބަސް އުނގެނެން ފަށައިގަންނައިރު މިފަދަ ގޮތަކަށް އޮޅުވާލުމަކީ އެހައި ކަންބޮޑުވާން ޖެހޭ ކަމެއް ނޫންކަމަށް ބަސް އުނގަންނައިދިނުމުގެ ތަޖްރިބާކާރުން ވިދާޅުވެއެވެ. ނަމަވެސް ބައެއް ފަހަރަށް މިކަމަކީ ދަރިވަރުގެ ކިބައިގައި ލާރނިސް ޑިސޭބިލިޓީ އެއް ނުވަތަ އުނގުނުމުގައި ނުކުޅެދުންތެރިކަމެއް ހުރުން ކަމަށް ހީވެދާނެއެވެ. ނުވަތަ ނިއުރޮލޮޖިކަލް ޑިސްފަންކްޝަނެއް (ނާރުތަކުގެ ނިޒާމުގެ މަސައްކަތް ކުރުމުގައި މައްސަލައެއް) ހުރުން ކަމަށްވެސް ހީވެދާނެއެވެ. އަދި ހަމަ އެހެންމެ ޑިސްލެކްސިކް (އުނގުނުމުގައި ނުކުޅެދުންތެރިކަމެއް ހުރުމުގެ ވައްތަރެއް) ހުރީ ކަމަށްވެސް ހީވެދާނެއެވެ. ނަމަވެސް އަކުރު ނުވަތަ ބަސް އޮޅެން މި ޢުމުރުގެ ކުދިންގެ ފަރާތުން ފެނުން އެއީ ހައިރާންވާން ޖެހޭ ކަމެއް ނޫނެނެވެ.

 

އަކުރު ނުވަތަ ބަސް އޮޅުވައިލުމަށް ވަރަށް ގިނަ ހައްލުތައް ‘ދަ ފަރސްޓް ގްރޭޑް ޕެރޭޑް’ ‘ބްލޮގް’ ގައި ހިމަނާފައި ވެއެވެ. އެގޮތުން ބްލޮގް ލިޔުންތެރިޔާ ބުނާގޮތުން އޭނާގެ ކުލާސް ކޮޓަރީގައި ދަރިވަރުންނަށް ހަނދާން ކޮށްދިނުމުގެ ގޮތުން އަބަދުވެސް ފެންނަ ހިސާބުގައި ތިރީގައިވާ ޕޯސްޓަރު ބަހައްޓައެވެ.

 



މިފަދަ ޕޯސްޓަރެއް ބެހެއްޓުމުން މި ދެއަކުރު އޮޅުން އެރުން ކުޑަވެގެން ދާނެކަމަށް ބެލެވެއެވެ. މީގެ އިތުރުން ދަރިވަރުން ކައިރީގައި އަންނަނިވި އިބާރާތްކޮޅު ބުނެދީފައި ބޭއްވުމުންވެސް ދެ އަކުރުގެ ތަފާތު ހަނދާނުގައި ބެހެއްޓުމަށް އެހީއަކަށް ވާނެއެވެ.

 

“Little B faces away from Big B because he’s been a bad, bad boy” and the “Big D faces the little D because he is so doggone good.” 

 

“ކުޑަ ‘ބީ’ (ސިމްޕަލް ބީ) އަބަދުވެސް ހުންނަނީ ބޮޑު ‘ބީ’ (ކެޕިޓަލް ބީ) އާއި ދުރަށް މޫނު އަނބުރައިގެންނެވެ. ތިކުދިންނަށް އެނގޭތަ އެއީ ކީއްވެކަން؟ އެއީ ކުޑަ ‘ބީ’ އަކީ ވަރަށް ގޯސް (ބޭޑް)، ގޯސް (ބޭޑް) ފިރިހެން ކުއްޖެއް (ބޯއީ). އަދި އެނގޭތަ؟ ބޮޑު ‘ޑީ’ (ކެޕިޓަލް ޑީ) ހުންނަނީ ކުޑަ ‘ޑީ’ (ސިމްޕަލް ޑީ) އާއި ދިމާއަށް ކުރިމަތިލައިގެން. އެއީ އޭނަ ވަރަށް (doggone) ރަނގަޅު ވީމަ.”

 

މިފަދަ ގޮތަކަށް މަތީގައިވާ ޢިބާރާތްތައް މާނަ ކޮށްދެވިދާނެއެވެ. ނަމަވެސް މިހެން ކިޔައިދިނުމުން ހަނދާނުގައި ބެހެއްޓުމަށް ފަހަރުގައި އުނދަގޫ ވެދާނެއެވެ. ސަބަބަކީ ދަރިވަރުންނަށް ފެންނަ ފެނުމުން މާ ފަސޭހައިން ދަސްކުރެވޭތީއެވެ. އެހެން ކަމުން ބްލޮގް ލިޔުންތެރިޔާ ބުނަނީ މަތީގައިއެވާ ޢިބާރާތްކޮޅު ހިމަނައިގެން އެހެން ޕޯސްޓަރެއް ތައްޔާރުކޮށް ބެހެއްޓުމުން ދަރިވަރުންނަށް ފަސޭހަ ވެގެންދާނެ ކަމަށެވެ. އެގޮތުން ލިޔުންތެރިޔާ ކުލާހުގައި ބޭނުންކުރުމަށް ހަދާފައިވާ ދެ ޕޯސްޓަރު ހިމަނާލާނަމެވެ.

ބީ އަކުރާއި ޑީ އަކުރުގެ ފަރަގު ދަސްކޮށްދިނުމަށް މިފަދަ ޕޯސްޓަރެއް ކުލާހުގައި ތަތްކޮށްފައި ބެހެއްޓިދާނެ

މީގެ އިތުރުންވެސް ވަރަށް ގިނަ ތަފާތު ގޮތްތައް މި ސިފަކޮށްފައި ވެއެވެ.


ބެޑް ނުވަތަ އެނދުގެ ބޯލާ ކޮޅު ނިސްބަތްކޮށްދެނީ ބީ އަކުރަށް ކަމަށާއި ފައިލާކޮޅު ނިސްބަތްކޮށްދެނީ ޑީ އަކުރަށްކަމަށް މި ދެޕޯސްޓަރުން ބުނެދެވިދާނެ އެވެ.

 

ކިޔު އާއި ޕީ އަކުރު އޮޅުންއެރުން ކުޑަކުރުވުމަށް ތިރީގައިވާ ކުރެހުމާއި އެއްގޮތަށް ޕޯސްޓަރެއް ތައްޔާރުކުރެވިދާނެ އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: