2017 ވަނަ އަހަރުގެ އެންމެ ބޮޑު ފިލްމުގެ ގޮތުގައި އިޝްތިހާރު ކުރެވި، އަހަރުގެ އެންމެ ކާމިޔާބު އަދި އެންމެ ގިނަބަޔަކު ބެލި ފިލްމަކަށް ހަމަ ގައިމުވެސް “ނޯޓީ ފޯޓީ” ވާނެއެވެ. އަނެއްކާވެސް “ނޯޓީ ފޯޓީ”ގެ ޓީމުން ތައްޔާރުވަމުންދަނީ އެފަދަ ފިލްމެއް ގެނެސްދިނުމަށެވެ. 2019 ވަނަ އަހަރުގެ އެންމެ ބޮޑު ފިލްމުގެ ގޮތުގައި ފެބްރުއަރީ 27 ގައި ގެނެސްދޭ ފިލްމަކީ “ފޯޓީ ޕްލަސް” ކަމަށް ހެދުމަކީ ފިލްމުގެ ޓީމުގެ އަމާޒެވެ.

 

“ފޯޓީ ޕްލަސް ވީމާ ނޯޓީ ވާނެ، ފިލްމު ރިލީޒްކުރަނީ ފެބްރުއަރީ 27 ގައި. އަހަރުގެ އެންމެ ބޮޑު ފިލްމު2019″ މި ޝިއާރުގެ ދަށުން ކޮންމެ ދުވަހަކު ކަހަލަ ގޮތަކަށް “ފޯޓީ ޕްލަސް” ގެ ފޭސްބްކް ޕޭޖުން އަންނަނީ ފިލްމުގެ ކޮންމެވެސް މަންޒަރެއް ހިމެނޭ ޕޯސްޓެއް ޖަހަމުންނެވެ. ތަފާތެއް ފެންނަ ޕޯސްޓްތަކެކެވެ. ބިރުވެރި އަދި ހެއްވާ މަޖާ ކަންތައް ތަކެއް ދައްކައިދޭނެ ފިލްމެއް ކަމަށް ފިލްމުގެ ޕްރޮޑިއުސަރާއި ޑައިރެކްޓަރުގެ އިތުރުން އެކްޓަރުންވެސް އަންނަނީ ބުނަމުންނެވެ.

 

އެންވިޝަން އާއި ޔޫއްޕެ ޕްރޮޑަކްޝަން ގުޅިގެން އުފެއްދި “ނޯޓީ 40″ގެ ދެވަނަ ބައެއްގެ ގޮތުގައި އުފައްދާ “ފޯޓީ ޕްލަސް” އާއި ގުޅޭގޮތުން ފިލްމުގެ ޕްރޮޑިއުސަރު އިސްމާއީލް ޝަފީގު ބުނީ މިއީ 2019 ވަނަ އަހަރު ދިވެހި ފިލްމީ ސްކްރީނަށް އަންނާނެ އެންމެ ތަފާތު އެއް ފިލްމަށްވާނެކަމަށެވެ. އަދި ފިލްމަކީ ބެލުންތެރިންނަށް ވަރަށް ކަމުދާނެ ފިލްމަކަށްވާނެކަން ޔަގީންކުރާކަމަށް ޝަފީގް ވަނީ ބުނެފައެވެ.

 

ޝަފީގް ބުނީ “ފޯޓީ ޕްލަސް“އަކީ ވަރަށް ގިނަ ރަހަތައް އެކުލެވޭނެ ފިލްމެއްކަމަށާ ފިލްމުގައި ތަރިންގެ ފަރާތުން ވަރަށް ކުޅަދާނަ އެކްޓިންއެއް ފެނިގެންދާނެކަމަށެވެ. އަދި އޯޕަން ބަޖެޓަކުން އުފައްދާ މި ފިލްމު 2018  ވަނަ އަހަރު ސްކުރީން ނުކުރީވެސް ސިޔާސީ ކަންކަމާއި ގުޅިގެން ގިނަ ބަޔަކަށް ފިލްމު ނުބެލިދާނެތީ، ވީހާވެސް ގިނަ ބަޔަކަށް ފިލްމު ބަލާލުމުގެ ފުރުސަތު ދިނުމުގެ ގޮތުންކަމަށެވެ.

 

ފިލްމުގެ ޑައިރެކްޓަރު ޔޫސުފް ޝަފީއު ބުނީ ޑައިރެކްޓަރެއްގެ ހައިސިއްޔަތުން ތަރިންގެ އެކްޓިންނަށް 100 ދޭނެކަމަށެވެ. މި ފިލްމަކީވެސް އިންޑަސްޓްރީއަށް މުޅިން އަލަށް ބައެއް ތަރިން ތައާރަފްވާ ފިލްމަކަށްވުމަކީ ފިލްމަށް ލިބޭނެ އިތުރު ފުރިހަމަކަމެއްކަމަށްވެސް ޔޫއްފެ ވަނީ ބުނެފައެވެ.

 

ޔޫއްޕެ ބުނީ ޕްރޮޑިއުސަރުގެ އިރުޝާދުގެ ދަށުން މި ފިލްމުގައި ހެއްވާ މަޖާ، އަދި ބިރުވެރި އެތައް ހާދިސާތަކެއްވެސް ހިމެނިފައިވާނެކަމަށެވެ. މީގެ އިތުރުން ދިވެހި ފިލްމުތަކުގައި ބެލުންތެރިން ހިމަނަން ބޭނުންވާ ހުރިހާ ރަހަތަކެއް މި ފިލްމުގައި ހިމެނޭނެކަމަށް ޔޫއްޕެ ބުންޏެވެ.

 

ފިލްމުގެ ބޮޑު ކާސްޓަށް ބަލައިލާއިރު ޔޫސުފް ސަފީއު (ޔޫއްޕެ)، އަލީ ސީޒަން، މުހައްމަދު މަނިކު، ޝީލާ ނަޖީބު، އަހްމަދު ސައީދު، ފާތުމަތު އަޒީފާ (އަޒޫ)، މުހައްމަދު ފައިސަލް، އަލީ އާޒިމް (ދޮން އައްޔަ) އަދި އަލީ ޝާހިދު (ސްޓެޕްސް އައްޔަ) އަދި މަރިޔަމް ޝަކީލާ (ޝަކިއްތަ) ފަދަ ތަޖުރިބާކާރު ފަންނާނުންނާ އެކު “ފޯޓީ ޕްލަސް” ގައި ހަރަކާތްތެރިވާ އާ ކާސްޓުންނަކީ މަރިޔަމް ޝިފާ، އައިމިނަތު ސަމްއާ، ބައްސާމް އަހްމަދު، އިރުފާނާ އިބްރާހިމް، އައިމިނަތު ޒިޔާދާ އަދި ހުނޭޝާ އާދަމް ނަސީރް އެވެ.

 

“ފޯޓީ ޕްލަސް” ފިލްމުން ބިރުވެރިކަންކަމާއި، ހެއްވާ މަޖާ ގިނަ ކަންތައްތަކެއް ފެނިގެންދާނެ ކަމަށް ބުނެއެވެ.

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: