ދިވެހިރާއްޖޭގައި ޗާޕުގެ މަސައްކަތް އެންމެ ފުޅާ ދާއިރާއެއްގައި ކުރައްވަމުން އަންނަ ހިދުމަތްތެރިޔާ އަލީ ހުސެއިން މިއަދު ހެނދުނު އަވަހާރަވެއްޖެ އެވެ. މ.ވާރޭވިލާ، ޢަލީ ޙުސައިން އަކީ، ރާއްޖޭގައި ޗާޕް ކުރުމުގެ ދާއިރާއަށް އިންގިލާބީ ކުރިއެރުންތަކެއް ގެނުވި އަދި މިހާރުވެސް މި ދާއިރާގައި ފާހަގަކޮށްލެވޭ ބޭފުޅެކެވެ.

 

ކުރީގެ ރައީސް އިބްރާހިމް ނާސިރުގެ އޮފީހުގައި މަސައްކަތްކުރައްވައި ދައުލަތަށް ހިދުމަތް ކުރައްވާފައިވާ ޢަލީ ޙުސައިނަކީ، 1962 ވަނަ އަހަރުން ފެށިގެން ރާއްޖޭގައި ޕްރިންޓް ކުރުމުގެ ޚިދުމަތް ދެމުން އަންނަ ބޭފުޅެކެވެ. ވަރަށް އާދައިގެ ގޮތަކަށް ޢަލީ ޙުސައިން އިސްނަންގަވައިގެން ފެއްޓެވި މި މަސައްކަަަތް މިހާރުވަނީ، މިޒަމާނުގެ ޓެކްނޯލޮޖީއާއެކު، ދުނިޔޭގެ ކުރިއަރާފައިވާ އެހެން ޤައުމުތަކުގައިވެސް ޗާޕުކުރުމުގެ މަސައްކަތްކުރާ ފެންވަރަށް ތަރައްޤީ ކުރައްވާފައެވެ. ޗާޕުގެ މަސައްކަތުގެ ތެރެއިން އަދި ލިޔުންތެރިކަމުގެ ރޮނގުން އަލީ ހުސެއިން ވަނީ ދިވެހިރާއްޖޭގެ އަދަބިއްޔާތާއި ތާރީޚަށް ވަރަށް ގިނަ ހިދުމަތްތަކެއް ކުރައްވައިފަ އެވެ.

 

ޢަލީ ޙުސައިންއަށް ވަނީ، ދިވެހިރާއްޖޭގައި ޗާޕުގެ މަސައްކަތް ތަރައްޤީކުރުމުގެ ދާއިރާއިން 2003 ވަނަ އަހަރު އާންމު ޚިދުމަތުގެ ޝަރަފުގެ އިނާމްވެސް ލިބިވަޑައިގެންފައެވެ. އަދި މި ރޮނގުން ޢާންމު ޚިދުމަތަށް ހިތްވަރުދިނުމުގެ އިނާމު 1979 ވަނަ އަހަރު ލިބިވަޑައިގެންފައިވެއެވެ. އަދި މިނިވަން 25ގެ ޢާންމު ޚިދުމަތުގެ އިނާމުވެސް ޢަލީ ޙުސައިނަށް ވަނީ ލިބިވަޑައިގެންފައެވެ.

 

ރާއްޖެ އަށް ފުރަތަމަ އޮފްސެޓް ޗާޕާއި އޭގެ ފަހުން ކުލަ ޗާޕް ތައާރަފުކުރެއްވީ ވެސް، ނޮވެލްޓީ ބުކްޝޮޕްގެ ވެރިޔާ، އަލީ ހުސޭނެވެ.

 

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: