ޗައިނާގެ ވެރިރަށް ބެއިޖިންގައި މި އަހަރު އެޕްރީލް މަހު ބާއްވާ ނުވަ ވަނަ “ބެއިޖިން އިންޓެނޭޝަނަލް ފިލްމު ފެސްޓިވަލް” (ބީޖޭއައިއެފްއެފް) ގައި ދިވެހި ފިލްމުތައް ބައިވެރިކުރަން ނެޝަނަލް ސެންޓަ ފޮ ދި އާޓްސް (އެންސީއޭ) އިން ފުރުސަތު ހުޅުވާލާފައި ވާކަމަށް އެތަނުން ބުނެފި އެވެ.

 

މި މަހާސަމާގެ ހަތަރު ސެކްޝަނެއްގައި ފިލްމު ބައިވެރި ކުރުމަށް ފުރުޞަތު ލިބިފައިވާކަމަށް އެންސީއޭ އިން ބުނެއެވެ. މީގެތެރެއިން “ޓިިއަަންޓަން އެވޯޑް ކޮމްޕެޓިޝަން” ސެކްޝަންގެ 10 ކެޓަގަރީގައި ވާދަކުރެވޭނެ އެވެ.

 

މީގެ އިތުރުން ފިލްމު “ޕެނޮރާމާ އައުޓް އޮފް ކޮމްޕެޓިޝަން” ސެކްޝަންގައި ބައިވެރިކުރާ މޮޅު ފިލްމުތައް މަހާސަމާ ތެރޭގައި ބެއިޖިން ތިއޭޓަރގައި ދައްކާނެ ކަމަށްވެސް އެންސީއޭއިން ނެރުނު އިއުލާނުގައި ބުނެއެވެ.

 

އާ ފިލްމު އުފެއްދުންތެރިންގެ ހުނަރު ދައްކާލުމަށް “ފޯވާޑް ފިއުޗަރ ސެކްޝަން”ގައި ވެސް ފިލްމު ބައިވެރި ކުރެވޭނެ އެވެ. “ފޯވާޑް ފިއުޗަރ ސެކްޝަން”ގެ ތިން ކެޓަގަރީއެއްގައި ވާދަކުރެވޭނެ ކަމަށް އެންސީއޭ އިން ކުރި އިއުލާނުގައި ބުނެ އެވެ.

 

ޑޮކިއުމެންޓަރީ ފިލްމު އުފައްދާ ފަރާތްތަކަށްވެސް މި މަހާސަމާގައި ވަނީ ފުރުޞަތު ހުޅުވާލެވިފައެވެ. އެގޮތުން 60 މިނެޓަށްވުރެ ކުރުނޫން ޑޮކިއުމެންޓްރީ ފިލްމުތައް ޑޮކިއުމެންޓްރީ ސެކްޝަންގައި ބައިވެރި ކުރެވޭނެ ކަމަށްވެސް އެންސީއޭ އިން ބުނެ އެވެ.

 

ބެއިޖިން އިންޓަރނޭޝަނަލް ފިލްމު މަހާސަމާގައި ފިލްމުތައް ބައިވެރިކުރުމަށް http://system.bjiff.com/filmfestival މި ސައިޓްގައި  31 ޖެނުއަރީ 2019 ވާ ބުރާސްފަތި ދުވަހުގެ ކުރިން ރެޖިސްޓްރީ ކުރަން ޖެހެ އެވެ. އޮންލައިން ރެޖިސްޓްރޭޝަންގައި މައްސަލަ ދިމާވާ ފަރާތްތަކުން އެޕްލިކޭޝަން ފޯމް ފުރުމަށްފަހު 29 ޖެނުއަރީ 2019 ގައި އެންސީއޭއަށް ފޮނުވުމަށް އެތަނުން އެދެ އެވެ. މި މަހާސަމާގައި ވާދަކުރެވޭ ދާއިރާތަކުގެ ތަފްސީލް އެންސީއޭއިން ގެޒެޓު ކުރި އިއުލާނާ އެކު ވަނީ މައުލޫމާތު ކަރުދާހުގައި ހިމަނާފަ އެވެ.

 

މިއީ “ބެއިޖިން އިންޓެނޭޝަނަލް ފިލްމު މަހާސަމާ“ގައި ބައިވެރިވާން ރާއްޖެ އަށް ފުރުސަތު ލިބުނު ފުރަތަމަ ފަހަރެވެ. މި މަހާސަމާއަކީ ދުނިޔޭގެ އެކި ކަންކޮޅުތަކުން ފިލްމުތައް ވާދަ ކުރާ، އަދި ފިލްމީ ދާއިރާގެ މަޝްހޫރު ފަންނާނުންތައް ވެސް ބައިވެރިވާ ނުފޫޒު ގަދަ މަހާސަމާއެކެވެ.

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: