“ބޭނި މަސްކޮޅު ދޭ ކިރާލަން ވަގުތުން ފައިސާ ދޭ
ހޯކޯ ނަންބަރު ސަތިރީސް، އަދި ހޯކޯމާރް ތިރީހަށް”
މިއީ އަޅުގަނޑުމެން ކުޑައިރު ރޭޑިއޯ އިން ފޮނުވާތީ އަހައި އުޅުނު ލަވައެކެވެ. 1964 ގައި ނުކުތް ހިންދީ ފިލްމު “ސަންގަމް” ގައި ހިމެނޭ “ބޯލް ރާދާ ބޯލް ސަންގަމް ހޯނގާ ކީ ނެހީ” މި ލަވައިގެ ރާގަށް ހަދާފައިވާ، ދިވެހިންގެ މަސްވެރިކަމާ ގުޅޭ ލަވައެކެވެ.
ކުއްލިއަކަށް މި ލަވައިގެ މަތިން އަޅުގަނޑު ހަނދާނަށް އައީ ރޭ އިވިގެންދިޔަ ޚަބަރަކުންނެވެ. ފެނިގެންދިޔަ މަންޒަރުތަކަކުންނެވެ. ވިއްކާ މަހަށް ވަގުތުން ފައިސާ ލިބޭ މަސްދޯނި އެކައުންޓު ރައީސް އިބްރާހިމް މުޙައްމަދު ޞާލިޙް އިފްތިތާޙް ކޮށްދެއްވި މަންޒަރުން އަޅުގަނޑުގެ ހިތުގައި ގުގުމައިގަތީ މި ލަވައެވެ.
މަސްވެރިން ވިއްކާ މަހަށް ވަގުތުން ފައިސާ ލިބޭ، “މަސްދޯނި އެކައުންޓް” އިފްތިތާހް ކުރެވި، އެއީ ހަމަ ޙަޤީޤަތުގައިވެސް ބޭނުންކުރެވޭ، ބޭނުންކުރަން އެކަށޭނަ ނިޒާމެއް ކަމަށް ވާނަމަ، މިއީ މަސްވެރިންނަށް ލިބިގެންދާނެ ވަރަށް ބޮޑު ހިތްހަމަޖެހުމެކެވެ.
“މަސްދޯނި އެކައުންޓު” ރައީސް ޞާލިޙު އިފްތިތާޙް ކޮށްދެއްވީ އެކަމަށްޓަކައި ގއ. ކޫއްޑޫގައި ރޭ ބޭއްވި ޚާއްސަ ރަސްމިއްޔާތެއްގައެވެ. މިއީ ރައީސް އިބްރާޙީމް މުޙައްމަދު ޞާލިޙުގެ 100 ދުވަހުގެ ވަޢުދުގެ ތެރޭގައި ހިމެނޭ ކަމެކެވެ.
“މަސްދޯނި އެކައުންޓް” ކާޑަކީ ރާއްޖެއާއި ރާއްޖެއިން ބޭރުގައި ބޭނުންކުރެވޭނެ ކާޑެކެވެ. ރާއްޖެއިން ބޭރަށް ފައިސާ ފޮނުވުމަށްވެސް މި ކާޑު ބޭނުންކުރެވޭނެ އެވެ. ރާއްޖޭގައި އަލަށް ތައާރަފްކޮށްފައިވާ މަސްވެރިޔާ ކާޑާއި ޑިޖިޓަލް ވޮލެޓާއެކު މަސްވެރިންނަށް ޑިޖިޓަލް ވޮލެޓާއި ލިންކުކޮށްފައިވާ ޚާއްސަ ކާޑެއް ބޭނުންކޮށްގެން ފަސޭހަކަމާއެކު ބޭންކިންގ މުއާމަލާތްތައް ހިންގޭނެއެވެ. މަސްވެރިޔާ ކާޑަކީ ދޯނީގެ ކެޔޮޅުންނާއި ފަޅުވެރިންނަށް ފައިސާ ލިބިގަތުމަށާއި ކުރަންޖެހޭ ޚަރަދުތައް ކުރުމަށް ބޭނުންކުރެވޭ ގޮތަށް ފަރުމާކުރެވިފައިވާ ކާޑެކެވެ.
މަސްވެރިންގެ އަތުން މަސް ގަންނަ ކުންފުނިތަކަށް މި ޑިޖިޓަލް ވޮލެޓާއެކު ހިމެނޭ އޮންލައިން ޕޯޓަލް އެއް މެދުވެރިކޮށް މަސްދޯނިތަކަށް ފައިސާ ދެއްކޭނެއެވެ. މިއާއެކު މިފަދަ ކުންފުނިތަކަށް ބޭނުންވާ ނަގުދު ފައިސާގެ މިންވަރު ދަަށްކުރެވިގެންދާނެއެވެ. މަސްދޯނިތަކަށް ބޭނުންވާ ތެޔޮ އަދި އައިސް ގަތުމުގެ އިތުރުން ފަޅުވެރިންނަށް ލިބެންޖެހޭ ފައިސާވެސް އެ ފަޅުވެރިންގެ މަސްވެރިޔާ ކާޑަށް ފޮނުވާލެވޭނެއެވެ. މި ކާޑު ޕީއޯއެސް، އޭޓީއެމް އަދި ކޭޝް އެޖެންޓް ޚިދުމަތް ހޯދުމަށް ބޭނުންކުރެވޭނެއެވެ. އަދި މީގެ އިތުރުން އޮންލައިން ވިޔާފާރިކުރުމަށާއި ރާއްޖޭން ބޭރުގައިވެސް މިކާޑު ބޭނުން ކުރެވޭނެއެވެ.
މިތާނގައި ލަވައެއްގެ ވާހަކަ ދައްކައިލެވުނުއިރު، ދިވެހި ލަވަ ލިބޭގޮތެއް ނުވިއެވެ. ނަމަވެސް ހަނދާން އައުކޮށްލުމަށް ހިންދީ ލަވަ ހިމަނާލާނަމެވެ.
ލިޔުންތެރިޔާގެ ފުރަމަލަ
- އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.
މި ލިޔުންތެރިޔާގެ ބައެއް އެހެން ލިޔުންތައް
- 10 އޭޕްރިލް 2021ޚަބަރުމުނިއަވަސް މަދަހަ މުބާރާތަށް މިފަހަރުވެސް ބޮޑު ތަރުހީބެއް!
- 16 މާރޗް 2021ރިޕޯޓްކޮފީއަށް ކުޑަ ޚަރަދެއް! މި ގޮތް ކިހިނެއް؟
- 10 މާރޗް 2021ޚަބަރުއަންހެނުންގެ ދުވަސް ފާހަގަކުރުމުގެ ގޮތުން ތިމަރަފުށީގައި ހޭންޑްބޯލް މުބާރާތެއް
- 2 މާރޗް 2021ޚަބަރު“ފްލައިޓް” ގެ ޓްރެއިލާއިން ބެލުންތެރިން ހައިރާންކޮށްލައިފި
