| MUNIAVAS

ޝައި ޕްރޮޑަކްޝަންސް އާއި ޔޫއްޕެ ޕްރޮޑަކްޝަން ގުޅިގެން އުފައްދައި މިމަހު ފަހެއްގައި ރިލީޒް ކުރި ހޮރޯ ކޮމެޑީ “ފޯޓީ ޕްލަސް”ގެ ވަރަށް ގިނަ މަންޒަރުތައް، ކުރުކުރު ޓީޒާ ތަކެއްގެ ގޮތުގައި ފިލްމުގެ ޓީމުން އަންނަނީ ހިއްސާކުރަމުންނެވެ. އެގޮތުން އަނެއްކާވެސް މިއޮތީ ޓީޒާއެކެވެ. އެކަމަކު މިއީ ފިސާރި ފޯރިގަދަ ޓީޒާއެކެވެ. ފިލްމުގައި ހިމެނޭ ފޯރިގަދަ ދެ ލަވައިގެ ތެރެއިން “ލައިލާ މި ލައިލާ” އެވެ.

“ފޯޓީ ޕްލަސް” އަކީ ކިހާވަރެއްގެ މަޖާ ފިލްމެއްކަން މިހާރު މިވަނީ ފިލްމުގެ ހައުސްފުލް ތިން ޝޯއިން އެތައް ބަޔަކަށް އެނގިފައެވެ. ބެލުންތެރިންގެ ކޮމެންޓްތަކުން އޮހެމުންދަނީ ތަޢުރީފުގެ ބަސްތަކެވެ. އަހަރުގެ އެންމެ ބޮޑު ފިލްމު، އަހަރުގެ އެންމެ މޮޅު ފިލްމަށް ވެއްޖެކަމުގެ ކޮޅުމަތިވެސް ފެންނަން ފަށައިފިއެވެ.

“ލައިލާ މި ލައިލާ” މި ލަވައަކީ ފިލްމުގެ އެންމެ މުހިންމު އެއް ކެރެކްޓަރ ކަމަށްވާ ‘ލައިލާ’ އަކީ ކާކުކަން، ލާނެތްވެގެން އުޅޭ ޔޫއްޕެ، ސީޒަން، ސަޢީދު އަދި މަނިކަށް ދައްކައިލުމަށް ހުށައަޅައިދޭ ލަވައެކެވެ. ފިލްމުން ފެނިގެންދާ ލަވައާއި ޚިލާފަށް، މި ވީޑިއޯގައި ފިލްމުގެ އިތުރު ބައެއް މަންޒަރުތައް ވެސް ހިމަނާފައިވެއެވެ.

ލައިލާގެ ރޯލުން ފެނިގެންދާ ހުނަރުވެރި ބަޠަލާ ޝިފާ އަކީ ދާއިރާއަށް އަލަސް، ހުނަރުގެ ގޮތުން އައުކަމެއް ނެތް، ކުޅަދާނަ ސްޓާރެއްކަން މި ފިލްމުން ސާބިތުކޮށްދެއެވެ.

“ފޯޓީ ޕްލަސް”ގެ ރަސްމީ އޮންލައިން ޕާޓްނަރ މުނިއަވަސް އިން މި ލަވަ ހިއްސާ މިކޮށްލަނީ މިއަދު ފާހަގަކުރެވެމުންދާ ބައިނަލް އަޤްވާމީ އަންހެނުންގެ ދުވަހުގެ މުނާސަބަތުގައި ހުނަރުވެރި ފިލްމީ ފަންނާނެއްގެ ހުނަރު ދައްކައިލުމަށެވެ. ޓީމް ފޯޓީ ޕްލަސް އާއި މުނިއަވަސްގެ ފަރާތުން އަންހެނުންގެ ދުވަހުގެ ހެޔޮއެދުމާއި ތަހުނިޔާ ކިޔަމުންނެވެ.

“ފޯޓީ ޕްލަސް” އަކީ ފިލްމު ޓްރެއިލާ އާއި ޓީޒާތައް އެކަނި ބަލައިލައިގެން ތިބޭވަރަށް ވުރެން މޮޅު ފިލްމެކެވެ. ހީލަން ބޭނުމިއްޔާ މިއީ އެއްމެ ފައްކާ ފިލްމެކެވެ. ފިލްމެއް ބަލައިގެން، ރީތި ފިލްމެއް ބެލުނު ކަމުގެ އުފާ ހޯދަން ބޭނުންނަމަ އެކަމަށްވެސް އޮތް އެންމެ ފައްކާ ފިލްމަކީ މިއީ އެވެ. “ނޯޓީ ފޯޓީ” ސިނަމާއިންނާއި ޔޫޓިއުބުން ބެލި މީހުންނަށް އެ ފިލްމު ކަމުދިޔަނަމަ’ “ފޯޓީ ޕްލަސް” މާބޮޑަށްވެސް ކަމުދާނެއެވެ.

ޓިކެޓް ވިއްކުން މިހާރުވެސް ކުރިއަށް އެބަދެއެވެ. އޮލިމްޕަހުގައި އަޅުވަން ހަމަޖެހިފައިވަނީ 20 ޝޯ އެވެ. ހުޅުމާލޭ ޝްވެކް ސިނަމާގައި ފިލްމު އަޅުވާނެއެވެ. ބައެއް ރަށްރަށުގައި ފިލްމު އެޅުވުމަށް ހަމަޖެހިފައިވާއިރު، ކޮންމެ ރަށަކުންވެސް “ފޯޓީ ޕްލަސް” އަޅުވަން ޝަޢުޤުވެރިކަން ހުރި ފަރާތްތަކުން ފިލްމުގެ ޕްރޮޑަކްޝަން ޓީމާއި ގުޅައިގެން ކުރިއަށް ގެންދެވިދާނެ އެވެ. ހޮޓްލައިން ނަންބަރަކީ 7384040 އެވެ. “ފޯޓީ ޕްލަސް” ގެ ރަސްމީ ފޭސްބްކް ޕޭޖުން އިތުރު މަޢުލޫމާތުތައް ލިބޭނެއެވެ.