އަންހެންވެރީންނަކޫ އަބަދުވެސް ގޭތެރޭ މަސައްކަތާއިގެން އޮޅެން ބަޔަކަށް ވިޔަސް މާހެފުން ދޮހަޔަށްވެސް ނިކަން ތައްޔާރަވަން ބައެއް. ފިރިހެން ވެރީން މާހެފުން އޮޑިއަޅާން ތައްޔާރަވާން ފެށުމާ އެއްކޮށް އަންހެންވެރީން މާހެފުން ހެދުމަށް އެއްޗެހި ރައްކާކެރާން ފަށާޅެތާ. މިގޮތުން ގޭ ކައްކަން ބަތްކޮޅުން ބާކީވަންބައި އައްވުލާ ހިއްކާ ރައްކާކެރާޅެތް.
މާހެފުން ދޮހާ އެޔޯ ފުރަތަމަ ރޯދަޔު ކުރޫ ދޮހާ. ޝައްވާލު މަހު ފަހު ދޮހާ. މާހެފުން ދޮހާ ހެނދުނު ކޮންމަ ގޭށަކުވެސް އަކިރިލާން ބޭނުންވަން ބަޔު އޮންނަން އަކިރި ކަހާ އަކިރިތެއް ނަގާޅެތް. މެހެން ނަގަން އަކިރިތެއް ފަތަރާނޫ މަގަމައްތު އެގެއަކު ކުނުކަހަން ފަށަށް.
ދެން އެރޭނޫ ބަދިގޭ ހުރިހާ ތެލި، ތާސް، ދެއްޕަތް ހިފައިގެން މޫދަށް އެ އެއްޗެހިތެއް ދޮންނާން. މިގޮތަށް ދަންއިރޭ ދާނޫ އެހިސާބަގަނޑު އޮޅެން އަންހެން ކުދުވެރީން އެއްކޮށް. މި އެއްޗެހިތެއް އަތިރި މައްތުލާ ދޮންނަން އިރޭ ފިރިހެން ކުދުވެރީން އޮޅޭނޫ މާހެފުން އޮޑިއަށް ކުރުނބާތެއް އަރުވާން.
އެ އްޗެހިތެއް ދޮވެގެން ގޭށަށް އަރަންއިރޭ މަންމާމެން ހުންނާނޫ މާހެފުން ހަދައިދީފާ. އޮނަފޮޅި، ރުއްބުޑި، ފައްޓަރުފަނި އެޔޯ އޭރު އާންމުކޮށް ހަދާ އޮޅެނަ އެއްޗެހި. މިއެއްޗެހި ހިފައިގެން ދާނޫ މޫދަށް.
މޫދަަށް ގޮހޮ މާހެފުން އޮޑިއަށް މާހެފުން ދިނޫމާ ލިބޭޅަ ކުރުނބާ. ކުރުނބާ ހުންނާނޫ ރީއްޗަށް މަށާފާ ކަނޑާފަ. ދެން އަވަހާ ކުރުނބާ ބޯލާނޫ. މިގޮތަށް މޫދަށް އެރީ އޮޅެން އިރޭވެސް ހިތައިވެގެން އޮޅެން ކުދޫން އަޅާފަ ހުންނަ މާހެފުން އޮޑި ކާރިއަށް ދާޅެތް މާހެފުން ހަދައިގެން އެ ހިފައިގެން. އެހެން މީހުންނަށް ނޭގެން ގޮތަށް އެވެރީން ހިތައިވެގެން އޮޅެން ސޮރަށް މާހެފުންދީ ރޯދަމަހުގެ ތަހުނިޔާ ކިޔާ އޮޅޭ.
މާހެފުން ދޮހާ އިރައޮއްސޭންވަން އިރަށް ބޯފޮޅި ފިހެ ގޭގޭ އަސްކެނި ދަށު އަކިރިން ވެލިފުނި ޖަހާ، އެވެލި ފުންޏު ބޯފޮޅި ވަޅުލާޅެތް. މި ބޯފޮޅިއަކޫ ގަބުޅު ހުންނާ ފުށުން ހަދާފާ ހުންނަން އެއްޗެއް.
މިގޮތަށް ވަޅުލާފަ ހުންނަ ބޯފޮޅި މަޣްރިބި ނަމާދަށްފަހު ފިރިހެންވެރީން އެގޭގޭ މީހުންނަށް ނޭނގީ ނަގައިގެން ކާޅަ. މި ބޯފޮޅިވެސް މިއޯ މީހުންނާ އިންނަން އުމުރު ފެރާ ފިރިހެންވެރީންނަށް ރަނގަޅަ ބައިވެރިއެއް ހޯދާން ކެރަން މަސައްކަތު އެހީވަން އެއްޗެއް. ބޯފޮޅި މީރަކޮށް ފިހެފާ ހުންނަން ގޭގޭ އަންހެން ކުދޫން ބަލާފާ އިންނާން އަހާ އޮޅެތާ.
އިޝާނަމާދަށްފަހުން ރޯދަޔަށް ހަނދަފެނޭތޯ ރެޑިޔޯ އަޑަ އަހާން ތިބެފާ ހަނދަ ފެނިއްޖައިމުން ދެން އޮންނާނޫ ހާރަށް ކެއްކުން. ހާރަށް ކެއްކުމަށްފަހު ރޯދަޔަށް ނަގާފާ ހުރީ އަކިރި ފަތަރާ ނިންމާޅެތް. މިއޯދެން ރޯދަޔަށް ތައްޔާރަވެވެނޫ.
ލިޔުންތެރިޔާގެ ފުރަމަލަ
- ތަފާތު މައުޟޫތަކަށް އާއިޝަތު ފައިނާޒް (އައިޗަތު) ލިޔާނެއެވެ. އެގޮތުން ބަހާއި އަދަބިއްޔާތު، އިޖްތިމާޢީ ރޮނގުންނާއި އިތުރު ދާއިރާތަކުންވެސް ލިޔާނެއެވެ.
މި ލިޔުންތެރިޔާގެ ބައެއް އެހެން ލިޔުންތައް
- 11 ޖޫން 2024ވައްޓަފާޅިފޮނަދޫ މީހުން ބޮޑައީދަށް ތައްޔާރަވުން
- 5 އޭޕްރިލް 2024ރަހަފަތްޗީޒީ އެގް ޓޯސްޓް – މުނިއަވަސް ރަހަފަތް
- 31 މާރޗް 2024ރަހަފަތްބިސްގަނޑު ރިހަ – މުނިއަވަސް ރަހަފަތް
- 11 މާރޗް 2024ރަހަފަތްޗޮކްލެޓް އައިސްކްރީމް ކޭކް – މުނިއަވަސް ރަހަފަތް
