އަލްއުސްތާޛް އަލްމަރުޙޫމް އިބްރާހީމް ޝިހާބުގެ ވާދައިގެ ތައްޓަށް ބާއްވާ ވާހަކަ ދެއްކުމުގެ 34 ވަނަ ޤައުމީ މުބާރާތް މިއަދު ފަށައިފި އެވެ. މިއީ ދިވެހިބަހުގެ އެކެޑަމީން އިންތިޒާމު ކުރައްވައިގެން ބާއްވަވަމުން ގެންދަވާ މުބާރާތެކެވެ.

ވާހަކަ ދެއްކުމުގެ 34 ވަނަ ޤައުމީ މުބާރާތް ޝަރަފުވެރިކޮށްދެވީ މިނިސްޓަރ އޮފް ޓޫރިޒަމް ޢަލީ ވަޙީދު އެވެ. މުބާރާތް ޝަރަފުވެރިކޮށްދެއްވާ ވާހަކަފުޅު ދައްކަވަމުން މިނިސްޓަރ އޮފް ޓޫރިޒަމް ޢަލީ ވަޙީދު ވިދާޅުވީ ވާހަކަދެއްކުމުގެ ހުނަރަކީ ސްކޫލް ނިމުމާއިއެކު ދޫކޮށްލަންޖެހޭ ކަމަކަށްވުރެ ބޮޑު އިސްކަމެއް ދީގެން ދިރުވަންޖެހޭކަމެއްކަމަށެވެ. އެގޮތުން ޤައުމު ބިނާކުރުމުގެ މަސްއޫލިއްޔަތު އަދާކުރުމުގައި މީހުންނާއި ކުރަންޖެހޭ މުޢާމަލާތްތައް ކާމިޔާބުވުމުގައި ވާހަކަދެއްކުމުގެ ހުނަރަކީ މުހިއްމު ދައުރެއް އަދާކުރާ ކަމެއްކަމުގައި މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ ދައުލަތުގެ ވުޒާރާތަކުގައި މަސައްކަތްކުރާ ކޮންމެ މުވައްޒަފަކީވެސް ދިވެހި ބަހުގެ ހަމަތަކާއި އެއްގޮތަށް ލިޔަންކިޔަން ދަންނަ މީހުނަށް ވާންޖެހޭކަމަށާއި އެހެން ނޫންނަމަ ކުރާ މަސައްކަތުގައި ނާކާމިޔާބީއަކީ ގާތް އެއްޗަކަށް ވެދާނެ ކަމަށް މިނިސްޓަރ ވިދާޅުވިއެވެ.

މިރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވީ މިފަދަ މުބާރާތްތައް ކުރިއަށް ގެންދިޔުމުގައި އަދި ބަސް ދިރުވާ އާލާކުރުމުގައި ޢާއްމުންގެ ޚިޔާލު ވަރަށް މުހިއްމުކަމަށާއި ސްކޫލް ކުދިންގެ މެދުގައި ވާހަކަދެއްކުންތެރިކަމަށް ޝަޢުގު އުފެއްދުމަކީވެސް މުހިއްމުކަމެއްކަމަށެވެ.

ޖުމްލަ ހަ ކެޓަގަރީއަކަށް ބަހާލައިގެން ކުރިއަށްގެންދާ މިމުބާރާތުގައި 10 އަހަރުން ދަށުގެ ކުދިންނަށް ހިތްވަރު ދިނުމުގެ ގޮތުން އިބްރާހީމް ޝިހާބުގެ ރަން މެޑަލްއެއް ދިނުމަށް ހަމަޖެހިފައިވާކަމަށް މުބާރާތް އިންތިޒާމުކުރާ ބަހުގެ އެކަޑަމީން ބުނެއެވެ. އަދި އެންމެ މޮޅު ފަސް ސްކޫލް ހޮވާ ވަނަ ދިނުމަށް ހަމަޖެހިފައިވާއިރު ބަހުގެ ހަމަތަކާއި އެއްގޮތަށް ކުށެއް ނެތި ވާހަކަދައްކާ ކުދިން ހޮވާ އެކަމުގެ ރަންތަށި އެކި ގިންތިތަކުން ދިނުމަށްވަނީ ހަމަޖެހިފައެވެ.

ވާދަވެރިކަމާއެކު ސްކޫލްތަކާއި އަމިއްލަ ފަރާތްތަކުން ބައިވެރިވާ މިމުބާރާތުގައި މިހާތަނަށް އެންމެ ގިނަ ޢަދަދަކަށް އެކި ފަރާތްތަކުން ބައިވެރިވެފައިވަނީ މިއަހަރު ކަމަށްވެސް ބަހުގެ އެކަޑަމީން ބުނެއެވެ. އެގޮތުން ސްކޫލްތަކާއި ޖަމްޢިއްޔާ ޖަމާޢަތްތަކާއި ކޮލެޖް ޔުނިވަރސިޓީތައް ހިމެނޭހެން 96 ތަނަކުން ބައިވެރިވެފައިވާއިރު 495 ބައިވެރިން މުބާރާތުގައި ވާހަކަދައްކާނެއެވެ.

މިހާތަނަށް އެންމެ ގިނަ ބައިވެރިން ބައިވެރިވި މިމުބާރާތް މާދަމައިން ފެށިގެން ތިން ދަންފަޅިއަކަށް ބަހާލައިގެން މާލޭ އިންގްލިޝް ސްކޫލްގައި ކުރިއަށްގެންދާނެކަމަށް ބަހުގެ އެކަޑަމީން ބުނެއެވެ. މި މުބާރާތް އިންސާފު ކޮށްދިނުމުގައި 11 ފަނޑިޔާރަކު ބައިވެރިވާނެއެވެ.

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: