ލ. އަތޮޅަކީ ދިވެހި ރާއްޖޭގެ އަތޮޅު ތަކުގެ ތެރޭން ނަން މަޝްހޫރު އަތޮޅެކެވެ. އެހެންނަމަވެސް އަތޮޅުގެ ބޭނުން އެންމެ ރަނގަޅުގޮތުގައި އެއްވެސް ސަރުކާރަކުން ހިފާތަނެއް ނުފެނެއެވެ.

ރާއްޖޭގައި އެއް އަތޮޅަކުން އެންމެ ގިނަ ސިނާއަތަށް ބޭނުން ހިފޭނެ އަތޮޅަކީ ހަމަ ގައިމުވެސް ލ. އަތޮޅު ކަން ގަބޫލު ނުކުރާނެ ދިވެއްސަކު މަދުވާނެއެވެ. ގާދޫ އަކީ އިންޓަރނޭޝަނަލް ޕޯރޓެއް ހަދަން މުޅި ރާއްޖޭގައި ވެސް އެންމެ ރަނގަޅު އެއްތަނެވެ. ގަން، ފޮނަދޫ ސަރަހައްދަކީ ލޯކަލް ޓްއަރިޒަމް އަށް ރާއްޖޭގައި ދެވަނައެއް ނެތްފަދަ ސަރަހައްދެކެވެ. އޭގެ އިތުރުން އެއްފަސްކުރުމުގެ ސިޔާސަތުގެ ދަށުން ބޮޑު އާބާދީއެއް ބަދަލު ކުރެވެން އޮތް ސަރަހައްދެކެވެ. މާންދޫ އަކި ސިނާއީ މައި ރަށެކެވެ. ކައްދޫ ވައިގެ ބަނދަރާއި ގުޅާލެވިފައިވާ މާންދޫ އާއި ގަމުގެ ކުރުހިންނަ ސަރަހައްދަކީ ވެސް ފާހަގަކޮށްލެވޭފަދަ ތަނެކެވެ.

ލ. އަތޮޅަކީ އާސާރީ ތަރިކަ ނިސްބަތުން ގިނަ އަތޮޅެކެވެ. އެއަރޕޯރޓް އިންޓަރނޭޝަނަލް ކުރަން ބޭނުން ވަރަކަށް ބޮޑުކުރެވެން އޮތް ކައްދޫ އަކީ ރާއްޖޭގެ އެންމެ ދުވަސްވީ ސަރަހައްދީ އެއަރޕޯޓެވެ.

ޖޯގްރަފީ ގޮތުން ބެލިއަސް ދެވަނައެއް ނެއްފަދަ އަތޮޅެކެވެ. ރިސޯޓް ތަރައްގީކުރަން ރީތި ރަށްތަކެއް އޮތަސް ރާއްޖޭގެ ނިސްބަތުން ރިސޯޓް އެންމެ މަދު އަތޮޅަކީވެސް ލ. އަތޮޅު ކަމަށް ދެންނެވިދާނެއެވެ. މި އަތޮޅަކީ މަސައްކަތްތެރި ރައްޔިތުން ތަކެއް އުޅޭ، ރާއްޖޭގެ އެންމެ ވަރުގަދަ އެއް ސިނާއަތު ކަމަށްވާ މަސްވެރިކަމަށް ވެސް މަޝްހޫރު އަތޮޅެކެވެ.

އެހެން ނަމަވެސް ވޭތުވެދިޔަ އެއްވެސް ސަރުކާރެއްގައި ލ. އަތޮޅަށް އަޅައިލެވިފައި ވާތަނެއް ނުފެނެއެވެ. ނަމަވެސް، ލ. އަތޮޅުގެ ރައްޔިތުން އަބަދުވެސް އުނމީދެއްގައި ބައިތިއްބައިގެން ސަރުކާރުތަކުން ފޮނި ވައުދުތައް ވާތަން ފެނެއެވެ. މީގައި އެ ސަރުކާރެއް، މި ސަރުކާރެއް ކިޔާނެ ކަމެއްނެތެވެ.

މިހާރު ހިނގަމުންމިދާ ސަރުކާރުގައިވެސް ރައްޔިތުން ހިނިތުން ވާކަހަލަ ވައުދުތަކެއް ވަނީ އުއްމީދުން ފެންބޮވާފައިތިބޭ ރައްޔިތުން ކުރިމައްޗަށް ބަންޑުން ކޮށްލާފައެވެ. އެކަމު އެކަލަ ވައުދުތައް މާޒީގައި ވެފާ ވަނީ މަރުހޫމާ ނާސިރާ ބުނާ ބީދައިން ސައިބޯނި ބޮތްކަކަށެވެ.

ލިޔުންތެރިޔާގެ ފުރަމަލަ

މޫސާ ނަޒީރު
ކޮލަމިސްޓެއްގެ ގޮތުގައި އީސަދަރި ލިޔާނީ އިޖްތިމާޢީ އަދި ތަރައްޤީ އާއި މުޖުތަމަޢު ހޭލުންތެރި ކުރުވުމުގެ ލިޔުންތަކެވެ.

ގުޅުންހުރި ލިޔުން: