ކިޔުންތެރިންގެ ސަމާލުކަމަށް އެޓިޓޯރިއަލްގެ ބަހެއް:- 

ލިޔުންތެރިޔާގެ މި ލިޔުމުގައި ސިފަކުރައްވަނީ ދިވެހިތާރީޚުގައި އެބޭކަލެއްގެ ވާހަކަ އައިސްފައިވާ އަލްފަޤީހުލްޚަތީބު މުހައްމަދު ސިރާޖުއްދީން ނުވަތަ ލ.ފޮނަދޫ ދަންނަކަލޭގެފާނުގެ ނަންފުޅުން މަޝްހޫރުވެފައިވާ ޚަތީބުތަކުރުފާނާއިމެދު އިހުގައި ދައްކައި އުޅުނު ޔޯލަ ވާހަކަ ތަކުގެ ތެރެއިން ދެ ކަމެކެވެ.

ވައްތީނި އެދުރުކަލޭފާނު ނުވަތަ ދަންނަ ޚަތީބު ތަކުރުފާނަކީ ކުރިން ހައްދުންމަތީ ފޮނަދޫގައި އުޅުއްވި ބޭކަލެކެވެ. ތުންތުންމަތީން އައިސްފައިހުރި ގިނަ ވާހަކަތަކަށް ބަލާއިރު މި އެދުރު ކަލޭފާނަކީ އިލްމުވެރި ބޭކަލެކެވެ. ތައުލީމު ހާސިލްކުރައްވާފައިވަނީ އަރަބިކަރައިންނެވެ. މި ބޭކަލަކީ ވަލީވެރި ބޭކަލެއް ކަމުގައިވެސް ބުނެވެެއެވެ. މި ތަކުރުފާނުންގެ ފުރިހަމަ ނަންފުޅަކީ އަލްފަޤީހުލްޚަތީބު މުހައްމަދު ސިރާޖުއްދީން އެވެ.

ކޮންމެއަކަސް މި ބޭފުޅާ ފޮނަދޫގައި އުޅުއްވިކަން އެނގެން އެބައޮތެވެ. އޭގެ ހެއްކަކީ ފޮނަދޫ އިހުގެ ހުކުރުމިސްކިތު ގޯތިތެރޭގައި ހުންނަ ބިސްތާނެވެ. އެހެންނަމަވެސް ދަންނަ ޚަތީބު ތަކުރުފާނުގެ ދިރިއުޅުއްވުމާ ބެހޭގޮތުން ދައްކާ ބައެއް ވާހަކަތަކަކީ ފުލޯކު ވާހަކަތަކެއްކަން އެގެއެވެ. ކުރީޒަމާނުގެ މީހުން ބުނާގޮތުން ވަލީވެރިބޭކަލެއް ވީމާ މިހުންނަނީ ކުރެވިދާނެކަންކަމެވެ. އަޅުގަނޑު މި ހިއްސާކޮށްލަނީ އޭގެތެރެއިން ހާދިސާއެކެވެ. މި ހާދިސާއާމެދު ބުއްދިހަމަކޮށް ފުން ވިސްނުމަކުން ވިސްނާލަމާ ހިގާށެވެ.

އަލްފަޤީހުލްޚަތީބު މުހައްމަދު ސިރާޖުއްދީން ވަޅުފުޅުލެވިފައިވާ ބިސްތާނަ – ފޮޓޯ: މުނިއަވަސް

އިޝާނަމާދަށް މައްކާ މިސްކިތަށް ވަޑައިގެންނެވުން.
ކޮންމެރެޔަކު ފޮނަދޫ ހުކުރުމިސްކިތުން މަޣްރިބް ނަމާދުކޮށް އަވަދިވެވަޑައިގެން އިޝާނަމާދަށް ވަޑައިގަންނަވާ ކަމަށް ވަނީ މައްކާ މިސްކިތަށެވެ. އިޝާނަމާދު ކޮށް ނިންމަވައިގެން ރަށަށް ދުރުވެވޭއިރު ހުންނަނީ ނުވައެއްޖަހާ ބޮޑުވެފައެވެ. މަޣްރިބް ނަމާދުން ފައިބަންނަވައިގެން ދުރުވާތަނެއް ޚުދު އަނބިކަނބަލުންނަށްވެސް އެނގިއެއް ނުލައްވައެވެ. އަނބިކަނބުލުންނަށް މިކަން ބޮޑުވެގެން ފިރިކަލުންނަށް ފާރަލެއްވުމަށް ގަސްދުކުރެއްވިއެވެ. މިގޮތުން އެއްރެއަކު މަޢްރިބްނަމާދަށް ވަޑައިގަތީމާ އަނބިކަނބަލުން އާމިނާ ކަނބައިދިކިލެގެ، އެތަކުރުފާނުންގެ ފަސްފަހަތުން ދުރުވެ މިސްކިތް ފެންނަ ހިސާބުގައި މަޑުކުރެއްވިއެވެ.

ނަމާދުން އަވަދިވެވަޑައިގެން އެތަކުރުފާނު މިސްރާބުޖެއްސެވީ ރަށުގެ އިރުވައި ފަޅިއާއި ދިމާއަށެވެ. އާމިނާ ކަނބައިދިކިލެގެ ފަސްފަހަތުން އަތިރިއަށް ދުރުވެ ބައްލަވައިލެއްއިރު ތަކުރުފާނު މޫދަށް އެރިވަޑައިގަންނަވަނީއެވެ. އާމިނާ ކަނބައިދިކިލެގެ ބައްލަވަން މަޑުނުކުރައްވައި ފަހަތްޕުޅުން އެރިވަޑައިގަތެވެ. އެ ތަކުރުފާނު ތަންކޮޅަކަށް ދުރުވި ތަނުން ބޮކިޖަހާއަޑު އިވިވަޑައިގެން ފަސްއެނބުރި ބައްލަވައިލެއްވިއިރު ފަހަތްޕުޅުގައި ހުންނެވީ އަނބިކަނބަލުންނެވެ. އޭރު ހުންނެވީ ކަކޫތާފެނަށް އެރިވަޑައިގެންނެވެ. ތަކުރުފާނު ގޮވައިލެއްވިއެވެ.

“ބިރުނުގަނެ ދުރުވާށެވެ. ތިޔަކަށްވުރެ ފުނެއްނުވާނެއެވެ.”

އާމިނާ ކަނބައިދިކިލެގެ ދެން އިތުރަށް ކުރިޔަށް ވަޑައިގަންނަވަން ކެރިވަޑައިނުގެން އަނބުރާ ގެއަށް ވަޑައިގަތީއެވެ.

އެރޭ ދެން ކަންތައް ހިނގިމަގަކީ އެތަކުރުފާނު މައްކާއަށް ވަޑައިގެން މައްކާ މިސްކިތު ވަޅުދޮށުގައި ފައިންޕުޅު ދޮންނަވަން ހުންނަވަނިކޮށް މިސްކިތުން ގޮވައިލިއަޑުއިވުނެވެ.

“މިރެއަކުވާ ވައްތީނި އެދުރުކަލޭފަނު ނުދުރުވާ ރެއަކީތޯއެވެ.”

އެތަކުރުފާނު ޖަވާބުގައި “ނޫންނޫން އަޅުގަނޑު އެބަހުރީމޭ” ގޮވައިލެއްވިވެ.

ދެން މިސްކިތަށް އަރާވަޑައިގެން ޖަމާއަތުގައި އިމާމުވެ އިޝާނަމާދު ކުރައްވަން ފައްޓަވައި ބަޤަރާ ސޫރަތުން ފެއްޓެވިގޮތަށް ޚަތިމް ކުރެއްވި ކަމަށް ބުނެއުޅެއެވެ. އެ ރޭ ނޫނީ ކޮންމެރެއަކުވެސް ނަމާދުގައި ވައްތީނި ސޫރަތް ކިޔުއްވާ ކަމުގައި ވެއެވެ. މިސްކިތުން ގޮވައިލިމީހަކު ވައްތީނި އެދުރުކަލޭފާނޭ މިގޮވައިލީ މިހެންވެ ކަމަށް ބުނެއުޅެތެވެ.

މި ބުނި ރޭ ނަމާދުކޮށް އަވަދިވެ ވަޑައިގެން އެނބުރި ގެއަށް ވަޑައިގެންނެވުނުއިރު ހުރީ މެންދަމުން ދެބައިވެފައެވެ.

މި ތަކުރުފާނު މައްކާއަށް ފޮޅިގެންދަވާ ވާހަކައަކީވެސް ދެކެވޭ ވާހަކައެކެވެ. ގެކޮޅުގެ އުނދުންމަތިން ފިހެގެން ނަންގަވާ ފޮޅި ހިހޫނުވަންދެން މައްކާއަށްގެންދަވައި އެތަކުރުފާނުންގެ ބޮޑުބޭބޭފުޅަށް ދެއްވާ ކަމަށް ވެއެވެ.

މިވާހަކަތަކަށް އަޅުގަނޑު އެއްޗެކޭ ދަންނަވާކަށް ނެތީމެވެ. ތިޔަބޭފުޅުން ގޮތެއް ނިންމަވާށެވެ.

ލިޔުންތެރިޔާގެ ފުރަމަލަ

ހުސެން މޫސާ (ބިގޭ)
ތަފާތު ލިޔުންތެރިއެކެވެ. ލ. އަތޮޅުގެ ބަހުރުވައަށް ދެވިފައިވާ ލޯބި، ހުސެންގެ ލިޔުންތަކުން ފެނެއެވެ.

ގުޅުންހުރި ލިޔުން: