ދިވެހި މަންމައިންގެ އިޖުތިމާއީ ވިއުގަ ‘މަމްސް އެންޖީއޯ‘ ނުވަތަ ދިވެހި މައިންގެ ދުޅަހެޔޮކަމާއި ރައްކާތެރިކަމަށްޓަކައި ހިލޭސާބަހަށް މަސައްކަތް ކުރުމަށް ރެޖިސްޓްރީކޮށްގެން ހިންގަމުން އަންނަ ޖަމުޢިއްޔާ ގެ ވާހަކަ އަޑުއެހިން ހެއްޔެވެ؟ ފަހަރެއްގައި ‘މަމްސް އެންޖީއޯ‘ މި ނަމުން މުޚާޠަބު ކުރުމުން ނޭނގިދާނެއެވެ. އޭގެ ސަބަބެއްވެސް އެބަ އޮތެވެ. މިހައިތަނަށް ‘މަމްސް އެންޖީއޯ‘ އާބެހޭ ގޮތުން ބައެއް މީޑިއާތަކުން ގެނެސްދީފައިވާ ޚަބަރުތަކުގައި ކިޔަމުން އައިސްފައިވަނީ ‘މަމްސް އެމްވީ’ ނުވަތަ ‘މަމްސް ފޭސްބްކް ގްރޫޕް’ ފަދަ ގޮތަކަށެވެ.

‘މަމްސް އެންޖީއޯ‘ އަކީ ދިވެހި ސަރުކާރުގައި ރެޖިސްޓްރީ ކުރެވިގެން ހިންގަމުން އަންނަ މަދަނީ ޖަމިއްޔާއެކެވެ. މަޤްޞަދަކީ ދިވެހި މަންމައިން ބާރުވެރިކުރުވުމެވެ. މިއީ މީސްމީޑިއާ ފޭސްބްކްގައި ‘މަމްސް އެމްވީ’ ގެ ނަމުގައި ކުރިއަށް ގެންދާ ‘ކްލޯސްޑް ފޭސްބްކް ގްރޫޕް’ އަށް ނިސްބަތްވާ މަންމައިން އިސްވެ ހިންގާ ހަރަކާތެއްވެސް މެއެވެ. މި ގްރޫޕްގައި 28 ހާހަށްވުރެން ގިނަ މައިން ހަރަކާތްތެރިވެއެވެ.

‘މަމްސް އެންޖީއޯ‘ މަދަނީ ޖަމިއްޔާގެ ކޯ ފައުންޑަރ އަދި ޗެއަރޕާސަން އަކީ ޚަދީޖާ ސިތުރާ އެވެ. ކޯ ފައުންޑަރ އަދި ވައިސް ޗެއަރޕާސަން އަކީ މަރިޔަމް ޒީޝާން އައްބާސް އެވެ. ފާޠިމަތު ރިޔާސާ އަކީ ޖެނެރަލް ސެކްރެޓަރީ އެވެ.

މުނިއަވަސްގެ ފަރާތުން ‘މަމްސް އެންޖީއޯ‘ މަދަނީ ޖަމިއްޔާގެ ހަރަކާތްތައް ކިޔުންތެރިންނާ ހަމައަށް ގެނެސްދިނުމަށްޓަކައި މި ޖަމުޢިއްޔާގެ ދެ މުއައްސިސުން ކަމަށްވާ ޒީޝާން އާއި ސިތުރާ އަދި ޖެނެރަލް ސެކްރެޓަރީ ރިޔާސާ ބައްދަލުކޮށްލީމެވެ.

‘މަމްސް އެންޖީއޯ‘ގެ ތަޢާރަފާއި މަޤްޞަދުތަކަކީ ކޮބައިތޯ؟

‘މަމްސް އެންޖީއޯ‘ގެ އަކީ ރެޖިސްޓަރ ކޮށްފައިވާ އެންޖީއޯ އެއް. އަޅުގަނޑުމެންގެ ދަށުން އިންނާނެ ފޭސްބްކް ކްލޯސްޑް ގްރޫޕަކާއި ޕޭޖެއް. ކުރީގަ ފޭސްބްކް ގްރޫޕްގެ ނަމަކީ ‘މަމްސް އެމްވީ’. އަޅުގަނޑުމެންގެ މައިގަނޑު މަޤްޞަދަކީ މައިންގެ ކުރިއެރުމާއި ލާބަޔާއި މަންފާއަށް މަސައްކަތްކުރުން.

ދުވާލަކު އެތައް މަންމައިންނަށް އަޅުގަނޑުމެން މިދަނީ އެހީތެރިކަން ފޯރުކޮށްދެމުން. މަންމައަކަށް ދިމާވާ ކޮންމެ ކަމެއްގައި އެންމެ ކުރީ ސަފުގައި އެހީތެރިކަން ފޯރުކޮށްދިނުމަކީ އަޅުގަނޑުމެންގެ އެންމެ ބޮޑު އެއް މަޤްޞަދު. މައިންގެ ކުރިއެރުމާއި ލާބައަށް އަޅުގަނޑުމެން އެތައް ކަމެއް ޕްލޭންކޮށް މިދަނީ ކުރަމުން.

‘މަމްސް އެންޖީއޯ‘ އިން ރާއްޖޭގެ މައިންނަށް ވެދެވިފައިވާ ފާހަގަކޮށްލެވޭ ބައެއް ކަންކަން ކިޔުންތެރިންނާ ހިއްސާ ކޮށްލައްވަފާނަންތޯ؟

ވަރަށް ގިނަ ކޭސްތަކުގަ އެހީވެވިފަ އެބަހުރި. އެގޮތުން ވަރަށް ގިނަ މައިން އެބައުޅޭ ވަރަށް ހާލުގަ، ކާއެތިކޮޅެއް ނުލިބިފަ އަދި ދަރިންނަށް ކިރުދަޅެއް ގަނެލެވޭވަރު ވެސް ނެތިފަ. އަޅުގަނޑުމެން އެފަދަ މަންމައިން ފާހަގަކޮށް އެންމެ ބޮޑަށް އެހީއަށް ބޭނުންވެފައިވާ މަންމައިންގެ ލިސްޓެސްވެސް ވާނީ ހަދާފަ، ގްރޫޕްގައި އުޅޭ ދީލަތި މަންމައިންގެ އެހީތެރިކަމާއެކު ޑޮނޭޝަންސްގެ އެހީގަ އަޅުގަނޑުމެން ‘މަމްސް އެންޖީއޯ‘އިން އެ މަންމައިންނަށް އެހީތެރިކަން ފޯރުކޮށްދެން.

އަޅުގަނޑުމެން ޗެރިޓީ އިވެންޓްސްގެ ގޮތުގައި އިވެންޓްތައް ބޭއްވުމަށްފަހު ލިބޭ ފައިސާއިން ވެސް މިދަނީ މިފަދަ ހާލުގައި އުޅޭ މަންމައިންނަށް އެހީތެރިކަން ފޯރުކޮށްދެމުން. ދުވާލަކު 10 ވަރަކަށް މަންމައިންނަށް އެހީތެރިކަން ފޯރުކޮށްދެވިފަ ހުންނާނެ، ބައެއް ފަހަރު އެއަށްވުރެން އިތުރަށްވެސް.

އަޅުގަނޑުމެން އެހީތެރިކަން ފޯރުކޮށްދިނުމުގެ ކުރިން ވަރަށް ބޮޑަށް މަޢުލޫމާތު ހޯދަން. މިގޮތުން ބިލްތައް ނުދެއްކިގެން، ބޭސްފަރުވާ ނުކުރެވިގެންނާއި ޒަރޫރީ ބޭނުން ނުފުއްދިފަ ތިބޭ މަންމައިންނަށް އަޅުގަނޑުމެންގެ ފަރާތުން މިދަނީ އެހީތެރިކަން ފޯރުކޮށްދެމުން.

އަޅުގަނޑުމެން މިހާރު މިދަނީ ރަށްރަށުގެ ކައުންސިލްތަކުންނާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީ ތަކުގެ އެހީތެރިކަން ހޯދައި ރަށްރަށުގައި ހާލުގައި އުޅޭ މަންމައިންގެ ޑާޓާބޭސްއެއް ހަދަމުން.

ފޭސްބްކް އަދި ވައިބަރު ބޭނުން ނުކުރާ، ވަރަށް ހާލުގައި އުޅޭ މައިންވެސް އެބައުޅޭ ނޫންތޯ. އެފަދަ ފަރާތްތަކާއި ހަމައަށް ވާޞިލުވުމަށް މަސައްކަތް ކުރައްވަނީ ކިހިނެއް އަދި ކިހައި ވަރަކަށްތޯ؟

އަޅުގަނޑުމެން އާދަކޮށް ހަރަކާތްތައް ހިންގަން. އެކިއެކި ރަށްރަށުގައި ދިރިއުޅޭ އަޅުގަނޑުމެންގެ މި ޖަމާއަތަށް ނިސްބަތްވާ މަންމައިންނާ ބައްދަލުކުރަމު. މިއީ އޮންލައިން ޚިދުމަތްތައް ބޭނުން ނުކުރާ މަންމައިންނާއި ގުޅުމަށް ލިބޭ ފުރުޞަތެއް. އަޅުގަނޑުމެންގެ މަންމައިންނަށް އެފަދަ ފަރާތްތަކާއި ގުޅިގެން މަސައްކަތްކުރެވޭ. ރަށްރަށުގައި ހަރަކާތްތައް ވިލަރެސްކޮށް ހިންގާ މަންމައިންނާއި އަޅުގަނޑުމެން އިދާރީ ޓީމާއި އޮންނާނީ ފޭސްބްކް ގްރޫޕް އަދި ވައިބަރ ގްރޫޕް މެދުވެރިކޮށް ގުޅިފަ. އެހެންވީމާ އެއީ އަޅުގަނޑުމެންގެ ދެމެދުގައި ގާއިމުވެފައިވާ ރަނގަޅު ފާލަމެއް.

މީގެ އިތުރުން އަޅުގަނޑުމެންގެ ގްރޫޕްގައިވެސް ނޯޓިސްއެއް ޖަހައިގެން މިދަނީ އަޅުގަނޑުމެންނާއި އޮންލައިންކޮށް ގުޅިފައި ނުވާ އެފަދަ މަންމައިން ފާހަގަ ކުރަމުން.

‘މަމްސް އެންޖީއޯ‘ އިން އެހީތެރިކަން ފޯރުވައި ސަޕޯޓްދެއްވަނީ މާލީގޮތުން އެކަނިތޯ؟ އަޅުގަނޑުގެ ޕޮއިންޓަކީ މިސާލަކަށް ޖިންސީ އަނިޔާގެ ޝިކާރައަކަށް ވެފައިވާ، ގެވެށި އަނިޔާގެ ޝިކާރައަކަށްވެ އެ އަނިޔާ ލިބެމުންދާ މައިން ދެނެގަނެ އެހީތެރިވަމުތޯ؟ ހަމަ އެހެންމެ ކައުންސިލިން ބޭނުންވާ މައިންނަށް އެފަދަ ޚިދުމަތްތައް ފޯރުކޮށްދިނުމަށް އެހީތެރިވެދެއްވަމުތޯ؟

އަޅުގަނޑުމެންގެ ފަރާތުން ތިޔަ ދެންނެވި ހުރިހައި ކަމަކަށްވެސް އެހީތެރިކަން ފޯރުކޮށްދެން. މާލީގޮތުން އަދި ކައުންސިލިން ބޭނުންވާ ބޭފުޅުންނަށް ކުރިއަށްދާންވީ މަގު ދައްކައިދެން. އަޅުގަނޑުމެން މިހާރު މިދަނީ މިކަހަކަ ކަންތައްތަކަށް އެހީތެރިކަން ފޯރުކޮށްދިނުމަށް ކައުންސިލިން ދޭ ބޭފުޅުންނާވެސް މަޝްވަރާ ކުރަމުން. ކުރިއަށް އޮތް ތާނގައި ސެޝަންތައް ވެސް ނަގައިދެމުން ގެންދާނަން.

އަޅުގަނޑުމެންގެ އިދާރީ ޓީމުގައިވެސް ކައުންސިލަރުން ތިއްބަވާ. އަދި ތިޔަ ފާހަގަކުރެއްވި ފަދަ ކަންކަމުގައި ދަނީ އެހީތެރިކަން ފޯރުކޮށްދެމުން. އަޅުގަނޑުމެންގެ ގްރޫޕްގައި ރާއްޖޭގެ ވަރަށް ގިނަ ޑޮކްޓަރުން އުޅުއްވާ. މި ހުރިހާ ބޭފުޅުންނާވެސް ވަރަށް ގާތުން މަސައްކަތް ކުރަމުން މި އަންނަނީ.

‘މަމްސް އެންޖީއޯ‘ އިން ޤައުމީ ފެންވަރުގައި ހަރަކާތްތެރިވުމަށް ކޮންމެ ރަށެއްގައި މައިންގެ ފޯކަލް ޕޮއިންޓެއް އެކުލަވައިލެވިފައި ވާނެތޯ؟ ‘މައިންގެ ވޯކްޝޮޕް’ ފަދަ ހަރަކާތްތައް ޤައުމީ ފެންވަރުގައި ބޭއްވުންފަދަ ބޮޑު އިވެންޓެއް ބޭއްވުމަށް ޕްލޭން ކުރައްވަންތޯ؟

އާދެ. އަޅުގަނޑުމެންގެ މިހާރުވެސް ވަރަށް ގިނަ ބޮޑެތި އަދި ކުދި ރަށްރަށުގެ ފޯކަލް ޕޮއިންޓްތައް އެބަހުރި. އަޅުގަނޑުމެން މިދަނީ މި އަހަރު ވަރަށް ބޮޑު މަޢުރަޒަކަށް ތައްޔާރުވަމުން. މައިންގެ ހުނަރު ދައްކައިލުމަށް ވަރަށް ބޮޑެތި ކަންތައް ތަކެއް ދަނީ ރޭވެމުން. އެގޮތުން އަންނަ ސެޕްޓެމްބަރު މަހު “މަމްސް އެކްސްޕޯ 2019′ ގެ ނަމުގައި ބޭއްވޭ އެކްސްޕޯގައި ދައްކައިލެވޭނެ މަންމައިންގެ ހުނަރު، ވިޔަފާރިތައް އަދި އެ ނޫނަސް މަންމައިން އާއްމުކޮށް ހާމަކޮށްލަން ބޭނުންވާ ކަންކަން. މިއީ މާލެއާއި ސަރަހައްދީ ރަށްރަށުގައި އަހަރަކު އެއްފަހަރު ބޭއްވުމަށް އަޅުގަނޑުމެން ޕްލޭންކޮށްފައިވާ ކަމެއް.

‘މަމްސް އެންޖީއޯ‘ ގެ ފަރާތުން ފާހަގަކޮށްލައްވަން ބޭނުންވާ އެހެން ކަމެއް އެބަ އޮތްތޯ؟

‘މަމްސް އެންޖީއޯ‘ މިހާ ފުރިހަމައަށް ހިންގަމުން މި ގެންދެވެނީ ‘މަމްސް އެންޖީއޯ‘ ޓީމުގެ ވަރަށް ހިތްވަރުގަދަ މަންމައިން އެއްވެސް ފޫހިކަމެއް، ވަރުބަލިކަމެއް ނެތި 24 ގަޑިއިރު ކުރަމުންދާ މިންނަތް މަސައްކަތުގެ ސަބަބުންކަން މި ފުރުޞަތުގަ އަޅުގަނޑުމެން ވަރަށް ޝުކުރުވެރިކަމާއެކު ފާހަގަކޮށްލަން.

މިހާރުވެސް އަޅުގަނޑުމެން ‘މަމްސް އެންޖީއޯ‘ އިން މާލޭގައި ރާވާ ކޮންމެ ހަރަކާތެއް ރަށްރަށުގައި ތިބި އަޅުގަނޑުމެންގެ ފޯކަލް ޕޮއިންޓްތަކާއި އަޅުގަނޑުމެންނާއި ގުޅިގެން ރާވައިގެން ކުރިއަށް ގެންދޭ.

އަޅުގަނޑުމުން ‘މަމްސް އެންޖީއޯ‘ ގެ ވަރަށް ބޮޑު އެދުމެއް އެއީ އެހީތެރިކަން ބޭނުންވެފައިވާ މަންމައިން އެނގޭނަމަ އަޅުގަނޑުމެންނަށް އަންގަވައިލަދެއްވުމަކީ.

އަޅުގަނޑުމެންގެ ފޭސްބްކް ޕޭޖް Facebook page @MOMS އަށް މެސެޖްކޮށްލެއްވުމުން އަޅުގަނޑުމެންނާ ގުޅޭނެ.

އަޅުގަނޑުމެން ‘މަމްސް އެންޖީއޯ‘ ގެ އުންމީދަކީ މި ޖަމާޢަތް އިތުރަށް އުފެދި ފުޅާވުން. ސަބަބަކީ އަޅުގަނޑުމެންނާއި ގިނަ މައިން ގުޅެމުން އަންނަ ވަރަކަށް އެހީއަށް ބޭނުންވެފައިވާ މަންމައިން ލިބޭ މިންވަރު އަންނަނީ އިތުރުވަމުން. އެފަދަ މައިންގެ މައްސަލަތައް ހައްލުކޮށްދިނުމަށް އަޅުގަނޑުމެންނަށް އިތުރު ފުރުޞަތުތައް ލިބޭ. އަޅުގަނޑުމެން މި ކުޅެދޭ ރޯލަކީ އެކިއެކި އިވެންޓްތަކާއި ހަރަކާތްތަކުގައި މަންމައިން ބައިވެރިވާ މިންވަރު އިތުރުކޮށްދީ މައިންގެ ދިރިއުޅުން ފާގަތިކޮށްދިނުމުގައި އެހީތެރިވެދީ އެހީއަށް ބޭނުންވެފައިވާ މައިންނާއި އެހެނިހެން މައިންނާއި ގުޅުވައިދީ މާލީގޮތުން، ތަޢުލީމު ފޯރުކޮށްދިނުމުގެ ގޮތުން، ޞިއްޙީގޮތުން، ގެވެށި އަނިޔާ ފަދަ ކަންތައްތަކާއި އާއިލާއަށް ހެޔޮގޮތުގައި ދެމެހެއްޓުމަށް މައިންނަށް އެހީތެރިވެދިނުން.

‘މަމްސް އެންޖީއޯ‘ ގެ މަޤްޞަދުތަކާއި މަސައްކަތްތައް އަޅުގަނޑުމެންނަށް ހީވެފައިވާ މިންވަރަށް ވުރެން އެތައް ހާސްގުނައެއް އިތުރެވެ. ދަރުމައަށް މަސައްކަތް ކުރުމުގެ ލާމަސީލު ނަމޫނާއެއް ދިވެހި މަންމައިން އިސްވެ ކުރައްވަމުން ގެންދަވާކަމީ ހަމަ ގައިމުވެސް މި ދިވެހި ޤައުމުގެ ހަމަ ކޮންމެ ދަރިއެއްވެސް ފަޚްރުވެރިވާން ޖެހޭ ކަމެއް ކަމުގައި މުނިއަވަސް އިން ދެކެމުއެވެ.

މުނިއަވަސް އިން އެދުނު އެދުމަކަށް މި ދިވެހިރާއްޖޭގެ ހުރިހައި މަންމައިންގެ ‘މައިންގެ’ ފަޚްރުވެރި، ޝަރަފުވެރި، އަގުހުރި އަދި އެހާމެ ދަރުމަހުރި ރޯލު އަދާކުރައްވަމުން މިވަގުތު ގެންދަވާ ‘މަމްސް އެންޖީއޯ‘ ގެ ކޯ ފައުންޑަރ އަދި ޗެއަރޕާސަން ޚަދީޖާ ސިތުރާ އަށާއި ކޯ ފައުންޑަރ އަދި ވައިސް ޗެއަރޕާސަން މަރިޔަމް ޒީޝާން އައްބާސް އަދި ޖެނެރަލް ސެކްރެޓަރީ ފާޠިމަތު ރިޔާސާ ތިޔަ ދެއްވެވި އަގުހުރި މަޢުލޫމާތާއި ހޭދަކުރެއްވި ވަގުތަށް މުނިއަވަސް އާއި މުނިއަވަސްގެ އެންމެހައި ކިޔުންތެރިންގެ ނަމުގައި ޝުކުރުވެރިވަމުއެވެ. ތިޔައީ އަދި ‘މަމްސް އެންޖީއޯ‘ ގެ ހުރިހައި މަންމައިންނަކީ ހަމަގައިމުވެސް މުޅި ޤައުމު އެކުގައި ސެލިއުޓްކުރުން ޙައްޤު މަންމައިން ތަކެކެވެ.

މުނިއަވަސް އިން އެދެނީ ދިވެހި މަންމައިން ތިޔަ ކުރައްވާ މަސައްކަތުގައި މާތްﷲ ބަރަކާތް ލައްވަވައި ފެހިފަހި، ފާގަތި ކުރިމަގެއް މިންވަރު ކުރެއްވުމެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: