| MUNIAVAS

ޑާކްރެއިން އެންޓަޓެއިންމެންޓްގެ ކޮމެޑީ ފިލްމު “މާމުއީ” އަކީ ފިސާރި ރަހަގަނޑު ރަނގަޅު “މާމުއި” އެއްކަން ކޮންމެ ރެއެއްގެ ހައުސްފުލް ޝޯއަށް އެކަނި ބަލައިލުމުންވެސް އެނގެއެވެ.

ޖުލައި އެއްވަނަ ދުވަހުން ފެށިގެން އޮލިމްޕަހުގައި ދައްކަމުން އަންނަ “މާމުއި”ގެ ހައުސްފުލް 15ވަނަ ޝޯ މިރޭ ދެއްކުމަށް ތައްޔާރުވެފައިވާއިރު، މާދަމާރޭގެ ޝޯ ވެސް ހައުސްފުލްވުމާ ދިމާއަށް މިސްރާބު ހިފާފައިވާކަމަށް ފިލްމުގެ ޕްރޮޑިއުސަރު މުޙައްމަދު ޢަލީ (މޮގާ) މަޢުލޫމާތު ދެއްވައެވެ.

މީގެ ދެ ދުވަސްކުރިން މުނިއަވަސް ގެ ދެ ނޫސްވެރިން، ފިލްމު “މާމުއި”ގެ ޓިކެޓް ވިއްކަމުންދިޔަ ވަގުތު، ފިލްމު ވިއްކާ ކޮށިގަނޑު ތެރޭގައި ގާތްގަނޑަކަށް ގަޑިއެއްހައިއިރު ހޭދަކުރިއެވެ. އެ ވަގުތުވެސް ފެނިގެންދިޔައީ އަތުފަތު ނުޖެހި، “މާމުއި”ގެ ރަހަ ބަލައިލުމަށް ޓިކެޓް ގަންނަމުންދިޔަ މަންޒަރެވެ.

ފިލްމު “މާމުއި”އަކީ އެ ފިލްމުގައި ހުރިހައި ރަހަތަކެއް ވަރަށް މިންހެޔޮކޮށް އެކުލަވާލާފައިވާ މޮޅު ފިލްމެކެވެ. އައިޝަތު ފުއާދު އަދި އަޙްމަދު ޠަލާލް މި ފިލްމަށް ތައްޔާރުކޮށްފައިވަނީ ވަރަށް ފުރިހަމަ ސްކްރީން ޕްލޭއެއްކަން ފިލްމު ބަލައިލުމުން އެނގިގެންދިޔައީ އެ ސްކްރީންޕްލޭ އަށް ދިރުން ގެނެސްދިން ޢަލީ ޝިފާޢު (ޗިއްޕެ)ގެ މޮޅު ޑައިރެކްޝަނާއި އެކުގައެވެ. ފިލްމުގެ ހަމަ ކޮންމެ މަންޒަރެއްގެ ކެމެރާކޮށްފައިވާ ހިތްގައިމުކަމުން “މާމުއި”ގެ ފޮނިކަން، އިތުރުރަށް ފުރިހަމަކޮށްދީފައިވެއެވެ.

ފިލްމުގެ ތަރިންގެ އެކްޓިންއަށް ބަލައިލިޔަސް، މިވެނި ތަރިއެއްގެ އެކްޓިން ގޯހޭ، މިވެނި މަންޒަރެއް މިހެން އޮތްނަމަ ރަނގަޅޭ ބުނާނެ ތަންކޮޅެއްވެސް ފިލްމުގެ ކާސްޓާއި ޓެކްނިކަލް ޓީމުން ދޫކޮށްލާފައެއް ނުވެއެވެ.

”މާމުއި”ގެ ތަރިންގެ ތެރޭގައި ޖުމައްޔިލް ނިމާލް (ޖުމަލް)، މަރިޔަމް އައްޒަ، އަޙްމަދު ސަޢީދު، މުހައްމަދު ފައިސަލް، މަރިޔަމް މަޖުދާ (މަޖޫ)، ޝީލާ ނަޖީބް، ނުޒުހަތު ޝުއައިބް (ނުޒޫ)، އިބްރާހީމް ޝާފިއު (ފުބޫ)، އިސްމާއިލް ޖުމައިހް (ޖުމާ)، އަހުމަދު ސުނީ، ހަމްދާން ފާރޫގް، މަރިޔަމް ނޫރާ، އަލީ ޝަޒްލީމް، އާދަމް ރިޒްވީ (ރެކްސް)، އަހުމަދު ޝާކިރު (ޝާއްކޮ އައްމަޑޭ) އަދި އިބްރާހީމް އަމާން ފަދަ ތަރިން ހިމެނެ އެވެ. މީގެ އިތުރުން ”މާމުއި” ގެ ކާސްޓުންގެ ތެރޭގައި މަޝްހޫރު ފިލްމީ ތަރި އިސްމާޢީލް ވަޖީހްގެ ފެންނައިރު، ޗިއްޕެގެ އަންހެނުން އައިޝަތު ޔާދާ ވެސް މި ފިލްމުން ފެނިގެންދިޔައެވެ.

“މާމުއި”ފުޅިއަކަށް ފިލްމުގެ ވާހަކަ އެއްކޮށް ކަހަލަ ގޮތަކަށް ބިނާކޮށްފައިވާއިރު، ފިލްމުން ފެނިގެންދާ ހުދުމުހުތާރު (ޝާއްކޮ އައްމަޑޭ)ގެ ފަރާތުން ފެނިގެންދާ ހުުދުމުޚުތާރުކަމުން ވެސް ފިލްމަށް އިތުރު ފުރިހަމަކަމެއް ގެނެސްދީފައިވެއެވެ. ވަރުޖީނާ (ޝީލާ ނަޖީބު) ގެ ހުރި ހަމައެކަނި ދަރިފުޅު ސަލްމާން (ޖުމައްޔިއްލް ނިމާލް) އާއި ސަލްމާންގެ އަންހެން ހައިފާ (މަރިޔަމް އައްޒަ) ގެ ޙަޔާތަށް ވަރުޖީނާގެ ވަރުހެސަ މިޒާޖުގެ ސަބަބުން އަސަަރުފޯރާ މިންވަރު ނިކަން މޮޅަށް ގެނެސްދީފައިވެއެވެ.

އަނެއްކޮޅުން ރުޝްދީ (އިސްމާޢީލް ޖުމައިހް) ގެ އަޅައިލާ މިޒާޖުގެ އުފާވެރިކަން ތާނިޔާ (މަރްޔަމް މަޖުދާ) ހޯދަމުންދިޔައިރު، ތާނިޔާގެ ދޮންތަ (އައިޝަތު ޔާދާ)ގެ ޝައްކު މިޒާޖުގެ ސަބަބުން ރުޝްދީ އާއި ތާނިޔާގެ ހަޔާތަށް ކުރިމަތިވާ ނުތަނަވަސްކަން ފެންނަމުންދާއިރު، ޕްރަދީޕް ރައޫފް (ރެކްސް) އާއި ރުޝްދީގެ އޮންނަ ގުޅުންވެސް މި ފިލްމުގެ ރަހަ ހެޔޮވަރުކޮށްދިނުމަށް މުހިންމު ދައުރެއް އަދާކޮށްފައިވެއެވެ.

ފިލްމުގެ ހުރިހައި ކެރެކްޓާތައް ވަރަށް ފުރިހަމައަށް އަދާކޮށްފައިވާ މޮޅު މަސައްކަތުގެ ވާހަކަ ދައްކަން ވެއްޖެނަމަ، ލައްކަ ވާހަކަތައް ލިޔެވިދާނެއެވެ.

ކޮންމެއަކަސް، “މާމުއި” ނުބަލައި ތިބި ފަރާތްތަކަށް ބުނެލަން އޮތީ މިއީ ފިސާރި ރަހަގަނޑު ރަނގަޅު “މާމުއި”އެއް ކަމަށެވެ. މޮޅު “މާމުއި”އެއްގެ ރަހަ ބަލައިލަން ބޭނުންވާ ފަރާތްކުން އެންމެ އަވަހަށްވެސް “މާމުއި” ބަލައިލަން ބޭނުންނަމަ މާދަމާރޭ އޮލިމްޕަހަށް ދިއުމަށް ޓިކެޓެއް ލިބޭތޯ މަސައްކަތްކޮށްލާށެވެ.

ހާތްތެރީ… މިރޭގެ ޝޯ އެއްކޮށް އޮތީ ހައުސްފުލް ވެފައެވެ. މާދަމާ ރެއަށް ނުވަތަ ކުރިއަށް ހުރި ޝޯތަކުން ޓިކެޓެއް ބުކްކޮށްލެވޭތޯ ވީ އެންމެ އަވަހަކަށް މަސައްކަތްކޮށްލުން ރަނގަޅުވާނެ އެވެ.