އާބާދީގައި 1808 މިހުން ދިރިއުޅޭ ހދ. މަކުނުދޫއަކީ އައްމުގޮތެއްގައި ވިއްސާރަވުން ދުރުރަށެއް ނަމަވެސް މިހާރު ރާއްޖެއަށް ކުރަމުންދާ ގަދަ ވިއްސާރައިގެ ސަބަބުން މަކުނުދޫއަށް ގެއްލުންތަކެއް ވެއްޖެ އެވެ.

މަކުނުދޫއަކީ ހދއަތޮޅުގެ އެހެންރަށްރަށާއި އެކަހެރިކޮށް އޮންނަ ބޮޑުރަށެކެވެ. މިހާރު ރާއްޖެއަށް ކުރަމުންމިދާ ވިއްސާރައިގެ އަސަރު ކުރާލެއް ބޮޑުކަން ފާހަގަ ކޮށްލެވެއެވެ. އެގޮތުން އިއްޔެގެ ޙާލަތަށް ބަލާއިރު އިއްޔެގެ ވަގުތެއްގައި ރަށުގެ ޖެޓީ ސަރަޙައްދުގައި ހުރި ރުކެއްވެއްޓިފައި ވެއެވެ. އެރުއް ނެގުމުގެ މަސައްކަތް ބަޔަކާ ހަވާލުކޮށް ކުރުމަށްޓަކައި ރަށު ކައުންސިލުން ނިންމާފައިވާ ކަމަށް ރަށުކައުންސިލްގެ ރައީސް ހުސައިން ސާމީ ވަނީ ވިދާޅުވެފައެވެ. ނަމަވެސް ވިއްސާރަ އަދިވެސް މައިތިރިނުވުމުގެ ސަބަބުން އެކަން އަދިވެސް ނުކުރެވިވާކަން ވެސް ރައީސް ވަނީ ފާހަގަ ކުރައްވާފައެވެ.

ރަށުގެ މިސްކިތްތަކަށް ފެންވަނުމުގެ މައްސަލަވެސް ވަނީ ވަރަށް ބޮޑަށް ކުރިމަތިވެފައެވެ. އެގޮތުން ރަށުގެ އެންމެ ބޮޑު މިސްކިތް ކަމުގައިވާ ތަޤުވާ މިސްކިތަށްވެސް ފެންވަދެފައި ވެއެވެ. ފެން ހިއްކުމުގެ މަސައްކަތްދަނީ މިސްކިތްތަކުގެ މުވައްޒަފުން ކުރަމުން ކަމަށް މަޢުލޫމާތު ލިބެއެވެ.

މިއަދުގެ ޙާލަތަށް ބަލާއިރު ވައިގަދަވެ ވިއްސާރަވުމުގެ ސަބަބުން ރަށުގައި ހުންނަ ހަމައެކަނި ޕުރީސުކޫލް ކަމުގައިވާ އުންމީދީ ޕުރީސުކޫލުގެ ކިޔެވުންވެސް ވަނީ މެދުކަނޑާލާފައެވެ. މީގެ އިތުރުން ރަށުގައި ހުންނަ އެސް.ޓީ.އޯ ގުދަނުގެ ފުރާޅުން ޓިނުތަކެއްވެސް ގަދަވަޔާއެކު މިއަދުގެ ވަގުތެއްގައި އެއްލާލާފައިވެއެވެ. މިކަން މިވަނީ ރަށު ކައުންސިލާއި ރަށުގެ ޕޮލިސް ސުޓޭޝަނާ ގުޅިގެން ހައްލުކުރުމުގައި މަސައްކަތް ކޮށްފައިވާކަމަށް ކައުންސިލްގެ ރައީސް މައުލޫމާތު ދެއްވައެވެ. ރަށަކީ ފެންތިލަ ރަށަކަށް ނުވުމާއެކު ފެންބޮޑުވުގެ މައްސަލަ ދިމާވެފައި ނުވާކަން ފާހަގަ ކޮއްލެވެއެވެ.

ރާއްޖެއަށް ކުރަމުންމިދާ ވިއްސާރައިގައި އުތުރުގެ ބައެއް އަތޮޅުތަކަށް 50މޭލަށް ވައިގަދަވާނެކަމަށް ލަފާކޮށް މޫސުމާބެހޭ ގައުމީ އިދާރާއިން ވަނީ ރީނދޫ އިންޒާރުދީފައެވެ. އެގޮތުން ހއ. އަތޮޅުން ޅ އަތޮޅާއި ދެމެދުގެ ރަށްތަކަށް މެންދުރު 12:00 އާއި ހަމައަށްވަނީ ރީނދޫ އިންޒާރުދީފައެވެ.

މޫސުމާބެހޭ އިދާރާއިން ވިދާޅުވި ގޮތުގައި ކުރިއަށް އޮތް 24ގަޑިއިރުވެސް ރާއްޖޭގެ ބޮޑުބަޔަކަށް ގުގުރުމާއެކު ވިއްސާރަ ކުރާނެއެވެ. އަދި ބައެއް އަތޮޅުތަކަށް ބޯކޮށް ވާރޭވެހޭނެކަމަށްވެސް ވަނީ ލަފާކޮށްފައެވެ.

ވައިޖެހޭނެކަމަށް ލަފާކުރަނީ ދެކުނާއި ހުޅަނގު ދެކުނުން ދެކުނުގެ އަތޮޅުތަކަށް ގަޑިއަކު 08 މޭލާއި 18 މޭލާއި ދެމެދުގެ ބާރުމިނުގައެވެ. އަދި އުތުރާއި މެދުރާއްޖެތެރޭގެ އަތޮޅުތަކަށް ހުޅަނގުދެކުނާއި ހުޅަގުން ގަޑިއަކު 15 މޭލާއި 25 މޭލާދެމެދުގެ ބާރުމިނުގައެވެ. ރާއްޖޭގެ ކަނޑުތައް އުތުރާއި މެދުރާއްޖެތެރެއަށް ގަދަވާނެކަމަށް ލަފާކުރާއިއިރު ދެކުނުގައި އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެކަމަށް މޫސުމާބެހޭ ގައުމީ އިދާރާއިން ވިދާޅުވެއެވެ.

ވައިގަދަވެ، ކަނޑުތައް ގަދަވެ ބޯކޮށް ވާރޭވެހޭނެކަމަށް ލަފާކުރެވޭތީ ހުރިހާ ފަރާތްތަކުން މޫސުމަށް ސަމާލުވުމަށް މޫސުމާބެހޭ ގައުމީ އިދާރައިން އިލްތިމާސް ކުރައްވައެވެ.

ލިޔުންތެރިޔާގެ ފުރަމަލަ

ޚަދީޖަތު ސަނާ
ޚަދީޖަތު ސަނާ
މުނިއަވަސްގެ ޑެޕިއުޓީ އެޑިޓަރ ޚަދީޖަތު ސަނާ އަކީ ލޯބީގެ، އަސަރުގަދަ އަދި ހިތާމަވެރި ވާހަކަ ލިޔުމާއި ކިޔުމުގައި ފާހަގަކޮށްލެވޭ ލިޔުންތެރިއެކެވެ. އިޖްތިމާޢީ މައުޟޫތަކަށް ސައްނު ލިޔާ ކުރުވާހަކަތަކުން ބޭނުންވާ މެސެޖް ފޯރުކޮށްދެނީ ވަރަށް އަސަރާއި އެކުގައިކަން ފާހަގަކޮށްލެވެއެވެ.
މި ލިޔުންތެރިޔާގެ ބައެއް އެހެން ލިޔުންތައް

ގުޅުންހުރި ލިޔުން: