ޢީދު ދުވަހާ ދިމާކޮށް ތިޔަ ކުދިންގެ ތެރެއިން ކޮންމެ ކުއްޖެއްގެ ގޭގައި ވެސް ކުކުޅުން ކޮންމެވެސް އެއްޗެއް ހަދާނެއެވެ. މިހާރަކަށް އައިސް، އައިސް ކުކުޅު ކައްކަމުން އަންނަ ނަމަވެސް ކުރިން ކައްކައި އުޅެނީ ދިވެހި ކުކުޅެވެ. ޢީދު ނަމާދުން ފައިބައިގެން ޢީދު ޞަލަވާތް ކިޔަވައި ސައިބޮއި ނިންމުމަށްފަހު ދެން ކުރަންފަށާ ކަމަކީ ކުކުޅު ހިފުމެވެ. މި ޒަމާނަށް އައިއިރު ގިނަ ކުދިންނަށް ދިވެހި ކުކުޅެއް ފެނުމުގެ ނަސީބު ލިބޭނީ ވެސް ވަރަށް މަދުންކަމަށް ބުނުން ދޮގަކަށް ނުވާނެއެވެ.
އެހެންކަމުން ޓިޝޫ ކަރުދާސް ބޭނުންކޮށްގެން ކުކުޅެއް ހަދާނެގޮތް ކިޔައިލައިދޭނަމެވެ. މިއީ މުދައްރިސުންނަށް ތިޔަ ކުދިންގެ ޢަމަލީފަންނު ގަޑީގައި ދަސްކޮށްދިނުމަށް ދެވިދާނެ މަސައްކަތެކެވެ.
ޓިޝޫ ކަރުދާހުން މި ތައްޔާރުކުރާ ކުކުޅު ތިޔަކުދިންގެ ޢަމަލީފަންނު ފޮތުގައި ތަތްކޮށްލައިފައި ހުންނައިރު ނިކަން ރީތި ވާނެއެވެ. ކާ ކޮޓަރީގެ ފާރުގައި ތަތްކޮށްލުމަށް ނުވަތަ އައިސްއަލަމާރީގައި ތަތްކޮށްލައިގެން ކާކޮޓަރީގެ ޒީނަތްތެރިކަން އިތުރުކޮށްލެވިދާނެއެވެ.
ބޭނުންވާނެ ތަކެތި:-
– ދެ ރީނދޫ އަދި އެއް އޮރެންޖު ކުލައިގެ ބްރިސިލް ބޯޑު ކަރުދާސް އޭ-ފޯރ ސައިޒުގެ
– އެއް އިންޗި އަކަމިނުގެ ކަޅު ކުލައިގެ އޭ-ފޯ ސައިޒް ކަރުދާސްކޮޅެއް
– ދެ އިންޗި އަކަމިނުގެ ހުދު ކުލައިގެ އޭ-ފޯ ސައިޒް ކަރުދާސްކޮޅެއް
– ކޮޅުގައި ރަބަރު ހުންނަ ފަންސުރެއް
– ތެރަސްފުޅިއެއް (ބޮޑަށް ރަނގަޅީ “ވައިޓް ގްލޫ”)
– ހުދު ނުވަތަ އޮރެންޖު ކުލައިގެ ޓިޝޫ ކަރުދާސްކޮޅުތަކެއް ދެ އިންޗީގެ އަކައަށް ވާގޮތަށް ކަފާފައި
ތައްޔާރު ކުރާނޭ ގޮތް:-
1- ބްރިސިލް ބޯޑް މަތީގައި ބަންޑުން ފަހަރަކު އަތްތިލައެއް ބާއްވާށެވެ. އެއަށްފަހު އަތްތިލައިގެ ވަށައިގެން ފިބާއެއް ނުވަތަ މާރކަރަކުން ކުރަހައިލާށެވެ.
2- ބްރިސިލް ބޯޑްގައި ކުކުޅުބިސް ވަށްބުރަށް ވާގޮތަށް، ގާތްގަނޑަކަށް އެމެރިކަން ފުޓްބޯޅައެއްގެ ސައިޒަށް ކުރަހާލާށެވެ. މިއީ ކުކުޅުގެ ހަށިގަނޑަށްވާ ބައެވެ.
ކުކުޅުގެ ހަށިގަނޑު ކަފާނީ މި ބައްޓަމަށް
ހަމަ އެހެންމެ ކުކުޅުގެ ދެފަޔާއި ތުން ހެދުމަށް ފައިގެ އަދި ތުނބުގެ ބައްޓަމަށް ވާގޮތަށް އޮރެންޖު ކަރުދާހުން ދެ އެތިކޮޅު ކަފައިލާށެވެ.
ކުކުޅުގެ ފައި ކަފާނީ މިހެން
ލޯ ހެދުމަށް ހުދު ކަރުދާސްކޮޅެއްގައި ކުކުޅުބިސް ވަށްބުރަށް ވާގޮތަށް ހަތަރުއަނާއެއް (25ލާރި އެއް)ގެ ސައިޒަށް ދެ އެތިކޮޅު ކަފާލާށެވެ. އޭގެ އިތުރުން އެއަށްވުރެން ކުޑަ ދެ އެތިކޮޅު ހަމަ އެ ބައްޓަމަށް ކަޅު ކަރުދާހުގައި ކަފައިލާށެވެ. ކަޅު ކަރުދާހުން ކެފި އެތިކޮޅު، ހުދު ކަރުދާހުން ކެފި އެތިކޮޅުގެ ތެރޭގައި ތަތްކޮށްލާށެވެ.
ކުކުޅުގެ ތުން އަދި ލޯ ހަދާނީ މިހެން
3- ކަފައިފައި ހުރި ޓިޝޫކޮޅުތަކުން ޓިޝޫ ކޮޅެއްގައި ފަންސުރުގެ ރަބަރު ހުންނަ ކޮޅު ޖައްސާށެވެ. އެއަށްފަހު ޓިޝޫ ކަރުދާސް ފަންސުރުގެ މައްޗަށްވާ ގޮތަށް ބޮނޑިކޮށްލާށެވެ. ހުރިހައި ކަރުދާސްކޮޅު ތަކެއް މިހެން ހަދާށެވެ.
4- ފަންސުރުގެ ކޮޅުގައި ޓިޝޫކޮޅު ބަހައްޓައި ފަންސުރުގެ ރަބަރު ޖެހިފައި ހުންނަ ތަނުގެ އަނެއް ފަރާތުގައި ތެރަސް ލުމަށްފަހު ކަރުދާހުގައި ކުރަހާފައިވާ ކުކުޅުގެ ހަށިގަނޑުގައި ތަތް ކުރަމުން ގެންދާށެވެ.
ފަންސުރު ރަބަރު ހުންނަ ކޮޅުގައި ޓިޝޫކޮޅު ޖައްސައި އަނބުރާލައި ރޫ ޖެއްސާނެ ގޮތް
5- މުޅި ކުކުޅު ފުރެންދެން މިގޮތަށް ޓިޝޫ ތަތްކުރާށެވެ.
6- ޓިޝޫތައް ހިކުމުން ކުކުޅުގެ ފިޔަ އަދި ފަޔަށް ކެފި ބައިތައް ތަތްކޮށްލާށެވެ. އޭރުން އެއޮތީ ޓިޝޫ ކަރުދާހުގެ ކުކުޅު ތައްޔާރުކުރެވިފައެވެ.
އެނގޭ ހެއްޔެވެ؟
މިގޮތަށް ފުއްޕާ ހަމެއްގައި ޓިޝޫ ތަތްކޮށްގެން ތަފާތު އެތައް އެއްޗެއް ތައްޔާރު ކޮށްލެވިދާނެއެވެ.
ނޯޓް: މިއީ 21 ޖުލައި 2011 ގައި ފަންވަތް.އިންފޯ ގައި ޝާއިޢުކޮށްފައިވާ އަޅުގަނޑުގެ ލިޔުމެއް އިތުރަށް ތަރައްޤީކުރުމަށްފަހު އަލުން ޝާއިޢުކުރާ ލިޔުމެކެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 24 ޑިސެމްބަރ 2024ޚަބަރުނިޝާ އާރްޖޭއަކަށް!
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
- 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
- 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
