އައު ލަފުޒުތައް ދަސްކޮށް ބޭނުންކުރުމަކީ އަޅުގަނޑުމެންގެ ބަސްކޮށާރު މުއްސަނދި ވެގެންދާނެ ކަމެކެވެ. މިއީ އަޅުގަނޑުމެންގެ ލިޔުންތަކަށް ލިބިގެންދާނެ އިތުރު ފުރިހަމަ ކަމެކެވެ. އެގޮތުން އަޅުގަނޑު މިއަދު ތިޔަ ކިޔުންތެރިންނާއި ހަމައަށް ވެސް މިއައީ އައު ލަފުޒަކާއި އެކުގައެވެ. އެ ލަފުޒަކީ ގޫހަރިޖެހުމެވެ. ގޫހަރިޖެހުމަކީ މާނައެއް ނެތް ޒުވާބު ކުރުމެވެ. މިއީ މިއަދު އަޅުގަނޑުމެންގެ މުޖުތަމަޢުން ވެސް ރެކޯޑު އަދަދަކަށް ފެންނަމުންދާ ކަމެކެވެ. މިކަމުގެ ސަބަބުން ފެންނަމުންދަނީ ހިތާމަވެރި މަންޒަރުތަކެކެވެ. މިކަން ހުއްޓުވުމަށްޓަކައި އިތުރަށް މިކަމުގެ ތެރެއަށް ފީނާލަމާ ހިންގަވާށެވެ.

ގޫހަރިޖެހުމަށް ދިމާވާ ސަބަބުތައް ބައިވަރެވެ. އެނގިގެންނާއި ނޭގި ނަމަވެސް މިކަމުގެ ތެރެއަށް އަޅުގަނޑުމެންނަށް ވަދެވެނީ މަދެއްކޮށެއް ނޫނެވެ. އެކަކަށްވުރެ އަނެކަކުގެ މޮޅުކަމާއި ދެމީހުން ދޭތެރޭގައި އޮންނަންޖެހޭ ގަދަރު ނެތުމަކީ ގޫހަރިޖެހުމުގެ މައިގަނޑު ސަބަބެވެ. މީގެ އިތުރުންވެސް ދޫނުދިނުމާއި އިތުބާރު ނެތުމާއި ބޭނުންކުރެވޭ ބަސްމަގަކީވެސް ގޫހަރިޖެހުމުގެ ސަބަބުތަކެވެ.

ގޫހަރިޖެހުމުގައި ވަކި އުމުރެއް ތަފާތެއްނެތެވެ. އެންމެ ތުއްތު ކުދިނުން ފެށިގެން މުސްކުޅިންނާއި ހިސާބަަށްވެސް މި ބަލިމަޑުކަމުގެ އަސަރުވަނީ ކޮއްފައެވެ. ގޭތެރެއިން ފެށިގެން، މަސައްކަތް ކުރާ މާހައުލާއި ކުޅިވަރުގެ މާހައުލުންވެސް ގޫހަރިޖެހުން ފެނުމަކީ މިއަދުގެ މުޖުތަމަޢުގައި އާއްމުވެފައިވާ ކަމެކެވެ. ވީމާ، މިކަމަކީ އަޅުގަނޑުމެން ފުންކޮށް ވިސްނާ މިހާރުން މިހާރަށް ފިޔަވަޅު އަޅަންވެއްޖެ ކަމެކެވެ.

ތުއްތު ދެކުއްޖަކު ކުޅެލަން ތިބޭ ތަނެއްގައި އަޅުގަނޑުމެން މަޑުކޮށްލިއަސް މިމަންޒަރަކީ އާއްމުކޮށް ފެންނަ މަންޒަރެކެވެ. އެއްކުއްޖެއްގެ މޮޅުކަމާއި ކެރޭކަން ދެއްކުމަށާއި އަތުގައި ހުންނަ އެއްޗެއްގެ ފެންވަރު މޮޅުކަން ހާމަކުރުމަށްވެސް އެކުދިން ނަގާ ހަތިޔާރަކަށް ވެގެން މިދަނީ ގޫހަރިޖެހުމެވެ. އެއްކުއްޖަކު އަނެއްކުއްޖަކަށް ދޫދިނުމުގެ ބަދަލުގައި ދެންހުންނަ ކުއްޖާގެ އަގު ވައްޓައިލުމުގެ ގޮތުން މިކަން ކޮށްލަނީއެވެ. މީ އެއްގޮތަކަށްވެސް އަޅުގަނޑުމެންގެ ދަރިންގެ ކިބައިން އަޅުގަނޑުމެން ދެކެން ބޭނުންވާ މަންޒަރެއް ނޫނެވެ. މިމަންޒަރުތައް ފެނުމުން އަޅުގަނޑުމެންގެ ލޮލުން ކަރުނަ ފޫދޭ ނޫންތޯއެވެ. މިކަންކަން އިސްލާހު ކުރެވޭނީ އަޅުގަނޑުމެން އެންމެން މަސައްކަތް ކޮށްގެނެވެ.

ގޭތެރޭއަކީ އެކި މިޒާޖުގެ އެކި މީހުން މަސްހުނިވެ އުޅޭ ތަނެކެވެ. އެކަކު އަނެކަކުގެ ޚިޔާލާ، އުޅުމާއި ބޭނުންތައް ދަނެގެން އެކަކު އަނެކަކަށް އެހީވެ އުޅެން އެންމެ ފަސޭހަ ތަނެވެ. އެހެނީ މިތާ މިއުޅެނީ އެއް ލޭ ހިނގާ އެއްބަނޑުން އުފަންވެފައި ތިބޭ ބައެކެވެ. ވީއިރު މިއަށްވުރެ ލޯބިން ފުރިފައި ވާނޭ ތަނެއް އޮންނާނެ ހެއްްޔެވެ؟ ނަމަވެސް މިތަނުގެވެސް ހަލާކަކަށް ވެގެން ދަނީ އެއްކަލަ ގޫހަރިޖެހުމެވެ. ނުބައި ނިޔަތަކާއި އެކުގައި ނޫންނަމަވެސް ތިމާގެ ވަރުގަދަކަމާ މޮޅުކަން ދައްކައިލުމަށްޓަކައި ކޮށްލެވޭ މި ނުބައި ކަންތަކުގެ ސަބަބުން ހަލާކުވެގެން ދަނީ ކިތައް އާއިލާތޯއެވެ. ވީއިރު މިކަމުގެ ސަބަބު ދެނެގަނެ މިކަން ހައްލުކުރަން ނުކުންނާކަށް ނުވޭތޯއެވެ.

ހަޔާތުގެ އެންމެ ނާޒުކީ ދުވަސްވަރު އަމިއްލަ މުސްތަގުބަލު ބިނާކުރުމަށްޓަކައި ނުކުންނަ މާހައުލުން ގޫހަރިޖެހުމާ ކުރިމަތިލާން ޖެހިއްޖެ ހިނދެއްގައި އަމިއްލަ ހުވަފެންތައް ގުރުބާންކޮށް ހަޔާތުގެ މިސްރާބު ބަދަލު ކުރާ ޒުވާނުންވެސް އަޅުގަނޑުމެން ތެރޭގައި މަދެއްނޫނެވެ. އެކަކު އަނެކަކަށް ވުރެ މަތީ ހަރުފަތަކަށް ދިއުމަށްޓަކައި ކުރާ މަސައްކަތްތަކުގެ އިތުރުން ކުރެވޭ މިނޭދެވޭ އަމަލުގެ ސަބަބުން ދުވަހަކު ހިތުން ނުފިލާ ފަދަ ލަކުނުތައް ހިތުގައި ލަނީވެސް މަދެއްކޮށެއް ނޫނެވެ. މީ އަޅުގަނޑުމެން ވިސްނަން ވެއްޖެ ކަމެއްނޫންތޯއެވެ.

ހަޔާތުގައި އުމުރު ދުވަހު އެކީ އުޅުމަށް ވަރުގަދަ ޚަރަދުތައް ކޮށްގެން ބަނދެލާ ގޮށްވެސް ދޫވެދާން ގިނަ ދުވަހެއް ނުނަގައި ނިމެނީ ހަމަ މި ސަބަބާހުރެއެވެ. ފިރިމީހާ ނުވަތަ އަނބިމީހާއާ ދިމާއަށް ކޮންމެހެން ބުނަން ނުޖެހޭ ކޫސަނި އެއްޗެއް ބުނެވި އެބަހުގައި ހިފަހައްޓައި އެ ޖެހޭ ގޫހަރިއެއްގެ ސަބަބުން މުޅި ޙަޔާތް ބަނަވެ ވީރާނާވެގެން ދަނީއެވެ. ދަރިންގެ ކުރިމަތީ ނަމޫނާ ދައްކަން ތިބޭ ބަޔަކީ  މައިންބަފައިންނެވެ. ނަމަވެސް އެކުދިން ކުރިމަތީ ފިލުމެއް އަޅުވާލާހެން މުނިފޫހި ފިލުވަން މިކަހަލަ ނޭދެވޭ ކަންތައް ކުރަމުން ދިއުމުގެ ނަތީޖާ އަކަށް ވަނީ މިކުދިންގެ ޅައުމުރުން ފެށިގެން އެންމެ ގާތް އެކުވެރިއަކަށް ގޫހަރިޖެހުން ވުމެވެ. ގޫހަރިޖެހުމާއި ނުލައި މިކުދިންނަށް ނޭވާލެވޭ ކަމަކަށްވެސް ނުވެއެވެ. މީ އަޅުގަނޑުމެންގެ ދަރިން ތަރުބިއްޔަތު ކުރަން ބޭނުންވާ ގޮތްތޯއެވެ.

އަޅުގަނޑުމެންގެ މުޖުތަމަޢު ރަނގަޅު ހަމަމަގަކުން ގެންދަން ބޭނުން ކަމުގައި ވާނަމަ، އަޅުގަނޑުމެން އެންމެ ފުރަތަމަ ކުރަންޖެހޭނެ އެއް ކަމަކީ ގޫހަރިޖެހުން ހުއްޓާލުމެވެ. ދޭދޭ މީހުންގެ ދޭތެރޭގައި އޮންނަ އިތުބާރާ އެކަކު އަނެކަކަށް ކުރަންޖެހޭ ގަދަރު އޭގެ އެންމެ ރަނގަޅު ގޮތުގައި ކުރަން އާދަކުރެއްވުމަށްފަހު އަންނަ ބަދަލު ނިކަން ބައްލަވާ ލައްވާށެވެ. އަޅުގަނޑުމެންގެ ދަރިންނަށް މިކަމުގައި ހުރި ނުބައިކަން ހާމަކޮށްދީ މިކަމުން ދުރުކުރަމާ ހިންގަވާށެވެ. އަޅުގަނޑުމެންގެ ޒުވާނުންގެ ކުރިމަގު މިކަހަލަ ނޭދެވޭ ކަމަކުން މަރައިނުލާ ފަހި މަގެއް އެމީހުނަށް ކޮށައިދެމާ ހިންގަވާށެވެ.  މިކަންކަން އިސްލާޙު ކުރެވިއްޖެ ކަމުގައި ވާނަމަ އަޅުގަނޑުމެން ދެކެން ބޭނުންވާ ފަދަ މަންޒަރުތަކާއި ފަހި މުސްތަޤުބަލެއް ފެނުމަކީ ދުރުކަމެއް ނޫނެވެ.

ގޫހަރިޖެހުން (މ)

  • (ޏ.ސ.) މާނައެއްނެތް ޒުވާބުކުރުން.

ލިޔުންތެރިޔާގެ ފުރަމަލަ

ޚަދީޖަތު ސަނާ
ޚަދީޖަތު ސަނާ
މުނިއަވަސްގެ ޑެޕިއުޓީ އެޑިޓަރ ޚަދީޖަތު ސަނާ އަކީ ލޯބީގެ، އަސަރުގަދަ އަދި ހިތާމަވެރި ވާހަކަ ލިޔުމާއި ކިޔުމުގައި ފާހަގަކޮށްލެވޭ ލިޔުންތެރިއެކެވެ. އިޖްތިމާޢީ މައުޟޫތަކަށް ސައްނު ލިޔާ ކުރުވާހަކަތަކުން ބޭނުންވާ މެސެޖް ފޯރުކޮށްދެނީ ވަރަށް އަސަރާއި އެކުގައިކަން ފާހަގަކޮށްލެވެއެވެ.
މި ލިޔުންތެރިޔާގެ ބައެއް އެހެން ލިޔުންތައް

ގުޅުންހުރި ލިޔުން: