މޯލްޑިވިއަން އައިޑޮލް ސީޒަން ދޭއްގެ ދެވަނަ ހޯދި ލަވަ ކިޔުންތެރިޔާ ހަމޫދު އަހުމަދުގެ ހިލަމެއް ނުވާތާ ދުވަސްކޮޅެއްވެއްޖެއެވެ. ނަމަވެސް މިއަދު ހަމޫދުގެ ފޭސްބްކް ޕޭޖުން ފެނުނު ފޮޓޯތަކަކުން ހަމޫދު އާއި ބައްދަލުކޮށްލައި، ވާނުވާ އޮޅުންފިލުވައިލުމަށް ނިންމީމެވެ.

މޯލްޑިވިއަން އައިޑަލްގައި ބައިވެރިވުމުގެ ކުރިން، ސެލްފް ކޮންފިޑެންސް ދަށްކަމަށް ބުނި ހަމޫދަކީ މިއަދު އޭގެ އިދިކޮޅު ދައްކަމުން އަންނަ ‘ހެޕެނިން’ ޒުވާނެއްކަން އޭނާގެ ހަރަކާތްތަކުން އެނގެއެވެ. ފޭސްބްކް ހާވައިލުމުން ފެނުނީ މުޅިން ތަފާތު ދާއިރާއެއްގައިވެސް ހަމޫދު މަސައްކަތްކުރަމުން އަންނަތަނެވެ.

އިތުރު ވާހަކަތަކެއް ނުދައްކާ ހަމޫދު ބުނަނީ ކީކޭތޯ ބަލައިލަމާދޯ އެވެ.

މިދުވަސްކޮޅު ހަމޫދު ކޮން މަސައްކަތެއްގަ ތިޔަ އުޅެނީ؟

މިދުވަސްކޮޅު އިއްޔަ ރެކޯޑްސް އާއެކު ހަމޫދުގެ ސޯލޯ އަލްބަމެއްގެ މަސައްކަތް މި ކުރަނީ. އޭގަ އިންނާނެ ގާތްގަނޑަކަށް ހަޔަކަށް ވުރެން ގިނަ ލަވަ. އަލްބަމްގެ އިތުރުން އެބަ ވޯރކްކުރަން ތިން ސިންގަލްސް އަމިއްލަ ސިންގަލްސް އަށް. އަދި ޚިޔާލު އޮތީ ވީޑިއޯއާ އެކީ މި ތިން ލަވަ ނެރޭގޮތަށް. ކުރިން ނެރުނު ‘ޝައްކު’ގެ ވީޑިއޯގެ މަސައްކަތްވެސް ކުރިއަށް ދޭ.

އޭގެ އިތުރުން ދަރިވަރުންނަށް ސްކޫލް މުބާރާތްތަކަށް މަދަހަ ކޯޗްކަން ވެސް އެބަ ކޮށްދެން.

ހަމޫދުގެ ފޭސްބްކް ޕޭޖުން ދުށިން މިއަދު ހަމޫދު އަޕްލޯޑްކޮށްފަ އިން ކްލީންއަޕް އިވެންޓެއްގެ ފޮޓޯތަކެއް. އެއީ ކޮން ބަޔަކު ރާވައިގެން ކިހިނެއް ފެށުނު އިވެންޓެއް؟

މި ކްލީންއަޕަކީ އެއްވެސް ގޮތަކަށް އިވެންޓެއް ބޭއްވުމުގެ ނިޔަތުގަ ކުރިކަމެއް ނޫން. ރައްޓެހިން ތަކަކާއެކު މޫދަށް އެރިލަން ގޮސްފަ ގޮނޑުދޮށުގަ ކުނި ގިނަކަމުން ހިތަށްއެރީ ސާފުކޮށްލާފައޭ މޫދަށް އެރޭނީ. ދެން ރައްޓެއްސެއްގެ ގެއިން ސުތުލި ގޯނިތަކެއް ހިފައިގެން ގޮސް އެތަން ކުޑަކޮށް ސާފުކޮށްލީ. އެކަމަކު މިހާރު އެބަ ހިތަށް އަރާ ކޮންމެ ހަފުތާއަކަށްވެސް ކްލީންއަޕެއް ރާވަން.

އެހެންވީމަ ތިމާވެއްޓާމެދު ވިިސްނަނީތާދޯ. ކީއްވެ ތިގޮތަށް ކްލީންއަޕް ޖައްސައި ތިމާވެށި ސާފުކޮށް ރައްކާތެރިކުރުމަށް ޚިޔާލު އައީ؟

ތިމާވެއްޓާމެދު ވިސްނޭނެދޯ. ކޮންމެ މީހަކު ވެސް ވިސްނަންވެސްޖެހޭ. މިހާރު އަހަރުމެންގެ މޫދާއި ކަނޑާއި ގޮނޑުދޮށްތައްވެސް ތަޣައްޔަރުވެފަ އޮތީމާ މިކަމަށް މި ވިސްނީ. އަހަރުމެންގެ ކުނި، އަހަރުމެން ޒިންމާދާރު ނޫންގޮތަކަށް އުކާލީމަ ޖަނަވާރުންނަށާ، މަސްމަހާމެއްސަށްވެސް މީގެ ނޭދެވޭ އަސަރުކުރާތީވެ. ގުދުރަތީގޮތުން މާތްﷲ ދެއްވި ހުރިހައި ނިޢުމަތްތައް އަހަރުންނަށް ކުރެވޭ ކަންތައްތަކުން ހަލާކުވެ ފަނާވެގެން ދާތީވެ. މިއީ އެންމެންގެ ދުނިޔެ. ދެން އަންނަން އޮތް ޖީލަށް ރައްކާތެރިކޮށްދީ، އެންމެ “ދުޅަހެޔޮ ޞިއްހަތުގައި” ބެހެއްޓުމަކީ އެންމެންގެވެސް ފަރުދީ ޒިންމާއަކަށް ވާތީ.

ތި ބޭއްވި ފަދަ ކިތައް ކްލީންއަޕް ބާއްވައިފިން؟

ކުރިންވެސް ބުނިހެން މިއީ އަދި ފުރަތަމަ ކްލީންއަޕް. ވަގުތު ފުރުސަތުދޭ ވަރަކުން އިރާދަކުރެއްވިއްޔާ އަދި ބައިވަރު ކްލީންއަޕްތައް ބާއްވާނަން.

ތިފަދަ ކަމެއް ކުރާއިރު އަންނަ އެންމެ ބޮޑު ގޮންޖެހުމަކީ ކޮބާ؟

މީހުންގެ ވިސްނުން. އެއްބައި މީހުން ބުނޭ ތިމާވެއްޓާމެދު ވިސްނުމަކީ އެމީހުން ކުރަންޖެހޭ ކަމެއް ނޫނޭ. ގްލޯބަލް ވޯމިންއާ އަދި ސުނާމީ އާއި، ބިންހެލުން އަންނައިރު އެމީހުން ތިބޭނީ މިދުނިޔޭގައެއް ނޫނޭ ބުނާ މީހުންވެސް އުޅޭ. މިކަހަލަ ވިސްނުން ގެންގުޅޭ މީހުންނަށް ދޭނެ ރައްދެއް ނެތް.

ދެން އެންމެ ބޮޑު ގޮންޖެހުމަކީ އެއްފަހަރު ބޭނުންކޮށްލާފަ އެއްލައިލާ ޕްލާސްޓިކް. މި އެއްޗެހީގެ ބަދަލުގައި ބޭނުންކުރެވޭނެ އެއްޗެހި މާ އަގުބޮޑުވުމާއި، ފަސޭހައިން ކޮންމެ ފިހާރައަކުން ލިބެން ނެތުން. މި ނޫންވެސް ބައިވަރު ގޮންޖެހުންތައް އާދޭ.

ފާހަގަވެއްޖެ ތިމާވެށި ރައްކާތެރި ކުރުމޭ ބުނުމުގެ ބަދަލުގަ ތިމާވެށި ސަލާމަތްކުރުމޭ ހަމޫދު ބުނާކަން. އެއީ ކީއްވެބާ؟

އެއީ ހަމޫދު، އަދި މި ވިސްނުން ގެންގުޅޭ ހުރިހައި އެކްޓިވިސްޓުންގެ ވެސް މަގުސަދަކީ މި އޮތްގޮތަށް ތިމާވެށި، ދެން އަންނަން އޮތް ޖީލުތަކަށް ފޯރުކޮށްދިނުމެއް ނޫން. އިންސާނުންގެ ސަބަބުން ތިމާވެއްޓަށް ލިބިފައިހުރި ގެއްލުންތައް ކުޑަކޮށްނަމަވެސް ރަނގަޅުކުރުން ދެން އަންނަން އޮތް ޖީލަށްޓަކައި. ތިމާވެއްޓަށްޓަކާ އަދި އަމިއްލަ ނަފުސަށްޓަކައި.

ހަމޫދު ސާފުކުރުމުގައި – ފޮޓޯ: ހަމޫދު ފޭސްބްކް

ހަމޫދުގެ ވާހަކައިން ހީވޭ ހަމޫދު ދެކޭ ގޮތުގަ ތީ އެންވަޔަރަމެންޓަލް އެކްޓިވިސްޓެއް ކަމަށް. އެހެންވީމަ އޭގެ ނިސްބަތުގައި ހަމޫދުގެ ހަޔާތަށް ކޮންކޮން ބަދަލުތަކެއް އައިސްފިބާ؟

ހަމޫދު ނުދެކެން ހަމޫދަކީ އެންވަޔަރަމެންޓަލް އެކްޓިވިސްޓެއް ގޮތުގައެއް. އެއީ އަދި މިކަމާ ބެހޭގޮތުން އެނގެންޖެހޭ ބައިވަރު އެއްޗެހި ނޭނގޭތީ. އެކްޓިވިސްޓެއް ގޮތުގައި އަމިއްލަ ނަފުސު ދެކޭނަން ހަމޫދުގެ ހަޔާތުން އެއްކޮށް ޕްލާސްޓިކް ފްރީ ވީމަ.

އެކަމަށް ވީވަރަކުން ހަމޫދުގެ ދިރިއުޅުމަށް ބަދަލުތަކެއް އެބަ ގެންނަން. މިސާލަކަށް ޕްލާސްޓިކް ބޭނުންކުރުން މަދުކުރުމާއި، ޕްލާސްޓިކް ބޭނުންކުރަން ޖެހޭ ހާލަތްތަކުގައި އެއްޗެހި ރިޔޫސް ކުރުމާއި، ޕްލާސްޓިކްގެ ބަދަލުގައި ތިމާވެއްޓަށް ގެއްލުން ނުވާނެ ތަކެތި ވީވަރަކުން ބޭނުންކުރުން.

ތިމާވެށި ސަލާމަތްކުރަން ބޭނުންވާ މީހެއްގެ ނަޒަރުން ރާއްޖޭގައި ހަމޫދު އެންމެ ދެކެން ބޭނުންވާ ބަދަލަކީ ކޮބާ؟

މި ދުވަސްކޮޅު އެންމެ ދެކެން ބޭނުންވާ ބަދަލަކީ ރާއްޖޭގައި ކަރުދާސް ރީސައިކަލްކުރާ ތަނެއް ހުޅުވާފަ ހުރުން. އޮފީސްތަކުންނާއި، ސްކޫލްތަކުން ބޭނުންކުރާ ކަރުދާސްތައް ރީސައިކަލްކޮށް، ދެވަނަ ފަހަރަށް ބޭނުންކުރާ ކަރުދާސްތައް ވެސް ރީސައިކަލް ކުރަން. އެކަމަކު އެކަހަލަ ތަނެއް އަދި ރާއްޖޭގައި ނެތް. ހުރިކަމަށް ވިޔަސް އަދި ހަމޫދަށް އެނގިފައެއް ނެތް.

ތި ޖެއްސި ކްލީންއަޕް ހަރަކާތުން ކިހައި ކުންޏެއް ނެގުނު؟

ހަ ގޯނި ފުރާ ނެގުނު. ހަ ގޯނި ގެނެސްދިނީވެސް. ދެން ފަހަރަކުން ކްލީންއަޕަކަށް ދާއިރު ތަންކޮޅެއް ގިނައިން ގެންދާނަން. އަދި އަންގިވެސް ގެންދާނަން. މޫދަށް ދާން އަސްލު ދިޔައީ، އެހެންވެ އެހާ ބޮޑަށް މިކަމަށް ތައްޔާރުވެގެނެއް ނޫން ހުރީކީ. ދެން ދާފަހަރަކު ތަންކޮޅެއް ގިނަ ރައްޓެހިންނާއެކު މިއަށްވުރެ ބޮޑަށް ތައްޔާރުވެގެން ދާނީ.

ނިންމާލަމުން ބުނެލަން ބޭނުންވާ އެއްޗެއް އެބައޮތްތަ؟

އިއްޔަ އަށާއި، މުބާހް އަށް ވަރަށް ބޮޑަށް ޝުކުރުއަދާކުރަން ބޭނުން މިކަމުގަ އެއްބާރުލުން ދިނީތީ.

ހަމޫދު އާއި އޭނާގެ އެކުވެރިންކޮޅެއް މި ހިންގިފަދަ ހަރަކާތަކީ އަހަރުމެން ހަމަ ކޮންމެ މީހަކަށް ވެސް ކުރެވިދާނެ ވަރަށް ކުޑަކަކުޑަ ކަމެކެވެ. ނަމަވެސް މިހެން ކޮށްލެވޭ ކުޑަކުޑަ ކަމަކުންވެސް ތިމާވެއްޓަށް އެ ކޮށްދެވެނީ ވަރަށް ބޮޑު ކަމެކެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
މުނިއަވަސް ގެ ފައުންޑަރ އަދި އެޑިޓަރ

ގުޅުންހުރި ލިޔުން: