| MUNIAVAS

އެއްވެސް މާއްދީ މުއްސަނދި ކަމަކަށްވުރެ ދަތުރުފަތުރުން ލިބޭ އުފާ ބޮޑުކަމަށް ދާދިފަހުން ސައިންޓިސްޓުން ހޯދި ހޯދުމަކުން ދައްކައިފިއެވެ. މާއްދީ މުއްސަނދިކަމުން ލިބެނީ ވަގުތީ އުފަލެކެވެ. އައު އެއްޗެއް ގަންނަތާ މަދު ދުވަސްކޮޅެއްގެ ތެރޭގައި އެއިން ލިބޭ އުފާވެރިކަން ފަނޑުވެދެއެވެ.

އައު އެއްޗެއް ގަނެގެން ދުވަސްކޮޅެއް ވާއިރަށް އޭގެމަތިން ފޫހިވެ، އަނެއްކާވެސް އެހެން އެއްޗެއް ގަންނަ ހިތް ޖެހެއެވެ. މިކަން މިގޮތަށް ތަކުރާރު ވޭވޭ ހުރެއެވެ.

މިކަހަލަ ކަންކަމަށް ދެވިހިފުމުގެ ސަބަބަކީ އުފާވެރިކަން ގަނެވޭތޯ އުޅުމެވެ. ދިރިއުޅުން ފަސޭހަވާނޭ ގޮތްގޮތް ފައިސާއިން ހޯދެއެވެ. އެކަންކަމުން ލިބެނީ ވަގުތީ ހިތްހަމަޖެހުމެކެވެ.

ކޯނެލް ޔުނިވަރސިޓީގެ ސައިކޮލޮޖީ ޕްރޮފެސަރެއް ކަމަށްވާ ގިލޮވިޗް ހާމަކުރާ ގޮތުގައި އެއްޗެއް ގަނެގެން ލިބޭ އުފަލަށްވުރެ ބޮޑު އުފަލެއް ދަތުރުކޮށްގެން ލިބެއެވެ. މީގެ އެންމެ މުހިންމު ކަމަކީ މިއެވެ. އެއްޗެއް ގަނެގެން ލިބޭ އުފާ ދުވަސްވީވަރަކަށް ފަނޑުވަމުން ދެއެވެ. ނަމަވެސް ދަތުރު ތަކުން ލިބޭއުފާ ގިނަދުވަހު ދެމިހުރެއެވެ. މިހެންވަނީ ދަތުރުކޮށްގެން ލިބޭ އުފަލުގެ ހޯމޯން ގިނަދުވަހަށް ދެމިހުންނާތީއެވެ.

ގިލޮވިޗް ބުނެދޭ ގޮތުގައި ވެށްޓަށް ހޭނުމަކީ “އުފާވެރިކަމުގެ ދުޝްމަނެވެ.” އުފާވެރިކަން ލިބިދޭ އެއްޗެހި ގަތުމުން އޭގެ ކާމިޔާބީ އޮންނަނީ ކުޑަ ވަގުތު ކޮޅަކަށެވެ. އެއަށްފަހު އެއަށް ހޭނެނީއެވެ. ވީމާ ދެމެހެއްޓެނިވި އުފާވެރިކަމަކީ ތަޖުރިބާއިން ލިބޭ އެއްޗެކެވެ. އައު އެއްޗެއް ނުވަތަ އޮރިޖިނަލް އެއްޗެއް ނުވަތަ އާދަޔާ ޚިލާފު އެއްޗެއް ގަނެގެން ލިބޭ އުފަލުގައި، އުފާވެރިކަން ދަމަހައްޓާނެ އެންމެ މުހިންމު ސަބަބު މަދުވެއެވެ.

ޑރ. ގިލޮވިޗް ބުނާގޮތުން މާއްދީ މުދަލަކުން ލިބޭ އުފަލަށްވުރެ އަމިއްލަ ތަޖުރިބާއިން ލިބޭ އުފާވެރިކަން ބޮޑެވެ. ގަނެގެން ގެނެސްފައިވާ ތަކެއްޗަކީ ތިމާއާ ގުޅިފައިވާ ތަކެތިކަމަށް ހީކުރެވޭ ވަރަކަށް އެތަކެއްޗާ ރުހެވެއެވެ. ނަމަވެސް ތަޖުރިބާއަކީ އެއަށްވުރެ ބޮޑަށް ތިމާއާ ގުޅިލާމެހިފައިވާ، ތިމާގެ އައިޑެންޓިޓީއެވެ.

އެންމެ މުއްސަނދި، އެންމެ ދަމަހައްޓަން ބޭނުންވާ ހަނދާންތަކަކީ މާއްދީ މުދަލުން ލިބޭނެ އެއްޗެއް ނޫނެވެ. އުފާލިބޭނީ ތިމާގެ ދިރިއުޅުމުގެ ތަޖުރިބާއިންނެވެ.

ދަތުރު ކުރުމުން އައު ސަގާފަތްތަކާއި ތަންތަން ދަސްވެއެވެ. އެފަދަ ވެއްޓެއްގައި ތިމާގެ ވަށައިގެންވާ ކަންކަމާއި ތަކެތިން އުފާވެރިކަން ލިބެއެވެ. ސިކުނޑިއަށް އައު މައުލޫމާތުތަކެއް ނަގައިގަނެވެއެވެ. މިފަދަ ތަންތަނުން ލިބޭ އުފާވެރިކަން ހަނދާނުން ފިލައިނުގޮސް ހުރެއެވެ.

ހާވާޑް ޔުނިވަރސިޓީގައި 80 އަހަރުގެ ތަޖުރިބާހުރި ރޮބަރޓް ވަލްޑިންގަރ އުފާވެރިކަމާބެހޭ ގިނަ ދިރާސާތަކެއް ކޮށްފައި ވެއެވެ. އޭނާ ބުނާގޮތުން އެންމެ އުފާވެރި، ސިއްހަތު ރަނގަޅު ދިރިއުޅުމެއް އުޅެނީ އާއިލާއާއި ރައްޓެހިންނާއި ޖަމާއަތުގެ ގުޅުން ދަމަހައްޓާ މީހުންނެވެ.

މި ދިރާސާގެ އަލީގައި، ވަލްޑިންގަރ ބުނަނީ ދިރިއުޅުމުގައި ތިމާއާ އެކީ އުޅޭ މީހުންނާއެކީ އައު ކަންކަން ކުރުމަށާއި އެމީހުންނާމެދު އޮންނަ ގުޅުން ބަދަހިކުރުމަށެވެ. އޭނާވެސް ބުނާގޮތުން މާއްދީ މުދަލުން ނުލިބޭ އުފާވެރިކަން، ގާތް މީހުންނާއެކު ކުރެވޭ ތަޖުރިބާތަކުން ލިބެއެވެ. އޭނާއަށް އެންމެ މުހިންމީ ދަތުރުތަކުން ލިބޭ ތަޖުރިބާއެވެ. ދަތުރުފަތުރުގެ ސަބަބުން އޭނާ އާއިލާއާ ގާތް ކުރުވައެވެ.

ދިގު މުއްދަތުގެ އުފާވެރިކަމަށް ކުރެވިދާނެ އެހެން ކަންކަމަކީ ކުޅިވަރު ތަކުގައި ބައިވެރިވުމާއި އައު ހުނަރުތައް ދަސްކުރުމާއި އާދަޔާޚިލާފު އިވެންޓް ތަކުގައި ބައިވެރިވެ އެކަންކަމުން އުފާ ހޯދުމެވެ. އައު ކާރެއް ނުވަތަ އެފަދަ އެހެން އެއްޗެއް ގަނެގެން ދުވަސްކޮޅަކުން އެ އާދައިގެ އެއްޗަކަށްވެ، ބާވެ ނުވަތަ ޒަމާނާ ނުގުޅޭ އެއްޗަކަށް ވެދެއެވެ. ނަމަވެސް އުފާވެރި ހަނދާންތަކަކީ ބަދަލެއްނައިސް މުޅި އުމުރަށް ހުންނާނެ އެއްޗެކެވެ.

ވީމާ ދާއޮހޮރައިގެން ތިޔަ ހޯދާ އަގުހުރި ފައިސާ ތަޖުރިބާތަކަށް ހޭދަކޮށްލާށެވެ. އޭރުން އެ އިންވެސްޓް ކުރެވެނީ ދިގު މުއްދަތެއްގެ އުފާވެރިކަމާއި ހިތްހަމަޖެހުމަށެވެ.