• މިއަދަކީ ދުނިޔޭގެ ޕޯސްޓް ދުވަސް، ރާއްޖޭގައި ޕޯސްޓް އޮފީހެއް ހުޅުވިތާމިއަދަށް މިވީ 113 އަހަރު

މިއަދަކީ ބައިނަލްއަޤްވާމީ ގޮތުން ފާހަގަ ކުރާ ޕޯސްޓްގެ ދުވަހެވެ. ދުނިޔޭގައި ފުރަތަމަ ފަހަރަށް ޕޯސްޓްގެ ދުވަހެއް ފާހަގަ ކޮށްފައިވަނީ 1969ވަނަ އަހަރު ޔުނިވާސަލް ޕޯސްޓް ޔޫނިއަންއިން ޓޯކިޔޯގައި ބޭއްވި ކޮންފަރެއްސެއްގައެވެ. އޭގެފަހުން ކޮންމެ އަހަރެއްގެވެސް އޮކްޓޯބަރު މަހުގެ 9ވަނަ ދުވަސް ދުނިޔޭގެ ޕޯސްޓްގެ ދުވަހުގެ ގޮތުގައި ފާހަގަ ކުރެވެއެވެ.

ފުރަތަމަ ފަހަރަށް ރާއްޖޭގައި ޕޯސްޓް އޮފީހެއް ހުޅުވާފައި ވަނީ 1906ވަނަ އަހަރުގެ ސެޕްޓެމްބަރ މަހުގެ 9ވަނަ ދުވަހުއެވެ. ރާއްޖޭގައި ރަސްމީ ގޮތުން ޕޯސްޓް އޮފީހެއް ހުޅުވުމުގެ ކުރިންވެސް ޕޯސްޓްގެ ޚިދުމަތް ވަނީ ބޭނުން ކުރަން ފަށާފައިވެއެވެ. ޕޯސްޓް އޮފީހެއް ހުޅުވައި ރަސްމީކޮށް  މި ޚިދުމަތް ފަށާފައިވަނީ ދިވެހިރާއްޖެ އާއި ސްރީލަންކާ އާ ދެމެދު ޕޯސްޓް މެދުވެރިކޮށް ސިޓީ ބިޓީ ބަދަލު ކުރެވޭނެ ނިޒާމެއް ޤާއިމް ކުރުމަކީ ވަރަށް މުހިއްމު ކަމެއްގެ ގޮތުގައި އޭރުގެ ސަރުކާރަށް ފެނިގެންނެވެ. 

ފުރަތަމަ ފަހަރަށް ރާއްޖޭގައި ޕޯސްޓްގެ ޚިދުމަތް ބޭނުންކުރީ “ފަނަރަ ސެންޓް ސްޓޭމްޕް”ގެ މަތީގައި އިނގިރޭސި އަކުރުން “މޯލްޑިވް” ޖަހައިގެންނެވެ. ރާއްޖެއިން ފުރަތަމަ ފަހަރަށް ސްޓޭމްޕެއް ތަޢާރަފް ކޮށްފައިވަނީ މުންނާރުގެ ފޮޓޯއެއް ޖަހައިގެންނެވެ. އެއީ 1909ވަނަ އަހަރުގައެވެ.

1906ވަނަ އަހަރު ޕޯސްޓްގެ ޚިދުމަތް ފެށުނު ފަހުން މިއަދާ ހަމައަށްވެސް ރާއްޖޭގެ މުވާސަލާތުގެ އަސާސީ ވަސީލަތެއްގެ ގޮތުގައި މި ޚިދުމަތުގެ ބޭނުން ކުރަމުންދެއެވެ. ދިވެހި ރާއްޖެއަށް ސިޔާސީ މިނިވަން ކަން ލިބުނުތާ ގާތްގަނޑަކަށް ދެއަހަރެއްހާ ދުވަހުގެ ތެރޭގައި ރާއްޖެ ވަނީ ބައިނަލްޢަޤްވާމީ ޕޯސްޓްގެ ޖަމިއްޔާއެއް ކަމަށްވާ ޔުނިވާސަލް ޕޯސްޓަލް ޔޫނިއަން (ޔޫ.ޕީ.ޔޫ)ގެ މެމްބަރަކަށް ވެފައެވެ.

ޕޯސްޓްގެ ނިޒާމް ހަރުދަނާކޮށް އިތުރަށް ފުރިހަމަ ކުރުމަށްޓަކައި 1994 ވަނަ އަހަރު ވަނީ ޕޯސްޓަލް ޑިޕާޓްމެންޓް ސަރުކާރުގެ ކުންފުންޏަކަށް ބަދަލުކޮށް ވިޔަފާރި އުސޫލުން ދޭ ގޮތަށް ހަމަޖައްސާފައެވެ. މީގެ އިތުރުން ސަރުކާރުގެ އިދާރީ އޮނިގަނޑުގެ ތެރެއިން ޚިދުމަތް ހޯދާ ފަރާތްތަކަށް ލުއިފަސޭހަ ކޮށްދިނުމުގެެ ގޮތުން އަތޮޅު ތެރެއަށް ދެމުން އައި ޚިދުމަތް ރަށްރަށުގައި އޭޖެންސީތައް ޤާއިމް ކުރެވި ޚިދުމަތް ދޭން ފެށުނެވެ.

މީގެ އިތުރުން ޚިދުމަތުގެ ފެންވަރު ރަނގަޅުކޮށް ޚިދުމަތް ފުޅާ ކުރުމަށް ވަނީ ގިނަގުނަ މަސައްކަތް ތަކެއް ކުރެވިފައެވެ. އެގޮތުން ޕޯސްޓް މެދުވެރިކޮށް ފައިސާ ފޮނުވުމުގެ ޚިދުމަތާއި އިންޓަނޭޝަނަލް އެކްސްޕްރެސް މެއިލްގެ ޚިދުމަތް ފާހަގަ ކޮށްލެވެއެވެ.

ޒަމާނީ ވަސީލަތްތަކުގެ އަލީގައި ޕޯސްޓްގެ ހިދުމަތް ދިނުމަށް އެކި އައުޓްލެޓްތައް ވަނީ ހަދާފައެވެ. މިނޫންވެސް އެތައް ޚިދުމަތްތަކެއް ވަނީ ތަޢާރަފް ކޮށްފައެވެ. މީގެ ތެރެއިން 2015 ވަނަ އަހަރު ވަނީ އީ-ޓުކުރީގެ ނަމުގައި މޯލްޑިވްސް ޕޯސްޓާއި ސިންގަޕޯރ ޕޯސްޓް ގުޅިގެން އީ-ކޮމާސް ޕޯޓަލްއެއް ތަޢާރަފް ކުރެވި ޚިދުމަތް ދޭން ފަށާފައެވެ. މި ޕޯޓަލް މެދުވެރިކޮށް 250،000 ހަށްވުރެ ގިނަ އޮންލައިން ވިޔަފާރި ތަކުން ވިޔަފާރި ކުރުމުގެ ފުރުސަތު ވެސް ވަނީ ފަހިވެގެން ގޮސްފައެވެ.

މި ޚިދުމަތް އިތުރަށް ފުޅާ ކުރުުމުގެ ގޮތުން ރާއްޖޭގައި އުފައްދާ ތަކެތި ބައިނަލްއަޤުވާމީ ޕޯސްޓްގެ ވިއުގައިގެ ތެރެއިން ލިބޭނެ ޕްލެޓްފޯމެއްވެސް ތަޢާރަފް ކުރުމުގެ މަސައްކަތް ދަނީ ކުރެވެމުންނެވެ. މި ޕްލެޓްފޯމްގެ ތެރެއިން އެކި ރަށްރަށަށްވެސް ތަކެތި ފޮނުވޭނެ ނިޒާމެއް ހަމަޖެހިގެން ދާނެ ކަމަށް މޯލްޑިވްސް ޕޯސްޓުން ބުނެއެވެ. މީގެ އިތުރުން ޕޯސްޓްގެ ޚިދުމަތް ހޯދާ ފަރާތްތަކަށް އަވަސް ޚިދުމަތެއް ފޯރުކޮށް ދިނުމަށްޓަކައި ކައުންޓަރ ޑެލިވަރީގެ ނިޒާމެއް ގާއިމް ކުރެވި އޮންލައިން ކިއު މެނޭޖްމަންޓް ސިސްޓަމެއްވެސް ވަނީ ގާއިމް ކުރެވިފައެވެ. އަދި ކަސްޓަމަރުންނަށް އެސް.އެމް.އެސް މެދުވެރިކޮށް ޕޯސްޓްގެ މައުލޫމާތު ލިބުމާއި މެދުނުކެނޑި 24 ގަޑިއިރު ޚިދުމަތް ދިނުމަށްޓަކައި ޕިކް ޕޯސްޓުގެ ނަމުގައި މާލެ އާއި ހުޅުމާލޭގެ އެކި ސަރަހައްދު ތަކުގައި ޑެލިވަރީ ސްޓޭޝަން ތަކެއްވެސް ވަނީ ގާއިމް ކޮށް ޚިދުމަތް ދޭން ފަށާފައެވެ. 

އަދި މީގެ އިތުރުން ކަސްޓަމަރުންނަށް ދެވޭ ޚިދުމަތް އަވަސްކުރުމަށް ޓަކައި އީ ކޮމާސް މެދުވެރިކޮށް ލިބެމުން އަންނަ މެއިލްތައް ހަލުވި ކަމާއެކު ކަސްޓަމަރުންނަށް ފޯރުކޮށް ދިނުމަށްޓަކައި އެކަމަށް ޚާއްޞަ ސޮފްޓްވެއަރ އެއް ހެދި ޚިދުމަތް ދޭން މިހާރު ފަށާފައި ވާއިރު ޕޯސްޓް މެދުވެރިކޮށް އަންނަ ތަކެތި އަވަހަށް ކަސްޓަމުން ކްލިއަރ ކުރުމަށްޓަކައި ކަސްޓަމްސް ޑިކްލަރޭޝަން ފޯމެއްވެސް ތައާރަފް ކޮށް މިހާރު ވަނީ ޚިދުމަތް ދޭން ފަށާފައެވެ.

މިއަދު ދިވެހި ރާއްޖޭގެ ޕޯސްޓްގެ ޚިދުމަތަށް 113 އަހަރު ފުރުން ފާހަގަކުރަމުން ދާއިރު ރާއްޖެ ވަނީ މި ރޮނގުން ގިނަގުނަ ކާމިޔާބީ ތަކާއި ކުރިއެރުންތައް ހޯދާފައެވެ.

ލިޔުންތެރިޔާގެ ފުރަމަލަ

މަރިޔަމް ޝައިލާ
ފިލްމީ ޚަބަރު ލިޔުމަކީ ޝައިލާގެ ޚާއްޞަ ހުނަރެކެވެ. ބޮލީވުޑްގެ ޚަބަރުތައް ލިޔުމަކީ ޝައިލާގެ ޚާއްޞަ ދާއިރާއެވެ.

ގުޅުންހުރި ލިޔުން: