| MUNIAVAS

ހަށިގަނޑުގެ ބަރުދަން ލުއިކޮށްލަން ވަގުތު ބޭނުންވެއެވެ. އިރު އޮއްސިފައި އިރު އަރާއިރަކަށް މިކަމެއް ނުވާނެއެވެ. އެނގޭނެ ފަދައިން ބަރުދަން ލުއިކުރަން ދުވަސްތަކެއް ހޭދަ ވާނެއެވެ. ފަސޭހަ، ކަށަވަރު ގޮތަކަށް ހަށިގަނޑު ލުއިކޮށްލަން ބޭނުންނަމަ މި ލިޔުމުގައި ވާގޮތަށް ކަންތައް ކުރާށެވެ.

ދިރާސާ ތަކުން ދައްކާގޮތުގައި ހިތްދަތި ވާފަދަ ހިތާމަވެރި ފިލްމެއް ބަލައިލުމަކީ ބަރުދަން ލުއިވާނޭ ކަމެކެވެ. އެއީ އަސަރާއެކު ރޮއިލުމަކީ ބަރުދަން ލުއިވާ ކަމަކަށް ވާތީއެވެ. މިހެންވަނީ މިގޮތަށް ރޮއިލުމަކީ ބަރުދަން ލުއިކޮށްދޭ ހޯމޯނަކާ ގުޅިފައިވާ ކަމެއް ކަމުގައި ވާތީއެވެ. މި ހޯމޯންގެ ސަބަބުން ކޯޓިސޯލްގެ މިންވަރު މައްޗަށް ދެއެވެ. ކޯރޓިސޯލް އަކީ ކަންބޮޑުވުމުގެ ހާލަތް ތަކުގައި އެޑްރީނަލް ގްލޭންޑް ތަކުން އުފައްދާ ހޯމޯނެކެވެ. މިއީ ހަށިގަނޑަށް ކޮންމެވެސް ފައިދާތަކެއް ކޮށްދޭ ހޯމޯނެއް ކަމުގައި ވިޔަސް ކޯރޓިސޯލްގެ މިންވަރު ގިނަވެފައި މާގިނަދުވަހު ހުންނަގޮތް ވެއްޖެނަމަ އެއިންލިބޭ ފައިދާއަށްވުރެ ގެއްލުން ބޮޑެވެ.

މި ހޯމޯން އުފެދެނީ ޖަމާވެފައިވާ ހިތާމައިގެ އުދާސްތައް ރޮއިގެން ބޭރުކޮށްލެވޭ ވަގުތުއެވެ.

ބައޯކެމިސްޓެއް ކަމަށްވާ ވިލިއަމް ފްރޭ އަށް ހޯދިފައިވާ ގޮތުގައި ހަށިގަނޑުގައި އުފެދޭ ތަފާތު ވައްތަރެއްގެ ވިހަ، އުދާސް އެކުލެވޭ ކަރުނައިގެ އެހީގައި ބޭރުކޮށްދެއެވެ. މީހުންނަށް ދިމާވާ ކަންބޮޑުވުމުގެ ހާލަތުގައި ކަރުނައިގެ ސިފައިގައި މި މާއްދާތައް ހަށިގަނޑުން ބޭރުވަނީއެވެ.

ކޯރޓިސޯލްގެ މިންވަރު ހަމަހަމަވެ، ކަންބޮޑުވުން އުފައްދާ ހޯމޯންތައް ކަރުނައިގެ ގޮތުގައި ބޭރުވާތީ ހަށިގަނޑަށް ސަރުބީ ބަލައިނުގަންނަނީ އެވެ. ނަމަވެސް ދިރާސާތަކުން ދައްކަނީ މިގޮތަށް ސަރުބީ ބަލައިނުގަންނަނީ ހަމައެކަނި ކަންބޮޑުވުމުގެ ހޯމޯނުން އެކަނި ކަމެވެ. އެހެން ސަބަބުތަކާހެދި ރޯރުއިމުން، ހަށިގަނޑުގެ ސަރުބީ އުނިވުމަށް އެހީތެރިއެއް ނުވެއެވެ.

އިންސާނަކު 3 ވައްތަރެއްގެ ކަރުނަ އޮހޮރައެވެ.

އަސާސީ ކަރުނަ: މިއީ އެންމެ އަސާސީ ބޭނުންތަކަށް އުފެދޭ ކަރުނައެވެ. މިއިން ލޯ ހިކުނަނުދީ ތެތްކޮށް ބަހައްޓައިދެއެވެ.

ރިފްލެކްސް ކަރުނަ: މިއީ ލޯ ކަރާކަމެއް ދިމާވުމުން އުފެދޭ ކަރުނައެވެ. ލޮލަށް ކުނިކޮޅެއް ވެއްޓުން، ދުމުގެ ސަބަބުން، ގަދަ ވައިގެ ސަބަބުން، ނުވަތަ ފިޔާ ކޮށާއިރު އަރާ ދިލައިގެ ސަބަބުން އުފެދޭ ކަރުނައެވެ.

ސައިޗިކް ކަރުނަ: މިއީ ހިތަށް ކުރާ އަސަރަކުން އުފެދޭ ކަރުނައެވެ. ހިތާމައިގެ އުދާސްތަކުންނާއި އުފާވެރި ކަމުންވެސް މި ކަރުނަ އުފެދެއެވެ. ކޯރޓިސޯލް ހޯމޯން އެންމެ ގިނައީ މީގެ ކަރުނައިގައެވެ. ވީމާ، ހަށިގަނޑު ލުއިކުރުމަށް އެހީވެދޭ ހަމައެކަނި ކަރުނައަކީ ސައިޗިކް ކަރުނައެވެ.

ހޯދުންތަކުން ދެއްކިގޮތުގައި މީގެ އަސަރު އެންމެ ބޮޑަށް ކުރަނީ ރޭގަނޑު 7އާ 10އާ ދެމެދު ރޯ ރުއިމުންނެވެ.

އެއްވެސް މީހަކު ހަމަ ހުރެލާފައި ރޯކަށް ބޭނުމެއް ނުވާނެއެވެ. ނަމަވެސް ރުއިމުން އެތައް ފައިދާއެއް ލިބޭކަން ދިރާސާތަކުން އެނގެއެވެ. ވީމާ ހިތާމަވެރި ފިލްމެއް ބަލައިގެން ނުވަތަ ދިމާވެފައިވާ ހިތާމަވެރި ހާދިސާއެއް ހިތަށް ގެނެސް މިގަޑީގައި ރޮއިލައިގެން ތިޔަ ބޭނުންވާ ލޫޅާފަތި ބައްޓަން ހަށިގަނޑަށް ގެނެވިދާނެއެވެ.