މުނިއަވަސް ގެ ކިޔުންތެރިންނަށް ‘ޒާނާ’ އަކީ ކާކުކަން ނޭނގުނަސް ހަމަ ގައިމުވެސް ޒާނާ އަކީ ހުނަރުވެރި އުއްމީދީ ވާހަކަ ލިޔުންތެރިއެއްކަން އެނގޭނެ އެވެ. ޒާނާ ގެ ހިނގާ ގަލަމުން ލިޔަމުން އަންނަ ވާހަކަ ‘މާފުކުރާށޭ ކަލާ’ ގެ ހަމަ ކޮންމެ އެޕިސޯޑަކުން އަންނަނީ ކިޔުންތެރިންނަށް ސަޕްރައިޒް ތަކެއް ދެމުންނެވެ. ކުރިއަށް އޮންނަ އެޕިސޯޑަށް އިންތިޒާރު ކުރުމަށް މަޖުބޫރު ވާ ފަދަ މޮޅު ހުނަރަކާއި އެކު ކޮންމެ އެޕިސޯޑެއް ނިންމައިލުމަކީ ޒާނާ ގެންގުޅޭ ވަރަށް ތަފާތު ކަމެކެވެ.

ޒާނާ ނުވަތަ ފުރިހަމަ ނަމުން ނަމަ އާމިނަތު ފަރުޒާނާ އަކީ ލ. މާމެންދޫ އަށް އުފަން ޒުވާނެކެވެ. ޒަވާޖީ ޙަޔާތެއް ފަށައި އުފާވެރި ދިރިއުޅުމެއް އުޅެމުން އަންނަ މަންމަ އެކެވެ. މިނިވަން ޚިޔާލެއް ގެންގުޅުނަސް ފިރިމީހާ އަށް ފުރިހަމައަށް އިޙްތިރާމު ކުރާ ކިޔަމަންތެރި އަންބެކެވެ.

ޒާނާ ތަޢުލީމު ޙާޞިލް ކުރީ މާމެންދޫ ސްކޫލުންނާއި ލ. އަތޮޅު ތަޢުލީމީ މަރުކަޒުންނެވެ. ސައިންސް ސްޓްރީމު ހެދުމަށްފަހު ޒާނާ ނާރސިންގ ކޯސް ހެދިނަމަވެސް ވަޒީފާ އަދާކުރީ މޯލްޑިވިއަން ގެ އެޑްމިން ކޯޑިނޭޓަރ އެއްގެ މަޤާމުގައެވެ. މީގެ އިތުރުން އުރީދޫ އަދި ދިރާގު ގައިވެސް ޒާނާ މަސައްކަތް ކުރިއެވެ. ނަމަވެސް މިވަގުތު ޒާނާ ގެ ހުރިހައި ވަގުތެއް ހުސްކޮށްފައިވަނީ އުމުރުން ތިން އަހަރުގެ އަންހެން ދަރިފުޅަށެވެ.

ވާހަކަ ކިޔުމަކީ ޒާނާ އަބަދުވެސް ކުރަމުން އަންނަ ކަމެކެވެ. އިނގިރޭސި ވާހަކައިގެ އިތުރުން ޒާނާ ގެ މަންމަ ކިޔަން ހޯދާ ދިވެހި ލޯބީގެ ވާހަކަތައް ވަރަށް ޅަ އުމުރުގައި ކިޔަން ފެށީ މަންމަ އަށް ސިއްރުން މަންމަ ގެންނަ ފޮތްތަކުންނެވެ.

ވާހަކަ ލިޔުމަށް ޒާނާ ނިކުތީ 2009 ވަނަ އަހަރު އަޅުގަނޑުގެ އެޑިޓޯރިއަލް ގެ ދަށުގައި ރެޖިސްޓްރީ ކޮށް ހިންގަން ފެށި ލާމުއެޓޯލް ޑޮޓް ކޮމް އިންނެވެ. އޭރު ޒާނާ ލިޔުނު ވާހަކަ އަކީވެސް ވަރަށް ހިޓް ވާހަކަ އެކެވެ. އޭގެ ފަހުންވެސް ބައެއް އޮންލައިން ތަކަށް ވާހަކަ ލިޔުމުގެ ފުރުޞަތު ތައް ލިބެމުން ދިޔަނަމަވެސް ޒާނާ ގެ ދިރިއުޅުމުގެ ކަންކަން އޭރު ހުރި ގޮތުން އެ ފުރުޞަތުތައް ބޭނުން ނުކޮށް ދޫކޮށްލިއެވެ. 2017 ވަނަ އަހަރު ޒާނާ އަށް މުނިއަވަސް ގައި ލިޔުމުގެ ފުރުޞަތު އެބައޮތް ކަމަށް ބުނުމުން ޒާނާ އަނެއްކާވެސް ވާހަކަ ލިޔުމައިގެން ކުރިއަށް ދިއުމަށް ނިންމި އެވެ. އެގޮތުން ޒާނާ ބޭނުންވީ ފެންވަރު ރަނގަޅު، މޮޅު ވާހަކައެއް ލިޔުމަށެވެ.

‘މާފުކުރާށޭ ކަލާ’ ގެ ފުރަތަމަ އެޕިސޯޑް ކިޔުމަށްފަހު ކިޔުންތެރިންގެ ފަރާތުން ލިބެންފެށި ތަރުހީބަކީ ޒާނާ އަށް މިކަމުގައި ކުރިއަށް ދިއުމަށް ލިބުނު އެއްމެ ބޮޑު އެއް ހިތްވަރެވެ. މީގެ އިތުރުން ޒާނާ ގެ ފިރިމީހާގެ ރުހުމާއި އެއްބާރުލުން ލިބުން ވެގެން ދިޔައީ ވާހަކަ ލިޔުމުގައި ކުރިއަށްދާން ލިބުނު އިތުރު ބާރަކަށެވެ. ޒާނާ ގެ މި ވާހަކަ ގެނެސްދިނުމުގައި މުނިއަވަސް އަށް އެއްމެ ފާހަގަ ކޮށްލެވުނު އެއް ކަމަކީ ކޮންމެ އެޕިސޯޑެއްގެ ދިގުމިނެވެ. އެއްމެ ހަތަރު ވަރަކަށް ޞަފްޙާގެ އެޕިސޯޑެއް ލިޔެ ގެނެސްދޭކަށް ޒާނާ ބޭނުމެއް ނުވިއެވެ. ހަފުތާ އަކު އެއްމެ ދުވަހަކު ވާހަކަ ގެނެސްދޭކަށްވެސް ބޭނުމެއް ނުވިއެވެ. ޒާނާ ބޭނުންވީ މަދުވެގެން އަށް ޞަފްޙާ ހިމެނޭ އެޕިސޯޑެއް ހަމަ ކޮންމެ ދުވަހަކުވެސް ގެނެސްދޭށެވެ. އެގޮތުން މަދު ހަފުތާއެއްގައި މެނުވީ ހަމަ ކޮންމެ ދުވަހަކުވެސް ޒާނާ އަންނަނީ އެޕިސޯޑެއް ލިޔެ ގެނެސްދެމުންނެވެ. މީގެ އިތުރުން ޒާނާ ގެ މި ވާހަކައިގެ އެއް ކެރެކްޓަރ ‘ނުހާ’ ގެ ގޮތުގައި ކަވަރ ފޮޓޯގައި ހިމަނަމުން އަންނަނީވެސް ޒާނާ ގެ ފޮޓޯ އެކެވެ.

ޒާނާ ގެ ‘މާފުކުރާށޭ ކަލާ’ އާއި ބެހޭ ގޮތުން ވަރަށް ބޮޑު ސިއްރެއްވެސް ކިޔުންތެރިންނަށް ހާމަކޮށްލާނަމެވެ. ހައިރާން ވުން އެކަށީގެންވާފަދަ ސިއްރެކެވެ. އެނގޭ ހެއްޔެވެ؟ ޒާނާ މި ވާހަކަ ޓައިޕްކޮށް ލިޔަމުން އެ އަންނަނީ އޭނާގެ އައިފޯނުން ނެވެ. އެއްވެސް ވަރަކަށް ކޮމްޕިއުޓަރެއް ނުވަތަ ލެޕްޓޮޕެއް ބޭނުން ނުކޮށެވެ. ކޮންމެ އެޕިސޯޑެއް ލިޔެ ނިންމުމަށްފަހު ކުށްފިލުވުމަށް ‘މެސެންޖާ’ މެދުވެރިކޮށް ފޮނުވުމުން މުނިއަވަސް އިން ކުށްފިލުވަމުން ޝާއިޢު ކުރަމުން ގެންދަނީ އެވެ. ޒާނާ ގެ ލިޔުންތެރިކަމުގައި ފިލުވާނެ މާ ބޮޑު ކުށްތަކެއްވެސް ނުހުރެއެވެ. ހުންނަނީ ވަރަށް އާދައިގެ ކުދިކުދި މައްސަލަތަކެކެވެ. އެ މައްސަލަތައް އެނގެން ޒާނާ ބޭނުންވެއެވެ. އިތުރަށް އެކަންކަން ތަކުރާރު ވިޔަނުދިނުމަށް މަސައްކަތް ކުރެއެވެ.

ދެން އޮތީ ޒާނާ މިހާރު ލިޔުމަށް ތައްޔާރު ވަމުން އަންނަ ‘ލޯބި ވެވުނީ އެވެ.’ ގެ ވާހަކަ އެވެ. ޒާނާ ބުނީ މިއީ ލޯބީގެ ބިރުވެރި ވާހަކައެއް ކަމަށެވެ. ބިރުވެރި ވާހަކަ ތަކުގައި އާއްމުކޮށް ނަންތައް ހުންނަ ގޮތާއި ތަފާތުކޮށް، ތަންކޮޅެއް ރޮމޭންޓިކް އިހްސާސެއް ގެނެސްދޭފަދަ ނަމެއް ވާހަކައަށް ދިނީވެސް ތަފާތު ކޮށްލުމަށެވެ. ވާހަކަވެސް ތަފާތު ގޮތަކަށް ލިޔުމަށް މަސައްކަތް ކުރުމަށް ނިންމާފައި ވާކަމަށްވެސް ޒާނާ ބުނެއެވެ.

ވާހަކައިގެ ވަރަށް ކުރު ޚުލާޞާ އަކަށް ދާނަމަ ބުނެވޭނީ މިއީ އިންސާނުންނާއި ލާއިންސާނީ މަޚްލޫޤަކާއި ދެމުގައި ހިނގާ ތިނެސްކަން ލޯބީގެ ބިރުވެރި ވާހަކައެއް ކަމުގައެވެ. ޒާނާ ގެ މި ވާހަކަ އަށް މިހާރު މިވަނީ ކަވަރ ފޮޓޯ ތަކެއްވެސް ތައްޔާރުކޮށްފައެވެ. އަދި ވަކި ފޮޓޯއެއް ނުވަތަ ފޮޓޯ ތަކެއް ބޭނުންކުރުމަށް ފައިނަލް ކޮށްފައި ނުވާތީ ކަވަރ ފޮޓޯ ފައިނަލް ކުރުމުގައި ޒާނާ ގެ ވާހަކަ ތަކަށް ޝައުޤު ހުންނަ ކިޔުންތެރިންނަށް އެ ފުރުޞަތު މި ވަނީ ހުޅުވައިލެވިފައެވެ. ކޮމެންޓް ސެކްޝަން ގައި އެއްމެ ކަމުދާ ކަވަރ ފޮޓޯއެއްގެ މަޢުލޫމާތު ހިއްސާކޮށްލެވިދާނެ އެވެ. ނުވަތަ މުނިއަވަސް ވާހަކަ މައިޒާން ފޭސްބްކް ޕޭޖްގައިވާ ޕޯސްޓުންވެސް އެއްމެ ކަމުދާ ފޮޓޯ އެއް ހިއްސާކޮށްލެވިދާނެ އެވެ.

‘މާފުކުރާށޭ ކަލާ’ ނިމުމަކާއި މިހާރު މިވަނީ ކައިރިވެފައެވެ. ވާހަކަ ނިމުމާއި އެކު ދެން އޮތީ ‘ލޯބި ވެވުނީ އެވެ.’ ގެނެސްދިނުމެވެ. ޒާނާ ގެ މި ވާހަކައަށް އިންތިޒާރު ކޮށްލަމާ ހިނގާށެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: