ޔުއެފާ ޗެންޕިއަންސް ލީގުގެ ގްރޫޕް އީ ގައި ނަޕޯލީ އަދި ރެޑްބުލް ސަލްޒްބާގް ބައްދަލުކުރި މެޗު 1-1 ގެ ނަތީޖާއަކުން ނިމިއްޖެއެވެ.

ނަޕޯލީގެ ދަނޑުގައި ކުޅުނު މި މެޗުގެ 11 ވަނަ މިނެޓުގައި ލިބުނު ޕެނަލްޓީއަކުން ހާލަންޑް ވަނީ ސަލްޒްބާގަށް ކުރި ހޯދައިދީފައެވެ.

މި ގޯލާއެކު އުމުރުން 19 އަހަރުގެ ހުނަރުވެރި ޒުވާން ފޯވާޑް އާލިން ހާލަންޑް ވެފައިވަނީ ޔުއެފާ ޗެންޕިއަންސް ލީގުގެ އެއް ސީޒަނެއްގައި އެންމެ ގިނަ ގޯލު ކާމިޔާބުކުރި “ޓީނޭޖް” ކުޅުންތެރިޔާ އަށެވެ. މިއީ ފާއިތުވެދިޔަ 4 މެޗުން އޭނާ ކާމިޔާބުކުރި 7 ވަނަ ގޯލެވެ. ކުރިން މި ރެކޯޑް އޮތީ ރައުލް ގޮންޒާލޭޒް އަދި ކީލިއަން އެމްބާޕޭ އަތުގައެވެ. ޓީނޭޖް އުމުރުގައި ރައުލް ރެއާލް މެޑްރިޑް އަށް އަދި އެމްބާޕޭ މޮނާކޯ އަށް ކުޅުނު އިރުގައި 2 ކުޅުންތެރިން ޖަހާފައިވަނީ 6 ގޯލެވެ.

ފުރަތަަމަ ހާފް ނިމެން އުޅެނިކޮށް މެޗުގެ 44 ވަނަ މިނެޓުގައި ނަޕޯލީގެ ހާވިން ލޮޒާނޯ ވަނީ ގޯލެއް ކާމިޔާބުކޮށް މެޗުގެ ނަތީޖާ ހަމަހަމަ ކޮށްދީފައެވެ. ގިނަ ހަމަލާތަކެއް ނަޕޯލީގެ ފަރާތުން ފެނިގެން ދިޔަ ނަމަވެސް ގޯލަށް އަމާޒުވީ މަދު ހަމަލާތަކެކެވެ.

ބާކީ 2 މެޗެ އޮތްނަމަވެސް މި މެޗުން މޮޅުވެ ގްރޫޕް ސްޓޭޖުގެ ކުރީކޮޅު ނޮކްއައުޓް ބުރުން ޖާގައެއް ކަށަވަރުކުރެވެން އޮތް ނަޕޯލީ އިން ވަނީ އެ ފުރުސަތު ނަގާލާފައެވެ.

ކުޅުނު 4 މެޗުން ލިބުނު 8 ޕޮއިންޓާއެކު ނަޕޯލީ ގުރޫޕުގެ 2 ވަނައިގައި އޮތް އިރު، ސަލްޒްބާގު އޮތީ 4 ޕޮއިންޓާއެކު 3 ވަނައިގައެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: