15 ނޮވެމްބަރ 2019 ގެ ބަޔާއި ގުޅޭ….
“މީ ފާރިޝް ” އެކޮޅުން ވާހަކަދެއްކީ ފާރިޝްއެވެ. “މިރޭ ކައިނިމިގެން ދިޔައިރު ސާމިހާގެ ނޯޓްފޮތް މޭޒުމަތީގައި ބާއްވާފަ ދެވުނީމަ އަޅުގަނޑު އެފޮތް ނަގާފަ މިއޮތީ.” ފާރިޝް އެހާ ލަސް ގަޑިއެއްގައި ސާމިހާއަށް ގުޅަން ޖެހުނު ސަބަބު ބަޔާން ކޮށްދިނެވެ. ފަހަރުގައި އެފޮތް މިރޭގައިވެސް ބޭނުން ވެދާނެތީ ގުޅާލީ ކަމުގައި ފާރިޝް ބުންްޏެވެ. ސާމިހާގެ އެ ނޯޓްފޮތަކީ ސާމިހާގެ ހަޔާތުގެ އެކިއެކި މުހިންމު ކަންކަން ޑައިރީއެއްގެ ގޮތުގައި ލިޔަމުން އަންނަ ފޮތެކެވެ. އެހެންކަމުން މި ދަތުރުގައިވެސް ސާމިހާގެ ބައިވެރިއެއްގެ ގޮތުގައި އެފޮތް ގެނައީއެވެ.
ސާމިހާގެ ހިތުގައި ސުވާލުތައް އުފެދެން ފެށިއެވެ. ފާރިޝް އަނެއްކާ އެފޮތް ހުޅުވައިގެން ބެލީބާވައެވެ. އެކަން އެގޮތަށް ވެއްޖެނަމަ ސާމިހާ އާއި ބެހޭ ގިނަ ވާހަކަތަކެއް ފާރިޝް އަށް އެނގިގެން ދާނެއެެވެ. މިކަހަލަ ޚިޔާލެއްގަައި ހުއްޓާ އަނެއްކާވެސް ފާރިޝް ވާހަކަދައްކަން ފެށިއެވެ. ފޮތް ގެންގޮސްދޭންވީތޯ ސުވާލުކުރިއެވެ. ސާމިހާ އާނއެކޭ ބުނެ ކޮޓަރި ދޮރުކައިރީގައި މަޑުކޮއްގެން ހުންނާނެ ކަމަށް ބުންޏެވެ.
ދެތިން މިނެޓެއްގެ ތެރޭގައި ފާރިޝް އެފޮތް ހިފައިގެން އައެވެ. ސާމިހާ، ފާރިޝްއަށްް ޝުކުރުއަދާކުރުމަށްފަހު ފޮތް ހިފައިގެން އަވަސް އަވަހަށް ކޮޓަރިއަށް ވަނެވެ.
ކޮޓަރިއަށް ވަދެ ދޮރު ލެއްޕުމަށްފަހު ސާމިހާ ދޮރުގައި ލެގިލިއެވެ. ފޮތް ހުޅުވައިލިއެވެ. ދަތުރުގެ ފުރަތަމަ ދުވަހުގެ ވާހަކަތައް ލިޔުމަށްޓަކައި ފޮތުގައި އިންނަ ގަލަން ނެގިއެވެ. މަޑުމަޑުން ގޮސް އިށީނދެ، ދުވަހުގެ މުހިންމު ވާހަކަތައް ލިޔަން ފެށިއެވެ. ފާރިޝްއާއި ދިމާވި ވާހަކަ އެވެ. ފާރިޝްގެ ރީތިކަމުގެ ވާހަކައެވެ. އިރުކޮޅަކު ލިޔަން އޮތުމަށްފަހު ފޮތް ލައްޕައިލިއެވެ. އެވަގުތު ފޮތުގެ އެއް އަރިމަތިން ބޭރަށް ނިކުމެފައި އޮތް ގަނޑުކޮޅެއް ފެނުނެވެ. މަޑުމަޑުން ފޮތް ހުޅުވާލުމަށްފަހު އެ ގަނޑުކޮޅު ނެގިއެވެ. އޭގައި އޮތީ ފާރިޝް ލިޔެފައި އޮތް ނޯޓެކެވެ. ނިދުމުގެ ކުރިން ވަގުތު އޮތިއްޔާ ގުޅާލަދިނުމަށް އެދިއެވެ. ސާމިހާ ވިސްނާލިއެވެ. މިގަޑީގައި ގުޅާލަދިނުމަށް ފާރިޝް އެދުނީ ކީއްވެބާއެވެ. ސާމިހާ ފޮތް ބާއްވާލުމަށްފަހު ފޯނު ނެގިއެވެ. ފާރިޝް ގުޅާފައި އޮތް ނަމްބަރަށް ގުޅާލިއެވެ. ފޯނު ރިންގްވާން ފެށިތަނާ ފާރިޝް ފޯނުނެގިއެވެ. ފާރިޝް ހަލޯ އޭ ބުނުމާއިއެކު ގުޅާށޭ ބުނީ ކީއްކުރަންތޯ ސާމިހާ ސުވާލުކޮށްލިއެވެ. ފާރިޝްގެ ޖަވާބު ވަރަށް ސާފެވެ. ސާމިހާ އާއި ވާހަކަދައްކާލަން ބޭނުންވާތީ ކަމުގައި ބުންޏެވެ. ފޯނު ކޯލުގައި ވަގުތުތައް ދިޔައީ ކިހިނެއް ކަމެއްވެސް ނޭނގުނެވެ. ދެމީހުންގެ ދިރިއުޅުމުގެ ވާހަަކަތައް ހިއްސާވެގެން ދިޔައެވެ. ހީވަނީ ދުވަސްވީ ދެ ރަހްމަތްތެރިން ހެނެވެ.
ވޯރކްޝޮޕް ނިންމާލުމަށްފަހު ސާމިހާ ފުރައިގެން ރަށަށް ދިޔައެވެ. ފާރިޝްއާއި އެކު ހޭދަވި ކުޑަ ވަގުތު ކޮޅުގެ އުފަލާއި ހިތްހަމަޖެހުމާއި އެކުގައެވެ. ކައިރި މުސްތަގުބަލެއްގައި ދިމާވާނެ ކަމުގެ އުންމީދުގައެވެ. ދެމީހުންގެ މެދުގައި އުފެދިފައިވާ ގުޅުމަށް ދޭނެ ނަމެއް ޚުދު ސާމިހާ އަކަށް ވެސް ނޭގެއެވެ. އެނގޭހާ ވެސް ކަމަކީ ސާމިހާގެ ހިތްއެދޭ ހުރިހާ ސިފައެއް ފާރިޝްގެ ކިބައިގައި ހުރިކަމެވެ. ފާރިޝްގެ އެކަނިވެރި ދިރިއުޅުމުގެ ވާހަކަތަކުން ސާމިހާއަށް ވަރަށް އަސަރު ކުރުވައިފިއެވެ.
ކޮންމެ ދުވަހަކީވެސް ސާމިހާއާއި ފާރިޝް އެތައް ވަގުތެއް ވާހަކަ ދެއްކުމުގައި ހޭދަކުރާ ދުވަހެކެވެ. އެކި އެކި ވާހަކަތަކެވެ. ދެމީހުންގެ ހަޔާތުގައި ދިމާވެފައި ހުރި ހުރިހާ ކަމެއް ހިއްސާވަމުން ދެއެވެ. ސާމިހާއަށްވެސް މަޑުމަަޑުން ސާހިލްގެ ހަނދާންތަަކާއި ދުރުވެވެން ފަށައިފިއެވެ. ފާރިޝްގެ ޚިޔާލުތައް ހިތުތެރޭގައި އަބަދުވެސް އާވެއާވެ ހުރެއެވެ. ފާރިޝްގެ ވާހަކަތަކުން، ފާރިޝްއަށް ވެސް ސާމިހާ ކަމުދާހެން ސިފަވެއެވެ.
ދުވަސްތައް ފާއިތުވަމުންދެއެވެ. ފާރިޝް އޭނާގެ އެދުން ސަަމިހާގެ ކުރިމަތީގައި ފުރަތަމަ ފަހަރަށް ހާމަކުރިއެވެ. ސާމިހާ އާއި ކައިވެނި ކުރަން ބޭނުންވާ ވާހަކަ ބުންޏެވެ. ސާމިހާގެ ޖަވާބަކަށް އިންތިޒާރުކުރާނެ ކަމުގައި ވެސް ބުންޏެވެ.
ނުނިމޭ
ލިޔުންތެރިޔާގެ ފުރަމަލަ
- ދީނީ އަދި އިޖުތިމާޢީ ރޮނގުން ގަލަން ހިނގައިލުމުގެ އިތުރުން ވާހަކަ ލިޔުމަކީވެސް ޔޫސުފުގެ ހުނަރެކެވެ.
މި ލިޔުންތެރިޔާގެ ބައެއް އެހެން ލިޔުންތައް
- 18 މެއި 2021ވާހަކަސިހުރު – ކުރު ވާހަކަ
- 25 ޖޫން 2020ޚަބަރުހާވިލް – ހަވަނަ ބައި
- 17 ޖޫން 2020ވާހަކަހާވިލް – ފަސްވަނަ ބައި
- 11 ޖޫން 2020ވާހަކަހާވިލް – ހަތަރުވަނަ ބައި
