‘ނަހާސްކީ ރާއްޖެ’ ސިލްސިލާގައި މި ގެނެސްދެނީ ޙަޤީޤީ ވާހަކަ އެކެވެ. ރޫހާނީ ކަމެއްގެ ވާހަކަ އެކެވެ. ޙާދިޘާ ހިނގި ތަންތަނުގެ ނަންތަކާއި މިކަން ދިމާވި މީހުންގެ ނަންތައް ހިމަނާފައެއް ނުވާނެ އެވެ. މި ލިޔުމުގައި އެއްވެސް މީހެއްގެ އަބުރަށް ގެއްލުމެއްވާފަދަ ގޮތަކަށް ބައެއް ގެނެވިފައިވާނަމަ އެއީ އިއްތިފާޤެކެވެ.

މިއީ މީގެ އަހަރުތަކެއް ކުރިން ‘ދަސްކުރާ މުދައްރިސުންގެ ޓީމެއް’ ގެ ގޮތުގައި އަހަރުމެން ކިޔަވައިދިނުމުގެ ތަޖުރިބާ ހޯދުމަށް ނުވަތަ ޓީޗިންގ ޕްރެކްޓިކަލް އަށް ކުރި ދަތުރުގެ ތެރޭގައި ދިމާވި ޙާދިޘާ އެކެވެ. އަހަރުމެން ގޮސް ތިބީ މެދުރާއްޖެ ތެރޭގެ ރަށެއްގަ އެވެ. މިއީ އަހަރުމެން ތިބި ރަށާއި ގުޅާލެވިފައިވާ ރަށުގެ ފަންނަށް (ބީޗަށް) ދިޔަ ރެއެއްގައި ދިމާވި ހާދިޘާ އެކެވެ. އެ ފަންނަނީ ބޮޑު ދޮންވެލި ތުނޑިއެއް އޮންނަ ފަންނެކެވެ. އަހަރުމެންގެ ދަތުރުގައި ހިމެނޭ އަށް ފިރިހެން ޓީޗަރުން ނިންމީ މަޖާކޮށްލުމަށް އެ ފަންނަށް ދިއުމަށެވެ. އޯވަރ ނައިޓް ޕިކްނިކެއް ހަދާލުމަށެވެ. ޢާއްމުކޮށް މީހުން ދަތުރުގޮސް އުޅޭ ވަގުތެއްގައި އެތަނަށް ނުދިއުމަށް ނިންމީ އެ ހިތްގައިމު މާހައުލުގެ އުފާވެރިކަން ރޭނގަނޑުގެ ވަގުތުގައި ތަޖްރިބާ ކޮށްލުމަށެވެ.

އަހަރުމެން އެތަނަށް ދިޔައީ އަހަރުމެން ތިބި ރަށުގައި ގެންގުޅޭ ޕިކަޕެއްގަ އެވެ. ދަތުރަށް ބޭނުންވާނެ ހުރިހައި އެއްޗެއް ހަމަކޮށްގެން ނައްޓާލީ ފަތިސްނަމާދު ވާންދެން އެ ފަންނުގައި ތިބުމަށް ނިންމައިގެން، އެކަމަށް އެހާވަރަށް ތައްޔާރުވެސް ވެގެންނެވެ. އަހަރުމެންނަށް އެ ފަންނާއި، އެ ސަރަހައްދާއި ބެހޭ މާގިނަ މަޢުލޫމާތެއް އޭރަކު ނުވެސް އެނގެއެވެ. އަހަރުމެން ދަތުރު ދާން ރަނގަޅު ތަނެއް ނެތްހޭ ކިޔަން ފެށުމުން ސްކޫލްގައި އުޅޭ ބައެއް ދޭސީ މުދައްރިސުން އެ ފަންނަށް ދިއުމަށް ލަފާ ދިނުމުން އެތަނަށް ދާން ނިންމީ އެވެ.

ސްކޫލް މުދައްރިސް ބުނީ އެތަނަކީ އެ ރަށުގެ މީހުން ދިރިއުޅޭ ސަރަހައްދާއި މުޅިން ވަކިން، މާ ދުރުގައި އޮންނަ ތަނެއް ކަމަށެވެ. އެހެންކަމުން އަހަރުމެން ދަތުރަށް ފުރީ މަޣްރިބް ނަމާދުކޮށްގެންނެވެ. އަހަރުމެން ތިބި ރަށުގެ ބޮޑުމަގުން ދުއްވަމުންގޮސް ތިން ފާލަމެއް ހުރަސްކޮށްފައި ގޮސް އެ ރަށަށް އަރައި އެތައް އިރަކު ދުއްވިފަހުން އަހަރުމެންގެ މަންޒިލާއި ހަމައަށް ދެވިއްޖެ އެވެ. ރަށުތެރޭގައި ފުޅާ މަގެއް އޮތަސް އަހަރުމެން ދިޔަ ފަންނާއި ދިމާއަށް ދެވުނީ ތަންކޮޅެއް ހަނި މަގަކުންނެވެ. އެ މަގުން އެތެރެއަށް ވަދެގެންގޮސް ހަމަ ސީދާ ދެވުނީ އެ ފަންނަށެވެ.

އެއީ ސަރާސަރު ދިގު، އެ ރަށުގެ ކޮޅުން ކޮޅަށް ދަމާލެވިފާ ހުދު ރޮނގެއްހެން އޮތް، ހިމުން ދޮންވެލި ފަންނެކެވެ. އެ ސަރަހައްދަށް ރަށުގެ އަލިކަންވެސް ފެންނާކަށް ނެތެވެ. ޕިކަޕުން ފުންމާލުމާއިއެކު ހިތްގައިމު އެ ފަންނުގެ ގޮނޑުދޮށް ސިފަވެގެން ދިޔައީ ރިޒޯޓެއްގެ ހިތްގައިމު ގޮނޑުދޮށެއްގެ ގޮތުގަ އެވެ. ހިމުން ދޮންވެލި މަތީގައި ކުނިބުންޏެއް ނެތެވެ. ހަނދުވަރުގެ ރިހި އަލިން އެ ހުދު ދޮންވެލިގަނޑު އޮތީ ވިދަވިދަ އެވެ. އަހަރުމެން ޓެންޓްތައް ޖެހުމަށް ކަނޑައެޅި ހިސާބުގައި އަލިފާންގަނޑެއް ރޯކުރީމެވެ. ކެއްކުމަށްޓަކައި ގެންދިޔަ ކުޑަވަރެއްގެ ތެޔޮ އުނދުންވެސް ކެއްކުމަށް ޚާއްޞަކޮށްފައިވާ ސަރަޙައްދުގައި ބެހެއްޓީމެވެ. ކާ އެއްޗަކަށް އެއްމެ ފުރަތަމަވެސް ތައްޔާރުކޮށްލީ ނޫޑްލްސް ސޫޕެވެ. އޭގެ އިތުރަށް ކޯކާއި ބިސްކޯދުވެސް ނެގީމު އެވެ.

އެއީ ގާތްގަނޑަކަށް އެރޭގެ 09:30 ކަންހައި އިރެވެ. އަހަރުމެން އެއްމެން އެ ހިތްގައިމު ގޮނޑުދޮށުގައި ހިނގަމުންދިޔައީ ތަން އޮތީތީ ހިނގާ ބީދައިންނެވެ. އެކެއްގެ އަތުގައި ޓޯޗް ބައްތިއެއް އޮތެވެ. އަހަރުމެންނަށް ވުރެން ތަންކޮޅެއް ބާރަށް ހަތަރު ރަހުމަތްތެރިން ހިނގަމުން ދިޔައިރު، އަހަންނާއި ދެންތިބި ތިން މީހުން ހިނގަމުން ދިޔައީ އެމީހުންގެ ފަހަތުންނެވެ. ކުއްލިއަކަށް ފެނުނީ އަހަރުމެންގެ ފަހަތުން ދެ ފިޔޮށް ކުކުޅު ދުވަމުން އަންނަ ތަނެވެ. ފިޔޮށްތަކާއިއެކު ނިކުމެ އުޅެނިކޮށް އެސޮރުގެ ފިޔޮށްތައް ނެގުމުން ރުޅިއައިސް ރަތްވެގެން މީހުންނާއި ދިމާއަށް އަންނަ ގޮތަށް އަހަރުމެންނާއި ދިމާއަށް އަންނަ ތަނެވެ. ދެކުކުޅު އައިސް އަހަރަމެންގެ ކުރީގައި ތިބި ހަތަރު މީހުންނާއި އަރައި ހަމަކޮށް ކުރި ބެއްދި އެވެ. އެވަގުތު އަހަރުމެން އެއްމެންނަށް އެކުގައި ހުއްޓެވުނީ އައިސް-ވޯޓަރ ކުޅޭއިރު ‘އައިސް’ ވުމުން ހުއްޓޭގޮތަށެވެ. ދެ ކުކުޅު ކުސްތަޅަމުން ގޮވަންފެށިއިރު ހީވީ ވަރުގަދަ ސައުންޑު ސިސްޓަމަކާއިއެކުގައި ހުރި މައިކެއްގެ ކުރިމަތީގައި ތިބެ ގޮވަން ފެށިހެން ނެވެ. އެހާވެސް އަޑު ގަދަ އެވެ. ކުސްތަޅާ އަޑުގެ އިތުރުން ޒާތެއްގެ އާދަޔާޚިލާފު އަޑުތަކެއް ލައްވަމުން އަހަރަމެންގެ ވަށައިގެން ދުވަންފެށިއިރު ހީވީ ގަހެއްގައި އެލުވާފައި އޮތް ވާދިގު އުނދޯއްޔެއް ވަށައިގެން އެނބުރެމުންދާއިރު އެ އުނދޯލީގައި އަހަރުމެންނަށް ތިބެވުނުހެން ނެވެ. އިރުކޮޅެއްވާންދެން ދެ ކުކުޅު އެހެން އެނބުރެން ތިއްބާ ކުއްލިއަކަށް ގެއްލުނީ ފިލްމެއްގެ ސްޕެޝަލް އިފެކްޓް މަންޒަރެއްގައި އެއްޗެއް ގެއްލިގެންދާފަދަ ގޮތަކަށެވެ.

ފެނުނު މަންޒަރާއި، އިވުނު އަޑުތަކުން އަހަރުމެން އެއްމެންނަށް ތިބެވުނީ ބިރުން ދެކަމު ހާޖަތަށް ދެވިފައޭ ބުންޏަސް ދޮގަކަށް ނުވާނެ އެވެ. އަތަށް ފައިވާން ނަގައިގެން، ފަޔަށް ލެވުނުހައި ބާރެއް ލާފައި އަހަރުމެންނަށް ދުއްވައިގަނެވުނީ ޓެންޓް ތަކާއި ދިމާއަށެވެ. ފަސްގަނޑު މަޑުކަމުން އަހަރުމެން ދުވަމުން ދިޔައީ ރާޅުޖަހާ ހިސާބުންނެވެ. މާނޭވާ ލަމުން، ދުވަމުން ދަނިކޮށް އަހަރުމެން ތެރެއިން އެކަކު ބުނި އެއްޗަކުން އަދި މާބޮޑަށް ބިރުގަންނަގޮތްވި އެވެ. މޫދު ތެރެއިން ވަރަށް އާދަޔާޚިލާފް އަޑެއް އިވުނު ވާހަކަ އޭނާ ބުނީ ދެލޯ މުދުނަށް ނަގައިގެންހުރެ ރޮމުންކަހަލަ ގޮތަކަށެވެ. އެވާނީ ހީވިގޮތެކޭ އަހަރުމެން އެއްމެން ބުނީ އަޑުއިވުނުކަމަށް ބުނި މީހާއާއި ޚުދު އަހަރުމެންގެ އަމިއްލަ ނަފުސަށް އޮޅުވާލުމަށެވެ.

އިރުކޮޅެއް ފަހެވެ. އަހަރުމެން އޭރުވެސް ދުވަމުން ދިޔައީ އެތައް ހިސާބެއް ދުރުގައިވާ އަހަރުމެންގެ ޓެންޓްތަކާއި ދިމާއަށެވެ. އަނެއްކާވެސް ވަރަށް ބިރުންހުރެ ރަހުމަތްތެރިޔާ ބުނީ އޭނާގެ ނަމުން ކޮންމެވެސް މީހަކު ގޮވާލި އަޑު އިވުނުވާހަކަ އެވެ. މޫދު ތެރެއިންނެވެ. އެވަގުތު އަހަންނަށް ބަލާލެވުނީ މޫދާއި ދިމާއަށެވެ. ފެނިގެން ދިޔައީ ހީވެސް ނުކުރާހާ ބިރުވެރި ސޫރައެކެވެ. އެހެންނަމަވެސް އަނދިރިކަމުން އެއީ މިވެނި އެއްޗަކާ ވައްތަރު އެެއްޗެކޭ ބުނާކަށް އެނގޭވަރެއް ނޫނެވެ. ހީވަނީ އެއީ އަންހެން ޖިންސަށް ނިސްބަތްވާ ކޮންމެވެސް މަޚްލޫޤެއްގެ ބޯ ހެންނެވެ. އޭގެ އަނގަ ހުޅުވައިގެން ހުރެ ހަޅޭއްލަވަމުން ދިޔަތަންވެސް އަހަރެން ދުށީމެވެ. ޓޯޗް ބައްތި ހިފައިގެން ހުރި ރަހުމަތްތެރިޔާ އެ އެއްޗަކާއި ދިމާއަށް އަލިކޮށްލި އެވެ. ނަމަވެސް ހަމަ އެވަގުތު އޭތި ލޮނުގަނޑުތެރެއަށް ފީނައިގަތެވެ. އޭތި ލެއްވި އަޑު އަހަރުމެން އެއްމެންނަށްވެސް އިވުނެވެ.

ޓެންޓްތަކާއި ހަމައަށް ދެވުމާއިއެކު އެމީހަކަށް ކިޔުނު ހެޔޮ އެއްޗެއް ކިޔައިގެން ނިދަން ވަނީ ރަށަށް ދެވޭނެ ގޮތެއް ނެތީމަ އެވެ. ޕިކަޕްގެ ޑްރައިވަރު ވީ އޭނާގެ ރައްޓެއްސަކާއި އެކު ރަށުތެރެއަށް އަރަ އެވެ. އަހަރުމެންތެރޭގައި ޕިކަޕް ދުއްވަން ދަންނަ މީހަކު ނެތްތާނގައި ޕިކަޕްގެ ތަޅުދަނޑިވެސް ނެތެވެ. އަހަންނާއި އެހެން ރަހުމަތްތެރިއެއް ނިދަންވަދެ ތިބީ ޕިކަޕްގެ ކުރީކޮޅަށެވެ. ދެން ތިބި މީހުން ނިދަން ވަނީ ޓެންޓް ތަކަށެވެ.

ގާތްގަނޑަކަށް މެންދަމު 01:30 ވެދާނެ އެވެ. ޓެންޓެއްގެ ތެރެއިން އެކަކު ވަރަށް ބާރަށް ހަޅޭއްލަވާ އަޑު އިވެން ފެށި އެވެ. އެދިމާއަށް ދިޔައިރު އެ ރަހުމަތްތެރިޔާ ހުރީ ދާހިއްލާ ފޯވެފަ އެވެ. ވީ ކިހިނެތްތޯ ސުވާލުކުރުމުން އޭނާ ބުނީ އޭނާ ތެދުވީ އަލިފާންގަނޑަށް ބޮނބި އަޅަންކަމަށެވެ. ބޮނބި އަޅަން ހުއްޓާ ވިނަގަނޑު ތެރެއިން ކަޅުކުލައިގެ ބޮޑު ހިޔަންޏެއް، ފޮޓޯ އެއް ޒޫމްކޮށްލުމުން ވާހެން އަލިފާންގަނޑާއި ދިމާއަށް ޒޫމްވުމަށްފަހު ކުއްލިއަކަށް އެދިމާ މޫދާއި ދިމާއަށް އެ ހިޔަނި ދިޔަކަމަށް ބުންޏެވެ. އަދި ހަމަ އެވަގުތު އެދިމާ މޫދު ތެރެއިން އަންހެނެއްގެ ބޯ ފެނުނު ކަމަށާއި އިރުކޮޅެއް ކޮށްފައި ލޮނުގަނޑު ތެރެއަށް ފީނައިގަތްތަން ފެނުނު ކަމަށްވެސް ބުންޏެވެ. މި ވާހަކަތައް އިވުމުން އަހަރުމެން އެއްމެން ވަރަށް ބިރުގަތެވެ. އެއްވެސް މީހަކަށް ނިދަންވެސް ނުކެރިފައި 3 ޖަހާ ބޮޑުވާންދެން ތިބުމަށްފަހު އެއްމެން ނިދަން ވަނީއެވެ.

ނިދާފައި އޮއްވާ އަހަންނަށް އިޙްސާސް ކުރެވުނީ އަހަރެންގެ ފައިގައި ހިފާފައި މީހަކު ދަމަމުން ދިޔަކަމެވެ. ޕިކަޕްގެ ވިންޑް ސްކްރީން އާއި ހަމައަށް އަހަރެން ދަމާފައި ގެންދިޔަކަންވެސް އެނގުނެވެ. އެހެން އޮއްވާ އަހަންނަށް ހޭލެވުނު ހިސާބުން ޔަޤީންވީ ކޮންމެވެސް ވަރުގަދަ ނުބައެއް އެ ސަރަޙައްދުގައި ހަމަ ޙަޤީޤަތުގައިވެސް އުޅޭކަމެވެ.

ދެން ހިނގި ކަންތަކަކީ އެ ފަންނުގައި، އެރޭ ހިނގި އެއްމެ ބިރުވެރި ކަންތަކެވެ. ހީވާގޮތުން އޭރު ހަތަރެއް ޖަހަން އުޅޭނެ އެވެ. ކުއްލިއަކަށް އިވިގެންދިޔައީ ވަރަށް ބާރަށް މީހަކު ހަޅޭއްލަވަން ފެށި އަޑެވެ. ‘މަ ސަލާމަތް ކުރާށޭ’ ކިޔާފައި ހަޅޭއްލަވަމުން ދިޔަ އަޑުވެސް އިވުނެވެ. އަހަރުމެން އެއްމެންނަށްވެސް އެ އަޑު އިވުނެވެ. އޭރު އަހަރުމެންގެ ތެރެއިން އެކަކު މޫދާއި ދިމާއަށް ކޮންމެވެސް ނޭނގޭ ބާރަކުން ދަމާފައި ގެންދާތަން ފެނުނެވެ. އަހަރުމެން އެއްމެން ދުވެފައިގޮސް ރަހުމަތްތެރިޔާގެ އަތުގައި ހިފައި ދަމަމުން އެއްގަމަށް ލީމެވެ. އޭރު އޭނާ އޮތީ ޝޮކެއްގެ ތެރޭގަ އެވެ. އިރުކޮޅެއްވާންދެން އޮވެފައި އަވަސް އަވަހަށް މާނޭވާތަކެއް ލާންފަށާފައި ވާހަކަދައްކަން ފެށިއެވެ. ކަންވީގޮތް ކިޔައިދިނެވެ.

އޭނާ ގޮނޑުދޮށާއި ދިމާއަށް ޖެހިލީ ހީސްލާށެވެ. ހީސްލާން ހުއްޓާ ކުއްލިއަކަށް ފެނުނީ އަންހެނެއް، މޫދު ތެރެއިން ބޯ ހިއްލާލި ތަނެވެ. ހަމަ އެވަގުތު ކުއްލިއަކަށް އިޙްސާސް ކުރެވުނީ އޭނާގެ ދެފައިގައި ކޮންމެވެސް ނުފެންނަ އަތަކުން ހިފި ކަމެވެ. އެ ނޭނގޭ ބާރުން އޭނާ މޫދާއި ދިމާއަށް ދަމާފައި ގެންދަންފެށީ އެއްވެސްކަހަލަ ރަހުމެއް ނެތި އެވެ. އެއީ ކޮންމެ އެއްޗެއް ނަމަވެސް، އެ އެއްޗެއް ނުބައި ވައްތަރަކަށް ހެމުން ދިޔަކަމަށްވެސް ރަހުމަތްތެރިޔާ ބުންޏެވެ.

ދިމާވަމުންދިޔަ އާދަޔަޚިލާފް ކަންތައްތަކާއިމެދު އެއްމެންވެސް ތިބީ ނުހަނު ބިރުގެންފައެވެ. ހަދާނެގޮތަކާއި މެދު މަޝްވަރާކޮށް އެއްމެންނަށް ނިންމުނީ ޕިކަޕަށް އަރައި ޕިކަޕް ސްޓާޓް ކޮށްގެން ދުއްވޭތޯ ބެލުމަށެވެ. ފިލްމުތަކުން ފެންނަގޮތަށް ކޮންމެވެސް ދެނަރެއް ބުރިކޮށް، ޝޯޓްކޮށްލައިގެން ޕިކަޕް ސްޓާޓްކުރީ އަހަރުމެން ތެރޭގައި ހުރި މާލޭ ކުއްޖެކެވެ. އެ ކުއްޖާގެ ގޭގައި ވެހިކަލް ރިޕެއަރ ގަރާޖެއް ހިންގާތީ ކޮންމެވެސް ވަރަކަށް އެ ޒާތުގެ ކަންކަން އެނގިފައި އޮތްކަމީ އަހަރަމެންގެ ނަސީބެވެ. ހަމަ އެހެންމެ އެކުއްޖާއަށް ކޮންމެވެސް ވަރަކަށް ވެހިކަލް ދުއްވަންވެސް އެނގިފައި އޮތްކަންވެސް އެއީ ހަމަ ލެއްވި ރަހުމަތެކެވެ.

ޒާތަކަށް ދުއްވަމުން ގޮސް އަވަށްގަނޑާއި ހަމައަށް ދެވުނުތަނުން، މިސްކިތަށް ދާން ދިޔަ މީހަކާއި ދިމާވި އެވެ. އެމީހާ ކައިރީގައި އެ ވާހަކަތައް ކިޔައިދިނުމުން އެމީހާ ބުނީ އެއްދުވަހަކު އެ ސަރަޙަދަށް އިރުއޮއްސެން ކައިރިވެފައި ވަނިކޮށް މޫދަށް ގޮސް އުޅުނު ވަރަށް ޒުވާން އަންހެން ކުއްޖެއް ގެނބިގެން މަރުވި ފަހުން އެކުއްޖާގެ ރޫހު އެތަނުން ފެންނަކަމަށް މީހުން ކިޔައި އުޅޭ ކަމާއި އެކުއްޖާ ގެނބުނީ ނޫންކަމަށާއި އެކުއްޖާ އާއި ކުރިން ހިތާވެގެން އުޅުނު މީހެއް އެކުއްޖާ ގަންބާ މަރާލީކަމަށް ކިޔައި އުޅޭކަމަށްވެސް އެމީހާ ބުންޏެވެ.

އެމީހާ ބުނިގޮތުން އެއީ އަހަރުމެންނަށް މި ހާދިޘާ ދިމާވުމުގެ 15 ވަރަކަށް އަހަރުކުރިން ހިނގާފައިވާ ހާދިޘާއެކެވެ. އޭގެ ފަހުން ބައެއް ރޭރޭ އެ ފަންނުން އެކުއްޖާ ރޮއެ ހަޅޭއްލަވާ އަޑު ކިތަންމެ ބަޔަކަށް އިވޭކަމަށްވެސް އެމީހާ ބުންޏެވެ.

މިއަދުވެސް، އެ ހަނދާންތައް އާވުމުން އަހަރެންގެ ގައިން ހީބި ނަގައެވެ. މުޅި ހަށިގަނޑަށް ހީރޯޅި އަރައިގެންދެ އެވެ.

ނިމުނީ

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: