​ޒަމާނެއް ދިޔައެވެ. ރަށުގައި ތިންއިރު ކައިބޮއެ އުޅެނީ މަދު ގެއެއްގަ އެވެ. މެންދުރުކުރީގައި ކައްކާ ފަޅޮލުގޮނޑި ނޫނީ ހިއްތަލަ ފުށުގެ ބޮނޑިބަތް ކޮޅުން މެންދުރާއި ރެއަށް ފުއްދާލައިގެން އުޅުނު ތަދު ޒަމާނެވެ. އެއް ގޭގައި ކައްކާ އެތިކޮޅު ޖެހިގެންހުންނަ ގެއަށް ފޯރުކޮށްލަދީ އުޅުނު އެކުވެރި ޒަމާނެކެވެ. ދުވާލުދާ ހަތަރުދަމު ބަނޑުފުރާނަ މުއްތިކުރުމަށް މަސައްކަތް ކުރުމަށްފަހު ރޭގަނޑުގެ އިރާކޮޅުގައި އަނގަތަޅައިލާ ފޫހިފިލުވައިލުމަށް ގޭގެއަށްގޮސް އުޅެތެވެ. . 

އެދުވަސްވަރު ގިނައިން މީހުން ގޮސް އުޅޭނީ އެތިކޮޅު ލިބޭ ފޯރާ ގޭގެއަށެވެ. އެ ގޭގެއަކީ އެ ގޭގޭގެ ބޭރުގެ (ސިޓިންރޫމު) މެހެމާނުންނަށްޓަކައި ތައްޔާރުކުރެވިފައިވާ ގޭގެއެވެ. އެފަދަ ގޭގޭގައި އިޝާނަމާދަށް ފަހު ސަފުދަމާލާފައި މީހުން ތިބޭކަމަށްވެއެވެ. އެހެން ބޭނުމެއްގައެއް ނޫނެވެ. ވަރުގަދައަށް ދުފާލުމަށެވެ. އެ ޒަމާނަކީ ކޮންމެ ކޮންމެގެއަކުން ވަރުގަދައަށް ދުފާލެވެން ހުންނަ ޒަމާނެއް ނޫނެވެ. މިގޮތުން ކަތީބުގެ ގެއާ އެދުރުންގެ ގެއާއި ބޮޑެތި މާވަޑިންގެ ގޭގެއަކީ މީހުން އާމުކޮށް ޖަމާވާ ގޭގެއެވެ.

އޭރުންސުރެ ދުފާތަބައް ނުވަތަ ދުފާފޮށްޓަކީ ދިވެހިންގެ މެދުގައި ޚާއްސަ ގަދަރެއްދެވިފައިވާ އެއްޗެކެވެ. ދުފުމަށް ކުރެދި ގަހުގެ ތޮށްޓާ ހިތި ގޮބޮޅި ބޭނުންކުރި ޒަމާނެއްވެސް ދިޔައެވެ. ނަމަވެސް ހިކި ފޯކާއި ފެންފޯއް އާއްމުވެ ދުފާ ތަބައް ވެސް ތަރައްގީ ވީއެވެ. 

އެދުމެއްނެތި ވެދުމެއް ނުކުރާނޭ ބުނާ ބީދައިން ދުފަން ދިނުމުގައި ވެސް މިފަދަ ސިއްރުތަކެއް ވެއެވެ. މި ޒަމާނުގެ ކުދިން ބައިހަދާފައި ކޮފީއަށްދާ އުސޫލުން އެޒަމާނުގައި ދުފަން އަނގަތަޅައިލަން ދަނީ ދެތިން އެކުވެރިންވެސް ގޮވައިގެންނެވެ. ދުފުންގަނޑު ހެޔޮވަރުވެ އަނގަމަޖަލުގައި ތިއްބާ އެގެއެއްގެ ވެރިމީހާ، ކަތީބުގެވިއްޔާ ކަތީބު މާވަޑިގެ ވިއްޔާ މާވަޑިބެ ކެޔޮޅުގެ ވިއްޔާ ކެޔޮޅުބެ މަގުސަދު ހާސިލް ކޮށްލާނެއެވެ. މަދަމާ މިގޭރުއްގަނޑުން ދެތިންރުއް ކަނޑައި ވަކަރަށް ހަދާލަދޭން އަންނަންވާނޭނޫންހޭ!! ބުނެލަފާނެއެވެ. އެހެންނޫނީ އެ ގޭގައި ކުރަން ހުންނަ ކޮންމެވެސް މަސައްކަތެއް ކޮށްދިނުމަށް އައިސްދިނުމަށް އެދޭނެއެވެ. އޭރު މި އޮންނަނީ ނޫނެކޭ ނުބުނެވޭ ވަރަށް އަނގަތަޅުވާފައެވެ. މިގޮތަށް ރެއަކު ދެތިން ބަޔަކާއި މަސައްކަތް ހަވާލުކުރާނެއެވެ. އެހެނަސް ޖެހިގެން އަންނަރޭ ވެސް ކޮންމެވެސް ދިމާއަކަށް ދުފާލަން ނުގޮހެއް ގެއަކަށް ނުވަދެވެއެވެ. 

މިއީ ވެސް ދުފާތަބަކުގެ ބޭނުމެކެވެ. އެކުވެރިކަމާއި އެއްބައިވަންތަ ކުރުވުމަކީ ވެސް ދުފާތަބަކުގެ ބޮޑު ރޯލެއް އޮންނަ ކަމެކެވެ. ހަމަ އެހެންމެ ދުފަން ދިނުމުގައި ބާވަތެއް މަދުވެގެން ވަރިފަށަށް އަރާ ވާހަކައަކީ ވެސް އިވޭ ވާހައެކެވެ. ދުފާ ތަބަކަކީ ވެސް ބާރުގަދަ ސަހުސިއްޔަތެކެވެ. މިޒަމާނުގައި ގައުމުގެ ބޮޑުންގެ މޭޒުކޮޅު މަތިން ގާނޫނު ހަދާ މަޖްލިސްގެ މޭޒުކޮޅުތައް މަތީގައި ވެސް ފަޚުރުވެރިކަމާއެކު ކޮޅުކޮޅުމައްޗަށް ދުފާ ތަބައް ދުވެލާ މަންޒަރު ފެނެއެވެ. 

ކާބަފައިންގެ ޒަމާނުންސުރެ އަހަރެމެންނާ ހަމަޔަށް ދުފާ ތަބައް ބަދަލުވަމުން، ޒަމާނާއި އެއްގޮތަށް ތަރައްގީވަމުން އައި ނަމަވެސް. މިވެސް ހަމަ ސަގާފީ ތަރިކައެއް ނޫންތޯއޭ އަޅުގަނޑުގެ ހިތަށް އަރައެވެ.

ލިޔުންތެރިޔާގެ ފުރަމަލަ

ހުސެން މޫސާ (ބިގޭ)
ތަފާތު ލިޔުންތެރިއެކެވެ. ލ. އަތޮޅުގެ ބަހުރުވައަށް ދެވިފައިވާ ލޯބި، ހުސެންގެ ލިޔުންތަކުން ފެނެއެވެ.

ގުޅުންހުރި ލިޔުން: