ޔުއެފާ ޗެމްޕިއަންސް ލީގުގެ ގްރޫޕް އެފް ގައި ރޭ ބާސެލޯނާ އަދި ބޮރޫސިއާ ޑޯޓްމަންޑް ބައްދަލުކުރި މެޗު 3-1 ގެ ނަތީޖާއަކުން ކާމިޔާބުކޮށް، ޗެމްޕިއަންސް ލީގުގެ ގަދަ 16 އިން ބާސެލޯނާ ފުރުސަތު ހޯދައިފިއެވެ.

ބާސެލޯނާގެ ދަނޑުގައި ކުޅުނު މި މެޗުގެ، ފުރަތަަމަ ހާފުގެ 21 ވަނަ މިނެޓުގައި ލުއިސް ސުއަރޭޒް ޖެހި ގޯލް، ވީޑިއޯ އެސިސްޓެންޓް ރެފްރީ (ވީ.އޭ.އާރު) ބޭނުންކޮށްގެން ބެލިއިރު، ސުއަރޭޒް އޮފްސައިޑް މަގާމެއްގައި ހުރުމުން، ރެފްރީ ވަނީ އެ ގޯލް އޮފްސައިޑް ކަމަށް ނިންމާފައެވެ. ބާސެލޯނާގެ ފުރަތަަމަ ގޯލް މެޗުގެ 29 ވަނަ މިނެޓުގައި މެސީ ތަނަވަސްކޮށްދިން ފުރުސަތަކުން ޖަހައިދިނީ ލުއިސް ސުއަރޭޒް އެވެ. ފުރަތަަމަ ހާފުގައި މެޗު ކޮންޓްރޯލްކޮށްގެން މޮޅަށް ކުޅެމުންދިޔަ ބާސެލޯނާ އަށް ވަނީ ލީޑު ފުޅާކުރަން ރަނގަޅު ފުރުސަތުތަކެއް ލިބިފައެވެ. މެޗުގެ 33 ވަނަ މިނެޓުގައި ސުއަރޭޒް އަދި މެސީގެ ރީތި ކުޅުމަކަށްފަހު، ސުއަރޭޒް ދިން ޕާހަކުން މެސީ ވަނީ ގޯލެއް ޖަހައި ބާސެލޯނާ އަށް ލީޑު ފުޅާކޮށްދީފައެވެ. މި ގޯލާ އެކު ޔުއެފާ ޗެމްޕިއަންސް ލީގުގައި، އެންމެ ގިނަ ޓީމުތަކުގެ ކޮޅަށް ގޯލް ޖެހި ކުޅުންތެރިޔާގެ ރެކޯޑް މެސީ ވަނީ މުގުރާލާފައެވެ. މެސީ، ތަފާތު 34 ޓީމުގެ ކޮޅަށް ގޯލް ޖަހާފައިވާއިރު، ކްރިސްޓިއާނޯ ރޮނާލްޑޯ އަދި ރައުލް ގޮންޒާލޭޒް ވަނީ 33 ޓީމުގެ ކޮޅަށް ގޯލް ޖަހާފައެވެ. މިއީ މެސީ ގެ ކެރިއަރުގައި އޭނާ ކުޅުނު 700 ވަނަ މެޗުކަން ފާހަގަކޮށްލެވެއެވެ. ކެރިއަރުގައި ކުޅުނު 700 މެޗުން 613 ގޯލް ޖަހައި، 237 އެސިސްޓް މެސީ ވަނީ ހަދާފައެވެ.

ދެވަނަ ހާފުގައި ޑޯޓްމަންޑްގެ ކުޅުން ރަނގަޅުކޮށް، މެޗުގެ ކޮންޓްރޯލް ހޯދާ ގޯލެއް ކާމިޔާބުކުރުމަށް ދިޔައީ މަސައްކަތް ކުރަމުންނެވެ. ކައުންޓަރ އެޓޭކެއްގައި މެސީ ދިން ހިތްގައިމު ޕާހަކުން 67 ވަނަ މިނެޓުގައި އޮންޓުއާން ގްރީޒްމަން ވަނީ ގޯލެއް ޖަހާ ބާސެލޯނާގެ ލީޑު ފުޅާކޮށްދީފައެވެ. މިއީ ބާސެލޯނާ އަށް ޗެމްޕިއަންސް ލީގުގައި އޭނާ ކާމިޔާބުކުރި ފުރަތަަމަ ގޯލުކަން ފާހަގަކޮށްލެވެއެވެ. މެޗުގެ 77 ވަނަ މިނެޓުގައި އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ތެރެއަށް ފޮނުވާލައިގެން ޖޭޑަން ސަންޗޯ ވަނީ ޑޯޓްމަންޑަށް ސުން ކަނޑުވާލާދީފައެވެ. 

“މެސީ އަކީ އަހަރެން ދެކުނު އެންމެ މޮޅު ކުޅުންތެރިޔާ” މެޗަށް ފަހު ނޫސްވެރިންނާ ވާހަކަދައްކަމުން ޑޯޓްމަންޑްގެ ޑިފެންޑަރު މެޓްސް ހަމެލްސް ބުނެފައިވެއެވެ. 

ޔުއެފާ ޗެމްޕިއަންސް ލީގުގައި 2012 ވަނަ އަހަރު ބަޔާން މިއުނިކް އަތުން ބަލިވި މެޗަށްފަހު، އަމިއްލަ ދަނޑުގައި ބާސެލޯނާ ބަލިވެފައި ނުވެއެވެ. އޭގެ ފަހުން ޗެމްޕިއަންސް ލީގުގައި އަމިއްލަ ދަނޑުގައި ޖުމްލަ 34 މެޗު ކުޅެފައިވާއިރު، 31 މެޗުން މޮޅުވެ 3 މެޗުން ވަނީ އެއްވަރުވެފައެވެ. 

ކުޅުނު 5 މެޗުން ލިބުނު 11 ޕޮއިންޓާއެކު، ގުރޫޕް އެފް ގެ އެއްވަނަ ޓީމުގެ ގޮތުގައި ޗެމްޕިއަންސް ލީގުގެ ގަދަ 16 ގެ ޖާގައެއް ބާސެލޯނާ އަށް ކަށަވަރުވެފައި ވާއިރު، ދެވަނައިގައި 7 ޕޮއިންޓް ހޯދައިގެން ގޯލުގެ ތަފާތުން އޮތް އިންޓަމިލާން އާއި، ހަމަ އެ އަދަދަށް ޕޮއިންޓް ހޯދައިގެން ތިންވަނައިގައި އޮތް ބޮރޫސިއާ ޑޯޓްމަންޑަށް ވެސް ގުރޫޕުގެ ދެވަނަ ޓީމުގެ ގޮތުގައި ގަދަ 16 އަށް ދިއުމުގެ ފުރުސަތު އެބައޮތެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: