ދެހާސް ސަތާރަ ވަަނަ އަހަރު ނޫސްވެރިކަމަށް ނިކުމެ، ނޫސްވެރިކަމުގެ ގަލަމުގައި ހިފައިގެން މިއަދާ ހަމައަށް އައި ޖކއިރު ތަފާތު އެކި މީހުންނާއި ދިމާވެ އެކި މީހުންގެ ތަފާތު އެތަކެއް ވާހަކަތަކެއް އެމީހުންގެ އަގައިން އަޑުއެހުމުގެ ފުރުސަތު ވަނީ ލިބިފައެވެ. އެހެންނަމަވެސް މިއީ މިހާތަނަށް އަޅުގަނޑުގެ ހަޔާތުގައި އަޑުއަހަން ލިބުނު އެންމެ ހިތްދަތި އެއްވާހަކައޭ ބުނުމުން ދޮގަކަށް ނުވާނެއެވެ. އޯޓިޒަމްް ކުއްޖެއްގެ މައެއްގެ ހިތުގެ އުދާސް އަޅުގަަނޑާ ހިއްސާކުރީ ލޯއްބާއެކު ތިޔަ އެންމެހާ ކިޔުުންތެރިންނަށް ހިއްސާކުރުމުގެ ބޭނުމުގައެވެ.

ދެކުނުގެ ރަށަކަށް ނިސްބަތްވާ އެ  މަންމަ ކިޔައިދިނެވެ. “އަހަރެންވެސް ޒަވާޖީ ހަޔާތެއް ފަށައި ދިރިއުޅުމެއް ބިނާކުރުމުގެ މަސައްކަތް ފަަށައިގަތީ ނުހަނު ފޮނި އުންމީދުތަކަކާ އެކުއެވެ. ކައިވެންޏަށް މާ ގިނަ އަހަރުތަކެއް ނުވެ އަހަރެންގެ ލޮލުން އުފާވެރިކަމުގެ ކަރުނަ ހިލުވައިލީ އަހަރެންގެ އުނގު ފަޅުފިލުވާލައިދޭނެ ކުއްޖެއް އަހަންނަށް ލިބެން އުޅޭކަމުގެ އުފާވެރި ޚަބަރުންނެވެ.

ކޮންމެ ދެމަފިިރިއެއްގެވެސް އާދައިގެ މަތިން، އަހަރެންނާއި އަހަރެންގެ ފިރިމީހާ އަހަރަމެންގެ އަލަތު ދަރިފުޅަށް މަރުހަބާ ކިޔުމަށް ތައްޔާރުވަމުން އައީ ނުހަނު އުފަލާއެކުއެވެ. ކޮންމެ އިންތިޒާރަކަށް ނިމުމެއްވާހެން އަހަރެމެންގެ ދަރިފުޅު އަމަން (އަސްލުނަމެއް ނޫން) މި ދުނިޔެއަށް ލޯހުޅުވާލާފިއެވެ. އެހެންނަމަވެސް އޯޓިޒަމް ކުއްޖެގެ ގޮތުގައެވެ.”

އަސަރުން ފުރިގެންވާ ހާލު އެ ކެތްތެރި މަންމަ، މި ހިސާބަށް މިވާހަކަ ހިއްސާ ކުރުމަށް ފަހު، ކެތްނުވެގެން ވާހަކަ މެދު ކަޑާލާފައި ރޯންފެށިއެވެ. އަނެއްކާވެސް ކެއްތެރިކަމާއެކު ރޮމުންކަހަލަ ގޮތަކަށް ކިޔައިދެމުންދިޔައެވެ.

“އިލާހީ ގާނޫނުގެ ނިޔާއަށް ފުރިހަމަޔަށް ކިޔަމަންތެރިވާ ހާލު އަހަރެން އަމަން ބަލަމުންދިޔައީ ނުހަނު ފޮނި އުންމީދުތަކަކާއެކުއެވެ. އަމަން ލިބުނުތާ 5 އަހަރު ނުވަނީސް އަހަރެންގެ ފިރިމީހާ އަހަރެން ދޫކޮށްފައި ހިނގައްޖެއެވެ. ސަބަބަކީ ކޮބައިކަން ނުބުންޏަސް ސަބަބަކީ، އަހަރެންގެ ފިރިމީހާ އަށް އަހަރެންގެ ނުކުޅެދުންތެރިކަން ހުންނަ އެ ދަރިފުޅު ބެލުން ބުރައަކަށްވުން ކަން އަހަންނަށް އެނގެއެވެ.” އަނެއްކާވެސް ކެތް ނުވެގެން އެތަކެއް އިރު ރޮއުމަށް ފަހު އެ މަންމަގެ ހިތުގެ އާދޭސް އާދެ! ތިޔަ އެންމެހާ ކިޔުންތެރިންނަށް އެ މަންމަ ލޯތްބާއެކު ކުރާ އާދޭސް، ހިއްސާކުރިއެވެ.

” އަހަންނަށް އޯޓިޒަމް ކުއްޖެއްލިބުން އެއީ އަހަރެން މިއަދު އެއްވެސް ދެރައެއްވާ ކަމެއްނޫނެވެ. އެކަމަކު މުޖުތަމައު މިއަދު އެކުދިން ބަލައި ގަންނަގޮތާއި އެ ކުދިންނާ ދޭތެރޭ ދެކޭގޮތް ފެނުމުން ނުހަނު ހިތަދަތިވެއެވެ. ތިބާގެ ދަރި އެއީ ނުކުޅެދުންތެރިކަން ހުންނަ ކުއަޖަކަށް ވުމަށް ތިބާ އެދޭނަން ހެއްޔެވެ؟ ނޭދޭނެ ކަމުގައި ވަންޏާ އަހަރެންވެސް އަހަރެންގެ ދަރި ނުކުޅެދުންތެރިކަން ހުންނަ ކުއްޖަކަށް ވާކަށް ނޭދެމެވެ. ކާއިނާތުގެ ވެރި މާތް ﷲ ވަތަޢާލާ އެއްވެސް އަޅަކަށް ނުއުފުއްލެވޭ ވަރުގެ ބުރައެއް ނުޖައްސަވާނެއެވެ. އަހަރެންގެ ދަރިއަކީ އޯޓިޒަމް ހުންނަ ކުއްޖެއްދޯއޭ އަހަރެން ކައިރީ ނާހާށެވެ. އެއީ ތިބާ އިރުއިރު ކޮޅާ ހަދާންކޮށް ނުދިނަސް އެ ދަރިއަކީ އޯޓިޒަމް ހުންނަ ކުއްޖެއްކަން އަހަންނަށް އެނގެއެވެ. އެ ސުވާލުން އަހަންނަށް ކުރާ އަސަރު އެނގޭނީ ހަމަ އަހަންނަށެވެ. ތިބާގެ އޯޓިޒަމް ހުންނަ ނުކުޅެދޭ ކުއްޖެއް ހުންނައިރު އެގޮތަށް އެ ސުވާލު އަޑު އަހަން ތިބާވެސް ބޭނުމެއްނުވާނެ ނޫންހެއްޔެވެ؟ އަހަރެންގެ ދަރިފުޅު ކޮބައިތޯ އަހަރެން ކައިރީ އަހާށެވެ.

ތިބާގެ ދަރިފުޅު ހުންނަ ސިފައަށާއި، ވާހަކަ ދައްކާ ގޮތަކުން ތިބާގެ ދަރި އަކީ ބުލީގެ ސިކާރައަކަށްވެ އެދަރިފުޅު މުޖުތަމައުއިން ބާކީވުމަށް އެދޭނަންހެއްޔެވެ؟ ނޭދޭނެކަން ޔަގީނެވެ. ހަމަ އެފަދައިން އަހަރެންވެސް އަހަރެންގެ ދަރިފުޅަށް އެހެންވާކަށްް ނޭދެމެވެ. ތިބާގެ ދަރިންނަށް ކިޔާދޭށެވެ. އެދަރިންކައިރީ ބުނެދޭށެވެ. ބުލީ ކުރުމަކީ ރަގަޅުކަމެއް ނޫންކަން ވިސްނައިދޭށެވެ.

އޯޓިޒަމްއަކީ ބައްޔެއްނޫނެވެ. އޯޓިޒަމް އަކީ ތުއްތު ކުދިންގެ އުމުރުން ފުރަތަމަ ދެތިން އަހަރުގެ ތެރޭގައި ފާހަގަކުރެވޭ ސިކުނޑި ތަރައްގީވެ ހެދި ބޮޑުވުމުގައި ދިމާވާ މައްސަލަ ތަކެކެވެ. އޭގެ ސަބަބުން ވާހަކަ ދައްކައި މުވާޞަލާތު ކުރުމާއި، އިޖުތިމާޢީ ގުޅުންތައް އުފެއްދުމުގެ ހުނަރުތައް ކުއްޖާގެ ކިބައިގައި ނުހުރެއެވެ. އެ ކުދިންނަކީ މުޖުތަމައުއަށް ބޭނުންހިފޭ ބަޔަކަށް ހެދުމަށް ތިޔަ އެންމެހާ ފަރާތްތަކުގެ އަރިހުން ލޯތްބާއެކުގައި އެދެމެވެ. އެފަދަ ކުދިން ބާކީ ކޮށްލާ، ބުލީކުރުން ހުއްޓާލުމަށް އަހަރެން އެެދެމެވެ. ތިބާގެ ދަރިފުޅުދެކެ ވާ ލޯބި އަހަަރެންވެސް އަހަރެންގެ ދަރިފުޅުދެކެވަމެވެ. މިއީ ހަމަ އެކަނި އަހަރެންގެ ހިތުގެ އުދާހެއްނޫނެވެ. މިއީ ކޮންމެ ނުކުޅެދުންތެރިކަން ހުންނަ ކުއްޖެއްގެ މައެއްގެ ހިތުގެ އުދާސްކަން ޔަގީނެވެ.

ލިޔުންތެރިޔާގެ ފުރަމަލަ

މުޙައްމަދު ރިފާޒް
ރިފާޒަކީ ސަން އޮންލައިން އާއި ޗެނަލް 13 ގައި މަސައްކަތްކޮށްފައިވާ ތަޖުރިބާހުރި ނޫސްވެރިއެކެވެ.

ގުޅުންހުރި ލިޔުން: