ރެއާލް މެޑްރިޑް ދޫކޮށް ރޮނާލްޑޯ އިޓާލިއަން ލީގުގެ ޗެމްޕިއަން ޔުވެންޓަސް އަަށް ބަދަލުވުމުން، އޭނާ ނެތް ތަން ފޫބެއްދުމަަށްް ކުލަބު ރެކޯޑު ފީ އެއް ކަމަށްވާ 146.1 މިލިއަން ޔޫރޯ އަށް ބެލްޖިއަމް ގެ ހުނަރުވެރި ފޯވާޑް އެޑެން ހަޒާޑް ރެއާލް މެޑްރިޑުން ވަނީ ގެނެސްފައެވެ. ނަމަވެސް ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ ލިއޮނެލް މެސީ ގަބޫލުކުރާގޮތުގައި ހަޒާޑަަކީ ހުނަރުވެރި މޮޅު ކުޅުންތެރިއެއް ކަމުގައި ވިޔަސް، ރޮނާލްޑޯ ނެތް ތަން ފޫބެއްދުމަކީ ވަރަށް އުނދަގޫ ކަމެކެވެ.

ކުރީގެ ޗެލްސީ ފޯވާޑް، ހަޒާޑް ރެއާލް މެޑްރިޑަށް ބަދަލުވި ފަހުން 13 މެޗު ކުޅެފައިވާއިރު، ކާމިޔާބުކުރެވިފައި ވަނީ އެންމެ ގޯލެކެވެ. ފިޓްނަސް އާއި، އަނިޔާގެ މައްސަލަތަކާއި ކުރިމަތިވެފައިވާ ކުޅުންތެރިޔާ އަށް ރެއާލް މެޑްރިޑުން އުންމީދުކުރިވަރާއި ގާތަށް ވެސް އޭނާގެ ކުޅުން ދެއްކިފައި ނުވެއެވެ. މިހާރުވެސް އަނިޔާގައި ހުރި ހަޒާޑް މިރޭ އޮންނަ އެލް ކްލެސިކޯ މެޗުގައި ބައިވެރިވި ނުވެވޭއިރު، ކުޅުމުގެ ތެރެއަށް އަނބުރާ އާދެވޭނީ އަންނަ ޖެނުއަރީ މަހުގެ މެދުތެރޭގައި ކަމަށް ޚަބަރުތައް ބުނެއެވެ.

“ހަޒާޑުގެ ބައިވަރު ކޮލިޓީ އެބަހުރި. އޭނައަކީ އިދިކޮޅު ޓީމުތައް ހަމައިން ނައްޓާލެވޭނެ ފަދަ ކުޅުންތެރިއެއް. އެކަމަކު އަހަރެންނަށް ވިސްނޭގޮތުގައި އޭނާ އާއި ރޮނާލްޑޯ އާއި ތަފާތު. ރޮނާލްޑޯ ގެ ހުންނަނީ އެހެން ކޮލިޓީތަކެއް.”

“ރޮނާލްޑޯ ނެތް ތަން ފޫބެއްދުމަަކީ ވަރަށް އުނދަގޫ ކަމެއް. އެކަމަކު ހަޒާޑަަކީ ވެސް މޮޅު ކުޅުންތެރިއެއް.” މެސީ ބުނެފައިވެއެވެ.

މެސީ އިތުރަށް ބުނެފައިވާގޮތުގައި ބާސެލޯނާ ގެ ކޭމްޕް ނޫ ސްޓޭޑިއަމްގައި ކުޅުމަށް ވުރެ ރެއާލް މެޑްރިޑް ގެ ސެންޓިއާގޯ ބެރްނެބުއޭ ސްޓޭޑިއަމްގައި ކުޅެން އޭނާ އަށް މާ ފަސޭހައެވެ. ސަބަބަކީ ސެންޓިއާގޯ ބެރްނެބުއޭ ސްޓޭޑިއަމްގައި ކުޅޭ އިރު ރެއާލް އިން ކުޅެނީ އެޓޭކިންގް ގޭމެއް ކަމުން ބާސާ އަށް ކުޅެން ފަސޭހަވެގެންދާ ކަމަށް މެސީ ބުނެފައިވެއެވެ. ނަމަވެސް ކޭމްޕް ނޫ ގައި ރެއާލް އިން ޑިފެންސިވްކޮށް ކުޅެމުން ބޮޑަަށް ބަލަނީ ކައުންޓަރ އެޓޭތަކުގައި ނުރައްކާ ކުރުމަށް ކަމަށާއި، އެހެންވެ ބާސާ އަށް އަސްލު ކުޅުން ކުޅެން އުނދަގޫވާ ކަމަށެވެ.

މިރޭ  ބާސެލޯނާ އާއި ރެއާލް މެޑްރިޑް ގެ ވަރުގަދަ ކުރިމަތިލުން އޮންނާއެވެ. އެލް ކްލެސިކޯ ގެ ތާރީޚުގައި މި ދެޓީމު ރަސްމީކޮށް 242 ފަހަރު ވަނީ ބައްދަލުކޮށްފައިވެއެވެ. މީގެތެރެއިން 96 ފަހަރު ބާސެލޯނާ މޮޅުވެފައި ވާއިރު، ރެއާލް މެޑްރިޑް މޮޅުވެފައި ވަނީ 95 ފަހަރުގައެވެ. އަނެއް 51 މެޗު ނިމުނީ އެއްވަރުވެގެންނެވެ. ރަހުމަތްތެރިކަމުގެ 33 މެޗު ކުޅެފައިވާއިރު، ބާސެލޯނާ 19 މެޗުން މޮޅުވިއިރު، ރެއާލް މެޑްރިޑް މޮޅުވެފައި ވަނީ 4 މެޗުގައެވެ. އަނެއް 10 މެޗު ނިމުނީ އެއްވަރުވެގެންނެވެ. އެހެންކަމުން މުޅި ޖުމްލަ އަދަދުތަކަށް ބަލާއިރު، ބާސެލޯނާ 115 ފަހަރު މޮޅުވެފައިވާއިރު، ރެއާލް މެޑްރިޑް މޮޅުވެފައި ވަނީ 99 ފަހަރުގައެވެ. 61 މެޗު ނިމިފައި ވަނީ އެއްވަރުވެގެންނެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: