​ހަނިމާދޫ ޒުވާނުންގެ ޖަމުޢިއްޔާއިން އިންތިޒާމު ކޮށްގެން ކުރިއަށް ގެންދާ އާދަމް ސަލީމް ކަޕް 2019 ފުޓްބޯޅަ މުބާރާތުގެ ފަހު ޖާގަ ރިއަލް ސްޓާރސްއިން ކަށަވަރުކޮށްފިއެވެ.

މިއަދު ހަވީރު ހަނިމާދޫ ރަސްމީ ފުޓްބޯޅަ ދަނޑުގައި ކުޅުނު ސެމީފައިނަލު މެޗު އަހުލީއާއި ވާދަކޮށް ރިއަލް ސްޓާރސް ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުން ދާދި ހަމަހަމަ ކުޅުމެއް ފެނިގެން ދިޔަ ނަމަވެސް ރިއަލް ސްޓާރސްއަށް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބިގެން ގޮސްފައެވެ. މި ގޮތުން މެޗުގެ ފުރަތަމަ ދިހަ މިނެޓުގެ ތެރޭގައި ރިއަލް ސްޓާރސްގެ ޖޯޒީ ނަންބަރު 37 މުހައްމަދު ނައުޝާދަށް ލިބުނު ހުސް ފުރުސަތު ފާހަގަ ކުރެވެއެވެ. އެ ހަމަލާ ދިފާއު ކޮށްފައިވަނީ އަހުލީގެ ގޯލު ކީޕަރެވެ. މީގެ އިތުރުން  ފުރަތަމަ ހާފުގައި ހަމަ އެޓީމުގެ ޖޯޒީ ނަންބަރު 5 އަބްދުﷲ މިސްބާހު ބޮޑު އޭރިއާގެ ބޭރުން ފޮނުވައިލި ބާރު ހަމަލާ ފާހަގަ ކުރެވެއެވެ. މި ހަމަލާ ވެސް ދިފާއު ކޮށްފައިވަނީ ފުރަތަމަ ހާފުގައި މޮޅުކުޅުމެއް ދެއްކި އަހުލީގެ ގޯލު ކީޕަރެވެ. ފުރަތަމަ ހާފު ނިމިގެން ގޮސްފައިވަނީ ދެ ޓީމުންކުރެ އެއްވެސް ޓީމަކަށް ލަނޑެއް ނުޖެހި 0-0 ގެ ނަތީޖާއިން ދެ ޓީމު އެއްވަރު ވެގެންނެވެ.

މިއަދުގެ މެޗުގެ ފަހު ހާފުގައި ގިނަ ވަގުތު ބޯޅަ ކޮންޓްރޯލު ކޮށްގެން ކުޅެފައިވަނީ ރިއަލް ސްޓާރސްއިންނެވެ. މެޗުގައި ފެނިގެންދިޔަ ދެ ލަނޑު ވެސް ފެނިގެން ގޮސްފައިވަނީ މި ހާފުގައެވެ. މިގޮތުން ފުރަތަމަ ލަނޑު ރިއަލް ސްޓާރސްއިން ކާމިޔާބު ކޮށްފައިވަނީ މެޗުގެ 48 ވަނަ މިނެޓުގައެވެ. މި ލަނޑު ކާމިޔާބު ކޮށްދީފައި ވަނީ އެ ޓީމުގެ ޖޯޒީ ނަންބަރު 11 މުހައްމަދު ނާފިޒެވެ. މެޗުގެ ނަތީޖާ ހަމަހަމަ ކުރުމަށް އެންމެ ރަނގަޅު ފުރުޞަތެއް ލިބިގެން ގޮސްފައިވަނީ އަހުލީ ޓީމުގެ ޖޯޒީ ނަންބަރު 12 އަލީ ހުސައިނަށެވެ. އަހުލީގެ ޖޯޒީ ނަންބަރު 7 ޠާހާ ޚާލިދު ރިއަލް ސްޓާރސްގެ އޭރިއާގެ ތެރެއަށް ހުރަސްކުރި ބޯޅަ އަލީ ހުސެއިން މުޅިން ހުސްކޮށް ހުރެ ބޮލުން ފޮނުވައިލި ނަމަވެސް އެ ބޯޅަ ގޮސްފައިވަނީ އަރިމަތީ ދަނޑި ކައިރިން ބޭރަށެވެ. އެކަތީގެ ތަފާތުން މެޗު ނިމެންދަނިކޮށް މެޗުގެ އިތުރު ވަގުތުގެ ގޮތުގައި ދެއްކި ތިން މިނެޓުގެ ތެރޭގައި ރިއަލް ސްޓާރސްއަށް ދެވަނަ ލަނޑު ކާމިޔާބު ކޮށްދީފައިވަނީ އެ ޓީމުގެ ޖޯޒީ ނަންބަރު 11 ނޫރުﷲ ޠާހާއެވެ. މި ލަނޑާއިއެކު މެޗު ކާމިޔާބުކޮށް ރިއަލް ސްޓާރސްވަނީ ފައިނަލުގެ ޖާގަ ކަށަވަރު ކޮށްފައެވެ.

މިއަދުގެ މެޗުގެ މޮޅު ކުޅުންތެރިއަކަށް ހޮވިފައިވަނީ ރިއަލް ސްޓާރސްގެ ޖޯޒީ ނަންބަރު 23 މުޙައްމަދު ހަސަނެވެ. މޮޅު ކުޅުންތެރިޔާއަށް އިނާމު ހަވާލުކޮށްދެއްވީ 18 ވަނަ ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރުކަން ކުރައްވައި އަދި ހަނިމާދޫ ޒުވާނުންގެ ޖަމުޢިއްޔާގެ ދެ ދައުރުގެ ރައީސްކަން ވެސް ކުރައްވާފައިވާ އަލްފާޟިލް ހުސައިން ޝަހުދީއެވެ.

މި މުބާރާތު ފައިނަލު މެޗު އޮންނާނީ 28 ޑިސެމްބަރ 2019 ވާ ހޮނިހިރު ދުވަހު ހަނިމާދޫ ރަސްމީ ފުޓުބޯޅަ ދަނޑުގައެވެ. ފައިނަލުގައި ބައްދަލު ކުރާނީ ޓީމް ރިއަލް ސްޓާރސްއާއި ޓީމް ޝީލްޑެވެ. މި މެޗު ފެށުމަށް ހަމަޖެހިފައިވަނީ އެ ދުވަހުގެ 15:45 ގައެވެ.

ލިޔުންތެރިޔާގެ ފުރަމަލަ

އިބްރާހިމް ޚަލީލް
އިބްރާހިމް ޚަލީލް
މުނިއަވަސްގެ ޑެޕިއުޓީ އެޑިޓަރ އިބްރާހިމް ޚަލީލްގެ ޚާއްޞަ ދާއިރާ ތަކަކީ ދީނީ، އިޖްތިމާޢީ އަދި އަދަބިއްޔާތެވެ. ކަރަންޓް އެފެއާޒަކީވެސް އޭނާ ފަރިތަ ދާއިރާއެކެވެ.

ގުޅުންހުރި ލިޔުން: