ހަނިމާދޫ ޒުވާނުންގެ ޖަމުޢިއްޔާއިން އިންތިޒާމު ކޮށްގެން ކުރިއަށް ގެންދިޔަ އާދަމް ސަލީމް ކަޕް 2019 ފުޓްބޯޅަ މުބާރާތުގެ ޗެމްޕިއަންކަން ރިއަލް ސްޓާރސްއިން ހޯދައިފިއެވެ.

މިއަދު ހަވީރު ހަނިމާދޫ ރަސްމީ ފުޓްބޯޅަ ދަނޑުގައި ކުޅުނު ފައިނަލު މެޗު ޓީމް ޝީލްޑާއި ވާދަކޮށް ރިއަލް ސްޓާރސް ކާމިޔާބު ކޮށްފައިވަނީ 3-1 ގެ ނަތީޖާއަކުންނެވެ.

މިއަދު މެޗުގެ ފުރަތަމަ ހާފުގެ ފުރަތަމަ ފަނަރަވަރަކަށް މިނެޓު ރިއަލް ސްޓާރސްއިން ވަނީ ވަރަށް ރަނގަޅަށް ކުޅެފައެވެ. މިގޮތުން މެޗު ފެށިތާ ސާޅިސް ފަސް ސިކުންތު ތެރޭ އެ ޓީމުންވަނީ ލަނޑު ޖަހާފައެވެ. މި ލަނޑު އެ ޓީމަށް ކާމިޔާބު ކޮށްދީފައި ވަނީ އެ ޓީމުގެ ޖޯޒީ ނަންބަރު 5 އަބްދުﷲ މިސްބާހުއެވެ. މި ލަނޑަކީ މި މުބާރާތުގައި ފެނިގެން ދިޔަ އެންމެ އަވަސް ލަނޑެވެ. މެޗުގެ ދެވަނަ ލަނޑު ރިއަލް ސްޓާރސްއިން ކާމިޔާބުކޮށްފައި ވަނީ މެޗުގެ 9 ވަނަ މިނެޓުގައެވެ. އެ ލަނޑު ކާމިޔާބު ކޮށްދީފައިވަނީ ރިއަލް ސްޓާރސްގެ ޖޯޒީ ނަންބަރު 37 މުހައްމަދު ނައުޝާދުއެވެ. މި ލަނޑަށްފަހު ޝީލްޑުން ކުޅުން ރަނގަޅު ކުރިތަން ފެނިގެން ދިޔައެވެ. މިގޮތުން 35 ވަނަ މިނެޓުގައި އެ ޓީމުގެ ޖޯޒީ ނަންބަރު 14 އަހުމަދު މުޖުތަބާ ވަނީ ލަނޑެއްޖަހައި ޝީލްޑަށް އުންމީދު އައުކޮށްދީފައެވެ. ފުރަތަމަ ހާފު ނިމިގެން ގޮސްފައިވަނީ 2-1 ގެ ނަތީޖާއިން ރިއަލް ސްޓާރސް ކުރީގައި އޮވެގެންނެވެ.

ދެވަނަ ހާފުގައި ދެ ޓީމުގެ ފަރާތުން ވެސް ފެނިގެން ގޮސްފައިވަނީ ދާދި ހަމަހަމަ ކުޅުމެކެވެ. ނަމަވެސް ލަނޑު ޖަހާނެ ރަނގަޅު ފުރުޞަތު ލިބިގެން ގޮސްފައިވަނީ ރިއަލް ސްޓާރސްއަށެވެ. މިގޮތުން ލިބުނު ހިލޭ ޖެހުމަކުން ރިއަލް ސްޓާރސްގެ ތިންވަނަ ލަނޑު 54 ވަނަ މިނެޓުގައި ކާމިޔާބު ކޮށްދީފައިވަނީ މިއަދު މެޗުގައި މޮޅުކުޅުމެއް ކުޅުނު އެ ޓީމުގެ ޖޯޒީ ނަންބަރު 13 މުޙައްމަދު އަބްދުލް ޤަފޫރެވެ. މެޗު ނިމިގެން ގޮސްފައިވަނީ 3-1 ގެ ނަތީޖާއިން ރިއަލް ސްޓާރސް ކުރީގައި އޮވެގެންނެވެ.
މިއަދުގެ މެޗަށްފަހު މުބާރާތުގެ ނިންމުމުގެ ރަސްމިއްޔާތުގައި މުބާރާތް ކުރިއަށް ގެންދިއުމަށް އެހީތެރިކަން ފޯރުކޮށްދެއްވި ފަރާތްތަކުގެ އަގުވަޒަން ކުރުމާއި މުބާރާތުގެ އެކިއެކި ވަނަތަކަށް ހޮވުނު ފަރާތްތަކަށް އިނާމު ހަވާލުކޮށްފައި ވެއެވެ. މިގޮތުން މުބާރާތް ކުރިއަށް ގެންދިއުމަށް އެހީތެރިކަން ފޯރުކޮށްދެއްވި ފަރާތްތަކަށް ސެޓްފިކެޓް ހަވާލުކޮށްދެއްވީ ހަނިމާދޫ ޒުވާނުންގެ ޖަމުޢިއްޔާގެ ރައީސް ހުސެއިން ވަހީދުއެވެ. މުބާރާތް ކުރިއަށް ގެންދިއުމަށް އެހީތެރިކަން ފޯރުކޮށްދެއްވި ފަރާތްތަކުގެ ތެރޭގައި މުބާރާތުގެ މެއިން ސްޕޮންސަރ ހެޕީމާކެޓް، ހަނިމާދޫ ކައުންސިލުގެ އިދާރާ، ރަބޯނާ ސްޕޯޓްސް، ބީ ތްރީ ކޮންސްޓްރަކްޝަން، ހަނިމާދޫ ޕޮލިސް، ހަނިމާދޫ ސިއްހީ މަރުކަޒު، ހަނިމާދޫ ސްކޫލް، ސާއްބަ އެކުވެރި ކުލަބު، ހަނިމާދޫ އިންޓަރނޭޝަނަލް އެއާރޕޯޓް، އޭވިއޭޝަން ސެކުރިޓީ ކޮމާންޑު، އަލޫފް ފިހާރަ، ޕެންޓަގުރާމް، އިޔާމް ޝޮޕް އަދި ހުސައިން ޝަހުދީ ހިމެނެއެވެ.

މުބާރާތުގެ ރެފްރީކަން ކޮށްދެއްވާފައިވާ ފަރާތްތަކަށް އަގުވަޒަން ކުރުމުގެ މެޑަލް ހަވާލު ކޮށްދެއްވީ ހަނިމާދޫ ޕޮލިސްޓޭޝަން އިންޗާޖު މުހައްމަދު ޝަކީލެވެ. މީގެ އިތުރުން މުބާރާތުގެ އެކިއެކި ވަނަތަކަށް ހޮވުނު ކުޅުންތެރިންނަށް އިނާމު ހަވާލު ކޮށްދެއްވީ 18 ވަނަ ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރުކަން ކުރައްވާފައިވާ އަދި ހަނިމާދޫ ޒުވާނުންގެ ޖަމުޢިއްޔާގެ ދެ ދައުރުގެ ރައީސްކަން ވެސް ކުރައްވާފައިވާ މި ޖަމުޢިއްޔާގެ މެމްބަރު ހުސެއިން ޝަހުދީއެވެ. ފައިނަލު މެޗުގެ މޮޅު ކުޅުންތެރިއަކަށް ހޮވިފައިވަނީ ރިއަލް ސްޓާރސްގެ ޖޯޒީ ނަންބަރު 13 މުޙައްމަދު އަބްދުލް ޤަފޫރެވެ. އަދި މީގެ އިތުރުން މުބާރާތުގެ އެންމެ މޮޅު ޑިފެންސް ކުޅުންތެރިއަކަށް ވެސް ހޮވިފައިވަނީ އޭނާއެވެ. މުބާރާތުގެ އެންމެމޮޅު މިޑްފީލްޑު ކުޅުންތެރިއަކަށް ރިއަލް ސްޓާރސްގެ ޖޯޒީ ނަންބަރު 05 އަބްދުﷲ މިސްބާހު ހޮވިފައިވާއިރު، ހަ ލަނޑު ޖަހައިގެން މުބާރާތުގެ އެންމެ ގިނަ ލަނޑު ޖެހި ކުޅުންތެރިއަކަށް ހޮވިފައިވަނީ ހަމަ އެ ޓީމުގެ ޖޯޒީ ނަންބަރު 10 ނޫރުﷲ ޠާހާއެވެ. މުބާރާތުގެ އެންމެ މޮޅު ގޯލް ކީޕަރަކަށް ޝީލްޑުގެ ގޯލްކީޕަރު މައްސޫދު އާދަމް ހޮވުނުއިރު މުބާރާތުގެ އެންމެ މޮޅު ފޯވާޑު އަދި މުބާރާތުގެ ހުރިހާ ގޮތަކުން އެންމެ މޮޅު ކުޅުންތެރިއަކަށް ހޮވިފައިވަނީ ޝީލްޑު ޓީމުގެ ޖޯޒީ ނަންބަރު 11 އާސިފް ސަލީމެވެ.

މުބާރާތުގެ ފެއާރޕްލޭ ޓީމް، ރަނަރަޕް ޓީމް އަދި ޗެމްޕިއަން ޓީމަށް މެޑަލްއާއި ޓްރޮފީ ހަވާލުކޮށްދެއްވީ މިއަދު މެޗުގެ ޝަރަފުވެރި މެހެމާނު، މި މުބާރާތުގެ މެއިން ސްޕޮންސަރ ކަމުގައިވާ ހެޕީމާކެޓްގެ ސީއީއޯ އަލީ އިހުސާނެވެ. މުބާރާތުގެ ފެއާރޕްލޭ ޓީމަކަށް ހޮވިފައިވަނީ ޔޫތު ފުރެނޑްސްއެވެ. މުބާރާތުގެ ރަނަރަޕް ޓީމަކަށް ޝީލްޑު ހޮވިފައިވާއިރު އެ ޓީމަށް ވަނީ ތިން ހާސް ރުފިޔާގެ ފައިސާގެ އިނާމެއް ދީފައެވެ. މި މުބާރާތުގެ ޗެމްޕިއަންކަން ހޯދި ޓީމަށް ޗެމްޕިއަން ޓްރޮފީ އާއި ދިހަހާސް ރުފިޔާގެ ފައިސާގެ އިނާމެއް ހަވާލުކޮށްފައިވެއެވެ.

ހަނިމާދޫ ޒުވާނުންގެ ޖަމުޢިއްޔާއިން އިންތިޒާމުކޮށްގެން ކުރިއަށް ގެންދިޔަ މި މުބާރާތުގައި އެކި ގޮތްގޮތުން އެހީތެރިކަން ފޯރުކޮށްދެއްވި އެންމެހައި ފަރާތްތަކަށް އެ ޖަމުޢިއްޔާއިންވަނީ ޝުކުރު އަދާކޮށްފައެވެ. ވަކިން ހާއްޞަކޮށް ހެޕީމާކެޓްގެ ނަން ފާހަގަކޮށް އެ ފަރާތަށް ވަނީ ހާއްޞަ ޝުކުރެއް ދަންނަވާފައެވެ.

ލިޔުންތެރިޔާގެ ފުރަމަލަ

އިބްރާހިމް ޚަލީލް
އިބްރާހިމް ޚަލީލް
މުނިއަވަސްގެ ޑެޕިއުޓީ އެޑިޓަރ އިބްރާހިމް ޚަލީލްގެ ޚާއްޞަ ދާއިރާ ތަކަކީ ދީނީ، އިޖްތިމާޢީ އަދި އަދަބިއްޔާތެވެ. ކަރަންޓް އެފެއާޒަކީވެސް އޭނާ ފަރިތަ ދާއިރާއެކެވެ.

ގުޅުންހުރި ލިޔުން: