ކޮޅުމަޑުލު ތިމަރަފުށި އަދި ކިނބިދޫ ދާއިރާގެ ރަށްތަކަށް ހުޅުވާލައިގެން، ތިމަރަފުށީ ދާއިރާގެ މަޖިލިސް މެންބަރު އޮނަރަބަލް އަބްދުﷲ ރިޔާޒް ބާއްވާ “އެމްޕީ ކަޕް 2019” ފުޓްބޯޅަ މުބާރާތުގައި ތިމަރަފުށި އަދި ވަންދޫ ބައްދަލުކުރި މެޗު 1-1 ގެ ނަތީޖާއަކުން އެއްވަރުވެގެން ނިމިއްޖެއެވެ.

ތިމަރަފުށީ ފުޓްބޯޅަ ދަނޑުގައި ކުޅުނު މި މެޗުގައި ދެޓީމުގެ ފަރާތުން ވެސް ފެނިގެންދިޔައީ ހަމަހަމަ ކުޅުމެއްކަން ފާހަގަކޮށްލެވެއެވެ. ތިމަރަފުށީ ޓީމުން ކުޅުނު ފުރަތަަމަ މެޗާއި އަޅާ ބަލާއިރު، މިއަދުގެ މެޗުން އެޓީމު ފަރާތުން ފެނުނީ ތަންކޮޅެއް އާދައިގެ ކުޅުމެކެވެ. މިއަދުގެ މެޗުގެ ފުރަތަަމަ ގޯލު ފުރަތަަމަ ހާފުގައި ކާމިޔާބުކުރީ ވަންދޫ ޓީމުންނެވެ. ފުރަތަަމަ ހާފުގެ 25 ވަނަ މިނެޓުގައި ވަންދޫ ޓީމުގެ ފޯވާޑު ޝިޔާޒް އިބުރާހިމް މި ގޯލު ކާމިޔާބުކުރީ ވަރަށް ރީތިކޮށް ތިމަރަފުށީ ކީޕަރުގެ ބޯމަތިން ބޯޅަ ގޯލުގެ ތެރެއަށް އޮއްސާލައިގެންނެވެ. ފުރަތަަމަ ހާފު ނިމުނީ 1-0 ގެ ނަތީޖާއަކުން ވަންދޫ ކުރީގައި އޮވެގެންނެވެ.

ދެވަނަ ހާފުގައި ދެ ޓީމުގެ ފަރާތުން ވެސް ގޯލު ޖަހާނެ މާގިނަ ފުރުސަތުތަކެއް އުފައްދާފައި ނުވެއެވެ. ނަމަވެސް މެޗުގެ ފަހު ދިހަވަރަކަށް މިނެޓް ތިމަރަފުށީ ޓީމުން ފެނުނީ ވަރަށް ނުރައްކާތެރިކޮށް ކަން ފާހަގަކޮށްލެވެއެވެ. ތިމަރަފުށީ ޓީމުގެ ގޯލު ފެނިގެން ދިޔައީ މެޗުގެ ފުރިހަމަ ވަގުތު ހަމަވާން އެއް މިނެޓަށް ވެފައިވަނިކޮށެވެ. 89 ވަނަ މިނެޓުގައި ތިމަރަފުށީ ޓީމުގެ ފޯވާޑު އާދަމް ނާސިހު ވަންދޫ ޕެނަލްޓީ އޭރިއާގެ އަރިމަތިން ވަރަށް ރީތިކޮށް ނަގައިދިން ހުރަހެއް އެޓީމުގެ ސެންޓްރަލް ފޯވާޑު އަހުމަދު ތޯހިރު ވަނީ ގޯލުގެ ތެރެއަށް ވައްދާލާފައެވެ. މިއީ ތޯހިރު މި މުބާރާތުގައި ކާމިޔާބުކުރި ތިންވަނަ ގޯލުކަން ފާހަގަކޮށްލެވެއެވެ.

މިއަދުގެ މެޗުގެ މޮޅު ކުޅުންތެރިއަކަށް ހޮވުނީ ތިމަރަފުށި ކުޅުނު ފުރަތަަމަ މެޗުގައި ވެސް މޮޅު ކުޅުންތެރިޔާގެ މަގާމު ހޯދި އަހުމަދު ތޯހިރު އެވެ.

މެޗުގެ މޮޅުކުޅުންތެރިޔާ އަށް ޓްރޮފީ ހަވާލުކޮށްދެއްވަނީ / ފޮޓޯ: އަހުމަދު ނާސިރު

މި މެޗުން އެއްވަރުވުމުން ލިބުނު ޕޮއިންޓާއެކު ކުޅުނު ދެ މެޗުން ހަތަރު ޕޮއިންޓު ހޯދައިގެން ތިމަރަފުށި އޮތީ ތާވަލުގެ އެއްވަނައިގައެވެ. އެއް މެޗު ކުޅެ ލިބުނު ތިން ޕޮއިންޓާއެކު ތާވަލުގެ ދެވަނައިގައި ވޭމަންޑޫ އޮތްއިރު، ތިންވަނައިގައި އެއް ޕޮއިންޓާއެކު އޮތީ ވަންދޫ އެވެ. ހަތަރުވަނައިގައި އެއްވެސް ޕޮއިންޓެއް ނުލިބި ބައިކޮޅަށް ވަން ގޯލުގެ ތަފާތުން ހިރިލަންދޫ އޮތްއިރު، އެންމެ ފުލުގައި ޕޮއިންޓެއް ނުލިބި އޮތީ ކަނޑޫދޫ އެވެ.

މި މުބާރާތުގެ މެޗެއް މާދަމާ ވެސް ކުޅުމަށް ވަނީ ހަމަޖެހިފައެވެ. މާދަމާ ހަވީރު 16:00 ގައި ބައްދަލުކުރާނީ ކަނޑޫދޫ އަދި ހިރިލަންދޫ އެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: