ކޮޅުމަޑުލު ތިމަރަފުށި އަދި ކިނބިދޫ އަދި ދާއިރާގެ ރަށްތަކަށް ހުޅުވާލައިގެން، ތިމަރަފުށީ ދާއިރާގެ މަޖިލިސް މެންބަރު އޮނަރަބަލް އަބްދުﷲ ރިޔާޒް ބާއްވާ “އެމްޕީ ކަޕް 2019” ފުޓްބޯޅަ މުބާރާތުގައި ހިރިލަންދޫ އަދި ކަނޑޫދޫ ބައްދަލުކުރި މެޗު 7-1 ގެ ތަފާތުބޮޑު ނަތީޖާއަކުން ހިރިލަންދޫ ކާމިޔާބުކޮށްފިއެވެ.

ތިމަރަފުށީ ފުޓުބޯޅަ ދަނޑުގައި ކުޅުނު މި މެޗުގެ އެއް ގޯލު ފިޔަވައި، އެހެން ހުރިހާ ގޯލެއް ޖަހާފައިވަނީ ފަހު ހާފުގައި ކަން ފާހަގަކޮށްލެވެއެވެ. މެޗުގެ ފުރަތަަމަ ގޯލު ފުރަތަމަ ހާފު ނިމެން އުޅެނިކޮށް ކާމިޔާބުކުރީ މުޅި މެޗު ކޮންޓްރޯލްކޮށްގެން ކުޅެމުންދިޔަ ހިރިލަންދޫ ޓީމުންނެވެ. 38 ވަނަ މިނެޓުގައި ހިރިލަންދޫ ޓީމަށް މި ގޯލު ކާމިޔާބުކޮށްދިނީ މެޗުގައި މޮޅުކުޅުމެއް ދެއްކި މުހައްމަދު އާޒިމް އެވެ.

ދެވަނަ ހާފު ފެށުނުތަނާ ހިރިލަންދޫ ޓީމުން ވަނީ ގޯލެއް ޖަހާ ލީޑު ފުޅާކޮށްފައެވެ. 47 ވަނަ މިނެޓުގައި މި ގޯލު ކާމިޔާބުކޮށްދިނީ މޫސާ ފަޔާޒު އެވެ. 60 ވަނަ މިނެޓުގައި މޫސާ ފަޔާޒު ވަނީ އިތުރު ގޯލެއް ޖަހާ މެޗުގެ ނަތީޖާ 3-0 އަށް ބަދަލުކޮށްލާފައެވެ. ގިނައިރު ބޯޅަ ހިފަހައްޓައިގެން މޮޅަށް ކުޅެ، ގިނަ ހަމަލާތައް އުފައްދަމުން ދިޔަ ހިރިލަންދޫ ޓީމުގެ ހަތަރުވަނަ ގޯލު 62 ވަނަ މިނެޓުގައި ކާމިޔާބުކޮށްދިނީ ފުރަތަަމަ ގޯލުވެސް ކާމިޔާބުކޮށްދިން މުހައްމަދު އާޒިމް އެވެ. މި ގޯލު ކާމިޔާބުކުރި ތަން ތިން މިނެޓު ފަހުން އޭނާ ވަނީ އިތުރު ގޯލެއް ޖަހާ ހެޓްރިކް ފުރިހަމަކޮށްފައެވެ. މިއީ މި މުބާރާތުގައި ފެނުނު ފުރަތަަމަ ހެޓްރިކް ކަން ފާހަގަކޮށްލެވެއެވެ. ކަނޑޫދޫ ޓީމުން ޖެހި ހަމަ އެކަނި ގޯލު 75 ވަނަ މިނެޓުގައި ކާމިޔާބުކޮށްދިނީ މުހައްމަދު ޒިދާން އެވެ. ހިރިލަންދޫ ޓީމުގެ ފަސްވަނަ ގޯލު 76 ވަނަ މިނެޓުގައި އިސްމާއިލް އަޒުހާން ކާމިޔާބުކޮށްދިން އިރު، އޭގެ ދެ މިނެޓު ފަހުން އެޓީމުގެ ހަތްވަނަ ގޯލު ކާމިޔާބުކޮށްދިނީ މުހައްމަދު ނިޝާހް އެވެ.

މިއަދުގެ މެޗުގެ މޮޅު ކުޅުންތެރިއަކަށް ހޮވުނީ ހިރިލަންދޫ ޓީމަށް ތިން ގޯލު ކާމިޔާބުކޮށްދިން މުހައްމަދު އާޒިމް އެވެ.

މެޗުގެ މޮޅުކުޅުންތެރިޔާ އަށް ޓްރޮފީ ހަވާލުކޮށްދެއްވަނީ / ފޮޓޯ: އަހްމަދު ޔަސައު

މި މެޗުން މޮޅުވުމާއެކު ކުޅުނު ދެމެޗުން ލިބުނު ތިން ޕޮއިންޓާއެކު ފައިދާ ގޯލުގެ ތަފާތުން ހިރިލަންދޫ އޮތީ ތާވަލުގެ ދެވަނައިގައެވެ. ދެ މެޗުން ލިބުނު ހަތަރު ޕޮއިންޓާއެކު ތާވަލުގެ އެއްވަނައިގައި ތިމަރަފުށި އޮތްއިރު، އެއް މެޗު ކުޅެ ލިބުނު ތިން ޕޮއިންޓާއެކު ތާވަލުގެ ތިންވަނައިގައި އޮތީ ވޭމަންޑޫ އެވެ. ހަތަރުވަނައިގައި އެއް ޕޮއިންޓާއެކު ވަންދޫ އޮތްއިރު، އެންމެ ފުލުގައި ޕޮއިންޓެއް ނުލިބި އޮތީ ކަނޑޫދޫ އެވެ.

މި މުބާރާތުގެ މެޗެއް މާދަމާ ވެސް ކުޅުމަށް ވަނީ ހަމަޖެހިފައެވެ. މާދަމާ ހަވީރު 16:00 ގައި ބައްދަލުކުރާނީ ވޭމަންޑޫ އަދި ވަންދޫ އެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: