| MUNIAVAS

ފޯކުލޯރާއި ފުލޯކު ވާހަކައަކީ ތަފާތު ދޭއްޗެކެވެ. ފުލޯކު ވާހަކަ ތަކަކީ އެއްވެސް ހަގީގަތެއްނެތް ވާހަކަ ތަކެއް ކަމުގައިވިޔަސް، ފޯކުލޯރުގައި ކޮންމެވެސް ވަރަކަށް ހަގީގަތް އެކުލެވިގެން ވެއެވެ. އެއީ އެކި ގައުމު ތަކުގައާއި މުޖުތަމައު ތަކުގައި ދޫދޫމަތިން ދެކެވެމުން އަންނަ ވާހަކަތައް ޒަމާން ވީވީހެން ބަދަލުވަމުން އައިސްފައި ހުންނަ ވާހަކަ ތަކެކެވެ. މިއީ މުޅިން ޚިޔާލީ ވާހަކަ ތަކެކޭ ބުނެވޭކަށް ނެތެވެ. ނަމަވެސް ޚިޔާލީ ބައިބައި މިފަދަ ވާހަކަ ތަކުގައި ހިމެނިފައި ހުރެއެވެ.

ބޭރުގެ ބަސްފޮތް ތަކުގައި ވާގޮތުން ފޯކުލޯރުގެ މާނައަކީ “މީހުންނާ ބެހޭ ވާހަކަ” އެވެ. މިއީ އެއްޖީލުން އަނެއް ޖީލަށް ވާރިދުވަމުން އަންނަ، މީހުންނާބެހޭ ނުރަސްމީ ވާހަކަތަކެކެވެ. މިއީ މިފަދަ ފޯކުލޯރެކެވެ.

އެއްއިރެއްގައި އއ. މަތިވެރިއަކީ އާބާދީ ބޮޑު، ބާރުގަދަ ރަށެކެވެ. އޭރު އެންމެ ގެޔެއްގައިވެސް ސާޅީހަކަށް ފިރިހެނުން ތިބޭކަމަށް ވެއެވެ. އެރަށުގައި 7 ކަތީބުންނާއި އެކަތީބުންގެ ވެރިޔަކަށް ބޮޑުކަތީބެއް (ރަސްކަތީބު) ހުރެއެވެ. ބޮޑުކަތީބުގެ އަމުރަށް ހުރިހާ ކަތީބުންވެސް ކިޔަމަން ވާންޖެހެއެވެ. މިމީހުން ތާކުންތާކު ނުޖެހޭ ގަވާއިދުތަކެއް ހަދައި ކައިރީގައިވާ ރަށްރަށުގެ މީހުންނަށް ދުއްޕާން ކުރަމުން ގެންދިޔައެވެ. އެ ގަވާއިދު ތަކުގެ ތެރޭގައި، އެއްވެސް ރަށެއްގެ ދޯންޏެއް މަތިވެރީ ފަޅަށް ވަދެއްޖެނަމަ، މަތިވެރީގެ އުތުރު ފަރާތު ގޮނޑުދޮށުން ވެލި ބާލިދީ އަކާއި ހޭޅިން މަގޫފަތް ކޯޅިއެއް ގެންދަން ޖެހެއެވެ.

އެއްދުވަހަކު އުކުޅަހު ދޯންޏެއް މި ގަވާއިދު މުގުރާލައިފިއެވެ. މަތިވެރީ ފަޅަށް ވަދެފައި އެކަންކަން ނުކޮށް ރަށަށް ދިޔައީއެވެ. މިކަމާ ރުޅިއައިސްގެން އަނެއްދުވަހު މަތިވެރީ ފިރިހެނުންތަކެއް ބަރަހަނާ ހާލުގައި ތިބެގެން އުކުޅަހަށް ގޮސް އެރަށަށް އަރާ ގޭގެއަށާއި ތަންތަނަށް ގެއްލުން ދިނެވެ. މިކަން ކުރީ އުކުޅަހު މީހުން މަހަށްދިޔަ ވަގުތު ބަލައިފައެވެ. އުކުޅަސް ހަލާކު ކުރުމަށްފަހު އަނބުރާ މަތިވެރިއަށް އައި މަގުމަތީ، އެއަތޮޅު ފަޅުރަށެއް ކަމުގައިވާ ވެލިދޫ (މިހާރު ރިސޯޓެއް) ކައިރިން އޮޔާދާ އެއްޗެއް ފެނިގެން ބެލިއިރު އެއީ ދޮން އަންހެނެއްގެ ގަބުރެކެވެ. އެމީހުން އެ ގަބުރާ ގުޅުން ހިންގިއެވެ.

އއ. މަތިވެރި ފިނޮޅު – ފޮޓޯ: ޝިރަން

މި ނުބައި އަމަލު ހިންގުމަށްފަހު ރަށަށް އައުމުން އެރަށް ނާމާންވެއްޖެއެވެ. ބަލިމަޑުކަމާއި ތަދުމަޑުކަން ވެރިވެއްޖެއެވެ. އެރަށަށް ދޭ އަވީގައިވެސް ހުންނަނީ ރީނދޫ ކުލައެވެ. ރައްޔިތުން ބަލިވާން ފަށައިފިއެވެ. އާދަޔާ ޚިލާފަށް ގިނައިން މީހުން މަރުވަމުން ދަނީއެވެ. އޭރު މަތިވެރީ މީހުންނަކީ ދީނީގޮތުން ހޭލުންތެރި ބައެއް ނޫނެވެ. ދީނީ ވާޖިބުތައް އަދާއެއް ނުކުރެއެވެ. އެމީހުން މައްޔިތުން ވަޅުލަމުން ގެންދިޔައީވެސް ހިތުހުރި ގޮތަކަށެވެ. ވަޅަށް ވައްޓާލާފައި ފަސް އަޅަނީއެވެ. ކަފުންވެސް ނުކޮށެވެ. މިގޮތަށް މީހުން ވަޅުލާފައިހުރި މަހާނަފާ ތަކެއް މިހާރުވެސްފެންނާން އެބަހުއްޓެވެ.

ދުވަހުން ދުވަހަށް އާބާދީ މަދުވާން ފަށައިފިއެވެ. ބަލިމަޑުކަމުގެ ސަބަބުންނާއި އެމީހުންކުރި ނުބައި އަމަލުގެ ކޯފާއެއްގެ ގޮތުންނެވެ. މީހުން މަދުވަމުންގޮސް ވިއްސަކަށް ނުވަތަ ދިހަވަރަކަށް މީހުންނަށް ވެއްޖެއެވެ.

މިކަމުން މިންޖުވޭތޯ މަތިވެރީ މީހުން ދ. އަތޮޅު ރިނބުދޫއަށް ގޮސް އެރަށުން ކަންވެރިޔަކު ގެނެސްފިއެވެ. އޭނާ ލަފާދިނީ ސަލާމަތުންތިބި މީހުންކޮޅު މަތިވެރިން ފައިބާ ކުޑަފޮޅުދޫއަށް ދިޔުމަށެވެ. މިކަމުން އަރައިގަނެވެންދެނެވެ. މިގޮތަށް ލަފާދިނުމަށްފަހު ކަންވެރިޔާ ފަންޑިތައިގެ މަސައްކަތް މަތިވެރީގައި ފައްޓައިފިއެވެ.

ފަންޑިތައިގެ މަސައްކަތް ކުރިއަށް ދިޔައިރު ކަންވެރިޔާ އޭނާގެ އެހީތެރިޔާއަށް އެންގީ ރަތް ހާލެއް ގެނެސް ކަތިލާފައި އޭނާ ދައްކާ ތަނެއްގައި ބޭއްވުމަށެވެ. އޭރު މަތިވެރިއާއި މަތިވެރީ ފިނޮޅު އޮތީ އެއްކޮށެވެ. ކަންވެރިޔާ އެންގި ގޮތަށް ކަންކުރުމުން އެ ރަތްހައު މަރަށް ތެޅެން ފަށައިފިއެވެ. ރަށްވެސް ގުޑަން ފަށައިފިއެވެ. އެވަގުތު ބޮޑު ރާޅެއް އަރައި އެ ހައު އޮތްތަން ގިރާލައި ބޮޑު ފުންގަނޑަކަށް ވެއްޖެއެވެ. މަތިވެރިއާ ފިނޮޅު ވަކިވީއެވެ.

އއ. މަތިވެރި ރޯޝަނީ މަގު – ފޮޓޯ: ޝިރަން

މީގެ އިތުރުން މަތިވެރީގެ މެދުން މަގެއް ކޮށަން ކަންވެރިޔާ އެންގިއެވެ. އަދި މީހުން ދިރިއުޅެން ވާނީ މަގުގެ އެއްފަރާތުގައި ކަމަށާއި އަނެއް ފަރާތުގައި ގެއަޅައިގެން ނުވާނެކަމަށް އެންގިއެވެ. މި މަގަށް މިހާރު ކިޔަނީ ރޯޝަނީ މަގެވެ. ކުރިން ކިޔަނީ ބޮޑުމަގެވެ. ރަށުގެ ހާލަތު ހަމައަކަށް އެޅުމުން، ކުޑަފޮޅުދޫއަށް ދިޔަ މީހުން އަނބުރާއައިސް މަތިވެރީގައި އަލުން ދިރިއުޅެން ފެށީއެވެ.