ކާމިޔާބު ވެބް ސީރީޒް “ހުވާ”ގެ ދިގު ސީޒަން ބްރޭކަށްފަހު، ސީޒަން 2 ގެ ފުރަތަމަ އެޕިސޯޑް ރޭ ދައްކައިފިއެވެ. “ހުވާ 02″ގެ ފުރަތަމަ އެޕިސޯޑާއެކު މި ސީޒަންއާމެދު ބެލުންތެރިންގެ ޝައުޤުވެރިކަން އިތުރުކޮށްފިއެވެ.

“ހުވާ 02”ގެ ފުރަތަމަ އެޕިސޯޑް ފެށިގެން ދިޔައީ މިންހާ (އައްޒަ) އާއި އާޒިމް (މުއާ) ގެ ހިތްގައިމު ލޯބީގެ މަންޒަރުތަކެއް ދައްކައިދޭ ލަވައަކުންނެވެ. ލަވައިގެ ތެރެއިން ޝައުނާ (ރިޝްފާ) އާއި ނާޒިމް (ފައިސަލް)ގެ ލޯބީގެ ބަގީޗާގައި މާފޮޅުވަމުންދާ އުފާވެރި މަންޒަރުތައްވެސް ފެނިގެންދިޔައެވެ. “ހުވާ”ގެ ފުރަތަމަ ސީޒަން ނިމިގެންދިޔައީ މި ދެ ޖޯޑުގެ ރޫޅިފައިވާ ޒަވާޖީ ޙަޔާތް، ދުވަސްގަނޑަކަށް ފަހު އަލުން ގުޅުނު ހިސާބުންނެވެ. ކައިވެންޏަށް ދުވަސްތަކެއް ވެފައިވީނަމަވެސް މިންހާގެ ހިތުގައި އާޒިމް އަށްޓަކައި ފޮރުވިފައި އޮތް ލޯބި ހާމަކުރެވުނު ހިސާބުންނެވެ. އެހެންކަމުން އެމީހުންގެ ލޯބީގެ ދުވަސްތައް މި ފެށުނީ އަދި ކިރިޔާއެވެ.

އެއްބަޔަކު އުފާކުރާއިރު އަނެއް ބަޔަކު ހިތާމައިގެ ވޭނުގައި އުޅެއޭ ބުނަނީ ތެދެކެވެ. ނާޒިމްގެ އުފާވެރި ޢާއިލާގެ އެންމެ ހަގަށް ހުންނަ ޣާނިމް (ދޮން އައްޔަ) ހުރީ އަދިވެެސް ހިތާމައިގައެވެ. ފުރަތަމަ ސީޒަންގައި ޣާނިމްގެ އާއިލާއަށް ސަހާ އޮޅުވާލައިގެން އުޅުނު ކަންތައްގަނޑު ފަޅާއެރި ހިސާބުން ދެމީހުންގެ ގުޅުން ގޯސްވެ ވަކިވާން ޖެހެއެވެ. ކޮންމެ ގޮތަކަށް ސަހާ ކަންތައްތައް ކުރިޔަސް، ސަހާ ދެކެ ޣާނިމް ވީ ހަގީގީ ލޯތްބެވެ. އެހެންވެ، ސަހާ ގެ ހަނދާނުގައި ޣާނިމް ވަގުތު ހޭދަކުރެއެވެ. ނަމަވެސް ޣާނިމް އަކީ މިޒާޖުގައި ސަކަ ގޮތެއް ހުންނަ މީހެއްކަމުން އޭނާގެ މާޒީގެ ކަޅު ޗެޕްޓަރު ލައްޕައިލަމުން ޢާއިލާއަށް ހިނިތުންވުން ގެނެސްދެއެވެ.

“ހުވާ ޝޫޓިންގައި ނަގާފައިވާ ފޮޓޯއެއް

ދެން ފެނިގެންދަނީ ޣާނިމް އާއި ނާޒިމްގެ އާއިލާއިން އުފާވެރި ދުވަހެއް ފަށާތަނެވެ. ޣާނިމް ވެސް އޭނާގެ ޙަޔާތުގެ ކަޅު ޗެޕްޓަރު ލައްޕައިލުމަށްފަހު އެވެ. ސަކަ މިޒާޖުގެ ޣާނިމްގެ އެ ނިންމުމުގައި ސާބިތުވެ ހުންނާނެކަން ނުވަތަ ނޫންކަން އެނގިގެންދާނީ ކުރިއަށް ހުރި އެޕިސޯޑުތަކުންނެވެ. އެހެންކަމުން އެކަމަށްޓަކައި ޖެހޭނީ އިންތިޒާރުކޮށްލާށެވެ.

ހައިޖާނުގެ ކަންފުޅެއްގެ ހިޔަނިވެސް އެޅިގެން ނުދާނޭ ހީވާހާ މަޖަލުގައި ދުވަސް ކުރިއަށް ދަނިކޮށް މުސީބާތެއް ފަދަ މަޢުރޫފް (އީސަ)، މިންހާއަށް ގުޅައެވެ. ދެމީހުންގެ ދެމެދުގައި ހޫނު ރައްދުތަކެއް ބަދަލުކުރެއެވެ.

މި ސީރީޒްގެ ފުރަތަ ސީޒަންގައި ނާޒިމް (ފައިސަލް) ގެ ޙަޤީޤީ ބައްޕަ ފުއާދު (އާޒިމްބެ ޢާޒިމް)، ނާޒިމަށް ޒަހަރު ދީގެން މަރައިލަން އުޅުމުގެ ތެރޭގައި އޭނާ އޭގެ އަމިއްލަ ޝިކާރައަކަށް ވުމަށްފަހު ދެން ކަންތައް ވީގޮތް ބަލަން ތިއްބާ ސީރީޒްގެ ސީޒަން ބްރޭކަށް ދިޔަ ހިސާބުން ބެލުންތެރިން ތިބީ ސުވާލުތަކެއް އުފެދިފައެވެ. ނާޒިމްގެ ބައްޕަ މަރުވީބާވައެވެ؟ އޭނާ މަރުން ސަލާމަތްވާނެބާވައެވެ؟ އާޒިމްބެގެ އަންހެން ދަރިފުޅު ޒޯޔާ (ނާއްކޮ) އަށް ވީ ކީއްބާވައެވެ؟ – މި ހުރިހައި ސުވާލުތަކެއްގެ ޖަވާބުވެސް ރޭގެ އެޕިސޯޑުން އެނގިގެންދިޔައެވެ.

މީގެ އިތުރުން ޒޯޔާ (ނާއްކޮ) އަކީ ނަފުސާނީ މައްސަލައެއް ނުވަތަ ސިކުނޑީގެ ކޮންމެވެސް މައްސަލައެއް އުޅޭ ކުއްޖެއްކަން އޮންނާނީ ފުރަތަ ސީޒަން އިން ހީވެފައެވެ. އެކަން ނާއްކޮ ކުޅެފައިވާ ޒޯޔާގެ ކެރެކްޓަރ އިން ވަރަށް ރަނގަޅަށް ވެސް އެނގެއެވެ. ބޭނުންކޮށްލާ ވަރުގަދަ ބަސްތަކުން ވެސް އެނގެއެވެ. ރޭގެ އެޕިސޯޑްގައި ފުލުހުންނާއި ޒޯޔާ މުޚާޠަބުކުރާ އިރު، އެ ބޭނުންކޮށްލާ ބައެއް ޖުމުލަތަކުން އޭނާގެ ބައްޕަގެ ފޮރުވިފައިވާ ސަހްސިއްޔަތާއެކު ނާއްކޮގެ ކެރެކްޓަރގެ ވަރުގަދަކަން ފެނިގެންދިޔަ އެވެ.

“ހުވާ 02” ގައި ނާއްކޮ އާއި ފައިސަލްގެ ކުރިމަތިލުމެއް

ނާއްކޮ ކުޅެފައިވާ ޒޯޔާގެ ކެރެކްޓަރގެ ވަރުގަދަކަން ރޭގެ އެޕިސޯޑުން ފެނިގެންދިޔަ އެވެ. މިއީ މީގެ ކުރިން ނާއްކޮގެ ފަރާތުން ފެނިފައިނުވާ ފަދަ ވަރުގަދަ އެކްޓިންއެއް ކަން ނާއްކޮގެ ފުރަތަމަ މަންޒަރުންވެސް ފެނިގެންދިޔަ އެވެ.

“ހުވާ 02″ގެ ފުރަތަމަ އެޕިސޯޑް ނިމިގެންދަނީ މިންހާ ހޯދުމަށް އާޒިމް މެންގެ ގެއަށް މަޢުރޫފް އައިސް އެ އާއިލާގެ ކުރިމަތީގައި މިންހާ ބަދުނާމުކުރަން މަސައްކަތްކޮށް މިންހާ ގެންދަން އުޅޭ ހިސާބުންނެވެ. އެހެން ނަމަވެސް މިންހާ އެ ދޭ ރައްދަކީ މީގެ ކުރިން މިންހާއަށް ލިބިފައި ނުވާފަދަ ވަރުގަދަ ހިތްވަރެއްކަން ފާހަގަވެއެވެ. މިންހާގެ ރޯލު ވަރަށް ފުރިހަމައަށް އަދާކުރަމުން އަންނަ އައްޒަގެ ނަފުރަތާއި ރުޅިވެރިކަން އެކުލެވޭ އެ ޑައިލޮގުތަކާއި އަސަރުގެ ސަބަބުން ގައިން ހީބިހި ނަގައިގެންދެއެވެ.

ވެބް ސީރީޒް “ހުވާ 02” ގެ ފުރަތަމަ އެޕިސޯޑްގެ މަންޒަރެއް – ފޮޓޯ: ހުވާ ޓީމް

“ހުވާ” ސީރީޒްގައި ކޮންމެ އެކްޓަރަކަށް ވެސް ލިބިފައިވަނީ ހަމަ އެހާ ވަރުގަދަ ރޯލެއްކަން ފާހަގަކޮށްލެވެއެވެ. އެގޮތުން ފައިސަލް އާއި ރިޝްފާގެ ކެރެކްޓަރ، ސީޒަން އެކެއްގައި ރަވީ އާއި އައްޒަގެ ރޯލާއި މިފަހަރުގެ ސީޒަންގައި މުއާ އާއި އައްޒަ ވެސް އެމީހުންގެ ހުނަރުވެރިކަން ދައްކައިލުމަށް ދީފައިވާ ރަނގަޅު ފުރުޞަތެކެވެ. ހަމަ އެހެންމެ ދޮން އައްޔަ އާއި އެރޫ، އަކްމަލްގެ ރޯލުން ފެނުނު ޖިމީ އަދި މުންތަސިރުގެ ރޯލުން ފެނުނު ފުބޫ އަށް ވެސް ދީފައިވަނީ ހަމަ އެފަދަ ފުރުޞަތެކެވެ. ޖުމްލަކޮށް ބުނާނަމަ، އެންމެ ކުޑަކުޑަ ރޯލުން ފެނިގެންދާ އެކްޓަރުންނަށް ވެސް އެމީހުންގެ ހުނަރުވެރިކަން ދައްކައިލެވޭފަދަ ރޯލެއް ދީފައިވެއެވެ.

ވެބް ސީރީޒް “ހުވާ 02” ގެ މަންޒަރެއް – ފޮޓޯ: ހުވާ ޓީމް

“ހުވާ”ގެ ފުރަތަ ސީޒަން ނިންމައިލި އިރު، އުފެދިފައިވާ ގިނަ ސުވާލުތަކެއްގެ ޖަވާބު ރޭގެ އެޕިސޯޑުން އެކަނިވެސް ލިބިގެންދިޔައެވެ. ނަމަވެސް ސީރީޒްގެ ވަގުތު 10 މިނެޓުން 20 މިނެޓަށް ބަދަލުކޮށްފައިވާކަން ރޭގެ އެޕިސޯޑް ބަލަން އިން އިރު ހީވެސް ނުވެއެވެ. “ހުވާ” ގެ 20 މިނެޓުންވެސް ނުފުދުނެވެ.

“ހުވާ 02” ގެ ފުރަތަމަ އެޕިސޯޑްގެ ކުރި މަރައިލާ، އަދި މި އެޕިސޯޑް ނުބަލާތިބި މީހުންގެ ޝަޢުޤުވެރިކަން ނަގައިލާކަށް ނެތީމެވެ. މިވަގުތު ކިޔައިދެވޭނީ މިވަރަށެވެ. އެހެން ނޫނަސް ބައިސްކޯފަށް ވަދެ “ހުވާ 02″ގެ ފުރަތަމަ އެޕިސޯޑް ބަލައިލުން މާ ރަނގަޅުވާނެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: