ނޭޝަނަލް ސެންޓަރ ފޮރ ދި އާޓްސް އިން އޮލިމްޕަސް ކުއްޔަށް ދިނުމުގައި ބޭނުންކުރަން ފަށާފައިވާ އައު އުޞޫލުގެ ސަބަބުން ރަނގަޅު ފިލްމުތައް އޮލިމްޕަހުގައި އެޅުވުމުގެ ފުރުޞަތު އެންސީއޭއިން ގެއްލުވާލާފައިވާކަމަށް ފިލްމީ ދާއިރާގެ ގިނަ ޕްރޮޑިއުސަރުންނާއި ޑައިރެކްޓަރުން ތުހުމަތުކޮށް، ކަންބޮޑުވުން ފާޅުކޮށްފިއެވެ. މިހެން މިވާހަކަ ދެކެވެނީ އެންސީއޭ އިން މިހާރު އަމަލުކުރާ އުޞޫލުގައި ވާގޮތުން ފިލްމެއް އަޅުވަން އޮލިމްޕަސް ލިބޭ އެންމެ ދިގު މުއްދަތަކީ18 ދުވަސް ކަމުގައި ހަމަ ޖެއްސުމުންނެވެ.

“އޮލިމްޕަސް ކުއްޔަށްދިނުމުގެ އާ އުޞޫލާއެކު އަހަރުމެން ކަހަލަ ބޮޑު އޯޑިއަންސެއް އޮންނަ މީހުން މި ޖެހެނީ ދާއިރާއިން ގެއްލެން. މިހާރު އޮލިމްޕަހުގަ ފުރުޞަތު އޮތީ ލޯވ ބަޖެޓް ކުދި ފިލްމުތަކަށް އެކަނި.” އެންސީއޭ އިން މިހާރު އަމަލުކުރަން ފަށާފައިވާ އުޞޫލާ މެދު ފާޑުކިޔަމުން އެންމެ ކާމިޔާބު އެއް ޕްރޮޑިއުސަރ އަދި ޑައިރެކްޓަރ ފާތިމަތު ނަހުލާ (ނަހޫ) އެންސީއޭއަށް ތުހުމަތުގެ އިނގިލިދިއްކުރަމުން ފާހަގަކުރިއެވެ.

“ދާއިރާގެ ބެލެނިވެރި ފަރާތް ކަމުގައިވާ އެންސީއޭ އަކީ ދާއިރާގެ ހަލާކަށް މިވީ. ދިވެހި ފިލްމުތައް ލީކްކުރާ ތަނެއްގެ ގޮތުގައި އަޑުއަރާފައި ވަނިކޮށް މިހާރު މިއޮތީ ސާބިތުބާ ހެއްކެއް އެންސީއޭ އިން ދާއިރާ ކުރިއެރުވުމުގެ ބަދަލުގަ ދާއިރާ ވީރާނާކޮށްލަން ރާވާކަން އެނގޭ. ކަނޑައެޅިގެން އެންސީއޭގެ ރެކޯޑުން ފެންނަން އޮންނާނެ އަޅުގަނޑުމެން ޝޯތައް ހިންގާ ވަރު. މީ އެންސީއަށް މީހަކު ކިޔާދޭން ޖެހޭ ވާހަކައެއް ނޫން. އެއްވެސް ވަރަކަށް ދާއިރާ އެނގޭ ބަޔަކު މިވަރުގެ ނިންމުމެއް ނުނިއްމާނެ” މީގެ ކުރިން އެންސީއޭ އަށް ފިލްމު އެވޯޑްގައި ބައިވެރިކުރުމަށް ނަހޫ ދީފައިވާ އޭނާގެ ފިލްމު 4426 ގެ ކޮޕީ ލީކްވެފައިވާ ވުމަށް އިޝާރާތްކުރަމުން ފާހަގަކުރިއެވެ.

ޕްރޮޑިއުސަރ އަދި ޑައިރެކްޓަރ ފާތިމަތު ނަހުލާ

“މިއީ މި ޒަމާނުގެ ރަނގަޅު ފިލްމަކަށް ކުރާ ހޭދަވެސް ނުލިބޭވަރުގެ އަދަދެއް. މިހެން ނިންމީމަ ދާއިރާ އެއްފަހަރުން ވަޅުޖެހޭނީ. ރަނގަޅު ފިލްމްތައް ހެދުމުގެ ފުރުސަތު ގެއްލުވާލެވެނީ އެ.” އެންސީއޭ އިން ކަނޑައަޅާފައިވާ 18 ދުވަހުގެ މުއްދަތަށް އިޝާރާތްކުރަމުން ނަހޫ ބުންޏެވެ.

“އެއްގޮތަކަށްވެސް ރަނގަޅެއް ނޫން ތި އުސޫލެއް..!” ކާމިޔާބު ފިލްމުތަކެއް ޕްރޮޑިއުސްކުރަމުން އަންނަ އިސްމާޢީލް ޝަފީޤްވެސް އެންސީއޭގެ އާ އުސޫލާމެދު ހުރީ ހިތްހަމަނުޖެހިފައެވެ.

“އެއީ އަޅުގަނޑުމެންނަކީ އާންމުކޮށް ގިނަ ޝޯތަކެއް ދައްކާ ބައެއް ވީމަ.. އަޅުގަނޑުމެންނަށް މީތި ހަމަ ވަރަށް ސަކަރާތް..” އެންސީއޭގެ އުސޫލު ރަނގަޅު ނޫންކަމަށް ބުނަނީ ކީއްވެގެންތޯ މުނިއަވަސް އިން ސުވާލުކޮށްލުމުން ޝަފީޤް އިތުރަށް ފާހަގަކުރިއެވެ.

“އެންސީއޭއިން ނެރެފައިވާ އޮލިމްޕަސް ހިނގުމާ ބެހޭ އައު އުޞޫލުތައް ކަނޑައަޅައި، ފިލްމު އަޅުވަން ދީފައިވާ މުއްދަތު މިހާރު އޮތްގޮތަށް ހަމަޖެއްސީ ހުރިހާ ޕްރޮޑިއުސަރުންނަށް އެނގިގެން މަޝްވަރާ ކޮށްގެން ކަމަށް ތަކުރާރުކޮށް އެންސީއޭގެ އިސްވެރީން ވިދާޅުވަމުން ދިއައަސް އެއީ ހަގީގަތެއްނޫން! ” ނަހޫ ބުންޏެވެ. އަދި ނަހޫގެ ވާހަކައަށް ދާއިރާގެ ބައެއް ބޮޑެތި ޕުރޮޑިއުސަރުން އެއްބަސްވެއެވެ.

ޕްރޮޑިއުސަރ ޝަފީޤް، ނޫރު އަދި މުޙައްމަދު ނިޔާޒް (ޓެޑްރީ) ވެސް މި އުސޫލުގައި ހުރި ބައެއް ކަންކަން ބަލައިނުގަނެވޭކަމަށް ބުނެފައިވެއެވެ. ވަކިން ޚާއްޞަކޮށް އަންނަނިވި މާއްދާއަކީ ދާއިރާގެ ގިނަ ޕްރޮޑިއުސަރުންނާއި ޑައިރެކްޓަރުން އެކަމާ ހިތްހަމަނުޖެހޭ މާއްދާއެކެވެ.

އެންސީއޭ އިން ނެރެފައިވާ އޮލިމްޕަސް ދޫކުރުމުގެ އުސޫލުން ނަގާފައި

ފިލްމު “ބަވަތި” އިން ދާއިރާއަށް ނުކުތް ޕްރޮޑިއުސަރ އަދި ޑައިރެކްޓަރ އިލްޔާސް ވަހީދުވެސް މި މާއްދާއާމެދު ފާޅުކުރީ އެހެން ބޭފުޅުންވެސް ފާހަގަކުރި ކަންތައްތެކެވެ.

ޕްރޮޑިއުސަރ އިސްމާޢީލް ޝަފީޤް

މި އުސޫލް ނިންމީ ހުރިހާ ޕްރޮޑިއުސަރުންނާ މަޝްވަރާ ކޮށްފައި ކަމަށް އެންސީއޭ އިން ބުނާ ބުނުމަށް “ނޯޓީ ފޯޓީ”، “ބައިވެރިޔާ” އަދި “ފޯޓީ ޕްލަސް” ފަދަ ކާމިޔާބު ފިލްމްތަކުގެ ޕްރޮޑިއުސަރ ޝަފީގް ދިން ޖަވާބަކީ…

“އެކަމަކު އެއޮތީ ކަނޑައެޅިފަތާ.. އެހެންވީމަ މަމީ ޕްރޮޑިއުސަރެއް ނޫނީއެއްނު..” މިކަމާ ބެހޭ މައުލޫމާތެއް ޝަފީގާވެސް އެންސީއޭއިން ހިއްސާ ކޮށްފައި ނުވާކަން ހާމަ ކޮށްދެމުން ޝަފީގް ބުންޏެވެ.

“އަޅުގަނޑު މިކަމާ ޝަކުވާކުރީމަ އެންސީއޭ އިން ޒިންމާދާރު އެއް ވެރިޔަކު ވިދާޅުވީ ތީ ޤަވައިދު ޑްރާފްޓްގަ އިން ނުކުތާއެއް ނޫނޭ. ތީ އެންމެ ފަހު ވަގުތު މިވެނި ބޭފުޅަކު (އެ ބޭފުޅާ އާއެކު އެއް މަގާމެއް ހިއްސާ ކުރައްވާ އަނެއް ވެރިޔާ) އެޑްކޮށްލި ތަންކޮޅެކޭ އެންމެނަށް ފުރުޞަތު ދޭށޭ ކިޔާފަ. މިކަމާ އެއަށްވުރެ އިސް ފަރާތަކާ ވާހަކަދެއްކީމަ ވިދާޅުވީ ތީ ދާއިރާގެ ހުރިހާ ޕްރޮޑިއުސަރުންނާ މަޝްވަރާކޮށްގެން ނިންމި ނިންމުމެއް ކަމަށް. އަޅުގަނޑަށް ހީވަނީ އެބޭފުޅުންނަށް ވެސް އަސްލު މިކަން ވެގެން އުޅޭ ގޮތެއް އެނގިވަޑައި ނުގަންނަވާހެން!” އެންސީއޭގެ އައު އުޞޫލާ މެދު ވަރަށް ބޮޑަށް ހިތްހަމަ ނުޖެހިފައި ހުރެ އެކަން ހިނގިގޮތް އޮޅުންފިލުވުމަށް ނަހޫ ކުރި މަސައްކަތްތައް ކިޔައިދެމުން ބުންޏެވެ.

ޕްރޮޑިއުސަރ ނޫރް

“އެމީހުން އެބަ ބުނޭ ހުރިހާ ޕްރޮޑިއުސަރުން ތިބެގެން ޕްރޮޑިއުސަރުން ނިންމި ގޮތޭ.. ޕްރޮޑިއުސަރެއްގެ ހައިސިއްޔަތުން އަޅުގަނޑަކަށް ނޭނގެ ދެން.. އަޅުގަނޑަށް މަޢުލޫމާތު ލިބިފައި އޮތް ގޮތުން ވިއްޔާ އެހެން ޕުރޮޑިއުސަރުން ވެސް އެބައުޅޭ މިކަން އެއްގޮތަކަށްވެސް ނޭނގޭ.. އެހެންވެއްޖެއްޔާ އަޅުގަނޑުމެން ޤަބޫލުކުރާ އުސޫލެއް ނޫން އެކަން އެގޮތަށް ވުން އެއީ.. އަޅުގަނޑު ޤަބޫލުކުރާ ގޮތުގަ ވެއްޖެއްޔާ އަޅުގަނޑުމެންނަށް ލިބެންޖެހޭ ބައެއް އެ އުނިވެގެން ދަނީ..” ރީތި އަދި ކާމިޔާބު ފިލްމުތަކެއް ޕްރޮޑިއުސްކޮށްފައިވާ ނޫރް އެންޑް ނޫރް މޫވީސްގެ ވެރިޔާ އަދި ފިލްމް އެސޯސިއޭޝަންގައި އެންމެ ގިނަދުވަހު ޖެނެރަލް ސެކެޓްރީގެ މަގާމު އަދާ ކޮށްފައިވާ ޙުސައިން ނޫރައްދީން ނާޞިރު (ނޫރް) ފާހަގަކުރިއެވެ.

“ރަނގަޅު ފިލްމެއް ހިނގާކަމަށް ވަންޏާ 18 ޝޯވއަށްވުރެ މައްޗަށް ދާނެ. އެހެން ވެއްޖެއްޔާ އެބަޔަކަށް އެ ފުރުސަތު އޮންނަންވާނެ.. މިސާލަކަށް އެއްފަހަރާ ލާރި ނަގައިގެން ނަމަވެސް އެކަން ކުރެވޭ އުސޫލެއް އޮންނަންވާނެ.. މިސާލަކަށް އެންސީއޭއަށް ލާރި ނުލިބޭކަމަށް ވަންޏާ ބުނަންވީ ތިމަންނަމެން އޮލިމްޕަސް ދޫކުރާނީ ކަލޭމެން އެއްފަހަރާ މިއަށް ލާރި ދިނީމައޭ.. އެގޮތަށް އެއްބަސްވެގެން ވިޔަސް މިކަން ކުރެވޭނެ އުސޫލެއް އޮންނަންވާނެޔޭ” ނޫރްގެ ކަންބޮޑުވުންތައް ތަފްޞީލްކޮށްދެމުން ބުންޏެވެ.

މި މައްސަލައާމެދު މުޙައްމަދު ނިޔާޒް (ޓެޑްރީ) ވެސް ވަރަށް ތަފްޞީލުކޮށް މިކަމުގައި ހުރި ކަންބޮޑުވުންތައް ހިއްސާކޮށްދެމުން ގިނަ ކަންތަތައްތަކެއް ފާހަގަކުރިއެވެ.

“މީގަ އަސްލު، އުސޫލު ހަދާ ކޮމެޓީގަ ތިބެނީ ކޮން ބައެއްކަމެއް ނޭނގެ.. އަޅުގަނޑު އެ ކޮމިޓީއަކު ނީނދޭ.. މިނިސްޓްރީގަ އޮވޭ ލަފާދޭ ކޮމެޓީއެއް.. އޭގަ ފިލްމް ސެކްޓަރގަ ވަރަށް ބައިވަރު މީހުން ތިބޭ.. ދެން އެ ފިލްމް ސެކްޓަރގަ މީ ލަފާދޭ ކޮމެޓީގެ ބައްދަލުވުމަށް މި އުސޫލު ގެނައި އިރު ވަރަށް ގިނަ ކަންކަން ހުރި ކަމުނުދާ.. ވަރަށް ބައިވަރު.. އެހެންވެ އެ ހުރިހާ ކަމެއް އެދުވަހު ރެއިޒްކޮށްފަ އަދި ހަމަ އެންމެންނަށް އެންމެ އިންސާފުވެރި ހަމަހަމަ އުސޫލަކުން ކަންކަން ފަހިވާނެ ގޮތަށް އެތާނގަ ޚިޔާލުތައްވެސް ފާޅުކުރެވުނު.. އޭގަ ހަމަ އަޅުގަނޑުމެންގެ ފަރާތުން ހުށަހެޅުނު ޚިޔާލަށް ތާއީދުވެސް ލިބުނު. މި އިންޑަސްޓްރީގެ ބައެއް ބޭފުޅުންގެ ކޮމެންޓްތައްވެސް އެއާއެކު ހުށަހެޅުނު. ޚިޔާލުތަކަށް ވަރަށް ޕޮޒިޓިވްކޮށް އެންމެ ބޭފުޅުންވެސް ވަރަށް ރެސްޕޮންސް ކުރި.. އެކަމަކު އުސޫލު ނުކުތްއިރު އެބަ ހުރި ފާހަގަކުރެވޭ ބައެއް ކަންކަން.. އެދުވަހު އެގޮތަށް މީޓިންއަށް ދިޔަ މީހުންނަށް ޤަބޫލުކުރެވުނީ އެގޮތަށް އެ ބަދަލުތައް އެއްކޮށް އައިސްގެން ކަމަށް ނުކުންނާނީ.. އެކަމަކު ނުކުތްއިރު 18 ޝޯވގެ މައްސަލައާއި އެކަހަލަ ކަންތައްތަކެއް އެބަހުރި.. އެއީ އަސްލުގަ ރަނގަޅަށް ހިނގާ ފިލްމެއްގެ ވިޔަފާރި އޭގެ އެންމެ ފުޅާކޮށް ކުރެވޭނެ ގޮތަކަށް ނޫން މިހާރު އޮތީކީ.. ” ޓެޑް ފާހަގަކުރިއެވެ.

ޕްރޮޑިއުސަރ އަދި ޑައިރެކްޓަރ މުޙައްމަދު ނިޔާޒް (ޓެޑްރީ)

“ހަމަ ގައިމުވެސް އަޅުގަނޑަށް އެއްވެސް މީހަކު އަންގާފަވެސް ނެތް އޮލިމްޕަސްގެ އުޞޫލު ބަދަލުކުރަން އުޅޭ ވާހަކައެއްވެސް. ދޭތެރެއަކުން އެންސީއޭއިން ގުޅާ ދާއިރާގެ ކުރިއެރުމަށް، އިސްލާހަށް މަސައްކަތް ކުރާ ކޮމިޓީއަށް ނުގޮސްގެން. ކޮންމެ ފަހަރަކުވެސް އަޅުގަނޑު ދަންނަވަން އިސްލާހަށް މަސައްކަތް ކުރައްވާ ކަމަށް އަޅުގަނޑު ގަބޫލު ކުރާނީ ފުރަތަމަ އެންސީއޭއިން ލީކް ކޮށްލި އަޅުގަނޑުގެ ފިލްމްގެ މައްސަލައިގަ އަޅުގަނޑު ލީ ސިޓީއަށް ޖަވާބެއް ދެއްވީމައޭ. އަދިވެސް އެމައްސަލަ ބަލާ ނުދެއްވި ތާނގަ ކުޑަމިނުން އެއަށް ޖަވާބެއްވެސް ނުދެއްވާ. އެހެންވީމަ ދާއިރާ ކުރިއަރުވަންށޭ ކިޔާފަ އެންސީއޭއިން ގުޅީމަ އަޅުގަނޑެއް ނުދަން. އެކަމަކު އޮލިމްޕަހުގެ އުސޫލުގެ ކަމަކާ ގުޅިނަމަ އަޅުގަނޑު ދާނެ އެއީ އަޅުގަނޑުގެ އަމިއްލަ މަސްލަހަތުވެސް އޮތް ކަމަކަށް ވާތީ. ދާއިރާގަ އެބަތިބި އަދި އަޅުގަނޑު ނޫނަސް އެހެން ޕްރޮޑިއުސަރުން ވެސް ތި އުސޫލާ ބެހޭ މައުލޫމާތެއް ހިއްސާ ކޮށްފަނުވާ. އެޅުގަނޑުމެން އުއްމީދުކޮށްގެން ތިބެނީ އަޅުގަނޑުމެންގެ ކުރިއެރުމަށް ވިސްނަން އެނގޭ ފެންވަރުގެ މީހުންކަމަށް އެންސީއޭގަ ތިބެނީ. އުސޫލުގަ އިންނަ އެންމެ ނުކުތާއެއްގެ ސަބަބުން އަޅުގަނޑުމެންގެ ވިޔަފާރި އެކީ ހަލާކުވެގެން މިދަނީ. ދާއިރާ ފުނޑުފުޑުވެގެން މިދަނީ. އަޅުގަނޑުގެ އުއްމީދަކީ އެންސީއޭއަށް މިކަމަށް އަވަސް ހައްލެއް ނުހޯދުނިއްޔާ އެއަށް ވުރެ މަތީ ފަރާތަކުން މިކަމަށް ހައްލެއް ހޯދާދެއްވުން” އެންސީއޭގެ އުސޫލުގެ ސަބަބުން ލިބޭނެ ގެއްލުންތައް ފާހަގަކުރަމުން ނަހޫ ބުންޏެވެ.

“…….އެން ސީއޭ އަކަށް ކަނޑައެއް ނޭޅޭނެ ކަލޭމެންނަށް ދޭނީ ތިން ދުވަހޭ، ދެ ދުވަހޭ، ހަތަރު ދުވަހޭ.. އެގޮތަކަށް ނުވާނެ ދޯ.. އެވަރު ހޭދައެއް ކޮށްގެން މި ފިލްމު ހަދަނީ…. ފިލްމެއް ހިނގާނެ ވަރު ކަނޑައެއް ނޭޅޭނެ އެންސީއޭއަކަށް. އެއީ އެ ހިފާ ބަޔަކަށް އެނގޭނީ ތިމަންނަމެން ހިފާނީ ކިހާ ދުވަހެއްކަން.. ދެން އޭތި ލާރި ނަގާނެތޯ ނުނަގާނެތޯ އެޑްވާންސްތޯ ނަގާނީ ޕަސެންޓްތޯ ނަގާނީ އެޔެއް ނިންމާނީ އެންސީއޭއިން.. އެކަމު އެ ބޭނުންވާ ބަޔަކަށް އޮލިމްޕަސް ހިފޭ ގޮތަކަށް ބޭނުންވާ ދުވަހަކު އޮންނަންވާނީ.. އެންސީއޭގެ ބޭނުމަކީ ލާރި ވެއްޖެއްޔާ ލާރި ލިބޭނެތާ.. އެކަމު އެންމެ ސިނަމާއެއް މާލޭގަ މި ހުންނަނީ ފިލްމުތައް އަޅުވާލަން.. އެހެންވީމަ އެ ސިނަމާއަށް މިހެންވީމަ މި ދެން މީ ވަރަށް ދެރަވަރު ކަމެއް ގޮތުގައި އަޅުގަނޑަށް ޤަބޫލުކުރެވެނީ.. އެއީ އަޅުގަނޑު ދެކޭ ގޮތަކީ..” ނޫރް ވެސް ހަމަ އެފަދަ ކަންބޮޑުވުންތައް ހިއްސާކުރިއެވެ.

މާލޭގައި ފިލްމު ދެއްކުމަށް ބޭނުންކުރާ ސަރުކާރުގެ ސިނަމާ ހުންނަ އޮލިމްޕަސް

“އަސްލުގަ ފިލްމް ސެކްޓަރގަ މިއިންނަނީ ޕްރޮޑިއުސަރުންގެ ފަރާތުންވެސް އެބަހުރި އެޑްވާންޓޭޖް ނެގުމާ އިހުމާލުވުމާ މިކަހަލަ ބައިވަރު ކަންތައްތަކެއް ހުރެގެން އެ ޤަވާއިދު ހެދީ.. ޤަވާއިދުގެ ބޮޑުބައި އަހަންނަށް ރަނގަޅު.. އެކަމަކު އެ ފާހަގަ ކުރާހެން 18 ޝޯވއަށް ލިމިޓް ކުރުމާ އެކަހަލަ ކަންތައްތައް އެހެން ހުރީމަ ރަނގަޅު ސްކޭލެއްގަ ހަދާ ފިލްމެއް މާކެޓްކޮށްގެން 18 ޝޯވ ދައްކާފަ މިސާލަކަށް ފިލްމުގެ ޝޯވތައް ހިނގަހިނގާ އޮއްވާ އެތަނުން ނުކުންނަން ޖެހުން އެއީ ވަރަށް ބޮޑު މައްސަލައެއް އަސްލު.. އެހެންވީމަ ޕްރޮޑިއުސަރުންނަށް އަސްލުގަ ފުރުސަތު އޮންނަން ޖެހޭ ކަމަށް އަހަރެން ޤަބޫލުކުރަނީ އެމީހަކަށް އޮލިމްޕަހުން ގެއްލުން ނުވާ ގޮތަށް، އެހެން ޕްރޮޑިއުސަރުންނަށްވެސް އޭގެން ގެއްލުން ނުވާނެ ގޮތަށް ހަމަ އެ ނަގަން ބޭނުންވާ މުއްދަތް ދިނުން އޭގަ ހަމަ އެންމެ ރަނގަޅީ.. އެއީ އޮލިމްޕަހަށް ހަމަ އެ އުސޫލުން އެޑްވާންސް ޕޭމެންޓް ގޮތުގަ ދައްކާފަ އެކަން ކުރީމަ ނިމުނީތާ.. ދެން އެބައެއްގެ ފިލްމު ނުހިނގީމަ އޭރުން އެ ދެން ނުހިނގީ.. އެ ނާކާމިޔާބެއް އެއީ.. ގަދަކަމަކުން ފިލްމެއް ނުއެއް ހިންގުވޭނެ.” ޓެޑްރީ އިތުރަށް ފާހަގަކުރިއެވެ.

“މީގަ ޤަބޫލުކުރަން ޖެހޭނެ އެއް ހަޤީޤަތަކީ މިސާލަކަށް މުއްދަތެއް ނަގާފާ ބާކީ އިންނަ މުއްދަތް ބޭނުން ނުކޮށް ދޫކޮށްލާން މި އޮންނަ އުސޫލުންވެސް ބައިވަރު ޕްރޮޑިއުސަރުންނަށް ގެއްލުންވޭ، އޮލިމްޕަހަށްވެސް ވަރަށް ބޮޑެތި ގެއްލުންތަކެއްވޭ.. އެއީ އޮލިމްޕަހުގެ އޮޕަރޭޝަންއަށް މިހާރު މި ނަގާ ކުއްޔަކުން އަސްލުގަ އެތަނެއް އޮޕަރޭޓެއްވެސް ނުކުރެވޭނެ.. އެހެންވީމަ އޭތި ހިނގަން ޖެހޭނީ އޭގަ ބައިވެރިވާ ހުރިހާ ފަރާތްތަކަށްވެސް ހަމަހަމަ އެންމެ ރަނގަޅު މަންފާ ލިބޭނެ ގޮތަކަށް.. އެހެންވީމަ 18 ޝޯވއަށް ލިމިޓް ކުރުމަކީ އަހަރެން ޤަބޫލުކުރާ ގޮތުގައި އެއީ އެންމެ ރަނގަޅު މެތަޑެއް ނޫން.. ދެން އަހަރެމެންނާ އެ މިނިސްޓްރީގެ ބައްދަލުވުމުގައި އެގޮތަށް ލިމިޓް ނުކުރާން އަހަރެން އެތާނގަ ވާހަކަދެއްކީ.. 18 ޝޯވގެ އިޝޫގަ.. ދެން އެދުވަހު އަސްލުގަ އޮތީ 18 އެއްވެސް ނޫން ފުރަތަމަ.. އޮތީ 16 ވަރަކަށް ޝޯވ ކަންނޭނގެ ނޫނީ އެއަށްވުރެވެސް މަދުކޮށް އޮތީ.. އެކަމަކު އެއަށްވުރެ ބޮޑަށް އޭތި ހުޅުވާލެވެން ޖެހޭނެކަމަށް ޤަބޫލުކުރެވެނީ.. އަސްލުގަ ލިމިޓްކުރާ ގޮތަށް އޮވެގެން އެކަމާ ހަމަ ވަރަށް ބޮޑަށް ވާހަކަ ދެކެވުނު ލިމިޓް ނުކުރާން.. އެބައެއްގެ ފިލްމު މާކެޓުކޮށްގެން އަންނަ މީހާއަށް އެތަނަށް ވަދެ 18 ޝޯވއިން ސްކިޕްކޮށްފަ ދިއުމަކީ އަހަރެން ޤަބޫލުކުރާ ހަމައެއް ނޫން އެއީކީ..” ޓެޑްގެ ވެސް ހުރީ ހަމަ އެފަދަ ކަންބޮޑުވުން ތަކެކެވެ.

ދިވެހި ފިލްމީ ދާއިރާގެ ބައެއް ޕްރޮޑިއުސަރުންނާއި ޑައިރެކްޓަރުންނާ ވާހަކަދައްކައިލުމުން މި މައްސަލައިގައި ހުރި ކަންބޮޑުވުންތައް ފާހަގަކުރީ ހީވެސްނުކުރާ މިންވަރަކަށެވެ. އެހެންކަމުން މިއީ މިހާރުން މިހާރަށްވެސް ހައްލެއް ބޭނުންވެފައިވާ މުހިންމު މައްސަލައެއްކަން ފާހަގަކުރެވުނެވެ. އަދި މިކަމަށް އޮތް އެންމެ ހަމަޖެހޭ ހައްލުވެސް ވަނީ ދާއިރާގެ ފަންނާނުންގެ ވާހަކަތަކުން އެނގިގެން ގޮސްފައެވެ.

ޝާއިޢުކުރީ: އަޙްމަދު ރަޝީދު  | ރިވިއު ކުރީ: ސާޖިދު

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: