ގިނަ ގޮންޖެހުންތަކަކާއެކު މިއުޒިކްގެ ދުނިޔެއަށް ފައިތިލައަޅައި، ދިވެހި މިއުޒިކީ ޕްލެޓްފޯމުގެ ފުރަތަމަ ހަރުފަތަށް އަރާފައިވާ ޒުވާން ލަވަކިޔުންތެރިޔާ އިސްމާޢީލް ޝިޔާރު (އިއްސޭ)ގެ “މަލާމާތް” ދިވެހި މިއުޒިކް ސްޓްރީމިން އެޕް، ލަވަފޮށްޓަށް ލައިފިއެވެ.

ކުރިއަރަމުން އަންނަ ‘ޑީބީ ރެކޯޑްސް’ އާއި ‘އިއްޔަ ރެކޯޑްސް’ އިން ޕްރޮޑިއުސްކޮށް އުފައްދާފައިވާ އިއްސެގެ “މަލާމާތް” ލަވަފޮށްޓަށް ލާފައިވަނީ މިމަހު 05 ވަނަ ދުވަހުއެވެ. މީގެ ކުރިން، އިއްސެގެ “ހިނިތުން” ލަވަ، ފެބްރުއަރީ 14ގައި ލަވަފޮށްޓަށް ލާފައިވާކަން ވެސް ފާހަގަކޮށްލެވެއެވެ.

އަޙްމަދު މާއިޝް ނިޔާޒް ކޮމްޕޯސްކޮށްފައިވާ “މަލާމާތް” ލަވައަކީ ޔުނީކް، ސަޅި އަދި ހިތްގައިމު ރާގަކަށް ކިޔާފައިވާ ލަވައެކެވެ. ރީތި އަދި ތަފާތު ލިރިކްސްއަކަށް ހަދާފައިވާ މި ލަވަ އިއްސޭ ކިޔާފައިވަނީ ވަރަށް ‘ފީލް’ގައި ކަން ފާހަގަކޮށްލެވެއެވެ.

ދ. ބަނޑިދުއަށް އުފަން އިސްމާޢީލް ޝިޔާރަކީ ކާކުކަން ގިނަ ބަޔަކަށް އެނގިފައި ނެތަސް، އިއްސޭ އަކީ މިހާރު ލަވަކިޔުންތެރިއެއްގެ ގޮތުގައި ފިޔަޖަހަމުން އަންނަ ހުނަރުވެރި ފަންނާނެއްކަން ‘ޑީބީ ރެކޯޑްސް’ އާއި ‘އިއްޔަ ރެކޯޑްސް’ގެ ބާނީ މުސްތާޤް މޫސާ ފާހަގަކުރެއެވެ.

ދ. ބަނޑިދޫ، ހާޝިމް ޢަބްދުލް ޤާދިރު އާއި އދ. މާމިގިލީ، ޒާހިދާ މަހްމޫދުގެ އިސްމާޢީލް ޝިޔާރު (އިއްސޭ) އަށް ލަވަކިޔުމުގެ ދާއިރާއަށް ވަދެވުނީ ކިހިނެއްތޯ އަހައިލުމުން ބުނީ، އެންމެ ފުރަތަމަ މި ދާއިރާއަށް ޝައުޤުވެރިކަން އުފެދުނީ ރިޒޯޓެއްގައި ވަޒީފާ އަދާކުރަމުން ދަނިކޮށް ރިޒޯޓްގައި ޕާފޯމްކުރަން ލިބުނު ފުރުޞަތެއްގައި ކަމަށެވެ. ގިޓަރިސްޓް އަދި ލަވަކިޔުންތެރިޔާ އިއްސޭ ވަނީ މޯލްޑިވިއަން އައިޑަލްގެ ހުރިހައި ސީޒަންއެއްގެ އޮޑިޝަންގައި ބައިވެރިވެ، ލަވަކިޔުމުގެ ދާއިރާއަށް ވަނުމަށް މަސައްކަތްކޮށްފައެވެ. ނަމަވެސް އޮޑިޝަންތަކުން އެދެވޭ ނަތީޖާއެއް ލިބިފައެއް ނުވެއެވެ.

ނާކާމިޔާބީ އަކީ ކާމިޔާބުގެ ސިއްރުކަމަށް ދެކިގެން އިއްސޭގެ މަސައްކަތް ހުއްޓައެއް ނުލައެވެ. އަދި ކިއެއްތަ؟، ފަންނުވެރިކަމުގެ ޝައުޤަކީ ފަންނުވެރިޔާގެ ވުޖޫދު ހަނދާންނެތޭވަރުގެ ކަމެކޭ ބުނާ ބީދައިން، އިއްސޭގެ މަސައްކަތަކަށް ބަދަލެއް ނާދެއެވެ. ރިޒޯޓް ވަޒީފާ ދޫކޮށްލުމަށްފަހު އުފަން ރަށުގައި ވަޒީފާ އަދާކުރަމުން ދިޔަ ދުވަސްވަރު، ޢީދު ޝޯތަކާއި އެހެނިހެން ޝޯތަކުގައިވެސް އިއްސޭ ޕާފޯމްކުރިއެވެ.

މިއުޒިކީ ދާއިރާއިން ކުރިއެރުމަށްޓަކައި އިއްސޭ ކޮށްފައިވާ ދަތުރަކީ ވަރަށް ހިތި، އުނދަގޫ ތަޖުރިބާތަކެއް ކުރަން ޖެހުނު ދަތުރެއް ކަމަށް އޭނާ ބުނެއެވެ.

“އެގޮތުން އެކިއެކި ސްޓޫޑިއޯތަކަށް ގޮސް އަމިއްލަ ލަވައެއް ރެކޯޑްކުރެވޭތޯ ގިނަގުނަ މަސައްކަތްތަކެއް ކުރެވުނު. ކުރި ކޮންމެ މަސައްކަތެއްގަވެސް ފައިދާ ނަގާފައިވަނީ އެ ސްޓޫޑިއޯތަކުން.” އިއްސޭގެ ތަޖުރިބާއިން ބައެއް ކަންކަން މުނިއަވަސް އާ ހިއްސާކުރަމުން ބުނެފައިވެއެވެ.

“މަލާމާތް” ލަވައިގެ ކަވަރ ގައި އިއްސެ – ފޮޓޯ: ޑީބީ ރެކޯޑްސް

“ރެކޯޑްކޮށް ނިމި ދެ އަހަރަށް ވުރެ ގިނަދުވަސް ވެފައިވާ ލަވަ ވެސް ހުންނާނެ.” އަމިއްލަ ޖީބުން ޚަރަދުކޮށްގެންވެސް އޭނާއަށް މިކަން ޙާޞިލްވާނެ ގޮތްވަނީ ނުވެފައެވެ. އެހެން ހުއްޓާ އިއްސޭއަށް ޓިކްޓޮކް ޔާމްބެގެ ފަރާތުން ތަޢާރަފުވީ ‘އިއްޔަ ރެކޯޑްސް’ އާއި ‘ޑީބީ ރެކޯޑްސް’ ގެ ބާނީ މުސްތާޤް މޫސައާ އެވެ. އިއްސޭގެ ހުނަރުވެރިކަން މުސްތާޤަށް ފާހަގަވިއެވެ. އެ ހިސާބުން އިއްސޭގެ ފަރާތުން އެއްވެސް މާލީ މަންފާއެއް ނެތްގޮތަށް އިއްސޭގެ ހުވަފެން ހަގީގަތަކަށް ހެދުމަށް މަސައްކަތް ފަށައި މުސްތާޤްގެ އެހީގައި އިއްސޭއަށް އެކަން ވަނީ ކާމިޔާބުކޮށްދީފައެވެ.

05 މާރިޗް 2020 ގައި ލަވަފޮށްޓަށް ރިލީޒްކުރި “މަލާމާތް” މި ލަވަ ވެގެންގޮސްފައިވަނީ ‘ޑީބީ ރެކޯޑްސް’ގެ ލޭބަލްގައި ނެރުނު އިއްސޭގެ ދެވަނަ ލަވައަށެވެ. ކުރިންވެސް ފާހަގަކުރެވުނު ފަދައިން “ހިނިތުން”ގެ ނަމުގައި ނެރުނު ލަވައަކީ އިއްސޭގެ ފުރަތަމަ ލަވައެވެ.

އިއްސޭ ބުނާގޮތުން މުސްތާޤާއި ބައްދަލުވެ މިވީ ކުރު މުއްދަތުގެ ތެރޭގައި މިއުޒިކްގެ ދާއިރާއިން އޭނާއަށް އެނގިފައިނުވާ ގިނަގުނަ އާ ކަންކަން ވަނީ ދަސްވެފައެވެ. އެގޮތުން ‘އިއްޔަ ރެކޯޑްސް’ އާއި ‘ޑީބީ ރެކޯޑްސް’ގެ ސްޓޫޑިއޯއިން ދިމާވި މަޝްހޫރު ފަންނުވެރިންގެ ފަރާތުން ގިނަގުނަ ފިލާވަޅުތަކެއް ލިބިފައިވާ ކަމަށާއި ވަކިން ޚާއްޞަކޮށް މާއިޝް އަދި އެއްކިބާ ހަސަންގެ ފަރާތުން ވަރަށް ބޮޑު އެއްބާރުލުމެއް ލިބިފައިވާކަމަށް އިއްސޭ ބުނެއެވެ.

އިއްސޭ ބުނާގޮތުން މުސްތާޤަކީ ވަރަށް ހިތްހެޔޮ، ބުނާ ބަހުގެ އިތުބާރު ހިފަހައްޓާ އަދި އެކުގައި މަސައްކަތްކުރަން ފަސޭހަ، މަޖާ އަދި އެކުވެރި މާހައުލެއްގައި މަސައްކަތްކުރާ މިއުޒިކްގެ ފަންނު ދިރުވައި އާލާކުރުމަށް ކަމަރުބަނދެގެން ހުރި މީހެކެވެ. އެގޮތުން މިއުޒިކް އިންޑަސްޓްރީގައި ކެރިއާއެއް ބިނާކުރާނަމަ، އިއްސޭގެ ނަޒަރުގައި ‘ޑީބީ ރެކޯޑްސް’ އަށް ވުރެން އެކަން ކުރަން ފަސޭހަ އެހެން ޕްލެޓްފޯމެއް ނެތެވެ.

އިއްސޭގެ މިއުޒިކް ކެރިއާ ބިނާކުރުމަށް އެހީތެރިވެދެމުން އަންނަ މުސްތާޤް، އުލްޔާ، ފަތީން، ޔާމްބެ، މާއިޝް އަދި އެއްކިބާ ހަސަން އަށް ފައްފަށުން އިއްސޭ ޝުކުރުއަދާކުރެއެވެ.

ޑީބީ ރެކޯޑްސްގެ އޮންލައިން މީޑިއާ ޕާޓްނަރަކީ މުނިއަވަސް އެވެ.

ޝާއިޢުކުރީ: އަޙްމަދު ރަޝީދު  | ރިވިއު ކުރީ: އަޙްމަދު ރަޝީދު

 

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: