ދުނިޔޭގެ އެކި ކަންކޮޅުތަކުގައި ހަލުވިކަމާއިއެކު ފެތުރެމުން އަންނަ ކޮރޯނާ ވައިރަސް ނުވަތަ ކޮވިޑް-19 މިއަދު މިވަނީ މި ކުޑަކުޑަ ޤައުމުން ވެސް ފެނިގެން ގޮސްފައެވެ. މިހާތަނަށް ވައިރަސްއާއި ދެކޮޅަށް ބޭނުން ކުރާނެ ވެކްސިނެއް ވެސް ހޯދިފައިނުވުމުގެ ސަބަބުން ދުނިޔޭގެ ތަރައްޤީ ވެފައިވާ ޤައުމުތަކަށް ވެސް މި ބަލި ކޮންޓްރޯލް ކުރުމުގައި މިވަނީ ބޮޑެތި ގޮންޖެހުންތަކާއި ކުރިމަތިލާން ޖެހިފައެވެ. ވުމާއިއެކު ފެސިލިޓީސްގެ ގޮތުން ދަށް އަދި ތަރައްޤީވަމުން އަންނަ މި ކުޑަކުޑަ ދިވެހިރާއްޖެއަށް މިކަމާއި ކުރިމަތިލުމުގައި ގޮންޖެހުން އިތުރުވެގެންދާނެ ކަމުގައި ޤަބޫލުކުރަން ޖެހެއެވެ.

އެންމެ ފުރަތަމަ ޗައިނާއިން މި ބަލި ފެނުނު ދުވަހުން ފެށިގެން ވެސް ދިވެހި ސަރުކާރުން މިކަމުން ރައްކާތެރިވުމުގެ ގޮތުން މުހިންމު ފިޔަވަޅުތަކެއް އެޅިތަން ފެނިގެން ދިޔައެވެ. މިގޮތުން ޗައިނާ ފަތުރުވެރިން ރާއްޖެ އެތެރެވުން ހުއްޓުވުމުގެ އިތުރުން، ރާއްޖެއާއި ޗައިނާއާއި ދެމެދު ކުރަމުންދިޔަ ސީދާ ދަތުރުތައް މެދުކަނޑާލިއެވެ.

މި ވައިރަހަކީ ވައިގެ ތެރެއިން ފެތުރޭ ވައިރަހެއް ނޫނެވެ. މި ވައިރަހުގެ އަސަރު ހަށިގަނޑަށް ކުރަނީ، އަތުގައި ވައިރަހުގެ އަސަރު ހުއްޓައި އަނގަޔަށް އަތްލުން ލޮލުގައި އަތްލުންފަދަ ކަމެއް މެދުވެރިވެގެން ހަށިގަނޑުގެ ތެރެއަށް އެ އަސަރު ކޮށްގެންނެވެ.

ދިވެހި ފަސްގަނޑުން މި ވައިރަހުގެ އަސަރު ފެނިގެން ދިޔުމަކީ ކޮންމެ ދިވެއްސަކުވެސް އިންތިހާއަށް ކަންބޮޑުވާނެ ކަމެއްކަން ޔަޤީނެވެ. ނަމަވެސް މި ނާޒުކު ވަގުތުގައި ސަރުކާރުގެ ޒިންމާއަށްވުރެ ފަރުދުންގެ ޒިންމާ ކުޑަ ކަމުގައި ބުނެވޭކަށް ނެތެވެ. މިކަމުގައި ފަރުދީގޮތުން ވިސްނަންވީ އެންމެ މުހިންމު ކަމަކީ ކަމާބެހޭ ފަރާތްތަކުން ދެމުންގެންދާ އިރުޝާދުތަކަށް ފުރިހަމައަށް އަމަލުކުރުމެވެ. މިގޮތުން ބަލައިލާއިރު ގިނަގިނައިން ސައިބޯނި ލައިގެން އަތްދޮވުމާއި، މީހުން އެއްވެ އުޅޭ ތަންތަނަށް ނުދިއުމާއި، އެއްވުންތަށް ނުބޭއްވުމާއި، ހޮސްޕިޓަލްތަކަށް ޒިޔާރަތް ނުކުރުމާއި، ހަށިގަނޑުގެ ސާފުތާހިރުކަން އިތުރު ކުރުމާއި، މަގުމައްޗަށް ކުޅު ނުޖެހުމާއި، ރޯގާ ފުހެފައި ޓިޝޫ ތަންތަނަށް އެއްލައިނުލުމާއި، ކެއްސާ ކިނބިހި އަޅާނަމަ އަނގަމަތި ނިވާކުރުން ފަދަ ކަންކަން ފަރުދީ ގޮތުން ކުރުމަކީ މި ވަގުތު މުހިންމު ކަމެކެވެ. 

އަދި މީގެ އިތުރުން އެއްބަޔަކު އަނެއް ބަޔަކަށް އިނގިލި ދިއްކުރުމުގެ ބަދަލުގައި އެއްބައިވަންތަކަން އިތުރުކޮށް އެއްބައެއްގެ ގޮތުގައި ޤައުމު މިކަމުން ސަލާމަތް ކުރުމަށް މަސައްކަތް ކުރުމުގެ ވަގުތު މިވަނީ ޖެހިފައެވެ. މިކަމާއި ގުޅިގެން ޔޯލަ ވާހަކަ ދެކުމުން ދުރުހެލި ވުމަކީ ވެސް މިވަގުތު މުހުންމު ކަމެކެވެ. މީގެ އިތުރުން މި ވަގުތަކީ އިންސާނާގެ ބަލިކަށިކަން ހިތަށް ގެނެސް ﷲ ގެ މަގަށް ރުޖޫޢަވާން ލިބޭ ފުރުޞަތެއް ކަމުގައި ދެކި ދީނީ ވާޖިބުތަކަށް ފަރުވާތެރިވާންވީ ވަގުތެވެ. ﷲ ހަޟްރަތުގައި މިބަލި މަޑުކަމުން ސަލާމަތް ކޮށްދެއްވުން އެދި ދުޢާކުރުން ގިނަކުރަން ވީ ވަގުތެވެ.

ލިޔުންތެރިޔާގެ ފުރަމަލަ

އިބްރާހިމް ޚަލީލް
އިބްރާހިމް ޚަލީލް
މުނިއަވަސްގެ ޑެޕިއުޓީ އެޑިޓަރ އިބްރާހިމް ޚަލީލްގެ ޚާއްޞަ ދާއިރާ ތަކަކީ ދީނީ، އިޖްތިމާޢީ އަދި އަދަބިއްޔާތެވެ. ކަރަންޓް އެފެއާޒަކީވެސް އޭނާ ފަރިތަ ދާއިރާއެކެވެ.

ގުޅުންހުރި ލިޔުން: