އެތަށް ދުވަހެއް ވާންދެން ދެކެމުން އައި ހުވަފެނުގައި ކުލަ ޖައްސަން ލިބުނު ދުވަހެވެ. ކޮންމެ ހާލެއްގައި އުޅެމުންވެސް، ކޮންމެ ތާކު އުޅެންޖެހުނަސް، ﷲގެ އިރާދަފުޅުން އެކަން ހާސިލް ކުރުމަކީ އަހަރެންގެ ފަނޑު ނުވާނެ އަޒުމެކެވެ.

ރަށުން ކިޔެވެން އޮތްވަރަށް ކިޔެވުމާއިއެކު އަހަރެން މާލޭގެ ޔުނިވާސިޓީ އަށް ފޯރމް ފުރާ އެކަމައިގެން ކުރިއަށް ދިޔައިމެވެ. މާކަ ގިނަދުވަހެއް ނުވެ ކޯހަށް ހޮވުނު ކަމުގެ އުފާވެރި ޚަބަރު ލިބުނެވެ. ނުލިބެންވީ ސަބަބެއްވެސް ނެތެވެ. ހަމަގައިމުވެސް އަހަންނަކީ ކިޔެވުމަށް ދަށް ކުއްޖެއް ނޫން ވިއްޔާއެވެ.

އެކަމަކު ދޯއެވެ. މާލެއަކީ އަހަރެން އެންމެ ފޫހިވާ އެއްތަނެވެ. ޒަމާނުއްސުރެން މީހުން ކިޔައިއުޅޭ ގޮތަށް އަހަންނަށް މާލެ ސިފަވެފައި އޮންނަނީ ތޮއްޖެހިފައި އޮންނަ ޖަނަވާރުންތަކެއް އުޅޭ ތަނެއްގޮތުގައެވެ. އެމީހުންގެ ހިތެއް އަދި ލޮލެއް، ކަންފަތެއްވެސް ނުހުރެއެވެ. އަމިއްލަ ސިފަ ރަނގަޅަށް ފެނިފައި ތިބޭބައެކެވެ.

އަހަރެންގެ މައިންބަފައިންނަކީވެސް ފުދޭވަރަކަށް ފޯރައިގެން އުޅޭ ބަޔަކަށް ވާތީ، އެމީހުން އެކޮޅުން ހޮވައިގެން އުޅެނީވެސް ހަމަ އެގިންތީގެ ބަޔެކެވެ. ފުރައިގެން މާލެ އައި އިރުވެސް މި ޚިޔާލުތައް، އަހަރެންގެ ސިނކުޑި ދިޔައީ ކަމުންނެވެ.

އަހަރެންގެ ނަސީބު ކަމެއް ނޫނީ މީހުންގެ ވިސްނުން ބަދަލު ކުރުމަށް ކަމެއް މެދުވެރިވާ އުސޫލުން އަހަރެންގެ ލޯ މައްޗަށް އައި ކަމެއްކަން ނޭގެއެވެ. މާލޭގައި އުޅޭތާ ހަމަސް ވެގެންދިޔައިރު އަހަރެންގެ، ކުރިން ހުރި ވިސްނުންވަނީ މުޅިން ބަދަލު ވެފައެވެ. ގޭ މީހުންގެ ހިތްހެޔޮ ކަމާއި ދިމާވަމުން ދިޔަމީހުންގެ އެކުވެރިކަމުން އަހަރެންގެ ހިތަށް ފިނިކަން ލިބެމުން ދިޔައެވެ.

އާދައިގެ މަތިން ހެނދުނު ޔުނިވަރސިޓީއަށް ދިޔުމަށްޓަކައި ނިކުތް ދުވަހެކެވެ. ބުރުގާދަށުން ހެޑްސެޓް ޖަހާލުމަށް ފަހު، ޝަލަބީގެ ރީތި މަދަހައެއް ޖަހައިލައިގެން އަހަރެން ކުރިއަށް ހިނގަމުން ދިޔައީ ދުނިޔެ މަތީ އެއްވެސް ކަމެއްނޭގޭ ހާލު، މަދަހައަށް ގެއްލި ހުސްވެ ހުރެއެވެ. ކުއްލިއަކަށް އަހަރެންގެ ފައިދަށުން ބިންގަނޑު ދެމިގަތް ކަހަލައެވެ. ފެންނަމުން ދިޔަ މަންޒަރު އަހަންނަށް ގަބޫލު ނުކުރެވުނީއެވެ. އަހަރެންގެ ފައިބުޑުގައި އޮތް އަތެއްގައި އަޅަމުންދިޔަ ވޭން އަހަންނަށް އިހުސާސް ކުރެވޭ ކަހަލައެވެ. ރަހުމެއް ނެތި އެ ފުރާނަ މަގުމައްޗަށް އެއްލައިލީ ހަމަގައިމުވެސް ހިތެއްނެތް މަޙްލޫޤެކެވެ.

އަހަރެން އެއަތުގައި ހިފާލީމެވެ. އެދެލޮލުގައި ފުރިފައި ހުރި ކަރުނަ އަހަންނަށް ހަމަ ރަނގަޅަށް ވެސް ފެނުނެވެ. އެދެލޮލުން އަހަރެންގެ ކައިރީގައި އެތައް ވާހަކަ ތަކެއް ކިޔައިދިން ކަހަލައެވެ. އެފުރާނަ އެނުބައި މީހުންގެ ކިބައިން ސަލާމަތް ކޮށްދިނުމަށް އެދި އަހަރެންގެ ކައިރީ ސަލާން ޖެހި ކަހަލައެވެ. އަހަރެންގެ އަތުތެރޭގައި އެލޯބި އަތްކޮޅު އޮއްވާ ކުއްލިއަކަށް އެގޭތެރެއިން މީހަކު އައިސް އެއަތުގައި ހިފައި ޖަހައިގަނެގެން ގެންދަން ފެށިއެވެ. އެއްވެސް ރަހުމެއްނެތި ބިންމަތީ ދަމާ ކޫތާފައެވެ. އަހަރެން އެކަމާ ހަޅޭއްލެވީމެވެ. އެހެން ނުހެދުމަށް އެދި އާދޭސް ކޮއްފައެވެ. ރޮމުންނެވެ. އެކަމަކު އަހަރެންގެ ލޮލުން ކަރުނަ ނޫން އެއްޗެއް ނުނިކުތެވެ. އަހަރެންގެ އަޑު ކޮބައި ބާވައެވެ. ތަންގަނޑު ކުދިކޮށްލާ އެނުބައި މީހުނަށް ބިރެއްގެ ގޮތުގައި އަހަރެންގެ އަޑު އަހަންނާ އެއްކޮށް ނުނިކުތީ ކީއްވެބާއެވެ.

ހުރި ފިޔަވަޅުން އެންމެ ތަންކޮޅެއްވެސް އަހަންނަށް ކުރިއަށް ދާކަށް ހިތްވަރެއް ނުލިބުނެވެ. އަތުގައި އޮތް ފައިލް މޫނު މަތީގައި އަޅަމުން އަހަރެން ގެއަށް ވަނުމަށްޓަކައި ދުއްވައިގަތީމެވެ. ކޮޓަރިއަށް ވަދެވުނު އިރު ހަމަ ރަނގަޅަށް ވެސް ގިސްލެވެ އެވެ. މުޅިދުވަސް އަހަންނަށް ވޭނަކަށް ވަމުން ދިޔައެވެ. އެންމެ ފަހުން އެނދުމަތީގައި އޮވެ ކުނިވެގެން ބެލްކަންޏަށް ނިކުމެލީ ހަމަޖެހިލުމަށެވެ. ހިތުގައި ހުރި އުދާސްތައް ޖެހެމުންދިޔަ މަޑު ރޯޅިތަކާއި ހަވާލު ކޮށްލުމަށްޓަކައެވެ.

އެތާހުންނަތާ އިރުކޮޅެއް ނުވެއެވެ. ހަމަ އެ ގިސްލުމުގެ އަޑެވެ. ޔަގީނެވެ. އަހަރެންގެ ނަޒަރު ވަގުތުން އެއަޑު އަންނަ ދިމާއަށް ހުއްޓުނެވެ. ކަރު މާކަނައެއްހެން އެތަށް އިރަކު ދިއްކުރި އިރުވެސް އަހަންނަށް އަހަރެން ބަލަން ބޭނުންވި މަންޒަރެއް ނުފެނުނެވެ. ހަމަ އެކަނި އިވެމުން ދިޔައީ ވޭނުގައި ރޮމުން ދިޔަ އަޑެވެ. އަހަރެންގެ ދެފައި އެތާ ހަރުލާ ހުންނަ ކަމާމެދު ޚުދު އަހަންނަށް ވެސް އަޖައިބު ހީވެއެވެ. އަނެއްކާވެސް ދުވެގޮސް އެދުމައްޗަށް ވެއްޓި ގަތީމެވެ. ކެއުމާއި، މީހުނާއި ވާހަކަ ދެއްކުން އަހަންނަށް ވޭނަކަށް ވާން ފެށިއެވެ.

ގެއިން ނުނިކުންނަތާނގަ، ބެލްކަންޏާ ހަމައަށް ވެސް ނުދާތާ ހަފްތާއެއް ވޭތުވެގެން ދިޔައީއެވެ. ގޭ މީހުންނަށް ކަންބޮޑުވެގެން އުޅެވޭ ނޫޅެވޭގޮތެއް ނޭގެއެވެ. އަހަރެންގެ ފިނޑިކަމުން ދިމާވާ ކަމެއްގައި އެހެންމީހުން ހާސްކޮށް ހަމަޖެހިގެން އުޅުނަ ނުދީ ހުރުމުގެ ހައްގެއް އަހަންނަށް ލިބިގެންވޭބާވައެވެ. ހިތްވަރު ކޮއްފައި ތެދުވެ ދިރިއުޅުމާ ކުރިމަތިލާން އަހަރެން ނިންމީ އަހަރެންގެ އެންމެ އަމަލަކުންވެސް އެތައް ބަޔަކަށް އޭގެ އަސަރު ކުރަމުން ދިޔަ މަންޒަރު އަހަންނަށް ފެންނަމުން ދާންފެށީމައެވެ. އެމީހުންނަށް އެހެން ހެދުމުން އަހަންނާ އެ ނުބައި ނުލަފާ ރަހުމެއް ނެތް މީހުންނާ އޮންނާނީ ވަކި ކޮން ތަފާތެއް ބާވައެވެ.

ތުރުތުރު އަޅައަޅާ ހުރި ހިންގުމެއްގައި އަހަރެން ގެއިން ނިކުމެ އެގޭ ދޮރުމަތީ މަޑު ކޮއްލީމެވެ. ގޭތެރެއިން އެއްވެސް މީހެއްގެ ހިލަމެއް ނުވެއެވެ. އެތެރެއަށް ވަނުމަށް އަހަރެންގެ އެ ބަލިކަށި ހިތް ނަސޭހަތްތެރި ވަމުން ދިޔައެވެ. ދެފިޔަވަޅެއް ކުރިއަށް އެޅީމެވެ. ފަހަތުން މީހަކު އައިސް އަހަރެންގެ ބުރަކަށީގައި ކޮއްޓާލިއެވެ. އަހަރެން ހުރީ ފަހަތަށް އެނބުރިލާން ވެސް ނުކެރިފައެވެ. އަނެއްކާވެސް އެމީހަކު އަހަރެންގެ ގައިގައި ކޮއްޓާލިއެވެ. އަހަރެން ދެލޯ މަރާލީމެވެ. އަދި އަނެއްފަރާތަށް އެނބުރިލީމެވެ. ކުރީދުވަހު އެ އަނިޔާތައް ކުރަމުންދިޔަ ރަހުމެއް ނެތް އިންސާނާ އެހުރީ އަހަރެން ކުރިމަތީ ހެވިލާފައެވެ. އޭނާ އަހަންނަށް މަލާމަތް ކުރާކަހަލައެވެ. އަހަރެންގެ ފިނޑިކަމަށްޓަކައި، މީހުންގެ ކުރިމަތީގައި އަހަރެން ފަޟީހަތް ކުރާކަހަލައެވެ.

އޭނާގެ މޫނުމަތިން އެފެންނަމުންދާ ހިނިތުންވުން އޭނައަކާ ނުގުޅެއެވެ. އޭނާއާއި ގުޅެނީ ހަމަ އެނުބައި ނުލަފާ ގޮތްގަނޑެވެ. އަހަންނަށް އަހަރެންގެ އަމިއްލަ ނަފުސު ކަންޓުރޯލް ކުރެވެނީ ހަމަ ކިރިޔާ އެވެ. ފައިވާން ކިބަ ނަގައި ތަޅައި ގެންފާނަމޭ ހިތަށް އެރިއެވެ. އޭނާ ލޮލުގެ އިޝާރާތުން ކުރިއަށް ދިޔުމަށް ތަން ދެއްކުމަށް އެދުނެވެ. އަހަރެން އެއްފަރާތަށް ޖެހިލީމެވެ. އަހަރެންގެ ކުރިމަތިން އޭނާ ހުރަސްކޮށް ކުރިއަށް ދިޔައެވެ. އަހަންނަށް ދަތްކުނޑި ވިކާލެވުނެވެ.

އޭނަ އެހާ ހަމަޖެހިލައިގެން އެހުރީ އަނެއްކާ އެފަކީރަށް ކިހިނެއް ހަދާފަ ބާވައެވެ. އަނިޔާކޮށް އެފަކީރު ދުނިޔެއިންވެސް ފޮހެލީބާވައެވެ. އެފަކީރުގެ ހިލަމެއް ނުވަނީ އެހެންވެބާވައެވެ. އެހެންވެއްޖެއްޔާ އަހަންނަށް ލައުނަތް ހުއްޓެވެ. އަހަރެން ގެއާ ދިމާއަށް ހިނގައި ގަތީމެވެ. ކުއްލިއަކަށް ވަރަށް ވޭނުން ފުރިގެންވާ އަޑަކުން އަހަންނަށް ގޮވާލި ކަހަލައެވެ. އިޚްތިޔާރަކާ ނުލައި އަހަންނަށް އެދިމާއަށް ދުއްވައިގަނެވުނެވެ. އެގޭ ދޮރުމަތީގައި އެނިކަމެތި ފަކީރު އަހަންނަށް ބަލަހައްޓައިގެން އޮތެވެ. ދުވެގޮސް އަހަންނަށް ބައްދައިލެވުނެވެ. އެނިކަމެތި ފުރާނައިގެ އަނގައިން ނިކުތީ ވޭނުގެ އާހް އެކެވެ.

އެފަކީރު އަހަރެންގެ ގެއަށް ގެނދިޔައިމެވެ. ގޭމީހުނަށް ވަގަށެވެ. އެފަކީރުގެ ގައިގައި އަޅަމުން ދިޔަ ވޭންތައް އަހަރެންގެ ހިތުގައި އަޅަމުން ދިޔައެވެ. ރަނގަޅަށް ފެންވަރުވާ ކާން ދިނީމެވެ. ހީވީ ދުވަހަކުވެސް ކާންނުދީ ހުރި ހެނެވެ. ކެއުމަށް ފަހު އެއޮތް ގޮތަށް އޮވެ ނިދައިފިއެވެ. އިރު އިރުކޮޅާ އަހަރެން ގޮސް ފިރުމާލަމެވެ. އޮތީ ގަދަ ނިދީގައި ކަން ޔަގީންކުރަމެވެ. އެފަކީރުގެ ހާލު ދެރަކަމުންނެވެ. އަމިއްލަ ނަފުސާއި ކުރިމަތިލާނެ ހިތްވަރު އަހަންނަށް ލިބުނެވެ. އެނިކަމެތި ފަކީރަށް އަޅައިލުމުގެ ފުރުސަތު އަހަންނަށް ލިބުނެވެ.

ޔުނިވަރސިޓީގެ ބަންދު ދުވަސް ކޮޅެއްކަމުން ހުރިހައި ވަގުތެއް އެފަކީރަށް ޚިދުމަތް ކުރުމަށްޓަކައި ހުސްކޮއްލުމުގެ ފުރުސަތުވެސް ލިބުނެވެ. އިސާހިތަކު ވަރު ޖެހެމުން ގޮސް ތެދުވެ އުޅެލެވޭ ވަރު ވިއެވެ. އަހަރެން ރީތި ނަމަކުން އެފަކީރާ މުޚާތަބު ކުރަންވެސް ފެށީމެވެ. “ރީމް” ރީތި ނަމެއް ދޯއެވެ. ގޭ މީހުނަށް ވެސް އެކަން އެނގުނެވެ. ނަމަވެސް އެއްވެސް މީހަކު ނުރުހުމުގެ ބަހެއް ނުބުނެއެވެ. އަހަރެންގެ ހިތްހެޔޮކަމާ އޯގާވެރިކަމަށް އެންމެން ތައުރީފުގެ ބަސްތައް ރައްދު ކުރަމުން ދިޔައެވެ. ގޭތެރޭގައި އަހަރުމެން ދުވެ އުޅޭ މަޖާ ގޮތްގަނޑު އެންމެނަށްވެސް ވަރަށް ކަމުދެއެވެ. އަހަރެންގެ އުފަލުގެ ކޮޅެއް ނޯވެއެވެ.

އެއްދުވަހެއްގެ ހަވީރެއްގެ ވަގުތެވެ. ގޭ އެންމެންވެސް ހުޅުމާލެއަށް ދިޔުމަށްޓަކައި ތައްޔާރު ވަނީއެވެ. އަހަރުމެންވެސް ތިބީ ތައްޔާރުވެގެންނެވެ. ގޭގެ ދޮރު ކުއްޖަކު ހުޅުވާލި ވަގުތެކެވެ. ކުއްލިއަކަށް ބޭރަށް ދުވެފައި ރީމް ނިކުތެވެ. ހަމަ އެއާއެކު އޭނާގެ ވޭނުގެ އަޑު އިވިގެންދިޔައެވެ. އަހަންނަށް ހުރެވުނު ތަނެއްވެސް ނޭގުނެވެ. ދުވެފައި ބޭރަށް ނިކުތްއިރު ލޮލަށް ފެނުނު މަންޒަރުން އަހަރެންގެ ހިތް ނުހުއްޓުނީ ހަމަ ކިރިޔާއެވެ. ކުރިއަށް އަހަންނަށް ފައި ކިރިޔާ އެޅެނީއެވެ. އަހަރެންގެ ރީމްގެ ހަށިގަނޑު މަތީ އެއޮތް ކާރުގެ ފުރޮޅު މިދުނިޔެއަށްް އީޖާދު ނުވިނަމަ ކިހާ ރަނގަޅު ހެއްޔެވެ. އަހަންނަށް ރޮއެގަނެވުނެވެ. އަޑުން އަޑުނަގާ ރޯން ފެއްޓުނެވެ.

ކާރު ދޮރު ހުޅުވާލާފަ އެ ނިކުތްމީހާ ފެނުމުން އަހަރެންގެ ހަށިގަނޑުގައި ކޮޅަށް ނުޖެހޭ ހަމަ އެންމެ އިސްތައްޓެއްވެސް ނުހުންނާނެކަން ޔަގީނެވެ. އާއެނކެވެ. އެއީ ހަމަ އެމީހާއެވެ. އަހަރެންގެ ރީމްއަށް އެއްވެސް ރަހުމެއްނެތި އެތަށް ދުވަހެއް ވާންދެން އަނިޔާ ކުރަމުންދިޔަ އަނިޔާވެރިޔާއެވެ. ކާރުން ފައިބާ ތިރިއަށް ބަލައިލުމަށް ފަހު އޭނާ ކަނޑާލީ ޗޮކެކެވެ. ‘އެއްކަލަ ބުޅާ ގަނޑޭ’ ކިޔައި އަނެއްކާވެސް ކާރަށް އަރާ ރީމްގެ ހަށިގަނޑު ޗިސްޗިސް ކޮއްލުމަށްފަހު އޮބާ ދިޔައީއެވެ.

އާނއެކެވެ. އެއީ ބުޅަލެކެވެ. ބުޅަލެއް ވިއްޔާ ތަދު ނުވާނީ ހެއްޔެވެ. ރިހުމެއްވެސް ނާޅާނީ ހެއްޔެވެ. ދުނިޔޭގަ ހުރުމުގެ ހައްގެއްވެސް ނޯންނަނީ ހެއްޔެވެ. އަހަރުމެން އިންސާނުންނަކީ ހަމަ އެހާ ރަހުމް ކުޑަބަޔަކީ ހެއްޔެވެ. އަހަރުމެން އިންސާނުން އެކަލާނގެ މިހާ ފުރިހަމަކޮށް ހައްދަވާފައި ވަނީ މި ގޮތަށް ކަންތައް ކުރުމަށްޓަކައި ހެއްޔެވެ.

ރީމް މި ރަހުމް ކުޑަ ދުނިޔެ ދޫކޮށް ދިޔަތާ އެތަށް އަހަރު ތަކެއްވޭތުވެގެން ހިނގައްޖެއެވެ. އެކަމަކު މިއަދުވެސް އެފަކީރުގެ އަޑު އަހަރެންގެ ކަންފަތުގައި ގުގުމަމުން ދެއެވެ. އަހަރެން ގެ ހިތުގައި ރީމް އަށްޓަކައި އިންތިހާއަށް ރަހުމް ވާކަން ޔަގީނެވެ.

ނިމުނީ

ލިޔުންތެރިޔާގެ ފުރަމަލަ

ޚަދީޖަތު ސަނާ
ޚަދީޖަތު ސަނާ
މުނިއަވަސްގެ ޑެޕިއުޓީ އެޑިޓަރ ޚަދީޖަތު ސަނާ އަކީ ލޯބީގެ، އަސަރުގަދަ އަދި ހިތާމަވެރި ވާހަކަ ލިޔުމާއި ކިޔުމުގައި ފާހަގަކޮށްލެވޭ ލިޔުންތެރިއެކެވެ. އިޖްތިމާޢީ މައުޟޫތަކަށް ސައްނު ލިޔާ ކުރުވާހަކަތަކުން ބޭނުންވާ މެސެޖް ފޯރުކޮށްދެނީ ވަރަށް އަސަރާއި އެކުގައިކަން ފާހަގަކޮށްލެވެއެވެ.
މި ލިޔުންތެރިޔާގެ ބައެއް އެހެން ލިޔުންތައް

ގުޅުންހުރި ލިޔުން: